Muʼyuk xpakbatik li jsaʼkʼop paleetike

Li Artur ti jaʼ jun jkʼelvanej ta sirkuito yuʼun stestigotak Jeova te ta Armeniae yakal tsvulaʼan jun tsobobbail. Laj yakʼ venta ti muʼyuk to chcholik mantal ta karrito li ermanoetike. Sventa stijbe yoʼonton li ermanoetike, li Artur xchiʼuk yajnil ti Ana sbie xchiʼuk yan stestigo Jeova ti Yiraír sbie bat xcholik mantal ta karrito ta jun bikʼit jteklum. Jaʼ te la xcholik mantal ti bu stustun ch-echʼ krixchanoetike.

Junantik krixchanoetik ti te chjelavike laj yichʼik batel vunetik. Pe ta anil noʼox te kʼotik xtok li jkontrainvanejetike, te kʼotik chaʼvoʼ paleetik, li june la slik ta tekʼel li karritoe, laje tʼaxbat ta majel sat li Arture, toj bajel yalel ta lumtik li slentee. Li Artur, Ana xchiʼuk Yiraíre laj yalbeik ti mu saʼik kʼope, pe mi jaʼuk xaʼiik albel li paleetike. Li paleetike la xvochʼilanik ta tekʼel li karritoe xchiʼuk jecheʼ bu tanpuk bat li vunetike. Laje, la xchopol kʼoptaik xchiʼuk la sibtasik komel li ermanoetike.

Li Artur, Ana xchiʼuk Yiraíre bat yalbeik polisia li kʼusi kʼot ta pasele xchiʼuk la xcholbeik mantal junantik polisiaetik xchiʼuk yan j-abteletik te. Laje, laj yichʼik ikʼel batel ta s-ofisina li bankilal polisiae, yuʼun tskʼan tsnaʼ ek li kʼusi kʼot ta pasele. Li bankilal polisiae laj yakʼ venta kʼu yuʼun muʼyuk spak kʼoplal Artur ti lek tsinil vinik xvinaje. Vaʼun, muʼyuk xa la sjakʼ li kʼusi kʼot ta pasele, jaʼ xa noʼox la sjakʼ li kʼusitik xchʼunojik li stestigotak Jeovae. Kʼalal chanib xa ox ora te chloʼilajike, toj labal sba laj yaʼi li bankilal polisiae, jaʼ yuʼun xi laj yale: «¡Toj lek maʼ arelijionike, ta jkʼan chi-och ek!».

Li ta yokʼomale, bat ta cholmantal ta karrito xtok li Arture, te nopaj tal jun vinik ti laj yil li kʼusi kʼot ta pasel ta svoljeale. Kʼupil kʼoptaat li Artur ti muʼyuk x-iline xchiʼuk ti muʼyuk stsak ta kʼop li paleetike. Laj yal xtok ti muʼyuk xa tstsak ta mukʼ li paleetike.

Li ta bat kʼakʼale, li bankilal polisiae la skʼopon batel Artur yoʼ sut batel li ta snail chapanobbaile, yuʼun tskʼan to tsnabe mas smelolal li kʼusitik xchʼunojike. Te la xchikintaik chaʼvoʼ polisiaetik ek.

Li ta yokʼomal xtoke, li Arture bat yakʼbe yil videoetik ti lokʼemik ta Vivlia, vaʼun li bankilal polisiae laj yikʼ tal yan polisiaetik sventa skʼelik li videoe.

Oy epal polisiaetik ti ta sba to velta la xchikintaik mantale xchiʼuk lek laj yilbeik stalelal li stestigotak Jeovae, taje jaʼ ta skoj li xchopol talelal paleetike.