Kʼu yelan laj yichʼ pasel li drama: «Li lekil aʼyejetik laj yal Jesuse»

Li stestigoutik Jeovae oy xa ox tajek ta koʼontontik skʼelel li drama «Li lekil aʼyejetik laj yal Jesuse», parte 1. Ta smiyonal xa noʼox krixchanoetik laj xa skʼelik, jech xtok skʼan to xlokʼ 17 videoetik. Pe ¿kʼuxi yakal chichʼ pasel li dramae? Xchiʼuk ¿kʼuxi yakal chakoltavan sventa xichʼ pasel li abtelal liʼe?

Chichʼik chabiel li aktoretike xchiʼuk li kʼusitik chtune

Li ta Betel ta Australasia, ti bu chichʼ pasel gravar li videoetik sventa Jesuse, jujun kʼakʼal tetik van 50 o 80 ta voʼ ermanoetik te chkoltavanik yoʼ bu chichʼ pasel gravare.a Jech xtok, chichʼik akʼbel sveʼel skotolik jujun kʼakʼal, ch˗akʼbat sveʼelik ta oʼlol kʼakʼal, ta mal kʼakʼal xchiʼuk oy kʼusi yan ch˗akʼbat slajesik. Jaʼ yuʼun, kak xa noʼox chichʼ chapanel skotol li veʼlile. Jun ermana ti Esther sbie, te ch˗abtej li ta Departamento sventa Veʼlile, xi chale: «Jeltos bu chichʼ manel li kʼusitik chtun sventa veʼlile. Jaʼ chichʼ saʼel li bu yalel noʼox stojole, pe ti lekik li kʼusi chchonike. Nopolik noʼox chichʼ kʼelel kʼu yepal chichʼ meltsanel li veʼlil sventa mu kʼusi xichʼ ixtolanele». Jujun kʼakʼale, tetik van 80 peso chlaj yuʼun ta veʼlil li jujun krixchanoe.

Li aktoretik xchiʼuk li buchʼutik tspasik li videoe maʼuk noʼox skʼan xveʼik, yuʼun skʼan xchabi sbaik xtok. Pe, ¿kʼu yuʼun ti skʼan xchabi sbaike? Li ta Australiae lek kʼepel xchiʼuk siket noʼox, pe oy bateltik xtoke solel kʼixin tajek xchiʼuk chchikʼvan tajek li kʼakʼale. Sventa xchabi sbaike xchiʼuk ti mu xlubik tajek ta skoj li kʼakʼale, oy buchʼutik chkoltavanik sventa svaʼanik karpanaetik yoʼ teuk xkuxik xchiʼuk x˗axinajik li buchʼutik ch˗abtejike. Jech xtok, tskʼelik ti oyuk yuʼunik krema sventa mu xlajik ta kʼakʼal, ti oyuk sombriyaike xchiʼuk ti oyuk voʼ sventa xuchʼike. Xi chal Kevin ti ch˗abtej ta Servicios de Audio y Video: «Li buchʼutik chkoltavanik ta spasel li abtelal taje, jutuk mu skotolikuk jaʼ li buchʼutik chkoltavanik ta Betel jun chib kʼakʼal noʼox ta xemanae. Bikʼit yakʼoj sbaik xchiʼuk xmuyubaj noʼox ch˗abtejik. Toj echʼ xa noʼox ep chkoltavanik».

Jeltos ti bu chichʼ pasel gravare

Mi te noʼox chichʼ pasel gravar ta Betel o li ta snail ti bu tspasik gravare, xuʼ van mu jechuk xvinaj chkom kʼuchaʼal li kuxlejal ta voʼnee. Jaʼ yuʼun, bateltike yan-o bu chichʼ pasel gravar, yuʼun li ta skʼakʼalil Vivliae muʼyuk toʼox kavleetik sventa lus, muʼyuk toʼox mukʼta be karroetik xchiʼuk li naetike mu xkoʼolaj kʼuchaʼal avie. Jaʼ yuʼun, li aktoretik xchiʼuk skotol li buchʼutik chkoltavanike nopolik noʼox skʼan xbatik li ta osiltik ti bu nom chʼikajtike. Sventa jech spasike skʼan skʼejik li kʼusitik tstunesik sventa tspasik gravare, li kʼuʼil pokʼil tstunesik xchiʼuk yan kʼusitik, yuʼun skʼan kuchel batel skotol. Vaʼun mi kʼotike skʼan skʼejik lek. Kʼalal mu to chlik spasik gravare, li yajkoltaobba buchʼu sbainoj abtelale tskʼelik ti oyuk generador sventa luse, ti oyuk yaʼalike xchiʼuk ti oyuk vanyoetike. Skotolik te chkom vayikuk, jlome ta sna ermanoetik ti te nopol nakalike, jlom xtoke ta remolques, ta oteletik o ta cabañaetik.

Kʼalal yan-o bu chbat spasik gravare mas to ep takʼin chlaj, mas to jal chichʼ xchiʼuk mas chlubik li buchʼutik chkoltavanike. Jaʼ yuʼun, li ta 2023 li Jtsob Jbeiltasvaneje laj yal ti xuʼ xichʼ manel jpʼej mukʼta pantaya (video wall) ti tetik van 45 miyon pesos stojole. Toj labal sba ti kʼu yelan pasbil li pantaya taje. Kʼalal chichʼ tunesel sventa chichʼ pasel gravare, toj echʼem lek ti xkoʼolaj xa ta osiltik oyutik yilele. Taje chkoltavan sventa mu masuk ep takʼin xlaj, ti ja’ mu jechuk kʼalal nom toʼox bu chichʼ pasel gravare. Li Darren ti jaʼ jun li ta Komite ta Betel ta Australasiae xi chale: «Kʼalal chichʼ tunesel li pantaya sventa xichʼ pasel gravare chkoltavan sventa mu masuk xlubik li aktoretike xchiʼuk ti xuʼ ep ta velta xichʼ pasel gravar jaʼ to ti kʼuxi lek chlokʼe. Kʼalal ta osiltik toʼox ta jpaskutik gravare, mi ta jkʼan ta jpaskutik gravar ti kʼu yelan chmal bal kʼakʼale skʼan sujom noʼox jpaskutik, yuʼun anil noʼox chchʼay batel li kʼakʼale. Pe ti jaʼ xa ta jtuneskutik li pantaya sventa jpaskutik gravare xuʼ xa ep ta velta jpasilankutik jaʼ to ti kʼuxi lek chkome, yuʼun te oy˗o xvinaj li xojobal sat kʼakʼal ti chchʼay batel yilele».

«Voʼone muʼyuk vokol laj kaʼi»

Sventa xichʼ pasel gravar li jujuvokʼ videoetik li ta drama «Li lekil aʼyejetike», chtun epal aktoretik xchiʼuk ti epuk buchʼu xkoltavane. ¿Kʼu yelan chabibil chaʼi sbaik li buchʼutik te chkoltavanike?

Jun ermana ti Amber sbi ti likem ta Melbourne la spas viajar mas ta 700 kilometro sventa xkoltavan li ta abtelale. Xi la stsʼibae: «Ti kʼuxi livul ta aeropuertoe li ermanoetik ta Betele toj echʼ xa noʼox la xchabiikun. Ep buchʼutik la stakikun ta ikʼel sventa jmoj xiveʼkutik o ti xkuchʼkutik te.Skotolik li buchʼutik ch˗abtejik sventa tspasik gravare lek tajek yoʼontonik, jun tajek koʼonton laj kaʼi jba. Li voʼone muʼyuk vokol laj kaʼi ti nom to lilik tale, yuʼun ep bendisionetik la jkʼupin».

Jun ermano ti Derek sbie ti te ch-abtej yoʼ bu tsmeltsanik videoetike xi chale: «Ti kʼuxi lik li abtelal liʼe epal departamentoetik la skoltaunkutik. Ta jtojbekutik tajek ta vokol li ermanoetik xchiʼuk ermanaetik ti tstunes skʼakʼalik xchiʼuk li kʼusitik x-ayan yuʼunik sventa xkoltavanik li ta abtelal liʼe. Lek tajek yoʼontonik xchiʼuk ta sjunul yoʼonton chkoltavanik. Jamal xvinaj ti akʼbilik bendision yuʼun Jeova li buchʼutik chkoltavanike xchiʼuk kilojkutik ti ep skoltaojunkutik li Jeova eke. Yuʼun li Jeovae maʼuk noʼox ep sbalil chil ti lekuk xkom li abtelale, yuʼun tstsak ta venta xtok ti kʼu yelan chichʼ pasele».

Koliyal li matanal takʼin chavakʼike jech-o chichʼ pasel gravar li drama «Li lekil aʼyejetike», te me tsakal skʼoplal xtok li matanal takʼin chavakʼik ta donate.jw.org. Kolavalik tajek, ermanoetik, ti ep chakoltavanike.