LI KʼUSITIK TSJAKʼ KEREM TSEBETIKE
¿Kʼuxi xuʼ skoltaun li Vivliae? Sbavokʼal: Saʼo kʼusitik kʼupil sba ta Vivlia
«Kakʼoj persa xchanel li Jvivliae, pe toj echʼ noʼox ep ta chanel chkaʼi» (Briana, 15 sjabilal).
¿Mi jech chavaʼi aba ek? Mi jeche, xuʼ skoltaot li xchanobil liʼe.
¿Kʼu yuʼun toj tsots skʼoplal ti jchantik li Vivliae?
¿Mi chijchʼajub van yuʼun xchanel li Vivliae? Xuʼ van. Yuʼun xuʼ van chanop ti jaʼ jun livro ti mas ta jmil pajina yichʼoje, ti bikʼit stsʼibaltake xchiʼuk ti muʼyuk yichʼoj lokʼoletike. Mu xkoʼolaj kʼuchaʼal li television xchiʼuk videoetike, ¿mi mu jechuk?
Pe nopo avaʼi liʼe, ti xa tauk jun kaxa ti mol o pokoʼ xa tajek xchiʼuk ti noj ta kʼusitik kʼupil sbae, ¿mi mu jechuk ti chakʼan xa chajam ta anile?
Li Vivliae xkoʼolaj kʼuchaʼal li mol kaxa ti noj ta kʼusitik kʼupilik sbae, yuʼun te chata lekil pʼijil tojobtaseletik ti tskoltaot sventa:
Lekuk kʼusi xkʼot ta nopel avuʼun.
Lekuk xavil aba xchiʼuk atot ameʼ.
Xata alekil amigotak.
Xanaʼ kʼusi chapas mi toj lubem chavaʼi abae.
¿Kʼuxi xa noʼox ti xuʼ jtabetik sbalil li jun livro ti toj voʼne xa slokʼele? Yuʼun jaʼ «laj yakʼ ta naʼel Dios skotol li Tsʼibetike» (2 Timoteo 3:16). Taje jaʼ skʼan xal ti te likem talel ta stojolal li buchʼu toj tsots skʼoplal ta sjunul vinajel balumil li tojobtaseletik ta Vivliae.
Li Vivliae jaʼ xkoʼolaj kʼuchaʼal li mol kaxa ti noj ta kʼusitik kʼupilik sbae.
Ti kʼu yelan xuʼ jchantik li Vivliae
Baʼyel, jaʼ ti ta slikeb xatsak xchanel jaʼ to mi tsuts avuʼune. Taje jaʼ tskoltaot sventa xanaʼ kʼusi chal sliklej li Vivliae, ep ta tos kʼusi xuʼ xapas. Pe jkʼeltik batel chibuk noʼox:
Xuʼ xachan li 66 bikʼtal livroetik ta Vivliae. Likeso ta Jenesis kʼalal ta Apokalipsis.
Xuʼ xachan kʼutik yelan kʼot ta pasel li jujun loʼil ta Vivliae.
Tojobtasel: Li Apendise A7 li ta Xchʼul Kʼop Dios sventa Achʼ Balumile xcholet chalbe skʼoplal li kʼusitik la spas Jesus kʼalal ay ta balumile.
Xchibal, xuʼ xasaʼ junuk loʼil ta Vivlia ti jaʼ chalbe skʼoplal li kʼusi yakal chanuptane. Jech kʼuchaʼal liʼe:
¿Mi chakʼan junuk avamigo ti xuʼ xapat avoʼonton ta stojolale? Mi jeche, chanbo sloʼilal li David xchiʼuk Jonatane (1 Samuel, kapitulo 18 k’alal ta 20). Vaʼun, nopbo skʼoplal li stalelaltak David ti jaʼ tijbat-o yoʼonton Jonatan sventa xamigoin sbaike.
¿Mi chakʼan oyuk avipal sventa xkuch avuʼun li prevaetike? Xuʼ xakʼelbe li sloʼilal xkuxlejal Jose xchiʼuk ti kʼuxi kuch yuʼun li preva la snuptane (Jenesis, kapitulo 39). Te chavakʼ venta ti kʼuxi koltae.
¿Mi chakʼan chanaʼ kʼuxi xuʼ skoltaot li orasione? Kʼelo li kʼusi kʼot ta stojolal li Neemiase (Neemias, kapitulo 2). Nopbo skʼoplal kʼuxi takʼbat yuʼun Dios li s-orasion Neemiase.
Tojobtasel: Saʼo bu tsʼijil kʼalal chachan Avivlia sventa xavaʼibe lek smelolale.
Yoxibal, saʼo junuk loʼil ta Vivlia o junuk salmo xchiʼuk nopbo skʼoplal kʼuxi xuʼ skoltaot. Vaʼun, xiuk xajakʼbe abae:
¿Kʼu yuʼun laj yakʼ ta tsʼibael li Jeova liʼe?
¿Kʼusi chchanubtasun ta stojolal Jeova xchiʼuk ti kʼu yelan stalelal chakʼ ta ilel kʼalal oy kʼusitik tspase?
¿Kʼuxi xuʼ skoltaun ta jkuxlejal li kʼusi la jchane?
Tojobtasel: Oyuk kʼusi xavakʼ ta avoʼonton stael. Xuʼ xatsʼiba kʼusi ora chalikes xchanel li Avivliae jaʼ tuneso li programa «Kʼu yelan xuʼ xichʼ kʼelel li Vivliae» ti te chata li ta jpajinakutik ta Internete.