«Akʼo taluk li Ajvalilal avuʼune»

Xi jamal yaloj li Jeovae: «Muʼyuk xa lajelal, muʼyuk xa at-oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux ta aʼiel. Muʼyuk xa bu chvul ta ajolik li kʼusitik chopol toʼoxe».

Li Jeovae te laj yakʼ nakiikuk ta nichimaltik Eden li Adan xchiʼuk Evae sventa xmuyubajikuk noʼox xchiʼuk ti junuk noʼox yoʼontonike. Pe skʼan jaʼuk noʼox xichʼik ta mukʼ li Jeovae xchiʼuk ti snojesik spʼejel balumile. Akʼo mi muʼyuk la xchʼunik mantal li Adan xchiʼuk Evae, ta onoʼox xkʼot ta pasel li kʼusi yaloj Jeovae. Yuʼun jech kʼuchaʼal laj xa jchantik li ta livro liʼe, skotol li kʼusi chal Jeovae persa chkʼot ta pasel. Vaʼun, li Ajvalilal yuʼune ta xakʼ tal epal bendisionetik liʼ ta balumile. Jaʼ jech chkʼot ta pasel li kʼusi yalojbe onoʼox li Abraane.

Jutuk xa tajek skʼan xichʼ lajesel li Satanas, li spukujtak xchiʼuk li chopol krixchanoetike. Vaʼun, skotol li lekil krixchanoetike jaʼ xa noʼox chichʼik ta mukʼ li Jeovae. Muʼyuk xa chij-ipaj, muʼyuk xa chijcham xchiʼuk xkuxet noʼox koʼontontik chijsakub jujun kʼakʼal xchiʼuk oy noʼox kipaltik. Vaʼun, ta kʼunkʼun chkʼataj ta jun paraiso spʼejel li balumile. Maʼuk noʼox, yuʼun naka xa muil veʼliletik ta jlajestik xchiʼuk ta jpas jnatik ti kʼupilik sbae. Muʼyuk xa me chopol krixchanoetik. Jech xtok, muʼyuk xa bu chijxiʼutik yuʼun li chonbolometike xchiʼuk muʼyuk xa chiʼik kuʼuntik ek.

Toj labal sba kʼalal mi lik xchaʼkuxesan skotol animaetik li Jeovae. Xijmuyubaj ta jchʼamtik kʼalal chchaʼkuxiik talel li buchʼutik kuxiik ta voʼne jech kʼuchaʼal Abel, Noe, Abraan, Sara, Moises, Rut, Ester xchiʼuk li Davide. Kʼalal mi chaʼkuxiike, jaʼ tskoltautik ta skʼatajesel ta paraiso spʼejel li balumile. Jech xtok, oy noʼox ep kʼusitik stakʼ jpastik.

Li Jeovae tskʼan ti xakuxi li ta paraisoe. Tee ep tajek kʼusi achʼ chachan ta stojolal Jeova ti labalik sbae. Jaʼ yuʼun li avie, ¡nopajkutik mas ta stojolal Jeova jujun kʼakʼal xchiʼuk jechuk-o jpastik ta sbatel osil!