Li Christopher, Hannah xchiʼuk Ginae mu stukikuk ti jech chaʼi sbaike. Epal krixchanoetik ta spʼejel Balumile lek xchʼunojik ti lek ch-ilatik yuʼun Diose. Pe ¿kʼu yelan chavaʼi aba li voʼote? ¿Mi nopol oyot ta stojolal chavaʼi? ¿Mi chakʼan chanopaj ta stojolal? ¿O mi chakʼan mas to chanopaj ta stojolal? Pe xuʼ van xi chajakʼbe abae: «Li Dios ti skotol xuʼ yuʼune, ¿mi xuʼ lek xilun ti jecheʼ krixchanoun noʼoxe?».

XUʼ XIJNOPAJUTIK TA STOJOLAL LI DIOSE

Li Vivliae chal ti xuʼ xijnopajutik ta stojolal li Diose. Jech kʼuchaʼal liʼe, li ta Isaías 41:8 chal ti ‹lek la skʼopon sbaik› xchiʼuk Dios li moltotil Abrahame. Jech xtok, li Santiago 4:8 xi chalbutike: «Nopajanic ta stojol li Diose, jech chnopaj ta atojolic ec». Taje jamal chakʼ ta ilel ti xuʼ xijnopajutik ta stojolale. Pe ¿kʼuxi xa onoʼox xuʼ xijnopajutik ta stojolal ti mu xkiltike?

Sventa jtakʼtik taje, jkʼeltik kʼuxi chlik chʼiuk ti lek xil sbaik chaʼvoʼ krixchanoetike. Jutuk mu skotoluk veltae jaʼo chlik kʼalal tsjakʼbe sba sbiik ta jujuntale. Ta skoj ti nopolik noʼox chloʼilajik, chalbe sbaik kʼusi tsnopik xchiʼuk kʼu yelan chaʼi sbaike, jaʼ chchʼi-o batel mas ti lek xil sbaike. Jech xtok kʼalal chakʼik persa oy kʼusitik lek tspasik ta jujuntale mas me tstsatsub-o batel ti lek xil sbaike. Taje chakʼ ta ilel ti jaʼ jech chkʼot ta pasel kʼalal chijnopaj ta stojolal li Diose. Jkʼeltik batel kuxi xuʼ jech xkʼot ta pasel taje.

¿Mi xuʼ van xkaltik ti jaʼ kamigotik jun krixchano ti mi mu jnabetik sbie? Ta melel moʼoj. Jech kʼuchaʼal laj yal jun ants ti likem ta Bulgaria ti Irina sbie: «Mu xuʼ lek xkil jbatik xchiʼuk Dios mi mu jnabetik li sbie». Pe jech kʼuchaʼal laj kiltik li ta baʼyel mantale, li Diose tskʼan ti xijnopajutik ta stojolale. Jaʼ yuʼun, li Vivliae chal ti Jeova sbi li Diose (Éxodo 3:14, Ch, kʼelo li tsʼib ta yok vune).

Pe, ¿mi oy van ta yoʼonton ta melel ti xkojtikinbetik xchiʼuk jtunesbetik sbi li Jpasvanej kuʼuntike? Nopo noʼox avaʼi liʼe: li sbi Diose —ti ta chanib letra laj yichʼ tsʼibael li ta hebreo ti ojtikinbil kʼuchaʼal Tetragrámaton— te van vukmiluk ta velta chvinaj li ta voʼne Tsʼibetik ta Hebreo Kʼope, ti ojtikinbil kʼuchaʼal Pokoʼ Testamentoe. Li biil taje jaʼ li mas chichʼ alel ta Vivliae. Ta melel, taje jaʼ jun sprevail ti oy ta yoʼonton Jeova ti jnabetik xchiʼuk ti jtunesbetik li sbie.a

Ta skoj ti chʼul xchiʼuk skotol xuʼ yuʼun li Diose oy buchʼutik tsnop ti mu jtatik-o ti jtunesbetik li sbie. Jech ta melel; muʼyuk onoʼox lek mi chopol ta jtunesbetik li sbie. Xkoʼolaj kʼuchaʼal kʼalal muʼyuk lek ta jtunesbetik sbi junuk jlekil amigotike. Akʼo mi jech, li Jeovae tskʼan ti akʼo kʼuxubinbatuk sbi yuʼun li yajtuneltake xchiʼuk ti xakʼik ta ojtikinele (Salmo 69:30, 31; 96:2, 8). Vuleso ta ajol ti xi la xchanubtas ta spasel orasion yajtsʼaklomtak li Jesuse: «Li voʼoxuque jaʼ jech xacʼopanic Dios chac liʼi: ‹Jtotic Dios, te oyot ta vinajel, ichʼbiluc ta mucʼ abi›». Chkichʼbetik ta mukʼ sbi kʼalal chkakʼtik ta ojtikinele, vaʼun chijnopaj-o mas ta stojolal (Mateo 6:9).

Li Vivliae chal ti Diose chakʼ tajek ta yoʼonton xchikintabel skʼop li ‹buchʼutik tsnopik (o chkʼuxubinbeik) li sbie› (Malaquías 3:16, TNM). Skotol li buchʼutik jech tspas taje, xi ch-albatik yuʼun li Jeovae: «Vuʼun ta jcolta loqʼuel ta sventa scotol cʼusiuc noʼox, yuʼun xiyotquinun [o «xojtikinik jbi» TNM], xchiʼuc vuʼun noʼox yichʼojun ta mucʼ. Cʼalal chiscʼanbun vocole, ta jtacʼbe li scʼope; cʼalal oy ep svocole, te ta jchiʼin o» (Salmo 91:14, 15). Jech kʼuchaʼal chkiltike, mi ta jkʼantik xijkʼot ta yamigo li Diose, skʼan xkojtikinbetik xchiʼuk jtunesbetik li sbie.

Li buchʼutik lek xil sbaike nopolik noʼox tskʼopon sbaik, xuʼ van ta telefono, ta koreo, ta video, ta karta o chbat saʼ sbaik. Jech chkʼot ta pasel ta sventa li Dios eke, mi ta jkʼantik lek xkil jbatik xchiʼuke skʼan nopolik noʼox jkʼopontik. Pe ¿kʼuxi van xuʼ jkʼopontik?

Jaʼo kʼalal ta jpastik orasion ta stojolale. Jaʼ noʼoxe, li skʼoponel Diose mu me xkoʼolaj xchiʼuk kʼalal ta jkʼopontik jun jchiʼiltik ta krixchanoale. Skʼan oyuk ta koʼontontik ti jaʼ ta jkʼopontik li Jpasvanej kuʼuntike, jaʼ xkaltik li buchʼu mas tsots skʼoplal ta vinajelbalumile. Jaʼ yuʼun skʼan xkichʼtik ta mukʼ kʼalal ta jkʼopontike. Jech xtok skʼan oy kʼusitik jpastik sventa xaʼi li kʼusi chkalbetike. Jkʼeltik oxtosuk.

Baʼyel, skʼan jaʼ jkʼopontik stuk li Jeovae, maʼuk skʼan kʼoponel Jesús, junuk lokʼol o junuk santo (Éxodo 20:4, 5). Li Vivliae jamal chal: «Mu me cʼusi xloʼilaj avoʼntonic yuʼun. Me oy cʼusi scʼan avuʼun chavaʼyique, cʼanbeic Dios, vocoletanic ta stojol, xchiʼuc tojbeic ta vocol» (Filipenses 4:6). Xchibal, skʼan xijkʼopoj ta sbi li Xnichʼon Diose, ti jaʼ li Jesucristoe. Xi laj yal stuke: «Muʼyuc bochʼo xuʼ chbat ta stojol Jtot ti me mu xtal ta jtojole» (Juan 14:6). Yoxibal, li kʼusi ta jkʼantike skʼan jechuk kʼuchaʼal tskʼan yoʼonton Diose. Xi chal li Vivliae: «[Jaʼ] spatubil coʼntontic ta stojol li Diose, jech cʼalal oy cʼusi ta jcʼanbetic jech chac cʼu chaʼal tscʼan stuque, ta jnaʼtic ti ta xaʼay jcʼoptique» (1 Juan 5:14).a

Ta melel, li chaʼvoʼ krixchanoetike muʼyuk me jal chamigoin sbaik mi jaʼ noʼox jun buchʼu chloʼilaje; skʼan xchikintabe sba sloʼilik. Taje jaʼ jech skʼan jpastik ta stojolal Dios ek, skʼan jchantik xchikintael li kʼusi chalbutike. ¿Pe kʼuxi van tskʼoponutik li Diose?

Li avie tskʼoponutik ta Skʼop, jaʼ xkaltik li ta Vivliae (2 Timoteo 3:16, 17). Kakʼbetik jun skʼelobil: nopo noʼox ti tstakbot talel junuk karta jun alekil amigoe. ¿Mi mu jechuk ti jaʼ xa tskʼoponot chavaʼi kʼalal chakʼelbe li skartae? Jech ta melel. Jaʼ jech chkʼot ta pasel kʼalal ta jkʼeltik li Vivliae, xkoʼolaj ti chkakʼ akʼo skʼoponutik li Diose. Jech oxal xi chal Gina ti laj kalbetik skʼoplal ta baʼyel mantale: «Mi ta jkʼan lek chilun li Diose, skʼan ta jchanbe li ‹skartae›, ti jaʼ li Vivliae». Xi to chal xtoke: «Ta skoj ti ta jkʼel skotol kʼakʼal li Vivliae, mas xa nopol ta xkaʼi jba ta stojolal». ¿Mi jech chapas jujun kʼakʼal li voʼot eke? Mi jech la apase, chavakʼ skʼoponot li Jeovae xchiʼuk mas me nopol chavaʼi aba ta stojolal.

«Mi oy kʼusi chtun avuʼune, te xavalbun, xuʼ xapat avoʼonton ta jtojolal ti chkakʼbote.» Taje mu jechuk chavalbe li buchʼu mu xavojtikine o li buchʼu jaʼ to chavojtikine, ¿mi mu jechuk? Pe jaʼuk li alekil amigoe ta sjunul avoʼonton jech chavalbe, yuʼun jkotoltik oy ta koʼontontik skoltael li kamigotaktike xchiʼuk ta jpastik li kʼusi tskʼanbutike.

Li Vivliae chal ti nopem onoʼox xaʼi Jeova ti oy kʼusi tspas sventa mas tskʼupin xkuxlejalik li yajtuneltake. Jun skʼelobile jaʼ li ajvalil Davide, ti jaʼ toʼox jun yamigo Diose, xi laj yale: «Mucʼul Dios, Dios cuʼun, toj ep xa li cʼusitic labalic sba laj apase; liʼ oy o avoʼnton ta jtojolcutic [...,] pero mu xuʼ cuʼun yalel scotol, yuʼun toj ven ep ta jyalel» (Salmo 40:5). Pe li Jeovae maʼuk noʼox oy kʼusi lek tspas ta stojolal li yajtuneltake, yuʼun oy kʼusi lek tspas xtok ta sventa li buchʼutik mu xojtikinike. ‹Ta xakʼbe sveʼelik, jech xkuxet noʼox yoʼontonik.› (Hechos 14:17.)

Ta skoj ti tskʼupin yakʼel kʼusitik li Jeovae, xijmuyubaj-o yuʼun, jech oxal sta-o ti xkakʼtik persa ti xmuyubaj kuʼuntik eke (Proverbios 27:11). Pe ¿kʼusi van skʼan jpastik sventa junuk noʼox yoʼonton kuʼuntik li Diose? Xi tstakʼ li Vivliae: «Mu me xchʼay ta avoʼntonic spasel li cʼusitic leque, xchiʼuc ti tscʼan chacoltavanique. Yuʼun jaʼ li matanal toj lec chil Diose» (Hebreos 13:16). ¿Kʼusi skʼan xal taje? ¿Mi jaʼ noʼox van ti mu jpastik li kʼusi chopol xchiʼuk ti jkoltatik yantike?

Moʼoj, maʼuk noʼox taje. Li Vivliae chal ti «me muʼyuc xchʼunojel coʼntontique, mu xuʼ lec chijyilutic li Diose» (Hebreos 11:6). Chal xtok ti «Abrahame lec laj yil sbaic xchiʼuc Dios», pe jaʼ to kʼalal laj xaʼox yakʼ xchʼunel yoʼonton ta stojolale (Santiago 2:23). Jech xtok, li Jesucristoe laj yal ti skʼan oyuk xchʼunel koʼontontik sventa xakʼbutik bendision li Diose (Juan 14:1). Vaʼun chaʼa, ¿kʼuxi xuʼ xatsʼites li xchʼunel oʼontonal ti jech tskʼanbe yamigotak li Diose? Li kʼusi baʼyel skʼan xapase, jaʼ ti xanopes aba ta xchanel li Vivliae. Jech chanaʼ li kʼusitik smalaoj akʼo xapase xchiʼuk xuʼ jun yoʼonton avuʼun. Mi chavakʼ persa ta yojtikinel leke xchiʼuk mi chachʼun li kʼusi chale, ta me xchʼi li xchʼunel avoʼontone xchiʼuk chnopaj mas ta atojolal (Colosenses 1:9, 10).

¿Kʼusi skʼan xapas sventa xanopaj ta stojolal li Diose? Laj xa jchantik tal jaytosuk kʼusitik skʼan jpastik sventa lek xkil jbatik xchiʼuk li Jpasvanej kuʼuntike.

1. Skʼan jnaʼtik xchiʼuk jtunesbetik li sbie, ti jaʼ li Jeovae.

2. Skʼan nopolik noʼox jkʼopontik ta orasion xchiʼuk jkʼel Jvivliatik.

3. Skʼan jpastik skotol ora li kʼusi tskʼanbutike.

¿Li voʼot une? ¿Mi yakal van chapas li kʼusitik laj yichʼ alel sventa xanopaj ta stojolal li Diose? ¿Mi oy van bu jtosukal skʼan mas xavakʼ ta avoʼonton spasel? Ta melel oy van bu skʼan mas xavakʼ persa spasel, pe mu xavikta aba, jaʼ nopbo li sbalil chatabe mi jech la apase.

Xi laj yal Jennifer ti likem ta Estados Unidose: «Kʼusiuk noʼox ti chkakʼtik persa spasel sventa xlekub mas ti kʼu yelan xkil jbatik xchiʼuk Diose, oy sbalil. Ta skoj taje ta jtatik-o ep bendision: ta jpat mas koʼontontik ta stojolal, ta xkojtikinbetik lek stalelal, pe li kʼusi mas leke, jaʼ ti chlik jkʼantik tajeke. Muʼyuk yan kʼuxi xuʼ lek xijkuxi-o».

¿Mi chakʼan ti jech lek chavil aba xchiʼuk li Dios eke? Li stestigotak Jeovae oy me tajek ta yoʼontonik tskoltaikot xchiʼuk chchanubtasvanik ta Vivlia ta moton. Xuʼ xabat xtok li ta Salon sventa Tsobobbail sbi yuʼunike, ti jaʼ te chbat yaʼiik tal mantale. Te chavojtikin krixchanoetik ti tsots skʼoplal chilik ti lek xil sbaik xchiʼuk Diose.a Ta kʼunkʼun jech chavaʼi aba kʼuchaʼal li jtsʼibajom yuʼun salmo ti xi laj yale: «Li vuʼune chinopaj ta atojol [Dios], yuʼun jaʼ toj lec chcaʼay» (Salmo 73:28).