Kʼusitik kuchem yuʼun spasel li Ajvalilale: Chichʼ pakel jkʼoplaltik sventa oyuk jderechotik ta sventa li lekil aʼyejetike

KʼALAL yakal chachol mantale chavaʼi ti yakal chnopaj tal jkot patruyae. Kʼalal jaʼ to chlik kʼopojan ta yan nae, li achiʼil ta cholmantale chchʼay yoʼonton kʼalal chkʼot kotiuk jkot patruyae. Chlokʼ tal jun polisia xchiʼuk xi tsjakʼboxuke: «¿Mi voʼoxuk ti yakal chavalbeik skʼoplal Vivlia ta naetike? Kaʼiojkutik ti ep buchʼutik stikʼoj amulike». Li voʼot xchiʼuk achiʼile lek noʼox sba chavalik ti stestigooxuk Jeovae. ¿Kʼusi van chkʼot ta pasel?

Li stakʼobile te tsakal skʼoplal xchiʼuk li kʼusitik kʼotem ta pasel ta stojolal stestigotak Jeova leʼ xa tale. ¿Kʼu yelan yiloj stestigotak Jeova li ajvalil ta alumal ta voʼnee? ¿Mi xuʼ stʼuj stuk srelijion li krixchanoetike? Mi jaʼ jeche, jaʼ van ta skoj ti ep laj yakʼbeik yipal li ermanoetik ti yijik ta mantal leʼ xa tal ta sjaylajunebal jabil yoʼ «chichʼ pakbel skʼoplal sventa oyuk jderechotik ta sventa li lekil aʼyejetike» (Filip. 1:7). Pe buyuk noʼox ti nakalote, ti ta jchanbetik batel skʼoplal li butik la spasik kanal ta stojolal ajvalil li stestigotak Jeovae tstsatsubtas xchʼunel avoʼonton ta melel. Li ta jvokʼ liʼe ta jchanbetik jayibuk skʼoplal kʼusitik labal sba kʼot ta pasel ta sventa taje. Ti kʼutik yepal jpasojtik kanale jaʼ sprevail ti yakal xa chventainvan li Ajvalilale, yuʼun muʼyuk bu ep kʼusitik pasem kuʼuntik jechuk ti ta kipaluk jtuktike.