¿Kʼu yuʼun chtun kuʼuntik ta jkuxlejaltik li Diose?

Li buchʼutik xchanojbeik lek skʼoplal kʼusi oy ta yoʼonton li krixchanoetike chalik ti oy to la kʼusi mas chtun yuʼun ta xkuxlejalik sventa chmuyubajike, ti maʼuk noʼox ti oy kʼusitik yuʼunike. Melel taje, yuʼun jutuk mu skotoluk li krixchanoetike jaʼ tspasik li kʼusi ch-akʼbat sbalil chaʼi ta xkuxlejalike o ti tskʼan chtunik ta stojolal yan buchʼu o yan kʼusi ti mas tsots skʼoplale. Jaʼ yuʼun, sventa jun yoʼonton xaʼi sbaik li junantike chchʼakbeik yorail sventa xojtikinik kʼusitik oy ta osiltik, tsbonik kʼusitik, tstijik son xchiʼuk yan kʼusitik. Pe muʼyuk jal ti jech jun yoʼonton chaʼi sbaik ti jech tspasike.

Li buchʼutik chchanik Vivliae mu labaluk chaʼiik ti stalel onoʼox jech chij-ayan ti oy kʼusi ta jkʼan chkichʼtik ta mukʼe. Li baʼyel skapituloaltak Genesise chal ti kʼalal la spas baʼyel krixchanoetik li Diose, nopoltik noʼox la xchiʼinan ta loʼil sventa lekuk xil sbaik (Génesis 3:8-10). Li Diose muʼyuk la spas sventa xuʼ sventain sba stuk li krixchanoe, yuʼun skʼan xloʼilaj xchiʼuk li Jpasvanej yuʼune. Li Vivliae nopajtik noʼox chal ti skʼan onoʼox jech xichʼ pasele.

Jech kʼuchaʼal liʼe, li Jesuse xi laj yale: «Xmuyubajik li buchʼutik oy ta sjol yoʼontonik ti chtun yuʼunik mantale» (Mateo 5:3, TNM). Jaʼ yuʼun, xuʼ xkaltik ti sventa xijmuyubajutike tsots skʼoplal xkojtikintik Dios ti jech onoʼox oy ta koʼontontik yojtikinele. ¿Kʼuxi xuʼ jpastik taje? Xi la stakʼ li Jesuse: «Muc ta vajuc noʼox ta xcuxi li cristianoe. Jaʼ ta xcuxi ta sventa scotol li scʼop chlocʼ ta ye Diose» (Mateo 4:4). ¿Kʼuxi xuʼ xakʼ jmuyubajeltik xchiʼuk ti oyuk sbalil xkaʼitik ta jkuxlejaltik li snopbentak Diose xchiʼuk li smantaltak ti te ta jtatik ta Vivliae? Jkʼeltik oxtosuk ti tsotsik skʼoplale.

Chtun kuʼuntik lekil beiltasel

Li avie ep li buchʼutik lek xchanojbeik skʼoplale chakʼik ta ojtikinel beiltaseletik ta sventa ti lekuk xil sbaik li krixchanoetike, ta sventa li kʼanelale, li kuxlejal ta utsʼ alalile, xchapanel kʼopetik, muyubajel xchiʼuk ti oyuk lek sbalil li kuxlejale. Akʼo mi jech, ¿mi mu meleluk ti jaʼ noʼox Jeova ti jaʼ li Jpasvanej kuʼuntik ti xuʼ xakʼbutik lekil beiltasel ta sventa skotol li kʼusitik taje?

Kalbetik junuk skʼelobil: Kʼalal oy kʼusi achʼ chamane, ti xuʼ van junuk kamara o komputadorae yichʼoj tal jlik vun ti jaʼ te chal kʼuxi xuʼ xichʼ tunesel leke. Li Vivliae xkoʼolaj kʼuchaʼal li vun taje, ti chal kʼuxi xuʼ jtunes lek jkuxlejaltik ti jaʼ yakʼojbutik li Diose. Te chalbutik kʼusi spas kuʼuntik ta sventa ti kʼu yelan laj kichʼtik pasele xchiʼuk ti kʼuxi xuʼ lek xkʼot ta lokʼel kuʼuntike.

Jech kʼuchaʼal jlik vun ti chal ti oy kʼusi xuʼ tsokes li aparatoe, li Vivlia eke chpʼijubtasvan ti oy kʼusi xuʼ tsokes li jkuxlejaltike. Li yantike oy van kʼusi chalik ti mas kʼun ta pasele. Pe, ¿mi mu meleluk ti jaʼ mas lek kʼusi chkʼot ta pasel xchiʼuk muʼyuk ta jta jvokoltik mi jaʼ ta jchʼunbetik li Jpasvanej kuʼuntike?

Li Jeova Diose ta xakʼbutik beiltaseletik, pe muʼyuk bu tsujutik sventa akʼo kakʼ ta jkuxlejaltik. Yuʼun ta skoj ti ep skʼanojutike xchiʼuk ti oyutik ta yoʼontone tskʼan tskoltautik, xi chalbutike: «Vuʼun li Mucʼul Diosun avuʼune, vuʼun ta jchanubtasot cʼusi lec ta pasel ta sventa alequilal; vuʼun ta jtojobtasot bu beal tscʼan chatam batel. Toj lec ti lajuc achʼun li cʼusitic laj calbote, yantic iʼepaj batel alequilal jech chac cʼu chaʼal nojelal ucʼum ti jechuque; muʼyuc spajeb chata cʼusi lec jech chac cʼuchaʼal nab ti mu xpaj ta yucʼlajetele» (Isaías 48:17, 18). Jaʼ xkaltik, mi ta jchʼunbetik li smantaltake xuʼ xijmuyubaj. Jaʼ yuʼun, chtun kuʼuntik ta jkuxlejaltik li Diose.

Chtun kuʼuntik xchapanobil jvokoltik

Oy chalik ti mu persauk xkoltaatik yuʼun Diose, yuʼun oy kʼusitik chkʼot ta pasel ta xkuxlejalik ti jaʼ ch-akʼbat snopik ti chʼabal jun jkʼanvanej Diose. Xuʼ van xi sjakʼbe sbaike: «¿Kʼu yuʼun chil svokol li lekil krixchanoetike? ¿Kʼu yuʼun oy neneʼetik muʼyuk lek chvokʼ ti muʼyuk kʼusi chopol spasojike? ¿Kʼu yuʼun muʼyuk tukʼilal li ta jkuxlejaltike?». Tsots skʼoplal li sjakʼobiltak taje xchiʼuk xuʼ xjel yuʼun jkuxlejaltik mi la jnabetik lek li stakʼobile. Mu xkakʼbetik xkuchin ta anil jvokoltik li Diose, jaʼ lek jkʼeltik baʼyel kʼuxi tstakʼ Vivlia li sjakʼobiltak taje.

Li ta yoxibal kapitulo ta Genesise chalbe sloʼilal ti kʼu yelan la stunes jkot kiletel chon li Satanás sventa xalbe Eva ti akʼo slobeik sat li jpets teʼ ti jaʼ chakʼ ta naʼel li kʼusi lek xchiʼuk kʼusi chopole, akʼo mi albilik xa onoʼox yuʼun Dios ti mu xuʼ sloʼike. Li Satanase xi laj yalbe li Evae: «Mu xachamic yuʼun. Yuʼun li Diose snaʼoj ti chjam asatic me laj aloʼique; chlic anaʼic cʼusi lec xchiʼuc cʼusi chopol. Chacoʼlajic jech chac cʼu chaʼal Dios» (Génesis 2:16, 17; 3:4, 5).

Kʼalal jech laj yal Satanás taje maʼuk noʼox laj yal ti la snop kʼop li Diose, laj yal xtok ti mu lekuk ch-ajvalilaje. Li pukuje laj yal ti jaʼ la mas lek chbat xkuxlejal krixchanoetik mi jaʼ chchʼunbeik smantale. ¿Kʼuxi chchapaj li kʼusi laj yichʼ alel taje? Li Jeovae laj yakʼ jelavuk kʼuk sjalil sventa xakʼ ta ilel ti jaʼ nopbil kʼop li kʼusi laj yichʼ alel ta stojolale. Taje jaʼ sventa xakʼik ta ilel Satanás xchiʼuk xchiʼiltak mi melel ti jaʼ mas lek chbat xkuxlejal krixchanoetik mi muʼyuk chchʼunbeik smantal Diose.

¿Mi kʼot onoʼox ta pasel li kʼusi laj yal li Satanase? ¿Mi lek kʼusi chkʼot ta stojolal krixchanoetik ti muʼyuk chventainatik yuʼun li Diose? Li il vokolile, ti muʼyuk tukʼilale, li chameletike, li lajele, li paskʼope, li milbaile xchiʼuk yan kʼusitik toj chopol ti ep xa jabiletik jeche, jaʼ skʼelobil ti muʼyuk kʼusi lek pasem yuʼunik li krixchanoetik ti mu skʼanik ventainel yuʼun Diose. Li Vivliae muʼyuk bu chal ti jaʼ ta smul Dios li kʼusitik chil-o svokol li krixchanoetike, yuʼun xi chal li Vivliae: «Oy bu ta xpechʼ ta teqʼuel xchiʼil li cristianoe» (Eclesiastés 8:9).

Jaʼ yuʼun chtun kuʼuntik li koltael chakʼ Diose. Maʼuk noʼox sventa jnabetik stakʼobil li kʼusi ta jvul-o koʼontontike, jaʼ sventa jnabetik li xchapanobil xtoke. ¿Kʼusi van tspas li Diose?

Chtun kuʼuntik li koltael chakʼ Diose

Li krixchanoetike mu onoʼox skʼan x-ipajik, xmalubik mi jaʼuk tskʼan chchamik. Ta skoj taje xchʼakojbeik ep yorail xchiʼuk ep slajesoj stakʼinik, pe mu kʼusi pasem yuʼunik. Oy xtoke tsnopik ti ta xkerem tsebajik mi chuchʼik jtosuk poxile, mi laj yuchʼik jtosuk voʼe o ti xbatik ta naklej ti bu chalik ti xuʼ xkerem stsebajike. Pe taje jaʼ noʼox jun vaychil, yuʼun muʼyuk kʼotem ta pasel.

Li Diose tskʼan ti lekuk xkuxlejalik xchiʼuk ti xmuyubajikuk li krixchanoetike. Yuʼun jech onoʼox oy ta yoʼonton kʼalal la spas li baʼyel krixchanoe, pe taje muʼyuk chʼayem-o ta sjol (Génesis 1:27, 28; Isaías 45:18). Li Jeovae chalbutik ta melel ti chkʼot ta pasel li kʼusi tskʼan tspase (Isaías 55:10, 11). Li Vivliae chal ti yaloj ta melel Dios ti chchaʼakʼ li Paraiso ti chʼay yuʼunik li Adán xchiʼuk Evae. Li slivroal Apocalipsise xi chale: «Li Diose ta scusbe loqʼuel scotol yaʼlel satic, jech muʼyuc xa bochʼo chcham, muʼyuc xa bochʼo chat yoʼnton, muʼyuc xa bochʼo ch-ocʼ, muʼyuc xa bochʼo cʼusi cʼux chaʼay. Yuʼun ilaj xa scʼoplal scotol ti jech toʼox oy ta baʼyuque» (Apocalipsis 21:4). ¿Kʼu yelan tspas Dios taje xchiʼuk kʼusi skʼan jpastik sventa jtabetik sbalil li kʼusi yaloj tspase?

Li Xnichʼon Dios ti jaʼ li Jesucristoe, la xchanubtas yajtsʼaklomtak sventa skʼanik ta orasion ti akʼo kʼotuk ta pasel kʼusi tskʼan yoʼonton li Diose. Epal krixchanoetike snaʼojik lek li orasion taje o chalilanik, oy junantike jaʼ sbi yuʼunik padrenuestro. Li orasione xi chlike: «Jtotic Dios, te oyot ta vinajel, ichʼbiluc ta mucʼ abi. Acʼo sta yorail chapas mantal, acʼo pasuc cʼusi tscʼan avoʼnton liʼ ta banamil jech chac cʼu chaʼal te ta vinajele» (Mateo 6:9, 10). Li Jeovae jaʼ tstunes Ajvalilal yuʼun sventa chchʼayesbe skʼoplal li il vokolil yakʼoj li chopol ajvalil krixchanoetike xchiʼuk chakʼ jun tukʼil achʼ balumil ti yaloj onoʼoxe (Daniel 2:44; 2 Pedro 3:13).a ¿Kʼusi van skʼan jpastik sventa jtabetik sbalil li kʼusi yaloj tspas Diose?

Li Jesuse oy kʼusi laj yal ti mu toj tsotsuk ta pasele: «Ti jech ta xcuxiic sbatel osile, yuʼun xayotquinicot ti atuc noʼox batsʼi cuxul Diosote, xchiʼuc xotquinic noxtoc li Jesucristo laj atac tale» (Juan 17:3). Mi ta jkʼanbetik koltael li Diose xuʼ jtatik kuxlejal sbatel osil. Li kʼusi jmalaojtik chkʼot ta pasel ta jelavel taje jaʼ yan srasonal kuʼuntik xtok ti chtun kuʼuntik ta jkuxlejaltik li Diose.

Jnopbetik xa skʼoplal li Diose

Oy xa van chaʼmiluk jabile laj yalbe skʼoplal Dios li jtakbol Pabloe, jaʼ laj yalbe li jnaklejetik ta Atenas ti ep ta tos kʼusi xchʼunojike: «Li stuque jaʼ ta xacʼ chijcuxiutic, xchiʼuc jaʼ ta xacʼ quichʼtic icʼ. Jaʼ ta xacʼbutic scotol. Yuʼun jaʼ ta sventa ti cuxulutique xchiʼuc ti ta jpastic cʼusi ta jpastique xchiʼuc ti liʼ oyutic ta sba banamile. Jech chac cʼu chaʼal laj yalic jayibuc bijil viniquetic avuʼunique: “Vuʼutic xnichʼnabutic li Diose”» (Hechos 17:25, 28).

Li kʼusi laj yalbe krixchanoetik ta Atenas li Pabloe melel onoʼox kʼalal to ta jkʼakʼaliltik. Li Jpasvanej kuʼuntike jaʼ chakʼbutik li ikʼ ti chkichʼtike, li jveʼeltike xchiʼuk li voʼ chkuchʼtike. Mu xijkuxi jechuk ti muʼyukuk chakʼbutik skotol kʼusitik lek li Jeovae. Pe, ¿kʼu yuʼun chakʼbe kʼusitik lek li krixchanoetike akʼo mi tstsakik ta venta ta xkuxlejalik o mi moʼoj? Li Pabloe laj yal «ti la spas cristianoetic li Diose, yuʼun jech acʼo saʼic li Diose. Me ta saʼilan yaʼyique, xuʼ ta staic. Yuʼun li Diose mu nomuc oy ta jtojoltic jujunutic» (Hechos 17:27).

¿Mi chakʼan chavojtikin mas li Diose? ¿Mi chakʼan chachanbe mas skʼoplal li kʼusi tskʼan tspase xchiʼuk ti chtojobtasvan sventa lek xijkuxi avi xchiʼuk ti jechuk-o ta sbatel osile? Mi jeche, ta jtijkutik avoʼonton sventa xavalbe li buchʼu laj yakʼbot li revista liʼe o li jtsʼibajometik yuʼune, yuʼun ta sjunul yoʼonton tskoltaoxuk.