Jkoltatik krixchanoetik sventa xchikintaik li kʼusi chal Diose
1. ¿Kʼusitik foyetoal laj yichʼ akʼel li ta Mukʼta Tsobajel ta oxib kʼakʼal ti jaʼ sbi: «Akʼo taluk li Ajvalilal yuʼun Diose», xchiʼuk kʼu yuʼun ti toj jtunelike?
1 Li ta Mukʼta Tsobajel ta oxib kʼakʼal ti jaʼ sbi: «Akʼo taluk li Ajvalilal yuʼun Diose», laj yichʼ akʼel chaʼlik achʼ foyetoetik, li june jaʼ Chikintao kʼusi chal Dios sventa chakuxi sbatel osil, li yan ti mas kʼun ta aʼibel smelolale jaʼ sbi Chikintao kʼusi chal Dios. Ta skoj ti muʼyuk mas kʼusi tsʼibabile kʼun noʼox ta jelubtasel ta yan kʼop. Kʼalal laj yichʼ akʼel ta mukʼta tsobajele yichʼoj xaʼox alel ti xuʼ xichʼ jelubtasel ta 431 kʼopetik li foyeto Chikintao kʼusi chal Dios sventa chakuxi sbatel osil sbie.
2. ¿Buchʼutik ta stabeik sbalil li foyetoetik taje?
2 ¿Buchʼutik van xuʼ stabeik sbalil? Jnoptik ta sventa li kʼusi xuʼ xkʼot ta pasel ta spʼejel Balumile:
• Kʼalal chchiʼin ta loʼil yajval na li jcholmantale chakʼ venta ti mu xkʼel lek yuʼun vun o mu xtojob skʼelel vune, taje jaʼo chakʼ venta li ta sba velta vulaʼale o jaʼo kʼalal chchaʼvulaʼane.
• Li jcholmantale chchiʼin ta loʼil krixchanoetik ti muʼyuk vunetik ta skʼopike o ti jutuk noʼoxe. Jech xtok, li bu chchol mantal tsobobbaile jutuk van mu skotolikuk ti mu snaʼ skʼelik vun li ta skʼopike.
• Li jcholmantale chcholbe mantal ta senya kʼop jun krixchano ti makal xchikin ti te nakal li ta yosilal bu chcholik mantale.
• Li jun totile tskʼan chchanubtas ta sventa kʼusi melel li xnichʼon ti mu to snaʼ skʼelel vune.
3. ¿Kʼu yelan pasbil li foyeto Chikintao kʼusi chal Dios sbie?
3 Ti kʼuyelan pasbil li foyetoetike. Jutuk tajek kʼusi tsʼibabil li ta foyeto Chikintao kʼusi chal Dios sbie. Jutuk mu skotoluk veltae oy jaychol kʼop li ta yok jujun pajinae xchiʼuk jun-chib teksto ta Vivlia ti chakʼ iluk kʼusi mas tsots skʼoplal li ta jujun xchanobile. ¿Kʼu yuʼun? Jnoptik noʼox ti chij-akʼbat junuk foyeto ti mu xkʼel kuʼuntik ta skoj ti ta yan kʼop oye xchiʼuk ti jelel tsʼibabile. ¿Mi oy van kʼusi chtun-o avuʼun manchuk mi kʼupilik tajek sba li slokʼoltake? Ta melel moʼoj. Jaʼ jech ek li buchʼutik mu snaʼik skʼelel vune, mu masuk xtun yuʼunik li vunetike manchuk mi ep kʼusitik tsʼibabil. Jaʼ yuʼun li ta foyeto liʼe jaʼ mas ep yichʼoj tal li lokʼoletik ti lek tajek tʼujbilike. Sventa kʼunuk noʼox ta chanele oy yuni senyailtak ti chakʼ iluk butik lokʼolal skʼan jkʼeltik batele.
4. ¿Kʼu yelan pasbil li foyeto Chikintao kʼusi chal Dios sventa chakuxi sbatel osil sbie?
4 Li foyeto Chikintao kʼusi chal Dios sventa chakuxi sbatel osil sbie jech onoʼox slokʼoltak xchiʼuk li foyeto Chikintao kʼusi chal Dios sbie. Li foyeto Chikintao kʼusi chal Dios sventa chakuxi sbatel osil sbie jaʼ chapanbil sventa li buchʼutik mu snaʼik lek skʼelel vune o ti yakal to chchanike. Mi yakal chkakʼtik chanubtasel ta Vivlia li ta foyeto Chikintao kʼusi chal Dios sbie, li jun foyetoe xuʼ skoltautik kʼalal chkakʼtik li chanubtasele. Smakoj chib pajina jujun xchanobil. Li ta jujun xchanobile yichʼoj tal jun sjakʼobil te ta slikeb li pajina ta tsʼetkʼobe, ti te chichʼ tabel stakʼobil li ta xchanobile. Li ta junantik lokʼoletike oy tekstoetik ta Vivlia xchiʼuk te chichʼ jambel mas smelolal. Ta xchikin epal pajinaetike, te ta yakʼol li snumeroal pajinae oy bikʼtal rekuadroetik ti saksaktik sbon ti chalbe to mas smelolale xchiʼuk chal bu chichʼ saʼel lokʼel ta Vivlia sventa jchantik xchiʼuk li buchʼu ta jchanubtastik ta Vivlia mi jech skʼan chkiltike.
5. ¿Bakʼin xchiʼuk kʼuxi xuʼ xkakʼtik li foyetoetike?
5 Kʼuxi xuʼ jtunestik. Xuʼ onoʼox me xkakʼtik ta cholmantal li foyetoetik mi sta-o chkiltike, manchuk mi maʼuk albil chichʼ akʼel li ta u taje (kʼelo li rekuadro «Kʼuxi ta akʼel»). Kʼalal oy buchʼu ta jchaʼvulaʼantike xuʼ xkalbetik ti oy kʼusi kichʼojbetik batele, vaʼun kakʼbetik li foyetoe.
6. ¿Kʼuxi xuʼ jtunestik li foyetoetik kʼalal chkakʼtik chanubtasel ta Vivliae?
6 Ta skoj ti muʼyuk sjakʼobil li foyeto Chikintao kʼusi chal Dios sbie maʼuk jech chichʼ chanel kʼuchaʼal li livro Chchanubtasvan ti chichʼ jakʼel xchiʼuk chichʼ takʼele. Kʼusuk slumalik li krixchanoetike lek tajek xaʼiik li loʼiletike. Jaʼ yuʼun tuneso lek li lokʼoletik sventa xavalbe loʼiletik ta Vivlia li buchʼu chachanubtase. Albo kʼusi skʼan xal li lokʼoletike. Muyubajan noʼox xchiʼuk tijbo yoʼonton sventa xal sloʼil. Kʼelo li tekstoetik ta yolon jujun pajinae xchiʼuk koʼol xachanik. Akʼo venta mi yakal chaʼibe smelolal, xchiʼuk sventa xal sloʼil eke skʼan oy kʼusitik xajakʼbe. Mi jaʼ tstunes li buchʼu chachanubtas ta Vivlia li foyeto Chikintao kʼusi chal Dios sventa chakuxi sbatel osil sbie koʼol xachanik li kʼusitik chal ta jujun lokʼole xchiʼuk li tekstoetik ta Vivliae.
7. ¿Kʼuxi xuʼ jkoltatik sventa xchʼiik ta mantal li buchʼu ta jchanubtastik ta Vivliae?
7 Jkoltatik yoʼ xchʼiik ta mantal li buchʼu ta jchanubtastik ta Vivliae. Kʼalal ta jchanubtastik ta Vivlia li jun krixchanoe xuʼ xtijbat-o yoʼonton sventa xchan mas skʼelel vun xchiʼuk ti x-ayan mas yojtikinel yuʼun ta stojolal Jeovae (Mat. 5:3, NM; Juan 17:3). Jech oxal, mi jaʼ yakaloxuk xchanel li foyeto Chikintao kʼusi chal Dios sbie, xuʼ me ta kʼunkʼun xchan-o batel skʼelel vun li buchʼu chachanubtas ta Vivliae, vaʼun ta mas tsʼakale xuʼ xalikesik xchanel li yan foyeto Chikintao kʼusi chal Dios sventa chakuxi sbatel osil sbie. Mi tsuts yuʼun xchanel buyuk junukal foyetoe, muʼyuk to me chapal sventa chichʼ voʼ. Yuʼun sventa xichʼ voʼe skʼan baʼyel xchan li livro Chchanubtasvane o yan vunetik ti xuʼ xkoltaat ta yaʼibel mas smelolal li Vivliae.
8. ¿Kʼu yuʼun skʼan jtojtik ta vokol li achʼ foyetoetike?
8 Li krixchanoetik ti tskʼan chkuxiik sbatel osile skʼan me xchikintaik kʼusi chal li Mukʼul Jpasmantal ta vinajelbalumile (Isa. 55:3). Li kʼusi tskʼan Jeovae jaʼ ti xchikintaik «scotol cristianoeti[k]» li kʼusi chale, manchuk mi mu snaʼik skʼelel vun (1 Tim. 2:3, 4). Xijmuyubaj tajek ti oy xa achʼ abtejebaletik sventa jchanubtastik krixchanoetik ta xchikintael li kʼusi chal Diose.
[Rekuadro ta pajina 3]
Kʼuxi ta akʼel
Akʼbo yil ta pajina 2 xchiʼuk 3 li yajval nae xchiʼuk xi xajakʼbee: «¿Mi ta van xakʼupin ti te chanaki jech kʼuchaʼal liʼe? [Akʼo stakʼ.] Li Vivliae [o li chʼul livro liʼe] chal ta melel ti tspas ta kʼupil sba Balumil li Diose, ti oy jun oʼontonale, ti chʼabal xa povreal xchiʼuk chameletike. Kʼelo avil kʼusi skʼan jpastik sventa xijkuxi li ta balumil taje. [Kʼelo li kʼusi chal ta akʼol li ta pajina 3, ti bu chalbe skʼoplal Isaías 55:3.] Liʼe chal ti skʼan jchikintatik li kʼusi chalbutik Diose. Pe ¿kʼuxi van ta jchikintatik li kʼusi chal Diose?». Saʼo li pajina 4 xchiʼuk 5, vaʼun jmoj xasabeik stakʼobil. Mi muʼyuk xokol li krixchanoe, iktabo li foyetoe vaʼun albo ti chasut yan velta sventa xachanike.