Filipenses 4:13 | «Scotol xuʼ cuʼun ta sventa Cristo»

«Oy jtsatsal sventa jpas skotol ta skoj li buchʼu chakʼbun juʼele» (Filipenses 4:13, Xchʼul Kʼop Dios sventa Achʼ Balumil).

«Scotol xuʼ cuʼun ta sventa Cristo, yuʼun jaʼ chiyacʼbun jtsatsal» (Filipenses 4:13, Xchʼul Cʼop Jtotic Dios, ta skʼop Chenalhó).

Li kʼusi skʼan xal Filipenses 4:13

Li jtakbol Pabloe jaʼ jech la stsʼibabe batel yajtsʼaklom Kristo sventa xakʼbe snaʼ ti ch˗akʼbat sjuʼelik yoʼ spas yuʼunik li kʼusi tskʼan yoʼonton Diose.

Junantik Vivliae chalik ti Pabloe jaʼ akʼbat sjuʼel yuʼun li Kristoe. Pe li voʼneal tsʼibetik ta griegoe muʼyuk te yichʼoj talel li jpʼel kʼop Kristo xi li ta versikulo liʼe. Jech oxal, epal Vivliaetike xi xa tsjelubtasike: «Li buchʼu chakʼbun juʼele» (Xchʼul Kʼop Dios sventa Achʼ Balumil), «li buchʼu chakʼbun kipale» (La Biblia de Nuestro Pueblo) o «li Buchʼu ta stsatsubtasune» (Nueva Biblia de las Américas; nota o tsʼib ta yok vun). Vaʼun chaʼa, ¿buchʼu yakal chalbe skʼoplal li Pabloe?

Li ta yan versikuloetike jamal chakʼ ta ilel ti Pabloe jaʼ yakal chalbe skʼoplal li Diose (Filipenses 4:6, 7, 10). Li mas baʼyel versikuloetike, li Pabloe la stsʼibabe batel li ermanoetik ta Filipose, xi laj yal li ta skartae: «Yuʼun jaʼ chakʼboxuk avipalik li Diose sventa [...] xuʼuk avuʼunik spasel li kʼusitik lek chile» (Filipenses 2:13). Li ta 2 Korintios 4:7, li Pabloe laj yal ti jaʼ ta stojolal Dios ti bu tsta˗o sjuʼel sventa spas yuʼun li yabtele (koʼoltaso ta 2 Timoteo 1:8). Jech oxal, kʼalal xi laj yal: «Li buchʼu chakʼbun juʼele», jaʼ yakal chalbe skʼoplal li Diose.

Kʼalal laj yal Pablo «oy jtsatsal sventa jpas skotol» xie, ¿kʼusi la skʼan laj yal kʼalal «skotol» xie? Yaʼeluke jaʼ yakal chalbe skʼoplal li kʼusitik jeltos la snuptan kʼalal jaʼo yakal ta spas li kʼusi tskʼan yoʼonton Diose. Mi ep kʼusitik x˗ayan yuʼun o mi muʼyuk mas kʼusi x-ayan yuʼune, li Pabloe spatoj yoʼonton ti ta xkʼelat ta xchabiat yuʼun li Diose. Jech oxal, li Pabloe la xchan ti junuk noʼox yoʼonton kʼusiuk noʼox ta snuptane (2 Korintios 11:23-27; Filipenses 4:11).

Li kʼusi laj yal li jtakbol Pabloe jaʼ te tsta spatobil yoʼonton li yajtsʼaklom Kristo avi eke. Yuʼun li Diose ta xakʼbe stsatsal o sjuʼel sventa xkuch yuʼun li prevaetike xchiʼuk sventa spasik li kʼusi tskʼan yoʼontone. Li Diose xuʼ stunes xchʼul espiritu, yajtuneltak xchiʼuk Skʼop ti jaʼ li Vivliae sventa skolta o xakʼbe stsatsal li yantike (Lukas 11:13; Echos 14:21, 22; Ebreos 4:12).

Stsʼak loʼil ta Filipenses 4:13

Li kʼusi chal li tekstoe jaʼ xa stsutseb li skarta la stakbe batel ermanoetik ta Filipos li jtakbol Pabloe, xuʼ van jaʼ xa ox ta sjabilal 60 o 61 kʼalal talem xa ox li Kristoe. Jaʼo la stsʼiba kʼalal tikʼil ta chukel ta sba velta ta Roma li Pabloe, te van kʼuk sjalil muʼyuk la sta koltael yuʼun yan yajtsʼaklomtak Kristo sventa oyuk noʼox yuʼun li kʼusitik chtun yuʼune, pe ta tsʼakale li yan yajtsʼaklomtak Kristoe laj xa skoltaik sventa oyuk noʼox li kʼusitik chtun yuʼune (Filipenses 4:10, 14).

Li Pabloe la skʼupil kʼopta li slekil yoʼonton ermanoetik ta Filipose xchiʼuk laj yalbe batel ti oy xa yuʼun skotol li kʼusitik chtun yuʼune (Filipenses 4:18). Jech xtok, laj yalbe skʼoplal li kʼusi ta jnuptantik li yajtsʼaklomutik Kristoe, yuʼun mu ventauk mi jkʼulejutik o mi abol noʼox jbatik, xuʼ jun noʼox koʼontontik xijkuxiutik mi ta jpat koʼontontik stojolal Diose (Filipenses 4:12).