¿Kʼusi chal li slivroal Apokalipsise?
Li kʼusi chal Vivliae
Li Apokalipsise jaʼ jech sbi jun livro ta Vivlia. Li sbie, jaʼ te lokʼem tal li ta griego kʼope, apokálypsis, ti skʼan xal «Li kʼusi chichʼ taele» o «Li kʼusi chichʼ alele». Jaʼ yuʼun Revelación chichʼ albel sbi xtok. Toj lek ti jech chichʼ albel sbie, yuʼun li livro taje, chalbe skʼoplal kʼusitik ti ta epal siglo mu toʼox xichʼ nabel skʼoplale, jech xtok, chal li kʼusitik chkʼot ta pasel ta tsʼakale. Li yantik albil kʼopetik chal tee jutuk xa skʼan xkʼot ta pasel.
Ti kʼu yelan pasbil li slivroal apokalipsise
Slikeb loʼil.(Apokalipsis 1:1-9).
Aʼyejetik chalbe Jesus li vukub tsobobbailetike.(Apokalipsis 1:10–3:22.
Chakʼ ta ilel Dios li xchotleb ta Ajvalilal ta vinajele.(Apokalipsis 4:1-11).
Oy kʼusitik laj yakʼ ta ilel:
Li vukub seyoetike,(Apokalipsis 5:1 8:6).
Li vukub okʼese; li slajeb oxibe te tsakal skʼoplal li vokoliletik o li kʼusi kʼux ta aʼiele.(Apokalipsis 8:7–14:20).
Li vukub setsʼe, li ta jujune yichʼoj tal jun vokolil o kastigo chakʼ Dios ti chichʼ malbel tal li chopol balumile (Apokalipsis 15:1–16:21).
Chakʼ ta ilel ti kʼu yelan tslajes li yajkontratak Diose.(Apokalipsis 17:1–20:10).
Chakʼ ta ilel li bendisionetik chakʼ Dios ti yaloj xa onoʼox sventa li vinajel xchiʼuk balumile.(Apokalipsis 20:11–22:5).
Slajeb.(Apokalipsis 22:6-21).
Voʼtos kʼusitik tsots skʼoplal sventa xkaʼibetik smelolal li slivroal Apokalipsise
Lek li kʼusi chale. Li buchʼutik chtunik ta stojolal Diose mu kʼusi ta xiʼik-o. Akʼo mi oy buchʼutik tskoʼoltasik li apocalipsis xchiʼuk li mukʼta lajelale, xi chal sliklej li livro liʼe, ti buchʼu chchane, skʼan xaʼibe smelolal xchiʼuk jechuk xakʼ ta xkuxlejal sventa xmuyubaje (Apokalipsis 1:3; 22:7).
Oy epal loʼiletik xchiʼuk yan kʼusitik ti mu ta meleluk chkʼot ta pasele, yuʼun jaʼ ta «senyailtak» o slokʼoltak (Apokalipsis 1:1).
Li buchʼutik o li kʼusitik chichʼ albel skʼoplale xchiʼuk li kʼusitik mas tsots skʼoplal li ta livro liʼe, te chvinaj xtok ta yan parte li ta Vivliae.
Li Jeovae: «Ja’ Dios ta vinajel» xchiʼuk jaʼ la Spas skotol li kʼusitike. (Deuteronomio 4:39; Salmo 103:19; Apokalipsis 4:11; 15:3).
Jesukristo: «Li Xchʼiom Chij Dios» (Juan 1:29; Apokalipsis 5:6; 14:1).
Satanas: Jaʼ li Diabloe, li bankilal yajkontra Diose (Génesis 3:14, 15; Juan 8:44; Apokalipsis 12:9).
Mukʼta Babilonia: Yajkontra Jeova xchiʼuk li steklumale ti jaʼ te chlik talel li jutkʼopetik ta sventa li relijionetike, jech kʼuchaʼal li voʼneal jteklum ta Babiloniae o ti Babel sbi xtoke (Génesis 11:2-9; Isaias 13:1, 11; Apokalipsis 17:4-6; 18:4, 20).
«Nab»: Jaʼ li buchʼutik nom oyik ta stojolal li Diose (Isaias 57:20; Apokalipsis 13:1; 21:1).
Li kʼusitik pasbil-o li chʼulna pasbil ta nukul ti jaʼ te chichʼ ichʼel ta mukʼ li Diose: Li xkaxail smantal Diose, li mukʼta nab ti xkoʼolaj kʼuchaʼal nene (sventa tspok-o skʼobik), li kantile, li pome, li skajleb matanale (Éxodo 25:10, 17, 18; 40:24-32; Apokalipsis 4:5, 6; 5:8; 8:3; 11:19).
Jtiʼaval chonbolometik: ajvaliletik yuʼun krixchanoetik (Daniel 7:1-8, 17-26; Apokalipsis 13:2, 11; 17:3).
Numeroetik ti oy yan smelolale (Apokalipsis 1:20; 8:13; 13:18; 21:16).
Li kʼusitik chichʼ akʼel ta ilele jaʼ te chvinaj li ta «skʼakʼalil Kajvaltik», ti lik ta 1914 (Apokalipsis 1:10). Li ta jabil taje jaʼo laj yichʼ vaʼanel ta ajvalil li Jesuse. Jech oxal chaʼa, chichʼ to malael ti chkʼot ta pasel ta jkʼakʼaliltik li albil kʼopetik chal ta slivroal Apokalipsise.
Sventa xkaʼibetik smelolal li slivroal Apokalipsise xchiʼuk li yan livroetik ta Vivliae, toj tsots skʼoplal ti jkʼanbetik jpʼijiltik li Diose xchiʼuk ti jsaʼtik koltael ta stojolal li buchʼutik xaʼibeik smelolale (Echos 8:26-39; Santiago 1:5).