Lokʼ li livro ti stuk noʼox jeche

«¡Lokʼ xa ta 19 jabil jmalaoj!». ¿Kʼusi ti smalaoj li ermanoe? Jaʼ li Chʼul Tsʼibetik ta Mateo kʼalal ta Apokalipsis ta Bengalie. Epal krixchanoetik jech chalik ek kʼalal mi lokʼ li Xchʼul Kʼop Dios sventa Achʼ Balumil ta skʼopike. Pe ¿mi oy ajakʼojbe aba kʼusitik smakoj sventa xlokʼ li Vivliae?

Baʼyele, chichʼ vaʼanel jun ekipo ti jaʼ tstsakik ta venta li kʼusi laj yal li Komite sventa Stsʼibael Vunetik yuʼun Jtsop Jbeiltasvaneje. ¿Kʼu sjalil chichʼ jelubtasel li Vivliae? Xi chal li Nicholas Ahladis ti te ch-abtej li ta Departamento sventa Skoltael li Jelubtasej Kʼopetik ta Warwick (Nueva York): «Oy ep ta tos kʼusi skʼan stsakik ta venta, jech kʼuchaʼal liʼe, jayvoʼ jelubtasej kʼopetik xuʼ xkoltavanik. Mi kʼun ta jelubtasel li kʼop taje o mi tsots o mi xojtikinik lek kʼusi chalbe skʼoplal Vivlia li jnaklejetike. Jech xtok, tskʼelik mi oy jaytos varianteetik. Junantik ekipoe chichʼ yuʼunik jun o oxib jabil sventa sjelubtasik li Chʼul Tsʼibetik ta Griego Kʼope. Pe li spoklijil Vivliae chichʼ chanib jabil o mas sventa xichʼ jelubtasele. Yanuk li ta senya kʼope mas jal chichʼ yuʼunik».

Maʼuk noʼox skʼan jun ekipo sventa xichʼ jelubtasel li Vivliae. Jech xtok, chichʼ saʼel jayvoʼ ermanoetik ti jeltos xkuxlejalik xchiʼuk ti bu likemik tal sventa skʼelik mi jamal lek ta aʼiel, mi jaʼ jech li kʼuchaʼal chkʼopojike xchiʼuk mi kʼun ta aʼibel smelolal li kʼusi sjelubtasojik xa ta Vivliae. Jun ermano ta Sudáfrica ti jaʼ chchanubtas li jelubtasel kʼopetik ta Vivliae, xi chale: «Li jelubtasej kʼopetike tsots tajek kʼusi sbainoj chaʼiik ta stojolal Jeova xchiʼuk li krixchanoetike».

Kʼalal mi tsuts xa ox sjelubtasel li Vivliae, chichʼ pasel imprimir xchiʼuk chichʼ meltsanel lek. Oy lajuntos li kʼusitik chtun li ta spat noʼoxe. Li ta 2019, laj yichʼ lajesel te van 407,870 miyon takʼin (20 miyon dolar) xchiʼuk mas ta 300 mil ora abtejik li ermanoetik sventa spasik imprimir xchiʼuk stakik batel li Vivliae.

¿Kʼu yuʼun jal chichʼ chʼakbel yorail xchiʼuk ep takʼin chichʼ lajesele? Xi laj yal li Joel Blue ti ch-abtej ta Departamento Internacional de Impresione: «Yuʼun li Vivliae jaʼ li kʼusi mas tsots skʼoplal chichʼ lokʼesele». Xi to chale: «Ta jkʼankutik ti jaʼuk xichʼ albel yutsilal li Jeovae xchiʼuk li Skʼop chichʼ cholele».

Jeltos kʼusitik chtun yuʼun li krixchanoetike, jaʼ yuʼun chichʼ pasel jeltos li Xchʼul Kʼop Dios sventa Achʼ Balumile. Jech kʼuchaʼal liʼe, li Xchʼul Kʼop Dios sventa Achʼ Balumil ta brailee oy ta lajunchop kʼopetik. Ti jaʼ noʼox chichʼ pasel imprimir spoklijil li Vivlia ta brailee yichʼoj van vaxakibuk ora xchiʼuk mi laj yichʼ latsel skotol li jujuvokʼe te van 2.30 metro staylej. Jech noʼox xtok, chichʼ lokʼesel Vivlia sventa li jchukeletike ti jaʼ noʼox ta papel li spate.

Kʼalal lokʼ li Xchʼul Kʼop Dios sventa Achʼ Balumile, jelbat-o tajek xkuxlejalik li ermanoetike. Kalbetik skʼoplal li tsobobbail ti chkʼopojik ta Kiluba li ta Tombe (República Democrática del Congo). Li ta lum taje mas ta 1,700 kilometro xil li kapitale. Li ermanoetik tee kʼajomal toʼox oy jpok Svivliaik li ta Kiluba kʼope, pe vokol xa tajek ta aʼibel smelolal ta skoj ti voʼne xa slokʼel li Vivliae. Sventa xchapan sbaik ta tsobajel li ermanoetike, chchʼamunbe sbaik li Vivlia taje. Pe li ta agosto ta 2018, lokʼ spoklijil li Xchʼul Kʼop Dios sventa Achʼ Balumil li ta Kiluba kʼope.

Xi laj yal jun ermana kʼalal lokʼ li Xchʼul Kʼop Dios sventa Achʼ Balumil ti achʼubtasbil li ta skʼop ta alemane: «Muʼyuk xa bu chkal ti skʼan jchan li Jvivliae. Xi xa chkale: ‹¡Skʼan xa noʼox jchan li Vivliae!›». Jun jchukel eke xi laj yale: «Laj yakʼbikun spoklijil li Xchʼul Kʼop Dios sventa Achʼ Balumile. Avie, yakal xa tsjelbun jkuxlejal, muʼyuk toʼox bu kaʼiojbe smelolal li Skʼop Diose jaʼ to kʼalal la jchan li Vivlia liʼe. Oy to ta koʼonton ta jnabe skʼoplal li stestigotak Jeovae xchiʼuk kʼusi skʼan jpas sventa xikʼot ta testigo eke».

Li buchʼutik chchanik li Xchʼul Kʼop Dios sventa Achʼ Balumile tstojik tajek ta vokol li matanal takʼin chichʼ akʼel sventa xlokʼ li Vivliae. Li matanal takʼinetik taje ep ta tos kʼuxi ta akʼel li ta donate.jw.org. Kolavalik tajek ti chavakʼik li matanal takʼine.