¿Kʼusi skʼan jpastik sventa xkaʼibetik smelolal li Vivliae?

Li kʼusi chal Vivliae

Li ta Vivliae jaʼ chalbutik stuk kʼusi skʼan jpastik sventa xkaʼibeik smelolale. Li kʼusi chal ta Skʼop Diose xuʼ xkaʼibetik smelolal jkotoltik, yuʼun «mu toj tsotsuk» (Deuteronomio 30:11).

Li kʼusi skʼan jpastike

1. Skʼan bikʼituk xkakʼ jbatik. Toj tsots skʼoplal ti skʼan bikʼituk xkakʼ jbatike xchiʼuk ti jtsaktik ta venta ti jaʼ Skʼop Dios li Vivliae, yuʼun kontra chil li jtoybaetike (1 Tesalonisenses 2:13; Santiago 4:6). Pe maʼuk skʼan xal ti ta jech noʼox ta jvovil chʼuntik xtoke, yuʼun li Diose tskʼan ti jtunes lek li jnopbentike (Romanos 12:1, 2).

2. Jkʼanbe jpʼijiltik Dios ta orasion. Li ta Proverbios 3:5 xi chale: «Mu xapat-o avoʼonton ti oy kʼusi xavaʼibe smelolale». Toj tsots skʼoplal ti jkʼanilanbe-o jpʼijiltik Dios sventa xkaʼibetik smelolal li Vivliae (Santiago 1:5).

3. Mu jkechantik skʼelel. Ta jtabetik sbalil kʼalal nopolik noʼox ta jkʼeltik li Vivliae. Jaʼ muʼyuk bu ta jtabetik sbalil mi bateltik to ta jkʼeltike (Josue 1:8).

4. Ta jujun tema jkʼeltik. Jtos ti kʼusi xuʼ jpastik sventa jchantik batel li Vivliae, jaʼ ti jkʼeltik batel ta jujun temae. Jaʼ baʼyel jkʼeltik batel li kʼusitik kʼun ta chanele, mi laje jaʼ xa jkʼeltik batel li kʼusi chijyijub-o batel yuʼun ta mantale (Ebreos 6:1, 2). Kʼalal ta jkoʼoltajestik li loʼiletik ta Vivliae, te chkakʼtik venta kʼuxi chchapbe sba smelolal stuk li Vivliae. Li kʼusitik vokolik ta aʼibel smelolale, lek jamal chkom (2 Pedro 3:16).

5. Saʼo koltael. Li Vivliae tstij koʼontontik ti jkʼanbetik koltael li buchʼutik xaʼibeik lek smelolale (Echos 8:30, 31). Li stestigotak Jeovae chakʼik matanal chanubtasel ta Vivlia. Jech kʼuchaʼal la spas li baʼyel yajtsʼaklomtak Kristoe, li stestigotak Jeova eke tskʼelik jayibuk teksto sventa skoltaik li krixchanoetik ta yaʼibel smelolal li kʼusi chchanubtasvan ta melel li Vivliae (Echos 17:2, 3).

Li kʼusi mu persauke

1. Mu persauk ti toj pʼijote o ti ep chanunajemote. Li 12 yajtakboltak Jesuse laj yaʼibeik lek smelolal li tsʼibetike xchiʼuk la xchanubtasik yantik akʼo mi laj yal yantik «ti jaʼik noʼox viniketik ti muʼyuk chanunajemike xchiʼuk jaʼik noʼox kʼuchaʼal yan krixchanoetike» (Echos 4:13).

2. Mu persauk ti oy atakʼine. Sventa xkaʼibetik smelolal li kʼusi chakʼ ta chanel li Vivliae, mu persauk jtojtik jsetʼuk, yuʼun xi laj yalbe yajtakboltak li Jesuse: «Ta moton la-akʼbatik, jaʼ jech ta moton xavakʼik ek» (Mateo 10:8).