Li yajtunel Jeovae: yayij ta skoj jmultik
«Ti jech ep iyayij sbecʼtale, vuʼutic ta scoj jtoyobbailtic. Ti jech iʼixtolaj sbecʼtal ta utsʼintaele, vuʼutic ta scoj jmultic. [...] Ta sventa ti jaʼ ep ituchʼe, jech vuʼutic poxtabil lijcom.» (ISA. 53:5)
1. ¿Kʼusi skʼan oyuk ta joltik kʼalal mi kʼot skʼakʼalil li sNaʼobil slajel Cristoe, xchiʼuk kʼusi albil kʼopal tskoltautik ta sventa taje?
LI SNAʼOBIL slajel Cristo ti chichʼ pasel jujun jabile ta me skoltautik ta snopel lek li kʼusi kʼotem ta pasel yuʼun li slajel xchiʼuk ti laj yichʼ chaʼkuxesele. Taje tsvules ta joltik ti toj tsots skʼoplal spakbel skʼoplal li mukʼul pas mantal yuʼun Jeovae, li xchʼultajesbel sbie xchiʼuk li skʼoteb ta pasel kʼusi tskʼan tspase, ti te smakojbe batel skʼoplal li skolebal krixchanoetike. Li albil kʼop ti mas toj lek chalbe skʼoplal ti laj yakʼ sba ta matanal li Cristoe xchiʼuk ti kʼusi kʼotem ta pasel yuʼune jaʼ van li kʼusi chal Isaías 53:3-12. Li j-alkʼop Isaiase kak laj yal li vokoliletik chil yaJtunel Diose xchiʼuk lek jamal laj yalbe skʼoplal li slajele. Laj yalbe skʼoplal xtok li kʼusitik lekik tstaik li tʼujbil yajtsʼaklomtak Cristo xchiʼuk li yan chijetik ta skoj li matanal taje (Juan 10:16).
2. ¿Kʼusi chakʼ ta ilel li albil kʼop yuʼun Isaiase, xchiʼuk kʼuxi tskoltautik ti ta jchanbetik lek skʼoplale?
2 Kʼalal vukub toʼox siglo skʼan xvokʼ li Jesuse, li Jeovae laj yakʼbe snaʼ Isaías sventa kak xal ti tukʼ chakʼ sba li yaJtunele, akʼo mi toj tsots spasik ta preva. Jaʼ jech laj yakʼ ta ilel Dios ti spatoj tajek yoʼonton ti tukʼ yoʼonton chakʼ sba li xNichʼone. Ti ta jchanbetik lek skʼoplal li albil kʼop liʼe ta me skoltautik sventa oyuk lek xchʼunel koʼontontik xchiʼuk ti jkʼanojtikuk lek li Diose.
«Bajbil» xchiʼuk «muʼyuc [tsots] scʼoplal» laj yilik
3. 1) ¿Kʼu yuʼun lek la xchʼamik Jesús jechuk li judioetike? 2) ¿Kʼuxi la xchʼamik chaʼa?
3 (Kʼelo Isaías 53:3.) Toj tsots van laj yaʼi li jun noʼox Nichʼonil ti laj yikta li sTot ti skʼanoj tajeke, ti tal ta Balumile xchiʼuk ti laj yakʼ xkuxlejal sventa skolta lokʼel ta mulil xchiʼuk ta lajelal li krixchanoetike (Fili. 2:5-8). Li matanal taje oy kʼusi chkʼot ta pasel yuʼun ti mu jechuk kʼot ta pasel yuʼun li matanaletik ti chal sMantal Moisés ti skʼan xichʼ akʼele: jaʼ ti chichʼ pasel ta perton ta j-echʼel li mulile (Heb. 10:1-4). Li kʼusi skʼan spasik ox jechuk li krixchanoetike jaʼ ti lekuk la xchʼamik li Jesuse xchiʼuk ti lajuk stsakik ta ventae, jaʼ mas lek chʼamvanik jechuk li judioetik ti yakal tsmalaik li Mesiase (Juan 6:14). Pe li judioetike «bajbil» yuʼunik li Cristoe xchiʼuk «muʼyuc [tsots] scʼoplal» laj yilik jech kʼuchaʼal chal li albil kʼop yuʼun Isaiase. Xi la stsʼiba li jtakbol Juane: «Liʼ ivul ta stojol li yuʼuntaque, pero li yuʼuntaque muc scʼanic» (Juan 1:11). Xi laj yalbe judioetik ek li jtakbol Pedroe: «Li Dios yuʼun Abraham, yuʼun Isaac, yuʼun Jacobe, laj xa yacʼ ta ichʼel ta mucʼ li Yajtunele, jaʼ li Jesuse. Jaʼ ti laj avaqʼuic ta cʼabal ta stojol Pilatoe. Cʼalal ta ox scʼan scolta li Pilatoe, li voʼoxuque muc xacʼanic. Muc xacʼanic li Chʼul vinique, li Tuqʼuil vinique» (Hech. 3:13, 14).
4. ¿Kʼuxi ti la snopes sba ta chameletik li Jesuse?
4 Li Isaías xtoke laj yal ti «solel [ta] snopes sba lec ta xcuchel scotol vocol» o chameletik li Jesuse. Akʼo mi chal Vivlia ti oy bateltik lub li Jesuse, pe muʼyuk bu x-ipaj (Juan 4:6). ¿Kʼuxi ti la snopes sba ta chameletike chaʼa? Jaʼ ti kʼalal laj yojtikin krixchanoetik ti ip chaʼiik kʼalal la xchol mantale xchiʼuk ep buchʼutik la xpoxtaan ta skoj ti kʼuxubaj ta yoʼontone (Mar. 1:32-34). Jaʼ jech kʼot ta pasel yuʼun Jesús li albil kʼop liʼe: «Jaʼ la xcuch scotol li jchameltique; jaʼ la stsʼic scotol li cʼux vocol chquichʼtique» (Isa. 53:4 sbavokʼal; Mat. 8:16, 17).
Xkoʼolaj kʼuchaʼal «ch-acʼbat nucul yuʼun [li] Diose»
5. ¿Kʼusi la snop epal judioetik ta sventa li slajel Jesuse, xchiʼuk kʼu yuʼun jaʼ tsatsaj-o svokol laj yaʼi?
5 (Kʼelo Isaías 53:4 xchaʼvokʼal.) Toj jutuk ti buchʼutik kuxiik ta skʼakʼalil Jesús ti laj yaʼibeik smelolal kʼu yuʼun laj yil svokol xchiʼuk ti ichame. Yuʼun la snopik ti yakal ch-akʼbat stoj smul yuʼun Dios li Jesuse, ti xkoʼolaj kʼuchaʼal akʼbat tal vokoliletike o kʼusi kʼux chaʼi ti toj ibal sbae (Mat. 27:38-44). Li judioetike la spakʼtaik ta jchopol kʼoptaej Dios li Jesuse (Mar. 14:61-64; Juan 10:33). Jamal ta aʼiel ti muʼyuk bu jech la spas li Jesuse xchiʼuk muʼyuk bu la spas yan muliletik xtok. Pe ta skoj ti skʼanoj tajek li sTote, mas to tsatsaj-o svokol laj yaʼi ti chcham ta skoj ti pakʼtaat ta xchopol kʼoptael Diose. Manchuk mi jech, ta sjunul-o yoʼonton la spasbe li kʼusi tskʼan yoʼontone (Mat. 26:39).
6, 7. ¿Kʼusi smelolal ti laj yakʼ ta utsʼintael li tukʼil yaJtunel Jeovae, xchiʼuk kʼu yuʼun chal albil kʼop ti xmuyubaj ti jech la spase?
6 Pe li albil kʼop yuʼun Isaiase maʼuk noʼox chal ti ta la snop krixchanoetik ti «ch-acʼbat nucul yuʼun [Dios]» li Cristoe, yuʼun xi chal xtoke: «Li Mucʼul Diose jech la scʼan [o muyubaj] ti laj yacʼ ta utsʼintaele» (Isa. 53:10). Pe li Jeovae xi onoʼox yaloje: «Qʼuelavilic [...] vuʼun la jtʼuj; toj xcuxet coʼnton yuʼun», xi, ¿kʼusi smelolal ti xmuyubaj ti laj yakʼ ta utsʼintaele chaʼa? (Isa. 42:1.) ¿Kʼusi smelolal taje?
7 Sventa xkaʼibetik lek smelolal li jtuchʼ albil kʼop liʼe, skʼan jvules ta joltik kʼalal la xchibal kʼoptabe mukʼul pas mantal yuʼun Jeova li Satanase, la xchibal kʼoptabe xtok li stukʼil yoʼonton yajtuneltak Diose, li buchʼutik te oyik ta vinajele xchiʼuk li buchʼutik ta Balumile (Job 1:9-11; 2:3-5). Kʼalal tukʼ la yakʼ-o sba kʼalal to cham li Jesuse, jaʼ laj yakʼ ta ilel lek ti jecheʼ li kʼusi la xchibal kʼopta Satanase. Jaʼ jech, akʼo mi toj kʼux laj yaʼi Jeova ti laj yakʼ akʼo chamuk ta skʼob yajkontratak li xNichʼone, xmuyubaj ta jyalel kʼalal laj yil ti staoj-o yav li stukʼil yoʼontone (Pro. 27:11). Oy to kʼusi muyubaj-o xtok li Jeovae, jaʼ ti kʼalal cham li xNichʼone tstabeik sbalil li krixchanoetik ti tsutes yoʼontonike (Luc. 15:7).
«Ti jech ep iyayij sbecʼtale, vuʼutic ta scoj jtoyobbailtic»
8, 9. 1) ¿Kʼuxi ti yayij ta skoj jmultik li Jesuse? 2) ¿Kʼuxi jamal laj yal jtakbol Pedro ek?
8 (Kʼelo Isaías 53:6.) Xi jkoʼolaj kʼuchaʼal chʼayemal chij li jpas mulil krixchanoutike, yuʼun jech noʼox mu jta jkolebaltik ta skoj li chamele xchiʼuk li lajelal ti la jkuchintik yuʼun Adane (1 Ped. 2:25). Ta skoj ti chʼabal jtukʼiltike mi junuk buchʼu xchaʼman kuʼuntik li kʼusi chʼay yuʼun Adane (Sal. 49:7). Pe ta skoj ti skʼanojutik tajek li «Mucʼul Diose jaʼ laj yacʼbe xcuch scotol [jmultik]» li xNichʼon ti skʼanoj tajeke xchiʼuk ti jaʼ li tʼujbil yaJtunele. Li Cristoe laj yakʼ akʼo xyayijesat «ta scoj jtoyobbailtic» xchiʼuk laj yichʼ utsʼintael «ta scoj jmulti[k]», vaʼun kʼalal jokʼantat muyel ta jtel teʼe te xkuchoj muyel li jmultike xchiʼuk jaʼ cham ta jkojtik.
9 Xi la stsʼiba li jtakbol Pedroe: «Jaʼ jech tscʼan Dios ti laj yicʼoxuc ta stojole, yuʼun jaʼ jech laj yichʼ vocol ta aventaic ec li Cristoe. Jaʼ laj yacʼboxuc avilic cʼusi tscʼan chapasic, yuʼun jech acʼo atsʼaclinic batel. Jaʼ stuc la xcuch ta sbecʼtal li jmultic cʼalal jaʼo jocʼol ta cruze [«jtel teʼ», NM], yuʼun jech xuʼ chijchamutic ta sventa li mulile; jaʼ chijcuxiutic ta spasel li cʼusi tuqʼue». Xchiʼuk xi to laj yal ti la sta ta alel li kʼusi chal albil kʼop yuʼun Isaiase: «Li Cristoe ep ituchʼ sbecʼtal, yuʼun jech voʼoxuc colem lacomic» (1 Ped. 2:21, 24; Isa. 53:5). Vaʼun jaʼ jech xuʼ lek chil sbaik xchiʼuk Dios li jsaʼ muliletike. Jech kʼuchaʼal xi laj yal ta mas tsʼakal li Pedroe: «Li Cristoe laj onoʼox yichʼ vocol ec ti cʼalal icham ta scoj jmultique. Jun noʼox velta jʼechʼel la xchʼaybutic o. Li stuque muʼyuc smul, pero laj yichʼ vocol ta scoj jpasmuliletic, yuʼun jech chijyicʼutic batel ta stojol Dios» (1 Ped. 3:18).
«Icʼbil ibat ta milel jech chac cʼu chaʼal jcot chʼium chij»
10. 1) ¿Kʼuxi biiltase yuʼun Juan J-akʼvanej ta voʼ li Jesuse? 2) ¿Kʼu yuʼun sta-o li kʼusi laj yal Juane?
10 (Kʼelo Isaías 53:7, 8.) Kʼalal laj yil te xtal Jesús li Juan J-akʼvanej ta voʼe, xi tsots laj yale: «Qʼuelavilic, leʼ xa xtal li chʼium chij yuʼun Dios ti chchʼaybe smul scotol cristianoetic ta banamile» (Juan 1:29). Kʼalal la stunes li jpʼel kʼop «chʼium chij», xie, yuʼun van te ta sjol li kʼusi yaloj Isaías liʼe: «Icʼbil ibat ta milel jech chac cʼu chaʼal jcot chʼium chij» (Isa. 53:7). Jech xtok xi yaloj li Isaías ta sventa Jesuse: «Laj yacʼ ta milel sbecʼtal» (Isa. 53:12). Toj lek ta albel skʼoplal li ta yakʼobalil kʼalal la slikes li sNaʼobil slajele laj yakʼbe jun kopa yaʼlel tsʼusub li buluchvoʼ tukʼil yajtakboltake, vaʼun xi laj yalanbee: «Liʼi jaʼ jchʼichʼal sventa chcʼot ta pasel li cʼusi chapanbil onoʼoxe. Yuʼun ta xmal ta sventa ep cristianoetic, jech ep bochʼo tsta perdón yuʼun smulic» (Mat. 26:28).
11, 12. 1) ¿Kʼusi chakʼ kiltik ta sventa slajel Cristo ti ta sjunul yoʼonton laj yakʼ ox sba ta matanal li Isaaque? 2) ¿Kʼusi skʼan te oyuk ta joltik ta sventa Jeova, li Bankilal Abraham, kʼalal chi jbat ta sNaʼobil slajel Cristoe?
11 Li Jesuse ta sjunul yoʼonton laj yakʼ ta matanal xkuxlejal jech kʼuchaʼal la spas li Isaac skerem Abrahame (Gén. 22:1, 2, 9-13; Heb. 10:5-10). Akʼo mi ta sjunul yoʼonton la xchʼam Isaac ti xbat ta matanale, jvules me ta joltik ti jaʼ Abraham ti buchʼu lokʼ ta yoʼonton yakʼele (Heb. 11:17). Jaʼ me jech ek un, li Jesuse ta sjunul yoʼonton la xchʼam ti xbat ta matanale, pe jaʼ Jeova ti buchʼu lokʼ ta yoʼonton ti jech xichʼ pasele. Jaʼ yuʼun chaʼa, ti laj yichʼ akʼel ta matanal li Jesuse jaʼ me svinajeb ti skʼanoj tajek krixchanoetik li Diose.
12 Xi laj yal stuk li Jesuse: «Toj ep la xcʼuxubin scotol cristianoetic ta banamil li Diose, jech laj yacʼ li jun noʼox Xnichʼon oye, yuʼun jech mu chʼayeluc chbat li bochʼotic ta xchʼunic ti jaʼ Jcoltavanej yuʼunique; jaʼ ta xcuxiic o sbatel osil» (Juan 3:16). Xi la stsʼiba ek li jtakbol Pabloe: «Li Diose laj yacʼ ta ilel ti ta melel scʼanojutique, acʼo me solel yuxub jpasmulilutic, pero icham ta jcojtic li Cristoe» (Rom. 5:8). Jaʼ yuʼun chaʼa, akʼo mi ta jtsaktik lek ta mukʼ Cristo kʼalal ta jtabetik ta naʼel li slajele, mu me jchʼay ta joltik mi jsetʼuk ti jaʼ Jeova li Bankilal Abraham ti buchʼu laj yakʼ li matanal taje. Chi jkʼot ta sNaʼobil slajel Cristo sventa ta jkʼupil kʼoptatik li Jeova ti sta-oe.
Li Jtunele «ep bochʼotic muʼyuc smul chcʼotic» yuʼun
13, 14. ¿Kʼuxi ti «ep bochʼotic muʼyuc smul chcʼotic» yuʼun li yaJtunel Jeovae?
13 (Kʼelo Isaías 53:11, 12.) Xi laj yal Jeova ta sventa li tʼujbil yaJtunele: «Ta sventa li tuqʼuil Yajtunel Diose ep bochʼotic muʼyuc smul chcʼotic». ¿Kʼusi la skʼan laj yal taje? Te ta jtabetik jutuk stakʼobil li ta slajeb versikulo 12: «Jaʼ chcʼopoj [yaJtunel] ta stojol Dios ta sventa li jpasmuliletique», xi. Skotol li snitilulutik Adane ta mulil xa onoʼox chi jvokʼ, jpas mulilutik, jaʼ yuʼun «li stojol mulile jaʼ ti chijchamutique» (Rom. 5:12; 6:23). Jaʼ yuʼun skʼan lekuk xkil jbatik xchiʼuk li Jeovae. Li ta kapitulo 53 yuʼun Isaiase lek jamal chal kʼuxi kʼot ta jkʼopojel li Cristo ta sventa li jpas mulil krixchanoetike. Xi chale: «Jaʼ la xcuch li vocole, jech vuʼutic jun coʼntontic lijcom; ta sventa ti jaʼ ep ituchʼe, jech vuʼutic poxtabil lijcom» (Isa. 53:5).
14 Kʼalal la xkuch jmultik li Cristoe xchiʼuk ti cham ta jtojolaltike, «ep bochʼotic muʼyuc smul chcʼotic» yuʼun. Xi la stsʼiba li Pabloe: «Li Jtotic Diose jech la scʼan ti chacʼbe scotol stalel li Xnichʼone, xchiʼuc ti jaʼ ta sventa chlecub scotol li cʼusitic oye, me ta vinajel, me ta banamil. Lec chil scotol ta sventa xchʼichʼal li Xnichʼon icham» ta jtel teʼe (Col. 1:19, 20).
15. 1) ¿Buchʼutik skʼoplal chalbe Pablo kʼalal xi laj yale: «Li cʼusitic [...] ta vinajel», xie? 2) ¿Buchʼutik noʼox xuʼ slajesik li pan xchiʼuk li yaʼlel tsʼusub ta sNaʼobil slajel Cristoe, xchiʼuk kʼu yuʼun?
15 «Li cʼusitic [...] ta vinajel» ti lek xil sbaik xchiʼuk Jeova ta sventa ti la smal xchʼichʼel li Cristoe jaʼ li tʼujbil yajtsʼaklomtak Cristo ti ch-ajvalilajik xchiʼuk Jesús ta vinajele. Li yajtsʼaklomtak Cristo ti takbilik ta ikʼel «sventa [ch-ochik] ta vinajel[e]» «tstaic xcuxlejalic sbatel osil» (Heb. 3:1; Rom. 5:1, 18). Vaʼun chchʼamatik yuʼun Jeova, ch-akʼbat xkuxlejalik ti mu xvinaj ta kʼelele. Ch-akʼbat snaʼik yuʼun chʼul espiritu ti koʼol slekil yutsil tstaik xchiʼuk Cristoe xchiʼuk ti tʼujbilik sventa chkʼotik ta ajvalil xchiʼuk ta paleal li ta Ajvalilal ta vinajele (Rom. 8:15-17; Apo. 5:9, 10). «Israel chcʼotic ta sventa [Dios]» xchiʼuk ch-ochik li ta kʼusi «achʼ [chapanbile]» (Gál. 6:16; Jer. 31:31-34). Ta skoj ti ochemik ta sventa li kʼusi achʼ chapanbile, oy sderechoik ta slajesel li pan ta sNaʼobil slajel Cristoe xchiʼuk ti chuchʼik li yaʼlel tsʼusub oy ta kopa ti xi laj yalbe skʼoplal Jesuse: «Li kopa liʼi jaʼ smelolal li achʼ trato ti oy sbalil ta skoj li jchʼichʼele, ti jaʼ ta xmal ta akojike» (Luc. 22:20, NM).
16. 1) ¿Kʼusi jaʼ «li cʼusitic [...] ta banamil[e]»? 2) ¿Kʼuxi ti tukʼ skʼoplal chkʼotik ta stojolal Jeovae?
16 «Li cʼusitic [...] ta banamil[e]» jaʼik li yan xchijtak Cristo ti spatoj yoʼonton chkuxiik sbatel osil ta nichimal balumile. Li krixchanoetik taje tukʼ skʼoplal chkʼotik ta stojolal Jeova ti jaʼ koliyal li yaJtunel Diose. Ta skoj ti oy xchʼunel yoʼontonik ta sventa li matanal laj yakʼ Cristoe «laj yaqʼuic ta chuqʼuel ti scʼuʼique, xchiʼuc laj yaqʼuic ta sacubtasel ta sventa xchʼichʼel ti jcot ta Uni Chije», tukʼ ch-ilatik yuʼun Jeova, chkʼotik ta yamigotak maʼuk ta xnichʼnabtak ti mu xvinajik ta kʼelele xchiʼuk ch-akʼbat lek spatobil yoʼontonik ta sventa ti kuxul chkomik li ta «tsots [vokolile]» (Apo. 7:9, 10, 14, Ch; Sant. 2:23). Ta skoj ti muʼyuk te skʼoplalik ta achʼ trato li yan chijetike muʼyuk spatoj yoʼonton chkuxiik ta vinajel, muʼyuk tslajesik li pane xchiʼuk muʼyuk chuchʼik li yaʼlel tsʼusub ta sNaʼobil slajel Cristoe. Pe chakʼik ta ilel ti stsakojik lek ta mukʼ li sNaʼobil slajel Cristoe, jaʼ yuʼun chbat skʼelik li kʼusi chkʼot ta pasele.
Jtojbetik ta vokol li kʼusi spasoj Jeova xchiʼuk yaJtunele
17. ¿Kʼuxi la xchapan jol-koʼontontik sventa sNaʼobil slajel Cristo ti la jchanbetik skʼoplal li albil kʼopetik yuʼun Isaiase?
17 Ti la jchanbetik lek skʼoplal li albil kʼopetik yuʼun Isaías ta sventa li yaJtunel Diose jaʼ me tskoltautik yoʼ lekuk chapal jol-koʼontontik ta sventa li sNaʼobil slajel Cristoe. Jaʼ me skoltaojutik sventa «cacʼtic batel jsatic ta stojol ti Jesuse, yuʼun jaʼ ta sventa ta xlic talel ta stojol ti jech cʼotem ta oʼntonal ta xchʼunele, yuʼun jaʼ sbainoj ta stuqʼuibtasel ti bu jtamojtic batele» (Heb. 12:2, Ch). Laj kiltik ti mu jutebuk la stoy sba li xNichʼon Diose. Xmuyubaj tajek ti kʼusi la xchan ta stojolal Jeovae, yuʼun la stsak lek ta mukʼ kʼuchaʼal Mukʼta Jpas mantal li Diose, mu xkoʼolaj kʼuchaʼal li Satanase. Kʼalal la xchol mantal li Jesuse kʼuxubaj ta yoʼonton li krixchanoetike xchiʼuk ep buchʼutik la xpoxtaan ta skoj chamel o ta mantal. Jaʼ jech laj yakʼ ta ilel kʼusi tspas kʼalal mi och ta Ajvalil li Mesías li ta achʼ balumil kʼalal «me la sliques li tuqʼuil chapanel liʼ ta sba banamile» (Isa. 42:4). Ti ta sjunul yoʼonton la xcholbe skʼoplal li Ajvalilal yuʼun Dios ti jaʼ «luz [...] yuʼun li jujun lume», jaʼ tsvules ta joltik ti ta muyubajeluk noʼox jcholtik li lekil aʼyej ta spʼejel Balumile (Isa. 42:6).
18. ¿Kʼu yuʼun tstij koʼontontik li albil kʼopetik yuʼun Isaías sventa jtojbetik ta vokol Jeova xchiʼuk li tukʼil yaJtunele?
18 Li albil kʼopetik yuʼun Isaías xtoke ta me skoltautik ta stsakel mas ta venta li mukʼta matanal laj yakʼ Jeova kʼalal la stak tal ta Balumil li xNichʼon ti skʼanoj tajeke, sventa chil svokol xchiʼuk ti xcham ta jtojolaltike. Maʼuk muyubaj-o Jeova ti kʼalal laj yil chil svokol li xNichʼone, moʼoj, jaʼ muyubaj-o ti tukʼ yoʼonton laj yakʼ sba kʼalal to cham li Jesuse. Xi jmuyubaj kʼuchaʼal Jeova kʼalal la jchantik skotol li kʼusi la spas Jesús sventa chakʼ ta ilel ti jaʼ jun jut kʼop li Satanase, yuʼun jaʼ jech la xchʼultajesbe sbi li Jeovae xchiʼuk la spakbe skʼoplal li mukʼul pas mantal yuʼun Diose. Jech xtok la xkuch jmultik li Cristoe xchiʼuk cham ta jtojolaltik. Jaʼ jech tukʼ skʼoplal ch-ilatik yuʼun Jeova li juteb chijetike xchiʼuk li yan chijetike. Kʼalal mi la jtsob jbatik li ta sNaʼobil slajel Cristoe ta sjunul me koʼontontik ta jtojbetik ta vokol li kʼusi spasoj Jeova xchiʼuk li tukʼil yaJtunele.
Svulesobil ta joltik
• ¿Kʼu yuʼun chichʼ alel ti muyubaj-o Jeova ti laj yutsʼintabeik li xNichʼone?
• ¿Kʼuxi ti yayij ta skoj jmultik li Jesuse?
• ¿Kʼuxi ti «ep bochʼotic muʼyuc smul chcʼotic» yuʼun li yaJtunel Jeovae?
• ¿Kʼuxi la xchapan jol-koʼontontik sventa sNaʼobil slajel Cristo ti la jchanbetik skʼoplal li albil kʼopetik yuʼun Isaiase?
[Lokʼol ta pajina 28]
«Bajbil ta jʼechʼel, pero muʼyuc scʼoplal laj caʼitic»
[Lokʼol ta pajina 29]
«Laj yacʼ ta milel sbecʼtal»
[Lokʼol ta pajina 29]
Chbatik ta sNaʼobil slajel Cristo li yan chijetike, yuʼun chbat skʼelik li kʼusi chkʼot ta pasele