Stakʼ aʼiel xchiʼuk stakʼ kʼelel li kʼusi ch˗echʼ ta asambleae

Li yajtuneltak Jeova avie oy xa mas ta 130 jabil jelavem talel s˗asambleaik ta jujun jabil. Li asambleaetik avie chjelav mas ta 40 mantaletik, oy musika, oy buchʼutik chichʼ jakʼbel sloʼil xchiʼuk oy videoetik. Sventa skʼupinik xchiʼuk ti xmuyubajikuk noʼox li ta asambleae, skʼan ti lekuk xichʼ chikintaele xchiʼuk ti lekuk xvinaj li kʼusitik chichʼ kʼelele (Lukas 2:20). Li matanal takʼin chavakʼe, ¿mi chkoltavan sventa lekuk xichʼ chapanel li asambleaetike?

Lek chapanbil li audio xchiʼuk video ta jujun asambleae

Jutuk mu skotoluk li estadioetik ti bu chjelav li asambleaetike chapal xa onoʼox yuʼunik li kʼusitik chtun sventa audio xchiʼuk videoe. Vaʼun chaʼa, ¿kʼu yuʼun ep ta velta voʼotik chkichʼtik batel li kʼusitik chtun sventa audio xchiʼuk videoe? Xi chal li David ti te ch˗abtej li ta Departamento sventa Broadcasting li ta smeʼ nail abtelale: «Jutuk mu skotoluk li kʼusitik ch˗echʼ ta asambleae naka diskursoetik. Li estadioetik ta jchʼamuntike jutuk mu skotoluk ti muʼyuk lek chapal sventa xchikintaik mantal mas ta vakib ora li ermanoetike. Jech kʼuchaʼal liʼe, li vosinaetik ti oy ta estadioe jaʼ noʼox tstunesik sventa xjelav junantik aʼyej ti komkomik noʼoxe xchiʼuk sventa stijik jutebuk musika. Jech xtok, li pantayaetike jaʼ noʼox tstunesik sventa xakʼik ta ilel ti kʼu yelan xbat li tajimole xchiʼuk tstunesik sventa xakʼik ta ilel li kʼusi chchonike. Pe li ta j˗asambleatike oy videoetik ti chjalije xchiʼuk oy ta koʼontontik ti x˗aʼibajuk lek li kʼusitik chichʼ alel ta plataformae».

Ta skoj ti jelajtik bu ch˗echʼ li asambleae, skʼan ti lekuk chapanbil li audio xchiʼuk videoe. Mi laj xa ox yichʼ tʼujel ti bu chjelav li asambleae, jaʼo me chlik li abtelal taje. Li Departamento sventa Broadcasting ta jujun Betele, jaʼ tskʼel jayvoʼ krixchanoetik x˗och yuʼun li ta jujun estadioe xchiʼuk ti bu chchotiike. Li ermanoetike lek tajek tskʼelik ti bu chakʼik li vosinaetik xchiʼuk li pantayaetike xchiʼuk tskʼelik lek kʼuxi tstsʼakik. Laje, tstsʼibaik li kʼusitik chtun sventa lekuk xichʼ chikintael xchiʼuk ti lekuk xvinaj skotole.

Pe jaʼ mas vokol kʼalal chjelav ta jeltos kʼopetik li asambleae. Li buchʼutik tsjelubtasik kʼope chilik batel li audio xchiʼuk tskʼelik batel li videoe, vaʼun tsjelubtas batel ta skʼop stukik. Laje, jmoj xa chichʼ akʼel ta ilel skotol. Oy kʼusi tstunesik sventa koʼoluk xa xvinaj li video xchiʼuk audioe. Li kʼusi tstunesik taje xuʼ stij batel ta vaxakib kʼopetik. Xi chal li Davide: «Mu toj kʼunuk sventa xichʼ tunesel skotol taje. Jaʼ yuʼun, li buchʼu chkoltavan ta stunesele, skʼan ti lekuk chanubtasbilike».

Jutuk mu skotoluk Betele chapal lek yuʼunik li kʼusi tstunesik sventa audio xchiʼuk video ta jujun jabile. Jaʼ yuʼun, oy ta sbaik tstakik batel li kʼusitik chtun sventa audio xchiʼuk video ti bu ch˗echʼ jujun asambleae. Li ta Estados Unidose tslajesik mas ta 200 mil dolara jujun jabil sventa stakobil li kʼusitik chtune. Akʼo mi jech, mas to onoʼox yalel xlokʼ, mas to toyol xlokʼ mi laj yichʼ manel yan achʼ aparatoetike. Xi chal Steven ti koltavan ta skʼelel audio xchiʼuk video ta jun asamblea ta Canadae: «Li buchʼutik koltavan ta abtele la skʼelik lek ti chapluk xbat skotole, ti teuk oy skotol li torniyoetike xchiʼuk li kavleetike. Laj yichʼ kʼejel skotol xchiʼuk laj yichʼ chapel skotol sventa lekuk chapal yuʼunik skotol ti bu chjelav yan asambleae».

Chichʼ manel yan aparatoetik xchiʼuk lek kʼelbil

Toj toyol chlokʼ kʼalal chichʼ chʼamunel li kʼusitik chtun sventa audio xchiʼuk videoe. Jech xtok, maʼuk ti toj lekik xae. Jaʼ yuʼun, chichʼ manel li kʼusitik chtun kuʼuntike. Li jpʼej mukʼta pantaya LED ti 5 metro snatil xchiʼuk 3 metro stayleje te van 24 mil dolar stojol, xchiʼuk li jun skavleal mikrofono ti 15 metro snatile te van 20 dolar stojol. Li Departamento sventa Smanel kʼusitike tskʼelik lek kʼu yepal takʼin chlaj yoʼ to mu smanike (Lukas 14:28). Xi tsjakʼbe sbaike: «¿Jayvoʼ tstunesik li aparatoe?, ¿mi xlokʼ venta ti xichʼ manel achʼ aparatoe?, ¿mi oy bu lek stakʼ skʼejik?, ¿mi oy buchʼutik lek chanemik stunesel xchiʼuk mi oy lek yabtejebik sventa skʼelik yoʼ lekuk noʼox oye?».

Skʼan ti nopolikuk noʼox xichʼ meltsanel li aparatoetik sventa audio xchiʼuk video sventa jaluk lek xtune xchiʼuk ti lekuk xichʼ tunesel li matanal takʼine. Li aparatoetik taje oy lek yavil ti lek meltsanbile, vaʼun muʼyuk tsok kʼalal chichʼ takel batele. Pe bakʼintike skʼan onoʼox xichʼ meltsanbel li yavil kʼalal tsoke.

Mantaletik ti lek xchapete xchiʼuk ti labal sba chil yantike

Junantik krixchanoetik ti maʼukik stestigo Jeovae toj echʼ xa noʼox labal sba chilik ti toj lek tajek ta kʼelel xchiʼuk ti toj lek ta aʼiel li kʼusitik chjelav ta asambleae. Jun j˗abtel ta jun empresa ti jaʼ sbainoj spasel li kʼusitik sventa audio xchiʼuk video ti lek ojtikinbil ta spʼejel balumile laj yal ti toj lek li kʼusi ch˗echʼ ta j˗asambleatike. Xi laj yal Jonathan ti tskolta sba ta stsʼakel xchiʼuk ta stunesel li kʼusitik sventa audio xchiʼuk video ta asambleaetike: «Li vinike labal to sba tajek laj yaʼi ti maʼuk ti lek xa chanunajemik li buchʼutik te chkoltavanike, yuʼun jaʼ noʼox lokʼem ta yoʼontonik chkoltavanik. Kʼalal ta jun kʼakʼal xchiʼuk oʼlol noʼox la jtsʼakutike, labal to sba laj yil, yuʼun li ta s˗empresae voʼob to kʼakʼal chichʼ yuʼunik». Xi laj yal li buchʼu sbainoj skʼelel ti bu ch˗echʼ li asambleae: «Ep tajek buchʼutik ti ayemik ti chanemik lek stunesel li kʼusitik sventa audio xchiʼuk videoe, pe muʼyuk kiloj˗o jech ti toj echʼ xa noʼox lek xatojobike».

¿Mi chakʼupin li asamblea ta skoj ti oy audio xchiʼuk videoe? Xuʼ van jech chavaʼi aba kʼuchaʼal li David ti te nakal ta Inglaterrae, xi chale: «Kichʼoj 88 jabil xchiʼuk chikʼotilan˗o ta skotol asamblea. Pe ta orae mas to ta jkʼupin li asambleae, yuʼun li videoetik chjelave chkoltavan sventa xkaʼibetik lek smelolal li kʼusitik chjelav ta mantale. Mu xkaʼitik chbat ora». Xi chal Micheal ti nakal ta Nigeriae: «Li ermanoetike muʼyuk xa kʼusi chchʼaybat yoʼontonik li ta asambleae, yuʼun toj lekik tajek chjelav li mantaletik xchiʼuk li videoetike».

Mi labat li ta asamblea rejional xchiʼuk li ta asamblea ti stuk noʼox jech ti xi sbie: ¡Jcholtik li lekil aʼyejetike!, nopbo skʼoplal li kʼusitik laj yichʼ pasel sventa lekuk xachikinta xchiʼuk ti xavil skotol li kʼusi chjelave. Skotol taje jaʼ chkoltavan li matanal takʼin chavakʼike xchiʼuk li matanal takʼin chichʼ akʼel ta donate.jw.org. Kolavalik tajek.