¿Kʼuxi xuʼ skoltaun li Vivliae?​ Xchaʼvokʼal: Kʼupino xchanel li Vivliae

Xi chal jun kerem ti Will sbie: «Xuʼ van chakʼ chʼaj xchanel li Vivliae, pe jaʼ ta skoj ti mu xanaʼ kʼuxi chavut sventa xakʼupin xchanele».

¿Mi chakʼan chanaʼ kʼuxi xuʼ xakʼupin xchanel li Vivliae? Li xchanobil liʼe ta skoltaot.

• Kʼalal chachan li loʼiletik ta Vivliae, teukot xa chavil.

• Sabo skʼoplal.

• Li kʼusi tsnopik yan kerem tsebetike.

Kʼalal chachan li loʼiletik ta Vivliae, teukot xa chavil.

Xiuk xapas kʼalal chachan Vivliae:

1. Saʼo junuk loʼil ta Vivlia ti bu chakʼan chachane. Xuʼ xachan ti kʼuxi kʼotanuk ta pasel li kʼusi chal Vivliae, junuk evanjelio o li dramaetik lokʼem ta Vivlia ti oy ta jw.org.

2. Chano li loʼil ta Vivliae. Xuʼ xachan atuk o xchiʼuk avutsʼ avalal o xchiʼuk avamigotak, xuʼ jun buchʼu xchan batel li loʼil ta Vivliae xchiʼuk oyuk buchʼu yan xchan li buchʼutik chloʼilajik tee.

3. Paso reva avil li junantik tojobtasel liʼe:

   • Pasbo sdivujoal li kʼusi chachane o ti kʼuxi kʼotanuk ta pasel li kʼusi yakal chachane xchiʼuk oyuk kʼusi xatsʼiba ta xokontak.

   • Kʼalal chachanbe sloʼilal junuk yajtunel Dios ti tukʼ laj yakʼ sbae, tsʼibao ta vun li stalelaltake, li kʼusitik la spase xchiʼuk li bendisionetik la stae.

   • Pasbeik skʼelobil kʼuxi kʼotanuk ta pasel li loʼiletik ta Vivliae, vaʼun jaʼuk xa xajakʼbeik sloʼil yilel.

   • Nopbo skʼoplal li loʼil yakal chachane xchiʼuk nopo kʼusi van kʼot ta pasel ta stojolal ti lekuk kʼusi la snope, jech kʼuchaʼal liʼe, nopo ta stojolal li Pedro kʼalal laj yal ti mu xojtikin li Jesuse (Markos 14:66-72). ¿Kʼusi van la spas ti jechuke?

   • Mi la tabe smuil li kʼusi chachane, tsʼibao li kʼusi yakal chchan ti voʼkotuk xa yaʼele (Romanos 15:4).

     

Sabo skʼoplal

Kʼalal bikʼitik chachan li loʼiletik ta Vivliae, xuʼ xata li kʼusitik kʼupilik sba ti xuʼ xavakʼ ta akuxlejale. Bateltike, jpʼel o chaʼpʼel noʼox yichʼoj talel ti bu tsots skʼoplale.

Jech kʼuchaʼal liʼe, koʼoltaso li ta Mateo 28:7 xchiʼuk li ta Markos 16:7.

• ¿Kʼu yuʼun laj yal Markos ti jutuk xa skʼan xakʼ sba ta ilel Jesus ta stojolal yajchankʼoptak xchiʼuk ta stojolal li Pedroe?

• Ta jkoltaot jutuk: Li Markose muʼyuk bu te oy; xakʼel noʼox yilele, jaʼ albat yuʼun li Pedroe.

• Kʼusitik kʼupil sba ta Vivlia: ¿Kʼu yuʼun jun yoʼonton laj yaʼi sba Pedro kʼalal laj yaʼi ti tskʼan chkʼelat yan velta yuʼun li Jesuse? (Markos 14:66-​72). ¿Kʼuxi laj yakʼ ta ilel Jesus ti jaʼ slekil amigo li Pedroe? ¿Kʼuxi xuʼ xachanbe stalelal Jesus mi chakʼan chakʼot ta lekil amigoile?

Mas me chakʼupin xchanel Vivlia mi te xa oyot chavaʼi aba xchiʼuk mi chasabe skʼoplal li loʼiletik chachane.