Oy kʼusitik pasbil ti tstabe sbalil li ermanoetike xchiʼuk ti muʼyuk tsokes li balumile

Li stestigoutik Jeovae jnaʼojtik ti poʼot xa slekubtas Dios li balumil ti yakal tsokesik li krixchanoetike (Apokalipsis 11:18). Pe yoʼ to ta jmalatik chkʼot ta pasele, chkakʼtik persa ti jkʼuxubintik li balumile. Jaʼ yuʼun, oy kʼusitik yichʼoj pasel li ta naetik ti svaʼanoj li j˗organisasiontike.

Li kʼusitik yichʼoj pasele jaʼ sventa mu masuk sok li balumile. ¿Pe kʼusitik yichʼoj pasel? ¿Kʼuxi chichʼ tunesel lek li matanal takʼine?

Toj lek kom li Salon sventa Asambleae

Li Salon sventa Asamblea ta Matola, ta Mozambiquee, muʼyuk makal li xokontake. Pe ta skoj ti ta lamina li sjole, kʼixin tajek yut li ta kʼakʼaltike. Xi laj yal jun ermano ti te chkʼot ta asambleae: «Ta skoj ti kʼixin tajeke, solel balchikʼunkutik tajek. Jaʼ yuʼun, kʼalal chnel asambleae, li ermanoetike chlokʼik noʼox batel ta anil, yuʼun jaʼ siket chaʼiik li ta spate». Jaʼ yuʼun, ¿kʼusi laj yichʼ pasel sventa skʼupinik asamblea li ermanoetike?

Laj yichʼ akʼel ventiladoretik li ta sjol salone xchiʼuk oy kʼusi laj yichʼ akʼel ta yolon slaminail sventa mu xkʼixnaj tajek li yute. Taje muʼyuk tsokes li balumile, yuʼun li ventiladoretike muʼyuk tstunesik lus, yuʼun ta ikʼ noʼox chjoyibajik. Vaʼun, jaʼ tstokʼ lokʼel li xkʼixnal yut salone. Li jujupʼej ventiladore mas jutuk ta jmil stojol.

Li kʼusi laj yichʼ pasel taje mas siket yuʼun li yut salone. Jech xtok, muʼyuk xa mas chkuxin li kʼusitik te ta yute xchiʼuk mas xa chanav ikʼ. Jaʼ yuʼun, li buchʼutik te chkʼotike jun xa yoʼontonik xchiʼuk mas xa tskʼupinik li asambleae. Xi to chal li ermano ti laj xa onoʼox yal sloʼile: «Kʼalal tsta yorail veʼel ta oʼlol kʼakʼale, muʼyuk xa chilokʼkutik batel ta anil, yuʼun te xa chkom loʼilajkunkutik li ta yute. Xkoʼolaj chkaʼikutik ti te oyunkutik ta yolon jpets teʼ ti sikete».

Ta jtuneskutik lek li xojobal kʼakʼale

Li ta naetik ta jtunestik ta spʼejel balumil sventa yichʼobil ta mukʼ Jeovae, jutuk mu skotoluk yichʼoj tikʼbel paneles solares ti jaʼ chtun˗o sventa tsjoypʼin ta lus li xojobal kʼakʼale. Ti vaʼ yelan chichʼ pasele jaʼ muʼyuk xa mas chichʼ tunesel li lus ti pasbil˗o ta akʼal, petróleo xchiʼuk gase. Li lus ta jtunestike jaʼ muʼyuk mas tsok yuʼun li balumile xchiʼuk lek chichʼ tunesel li matanal takʼine.

Li ta 2023, li ta Betel ta Esloveniae laj yichʼ tikʼel paneles solares. Ti kʼu yepal chichʼ tunesel lus ta Betele jaʼ 30% te chlokʼ talel li ta paneles solarese. Pe mi oy mu xlaj stunesik li luse, jaʼ chakʼbeik batel li jteklume. Li paneles solarese mas ta vukub miyon laj yichʼ tojel. Li avie, mas xa jutuk chichʼ tojel lus. Jaʼ yuʼun, mutik sta chanib jabil chkʼex˗o ti kʼu yepal laje.

Li ta 2024, li ta Betel ta Sri Lanka laj yichʼ tikʼel paneles solares xchiʼuk jun mukʼta pila ti bu tstsob li luse. Ti kʼu yepal chichʼ tunesel lus ta Betele jaʼ 70% te chlokʼ talel li ta paneles solarese. Mas jutuk ta 62 miyon laj yichʼ lajesel. Ta skoj ti mas xa jutuk chichʼ tojel luse, mi echʼ oxib jabile, chkʼextaj ti kʼu yepal laje. Li echʼ jabil xtoke, laj yichʼ tikʼel paneles solares li ta Betel ta Paises Bajose. Ti kʼu yepal tstunes lus li Betele 35% jaʼ te chlokʼ talel li ta paneles solarese. Laj yichʼ lajesel jutuk mu 23 miyon xchiʼuk ta baluneb jabil chkʼextaj ti kʼu yepal laje.

Jech xtok, li ta junantik Ofisina ti bu chichʼ Jelubtasel Kʼop (ORT) ta Mexicoe yichʼoj tikʼel paneles solares, june jaʼ li ORT ta tarahumara central ti te xkom ta Chihuahuae. Li ta jteklum taje, li ta yorail siktike toj echʼ xa noʼox sik, pe li ta yorail kʼepelale mas ta 40 grado xkʼixnal. Pe ta skoj ti toj toyol chichʼ tojel luse, li ermanoetike chakʼik persa ti mu masuk stunesik li xkʼixnaobil o sikubtasobil naetike. Xi chal Jonathan ti te ch˗abtej li ta ORT: «Li ta yorail siktike, ta jlap echʼel pim jkʼuʼkutik. Pe li ta yorail kʼepelale, ta jamkutik li ventanaetike».

Li ta 2024, laj yichʼ tikʼel paneles solares li ta ORT xchiʼuk mas ta 445 mil takʼin laj sventa xichʼ tikʼele. Pe ta voʼob noʼox jabil chkʼex ti kʼu yepal laje. Li avie, li ermanoetike xuʼ xa mas stunesik li xkʼixnaobil o sikubtasobil naetike. Xi chal li Jonathane: «Mas xa ta jkʼupin li kabtelkutike xchiʼuk lek chkaʼi jbakutik. Jech xtok, jun koʼontonkutik, yuʼun jnaʼojkutik ti lek chichʼ tunesel li matanal takʼine xchiʼuk ti muʼyuk tsok˗o yuʼun balumil li kʼusitik laj yichʼ pasele».

Ta jtuneskutik lek li voʼe

Li ta junantik Salon sventa Tsobobbail ta Africae, muʼyuk lek voʼ o toj ikʼ li voʼe. Jaʼ yuʼun, epal ermanoetike nom chanavik sventa xkuchik batel voʼ li ta salone. Junantik ermanoetik xtoke tsmanik li voʼe. Pe ta skoj ti ta karro chkʼot akʼbatikuke, toj toyol xlokʼ xchiʼuk tsokes˗o li balumile.

Sventa mu xa jechuk xil svokolike, ta epal salonetik ta Africae yichʼoj akʼbel stuvoaltak li xokontak sjol salone xchiʼuk yichʼoj akʼel mukʼtik yav voʼ sventa te stsob sba kʼalal chakʼ voʼe. Tetik van 12 mil o 62 mil chlaj ti jech chichʼ pasele. Pe sventa snaʼik kʼu yelan tsmeltsanik li jujupʼej salone, li ermanoetike baʼyel tskʼelik kʼu yelan xkʼixnal li osile o ti kʼutik sjalikil chakʼ voʼe. Ta skoj ti muʼyuk xa tsmanik voʼ li ermanoetike, mas xa jutuk chlaj takʼin li ta tsobobbaile.

Ti vaʼ yelan laj yichʼ pasele toj ep staojbeik sbalil li ermanoetike. Xi chal Noemia ti te nakal ta Mozambiquee: «Olon tale, nom tajek chixanavkutik sventa xbat jkuchkutik tal voʼ, jaʼ yuʼun solel lubem xa chikʼotkutik li ta salone. Toj vokol laj kaʼikutik. Pe avi ti oy xa lek kaʼalkutike, xuʼ xa lek jpok jkʼobkutik xchiʼuk muʼyuk xa lubem chikʼotkutik li ta salone, jech oxal mas xa ta jkʼupin li jtsobajelkutike. ¡Kolavalik tajek ti la˗akoltaunkutike!».

Li kʼusitik yichʼoj pasel ti laj kalbetik skʼoplale, ¿bu lokʼ talel li takʼin laj yichʼ tunesele? Jaʼ li ta matanal takʼin chichʼ akʼel ta sventa li abtelal ta spʼejel balumile. Jeltos kʼu yelan chichʼ akʼel li matanal takʼine, ep buchʼutik jaʼ te chakʼik li ta donate.jw.org. ¡Kolavalik tajek ti ta slekil avoʼonton chavakʼik li matanal takʼine!