MANTAL TA SLIKEBALTIK PAJINA: ¿MI TE VAN CHLAJ SKʼOPLAL SKOTOL KʼALAL MI LIJCHAME?
¡Maʼuk te chlaj-o skʼoplal skotol kʼalal mi lijchame!
Li Betaniae jaʼ jun uni bikʼit jteklum ti te oxibuk kilometro snamal yiloj li Jerusalene (Juan 11:18). Kʼalal skʼan toʼox jayibuk xemana xcham li Jesuse oy kʼusi chopol kʼot ta pasel. Li Lázaro ti jaʼ yamigo Jesús ti skʼanoj tajeke ta anil ipaj, vaʼun cham.
Kʼalaluk laj yaʼi Jesús li aʼyej taje, laj yalbe yajtsʼaklomtak ti vayem la li Lazaroe xchiʼuk ti chbat la stij likele (Juan 11:11). Pe jaʼuk li yajtsʼaklomtake muʼyuk laj yaʼiik kʼusi la skʼan laj yal li Jesuse, jaʼ yuʼun xi laj yalanbee: «Li Lazaroe chamen o» (Juan 11:14).
Kʼalal chanib xaʼox kʼakʼal smukel li Lazaroe, li Jesuse kʼot ta Betania, vaʼun bat spatbe yoʼonton Marta jun xchiʼil ta vokʼel li Lazaroe. Li Martae xi laj yale: «Cajval, ti liʼuc oyucote, muʼyuc xcham ti jchiʼil ta voqʼuel jechuque» (Juan 11:17; 11:21, Ch). Xi la stakʼbe li Jesuse: «Vuʼun jchaʼcuxesvanejun, xchiʼuc vuʼun jʼacʼcuxlejalun. Li bochʼo ta xchʼun ti vuʼun Jcoltavanejune, acʼo me ta xcham, pero ta xcuxiic sbatel osil» (Juan 11:25).
Sventa xakʼ ta ilel ti melel li kʼusi laj yale, li Jesuse nopaj batel ta smukinal li Lazaroe, vaʼun xi avane: «¡Lázaro, locʼan tal!» (Juan 11:43). Toj chʼayal yoʼonton kʼotik li buchʼutik te oyike, yuʼun lokʼ talel li vinik ti chamem toʼoxe.
Li Jesuse xchaʼkuxesoj xa onoʼox chaʼvoʼ krixchanoetik. Jun veltae la xchaʼkuxes jun tseb, jaʼ li stseb Jairoe. Kʼalal skʼan toʼox xchaʼkuxes stseb Jairo li Jesuse, laj yal ti jaʼ noʼox ta xvaye (Lucas 8:52).
Jech kʼuchaʼal chkakʼtik ventae, kʼalal cham Lázaro xchiʼuk li stseb Jairoe, li Jesuse laj yal ti buchʼutik chamemike xkoʼolaj ti yakal ta xvayike. Taje jaʼ jun slekil kʼelobil, ¿kʼu yuʼun? Yuʼun kʼalal chijvaye muʼyuk kʼusi jnaʼtik ta j-echʼel xchiʼuk chakʼ ta aʼiel ti yakal ta jkuxtik ta sventa li vokoliletike xchiʼuk li kʼusi kʼux chkaʼitike (Eclesiastés 9:5, kʼelo li rekuadro ti bu chal: «Li lajele xkoʼolaj kʼuchaʼal kʼalal ochem tajek jvayeltike»). Li baʼyel yajtsʼaklomtak Jesuse snaʼojik lek kʼu yelan oyik li buchʼutik chamemik xae. Li Encyclopedia of Religion and Ethics xi chale: «Li yajtsʼaklomtak Jesuse xkoʼolaj kʼuchaʼal vayel chilik li lajelale, xchiʼuk li mukinale jaʼ yavil ti bu chkux yoʼontonik [...] li buchʼutik tukʼ xchʼunel yoʼontonik chamike».a
Solel tspat tajek koʼontontik ti jnaʼojtik xa ti jaʼ noʼox vayemik ta mukinal li buchʼutik chamemike xchiʼuk ti muʼyuk chil svokolike. Jech xtok, ta skoj ti jnaʼojtik xa lek kʼusi chkʼot ta jtojolaltik kʼalal mi lijchame, muʼyuk xa chijxiʼ yuʼun.
«CʼALAL ME ICHAM LI CRISTIANOE, ¿ME TA TO XCUXI YAN VELTA?»
Akʼo mi ta jkʼupintik kʼalal lek chijvayutik junuk akʼobale, ¿mi oy van buchʼu tskʼan chbat vayuk-o sbatel osil? ¿Kʼusi spatobil koʼontontik oy ta sventa li buchʼutik yakal chvayik ta lajelal ti chchaʼlikik talel jech kʼuchaʼal kʼot ta stojolal Lázaro xchiʼuk li stseb Jairoe?
Jech la sjakʼ jmoltotik Job kʼalal chcham xaʼox chaʼie: «Cʼalal me icham li cristianoe, ¿me ta to xcuxi yan velta?» (Job 14:14).
Kʼalal jech laj yalbe Dios ti jaʼ Skotol xuʼ yuʼune, xi la stakʼ stuk li Jobe: «Voʼot cha-ikʼvan, voʼon ta jtakʼbot. Oy ta avoʼonton chachaʼkʼel li yabtel akʼobe» (Job 14:15, TNM). Li Jobe xchʼunoj lek ti oy ta yoʼonton Jeova ti xkʼot skʼakʼalil chchaʼkuxes li tukʼil yajtunele. ¿Mi vokol van ta chʼunel laj yaʼi Job taje? Moʼoj.
Kʼalal chaʼkuxesvan li Jesuse jaʼ te vinaj ti akʼbat sjuʼel yuʼun Dios ta sventa li lajelale. Yuʼun li Vivliae chal ti Jesús avie jaʼ «oy ta [skʼob] sllavial li lajele» (Apocalipsis 1:18). Jech kʼuchaʼal oy sjuʼel la xchaʼkuxes Lázaro li Jesuse, li avi eke oy sjuʼel sventa xchaʼkuxesan ta jelavel li krixchanoetik ti chamemik xae.
Li ta Vivliae ep ta velta chal ta sventa li spatobil oʼontonal ti chchaʼkuxiik talel li buchʼutik chamemike. Xi-albat yuʼun jun anjel li Daniele: «Jun avoʼnton chacux. Tsʼacal chatots sventa chavichʼ li amoton ta slajebal cʼacʼale» (Daniel 12:13). Li Jesuse xi laj yalanbe li jsaduseoetike, jnitvanejetik ta judioetik ti muʼyuk toʼox xchʼunojik ta sventa li chaʼkuxesele: «Chʼayemoxuc. Mu xachʼunic cʼusi chal li scʼop Diose, xchiʼuc mu xachʼunic cʼu xʼelan stsatsal li Diose» (Mateo 22:23, 29). Li jtakbol Pabloe xi laj yale: «Jchʼunoj ti ta xchaʼcuxes animaetic li Diose [...]. Jchʼunojcutic ti ta xchaʼcuxiic li bochʼotic lequique xchiʼuc li bochʼotic chopolique» (Hechos 24:15).
¿KʼUSI VAN ORA CHCHAʼKUXIIK TALEL LI BUCHʼUTIK CHAMEMIKE?
¿Kʼusi van ora chchaʼkuxiik talel li buchʼutik lekike xchiʼuk li buchʼutik chopolike? Li anjele laj yalbe tukʼil Daniel ti ta xchaʼlik talel «ta slajebal cʼacʼale». Li Marta eke snaʼoj xa onoʼox ti Lazaroe «ta xchaʼcuxi ta slajebal cʼacʼal ti cʼalal yorail ta xchaʼcuxiic scotol li bochʼotic chamenique» (Juan 11:24).
Li Vivliae jaʼ tstsakbe skʼoplal Ajvalilal yuʼun Dios li «slajebal cʼacʼal» xie. Xi la stsʼiba li Pabloe: «Yuʼun li Cristoe jaʼ to tsventain o batel scotol, jaʼ to ti cʼalal pechʼbil ta teqʼuel chcom yuʼun scotol li yajcontrae. Li slajeb yajcontra chulese jaʼ li lajele» (1 Corintios 15:25, 26). Taje jaʼ jun srasonal ti toj tsots skʼoplal skʼan jkʼantik ta j-orasiontik ti akʼo xa taluk li Ajvalilal yuʼun Diose xchiʼuk ti akʼo spas kʼusi tskʼan yoʼonton Dios liʼ ta Balumile.b
Li Jobe snaʼoj xa onoʼox ti oy ta yoʼonton Dios ta xchaʼkuxes li animaetike. Mi kʼot ta pasel taje, muʼyuk xa buchʼu chcham xchiʼuk muʼyuk xa buchʼu xi tsjakʼbe sbae: «¿Mi te van chlaj skʼoplal skotol kʼalal mi lijchame?».
a Li jpʼel kʼop ta español «mukinal» xie, likem talel ta griego kʼop ti jaʼ skʼan xal «yavil kuxob oʼontonal».
b Mi chakʼan chachanbe mas yaʼyejal ta sventa li Ajvalilal yuʼun Diose, kʼelo li kapitulo 8 ta livro ¿Kʼusi chchanubtasvan ta melel li Vivliae?, ti pasbil yuʼun stestigotak Jeovae.