Filipenses 4:8 | «Oyuk-o me ta avoʼontonik skotol li kʼusitik melele»

«Ta slajeb xa une, kermanotak, oyuk-o me ta avoʼontonik skotol li kʼusitik melele, skotol li kʼusitik tsots skʼoplale, skotol li kʼusitik tukʼe, skotol li kʼusitik sakik skʼoplale, skotol li kʼusitik tstij oʼontonal sventa xijkʼanvane, skotol li kʼusitik lek skʼoplale, skotol li lekil talelale xchiʼuk skotol li kʼusitik sta-o kʼupil kʼoptaele» (Filipenses 4:8, Xchʼul Kʼop Dios sventa Achʼ Balumil).

«Quermanotac, slajeb xa chacalboxuc tal: Jaʼ me xanopic scotol li cʼusi melele, li cʼusi oy stue, li cʼusitic tuqʼue, li cʼusitic leque, li cʼusitic lec ilbile, xchiʼuc scotol li cʼusitic lec scʼoplale. Scotol li cusitic leque, ti stacʼ pasele, jaʼ noʼox me xanopic o» (Filipenses 4:8, Xchʼul Cʼop Jtotic Dios, ta skʼop Chenalhó).

Li kʼusi skʼan xal Filipenses 4:8

Li Diose tsots skʼoplal chil li kʼusi ta jnoptike, yuʼun baʼyel ta jnoptik kʼalal oy kʼusi ta jpastike (Salmo 19:14; Markos 7:20-23). Jaʼ yuʼun, li buchʼutik tskʼan lek ch˗ilat yuʼun li Diose jaʼ tsnopik li kʼusitik lek chile xchiʼuk muʼyuk tsnopik li kʼusitik chopol chile.

Li ta versikulo liʼe, chalbe yajtsʼaklomtak Kristo ti jechuk-o oy ta yoʼontonik o jechuk˗o snopilanik li kʼusitik leke xchiʼuk te chalbe skʼoplal vaxaktos ti kʼusitik xuʼ snopbeik skʼoplal jujun kʼakʼale.

• «Li kʼusitik melele». Liʼe jaʼ chalbe skʼoplal li kʼusitik leke xchiʼuk ti xuʼ jpat koʼontontike, jech kʼuchaʼal li kʼusitik chal ta Skʼop Diose, li ta Vivliae (1 Timoteo 6:20).

• «Li kʼusitik tsots skʼoplale». Liʼe jaʼ chalbe skʼoplal li kʼusitik tsots skʼoplal ta melele, maʼuk li kʼusitik muʼyuke o ti mu masuke. Kʼalal ta jnopbetik skʼoplale mas to ch˗ayan ta koʼontontik spasel li kʼusi leke (Tito 2:6-8).

• «Li kʼusitik tukʼe». Liʼe jaʼ chalbe skʼoplal li kʼusitik ta jnop ta jpastik ti lek chil li Diose, ti maʼuk noʼox ta jtsaktik ta venta li spʼijil jun krixchanoe yuʼun oy noʼox spajeb (Proverbios 3:5, 6; 14:12).

• «Li kʼusitik sakik skʼoplale». Liʼe jaʼ chalbe skʼoplal ti skʼan sakuk li kʼusi ta jkʼan ta jpastike o li kʼusi ta jnoptike xchiʼuk ti sakuk-o li jtalelaltike, ti maʼuk noʼox te smakojbe skʼoplal ta sventa li chiʼinejbail ta vayele (2 Korintios 11:3).

• «Li kʼusitik tstij oʼontonal sventa xijkʼanvane». Liʼe jaʼ chalbe skʼoplal li kʼusitik ta jpastike ti tstij oʼontonal sventa jkʼan jbatik, ti muʼyukuk pʼajbaile o ti mu jtsal jbatike (1 Pedro 4:8).

• «Li kʼusitik lek skʼoplale». Liʼe jaʼ skʼoplal li kʼusitik ta jpastik yoʼ lekuk jkʼoplaltik ta stojolal li Diose xchiʼuk ta stojolal li yantike (Proverbios 22:1).

• «Li lekil talelale». Liʼe jaʼ chalbe skʼoplal li lekil talel jech kʼuchaʼal chal li ta smantaltak Diose o ti muʼyuk jsetʼuk xchopolile (2 Pedro 1:5, 9).

• «Li kʼusitik sta-o kʼupil kʼoptaele». Liʼe jaʼ chalbe skʼoplal li kʼusitik sta-o kʼupil kʼoptael ti lek chil Diose, jech kʼuchaʼal li kʼusitik spasoj ti xuʼ jaʼ jnopbetik skʼoplale (Salmo 78:4).

Stsʼak loʼil ta Filipenses 4:8

Kʼalal la stsʼiba Pablo li karta la stakbe batel li yajtsʼaklomtak ta Kristo ta Filipose, jaʼo te chukbil ta jpʼej na li ta Romae. Pe li buchʼutik chchanbeik skʼoplal Vivliae chalik ti jaʼ «li karta ti chakʼ jun oʼontonale», yuʼun ep ta velta chalbe skʼoplal muyubajel xchiʼuk kʼanelal (Filipenses 1:3, 4, 7, 8, 18; 3:1; 4:1, 4, 10).

Li Pabloe skʼanoj tajek li yajtsʼaklomtak ta Kristo ta Filipose, yuʼun oy ta yoʼonton ti xkuxetuk noʼox yoʼontonike xchiʼuk ti junuk noʼox yoʼontonik eke (Filipenses 2:17, 18). Jaʼ yuʼun, li ta stsutsebaltik skartae la stijbe yoʼonton ti junuk noʼox yoʼontonike xchiʼuk lekuk xtojobik snopele, ti jechuk-o spasik orasione, ti jaʼuk snopbeik skʼoplal li kʼusitik ch˗akʼbatik jun oʼontonale xchiʼuk ti junuk noʼox yoʼontonik xchiʼuk li Diose (Filipenses 4:4-9).

Sventa xavaʼibe smelolal kʼusi chal li karta sventa Filipensese, kʼelo li video liʼe.