Videoetik sventa li asamblea rejional ta 2020 «¡Kuxetuk˗o avoʼontonik!»

Li videoetik sventa li asamblea rejionale chkʼot ta koʼontontik xchiʼuk tskoltautik ta yaʼibel smelolal li Vivliae. Li ta asamblea rejional ta 2020 «¡Kuxetuk˗o avoʼontonik!» sbie, laj yichʼ pasel 114 videoetik. Li 43 videoetike jaʼ mantaletik ti la sjelubtasik li Jtsop Jbeiltasvanej xchiʼuk li yajkoltaobbatake. ¿Mi oy ajakʼojbe aba kʼu yepal abtel yichʼoj xchiʼuk jayib takʼin chlaj sventa xichʼ pasel li videoetike?

Tetik van baluneb sien ermanoetik ta spʼejel balumil koltavanik sventa xichʼ pasel li asambleae. Jutuk van mu sien mil ora laj yichʼ yuʼunik sventa xichʼ pasel li abtelal ti jalij chib jabile. 70 mil ora jaʼ laj yichʼ tunesel sventa xichʼ pasel li drama «Neemias: Jaʼ chkʼot ta jtsatsaltik li xkuxetel yoʼonton Jeovae» ti chjalij 76 minutoe.

Jaʼ yuʼun, sventa xichʼ koltael li buchʼutik te chkoltavanike, ti xichʼ pasel xchiʼuk ti oyuk skotol li kʼusitik chtune, ep laj takʼin.

Li Jared Gossman ti chtun ta Servicios de Audio y Videoe, xi laj yale: «Li Komite sventa Chanubtasel yuʼun li Jtsop Jbeiltasvaneje oy ta yoʼontonik ti xvinaj ta videoetik ti jeltos jtsʼunbaltik xchiʼuk jlumaltik li ta steklumal Jeovae. Sventa jech xichʼ pasele, koltavan 24 ekipoetik ta 11 jeltos lumetik xchiʼuk tun epal takʼin sventa xichʼuk pasele. Laj yichʼ chapanel lek xchiʼuk jmoj abtejik».

Sventa xichʼ pasel li videoetike, laj yichʼ tunesel lekikil ekipo sventa gravasion xchiʼuk yan kʼusitik. Jech kʼuchaʼal liʼe, sventa xichʼ pasel gravar li drama «Neemias: Jaʼ chkʼot ta jtsatsaltik li xkuxetel yoʼonton Jeovae» ep kʼusitik laj yichʼ vaʼanel li ta Mount Ebo ti nopol xkom ta Patterson (Nueva York) ti jaʼ te laj yichʼ pasel gravare. Sventa lekuk xichʼ tunesel li matanal takʼine xchiʼuk ti jaʼuk jech xvinaj kʼuchaʼal ta voʼnee, li ermanoetike la stunesik teʼ xchiʼuk oy kʼusi laj yakʼbeik ta sba ti xkoʼolaj ta ton sventa smeltsanik smuroaltak li voʼneal Jerusalene. Vakib metro staylej jujun. Ta skoj ti muʼyuk ole, stakʼ jelbel yavil sventa yan xa kʼu yelan xichʼ tunesel. Jaʼ yuʼun, mas jutuk li kʼusitik laj yichʼ meltsanele, akʼo mi jech, laj sien mil dolar sventa jaʼuk noʼox xichʼ pasel li muroetike.a

Kʼalal jnaʼojtik taje, mas ep sbalil chkiltik li asamblea ta 2020. Skotol li kʼusi laj yichʼ pasele jaʼ sventa xichʼ˗o ichʼel ta mukʼ Jeova ta spʼejel balumil. Kolaval ti laj avakʼik matanal takʼin ta donate.jw.org o ti yan kʼutik yelan laj avakʼike.