Ti kʼu yelan laj yichʼ jelubtasel li asamblea rejional ta 2020 «¡Kuxetuk˗o avoʼontonik!»

Jaʼ to sba velta ti laj yichʼ pasel gravar li asamblea rejional ta 2020 sventa tskʼelik ta yuilal julio xchiʼuk agosto li stestigotak Jeovae. Jech oxal, laj yichʼ jelubtasel ta mas ta voʼob sien jeltos kʼopetik. Sventa xichʼ jelubtasele chichʼ jun jabil o mas, pe ta skoj li coronaviruse mu sta chanib u laj yichʼ pasel˗o li asamblea rejional «¡Kuxetuk˗o avoʼontonik!».

Li Departamento Mundial de Compras xchiʼuk li departamento de Servicios de Traducción li ta smeʼ nail abtelale, jmoj la skolta sbaik spasel li mukʼta abtelale. Li Servicios de Traduccione laj yil ti chtun yuʼunik mas abtejebaletik li jelubtasej kʼopetike, jaʼ mas chtun yuʼunik lekil mikrofonoetik, jech oxal li Departamento Mundial de Compras la sman mil mikrofonoetik xchiʼuk ta chib sien jeltos butik laj yichʼ takel batel.

Sventa mu xlaj ep takʼine, ta yepal laj yichʼ manel li mikrofonoetike, ta jun noʼox yavil bu laj yichʼ tsobel xchiʼuk te laj yichʼ chapanel sventa xichʼ takel batel ta spʼejel balumil. Li jujun mikrofonoe lokʼ ta 170 dolar xchiʼuk te xa tsakal skʼoplal li stojol sventa xichʼ takel batele. Ti ta yepal laj yichʼ manele, laj to yichʼ tsʼinel mas ta 20 % takʼin.

Li Departamento Mundial de Comprase jaʼo la sman xchiʼuk la stak batel li mikrofonoetik ta yuilal avril xchiʼuk mayo ta 2020, jaʼo kʼalal mu masuk kʼusi stakʼ pasel ta skoj li chamele. Pe li ta slajebaltik yuilal mayoe, oy xa ox yuʼunik li kʼusi chtun yuʼunik li ofisinaetik ti bu tsjelubtasik kʼope, li Beteletike xchiʼuk ti buyuk noʼox ti tsjelubtasik kʼope.

Jay Swinney ti jaʼ sbainoj skʼelel li Departamento Mundial de Compras xi laj yale: «Kʼalal laj yichʼ pasel li abtelale, li Betel xchiʼuk li buchʼutik oy kʼusitik chchonike, lek tajek ti kʼu yelan abtejike. Jaʼ koliyal s˗espiritu Jeova ti laj yichʼik akʼbel ta anil li kʼusi chtun yuʼun li ermanoetike xchiʼuk ti tsulul stojol lokʼe».

Li Nicholas Ahladis ti te ch˗abtej li ta Servicios de Traduccione xi laj yale: «Li jelubtasej kʼopetik ti mu stakʼ xlokʼ ta snaike muyubajik tajek kʼalal akʼbatik li kʼusi xtun yuʼunike. Akʼo mi muʼyuk xa tsobol ch˗abtejik, koltavanik ta sjelubtasel, ta spasel gravar mantaletik, videoetik xchiʼuk kʼejojetik ta mas ta voʼob sien jeltos kʼopetik».

Pe taje maʼuk skotol li abtele, liʼe jaʼ noʼox jtos kʼusi laj yichʼ pasel sventa xlokʼ li asamblea rejional ta 2020 «¡Kuxetuk˗o avoʼontonik!». Li matanal takʼin la avakʼike jaʼ koltavan sventa xichʼ manel li kʼusi chtune. Junantike la avakʼik ta donate.jw.org o yan kʼutik yelan.