Li ofisinaetik ti bu chichʼ jelubtasel kʼope tstabeik sbalil epal miyon krixchanoetik

Mas ta j-oʼlol li ekipoetik ti jech-o xa tsjelubtasik jchopuk kʼope, te xa ch-abtejik ta ofisinaetik ti bu chichʼ jelubtasel kʼop ti nom xil Betele. ¿Kʼusi sbalil tstabeik? ¿Kʼusi abtejebal chtun yuʼunik li jelubtasej kʼopetike? ¿Kʼu yuʼun ti chkoltaatik li jelubtasej kʼopetik ti te ch-abtejik ta ofisinaetik ti nom xil li Betele?

Koliyal li ofisinaetike, li jelubtasej kʼopetike xuʼ xa te xnakiik ti bu chkʼopojik li kʼop ta sjelubtasike. Li Karin ti tsjelubtas kʼop ta bajo alemáne xi chale: «Ti kʼu xa sjalil libatkutik li ta ofisina ti bu ta xichʼ jelubtasel kʼop ta Cuauhtémoc, ta Chihuahua, (México). Puro xa ta bajo alemán chikʼopojkutik. Maʼuk noʼox jech chikʼopojkutik xchiʼuk li jchiʼiltak ta abtele o li ta cholmantale, yuʼun jech chikʼopojkutik xtok kʼalal chibatkutik ta manolajele. Buyuk xa noʼox chkaʼi li jkʼopkutike. Laj kaʼikutik jpʼelantik kʼop ti jal xa muʼyuk bu xkaʼikutike. Avie jnaʼojkutik xa kʼu yelan chkʼopoj li krixchanoetike».

Li James ti nakal ta Ghana xchiʼuk ti tskolta sba ta sjelubtasel kʼop ta Frafrae chal ti ta onoʼox tsnaʼ bakʼintik li ermanoetik ta Betele. Pe xi chal xtoke: «Ta jkʼupin tajek ti liʼ-oyun ta ofisina ti bu tsjelubtasik kʼope. Tstijbun koʼonton kʼalal ta jcholbe mantal ta skʼop stuk li krixchanoetike xchiʼuk kʼalal chkil kʼu yelan chchʼamik li lekil aʼyejetike».

¿Kʼu yelan chichʼ tʼujel ti bu chichʼ pasel li ofisinaetik ti bu chichʼ jelubtasel kʼope? Li Joseph ti chkoltavan ta Departamento sventa Svaʼanel salonetik xchiʼuk yan kʼusitik ta spʼejel Balumil ta Warwick (Nueva York), xi chale: «Li vokolil ta jnuptankutik kʼalal chichʼ tʼujel ti bu chichʼ vaʼanel li ofisinaetike, jaʼ ti chʼabal lek voʼ o luse xchiʼuk ti chʼabal lek Internet sventa stak bal yabtelik o ti xtakbat tal yabtelike. Jaʼ yuʼun, kʼalal muʼyuk toʼox chichʼ vaʼanel li ofisinaetike, chichʼ saʼel jaysepuk osil ti bu chkʼopojik li ta kʼop chichʼ jelubtasele».

Li bu onoʼox mas anil xchiʼuk yalel chlokʼ ti bu chichʼ akʼel li ofisina ti bu chichʼ jelubtasel kʼope jaʼ ta jun Salon sventa Asamblea, ta Salon sventa Tsobobbail o ta snail misioneroetik ti bu xuʼ xtal xbatik li jelubtasej kʼopetike. Mi chʼabal bu ta tael junuke, li ermanoetike xuʼ skʼanik permiso sventa smanik naetik xchiʼuk ofisinaetik ti bu xkom nakiikuk xchiʼuk ti te x-abtejik li jelubtasej kʼopetike. Mi muʼyuk xa chtun yuʼunik ta tsʼakale, xuʼ xichʼ chonel, vaʼun xuʼ stunesik li takʼin ti bu mas chtune.

Chapal xa sventa xlik abtejikuk

Li ta sjabilal cholmantal ti lik ta septiembre 2019 kʼalal ta disiembre 2020, te van laj 269,035,000 (13 miyon dólares) sventa li ofisinaetike. Li jelubtasej kʼopetike chtun yuʼunik komputadoraetik, aplikasionetik, li kʼusitik chtun sventa li spasobil gravare xchiʼuk Internet o yan kʼusitik. Jun skʼelobile, sventa xichʼ manel jpʼejuk komputadora xchiʼuk ti chapaluk xkom xchiʼuk li aplikasionetike chlaj van 15,521 (750 dólares). Jech xtok, li jelubtasej kʼopetike chtun yuʼunik li programa Watchtower Translation System ti jaʼ chkoltaatik-o ti lek chapal li yabtelike xchiʼuk xuʼuk staik li vunetik chtun yuʼunik kʼalal tsjelubtasik kʼope.

Li jelubtasej kʼopetike akʼbatik li kʼusitik chtun yuʼunik sventa spasik gravar ta s-ofisina stukike. Tun tajek kʼalal lik li chamel coronaviruse, yuʼun li jelubtasej kʼopetike laj yichʼ batel ta snaik sventa teuk spasik tal gravar li vunetik xchiʼuk videoetike.

Jech xtok, chkoltavanik ermanoetik ti tey noʼox nakalik sventa skʼelik mi stakʼ aʼiel ti kʼu yelan laj yichʼ jelubtasel li vunetike xchiʼuk chkoltavanik sventa xichʼ kʼelbel spat xokon li ofisinaetike. «Epal jcholmantaletik xchiʼuk prekursor regularetik xuʼ xtal koltavanikuk liʼe», jech laj yal Cirstin ti ch-abtej ta ofisina ti bu chichʼ jelubtasel kʼop ta afrikáans ta Ciudad del Cabo (Sudáfrica).

Li ermanoetike tskʼupinik tajek. Jun ermana laj yal ti xkoʼolaj xkuxet to chaʼi kʼalal chkoltavan ta jun ofisina ti bu chichʼ jelubtasel kʼope. Junantik ermanoetik ti te noʼox nopol nakalike chakʼ yechʼomal yeik sventa xichʼ pasel gravar. Li Juana ti tsjelubtas kʼop ta totonaco te ta Veracruz (México) xi chalbutike: «Avi ti liʼ xa nakalunkutik ti bu chkʼopojik li ta jkʼopkutike, mas xa kʼun sventa xtal mas ermanoetik ta spasel gravar li vunetik xchiʼuk videoetike».

Ti bu xa laj yichʼ akʼel li ofisinaetik ti bu chichʼ jelubtasel kʼope, ¿mi ta melel chkoltavan sventa masuk lek jamal li kʼusitik chichʼ jelubtasele? Ta smiyonal xa noʼox krixchanoetik chalik ti jeche. Li Cédric ti te chkoltavan ta sjelubtasel ta congo kʼop li vunetik ti te xkom ta República Democrática del Congo xi chale: «Junantik ermanoetike xi toʼox tsbiiltasik ti kʼu yelan ta jelubtaskutik ta congo li vunetike: ‹Congo yuʼun li Watch Towere›, yuʼun mu xkoʼolaj ti kʼu yelan chkʼopojike. Pe avie chalik ti jaʼ xa jech ta jelubtaskutik ti kʼu yelan chkʼopojik ta Congo li avie».

Li ta Sudáfricae jechtik chkʼot ta pasel ek, li Andile ti tsjelubtas kʼop ta xhosa kʼope xi chale: «Ep buchʼu chakʼik venta ti jelel xa ti kʼu yelan ta jelubtaskutik kʼope. Kʼalal ta ololetik ti nopem toʼox xaʼiik skʼel ta inglés Li Jkʼel-osil ta toyole, avie jaʼ xa ta skʼelik ta xhosa kʼop xchiʼuk lek tajek chaʼiik xchanel li Xchʼul Kʼop Dios sventa Achʼ Balumile, yuʼun kʼun ta aʼiel».

Skotol li kʼusitik chlaj li ta ofisinaetik ti bu chichʼ jelubtasel kʼope, ti chichʼ kʼelbel spat xokone xchiʼuk li kʼusitik chichʼ akʼbel li buchʼutik te ch-abteje, jaʼ te chlokʼ li ta matanal takʼin chichʼ akʼel ta abtelal ta spʼejel balumile xchiʼuk te chlokʼ li ta matanal takʼin chichʼ akʼel ta donate.jw.org.