Kʼusitik laj yichʼ vaʼanel kʼalal skʼan toʼox xlik li tsatsal chamele

Ta smilal noʼox krixchanoetik chichʼik voʼ jujun jabil. Ja yuʼun, chtun mas naetik sventa xkichʼtik-o ta mukʼ li Jeovae. Jech oxal, li Departamento sventa Svaʼanel salonetik xchiʼuk yan kʼusitik ta spʼejel balumile la snop tsvaʼanik o chachʼubtasik mas ta 2,700 naetik li ta septiembre ta 2019 kʼalal ta agosto ta 2020.a

Pe li tsatsal chamel coronaviruse la smak ta be li kʼusitik chapanbil toʼoxe. Sventa xichʼik chabiel li ermanoetike xchiʼuk xichʼ chʼunbel smantal li ajvaliletike, li Komite sventa Vunetik yuʼun li Jtsop Jbeiltasbaneje laj to spajes jutuk mu skotoluk li kʼusi nopbil toʼox chichʼ pasele. Pe li ta septiembre ta 2019 kʼalal ta agosto ta 2020, kʼalal jutuk xa ox skʼan xlik li tsatsal chamele, tsuts svaʼanel xchiʼuk xchaʼmeltsanel mas ta 1,700 naetik sventa yichʼobil-o ta mukʼ Jeova. Jech xtok, tsuts svaʼanel mas ta sien abtelaletik ti tsots skʼoplal li ta junantik Beteletike. Jkʼeltik chaʼtosuk li abtelaletik taje xchiʼuk kʼuxi staojbeik sbalil li ermanoetike.

Betel ta Camerún. Li mol Betele toj kʼox xchiʼuk ep kʼusi skʼan meltsanbel. Te xkom ta jun mukʼta jteklum Duala. Li Komite sventa Vunetike la snopik chchaʼachʼubtasik li Betele, pe laj yakʼ venta ti mas to ep chlaj takʼine. La snopik xtok mi jaʼ mas lek ti xbat svaʼanik ta yan osil o ti smanik xchiʼuk xachʼubtasik jpʼejuk nae. Pe mu stakʼ laj yilik kʼuchaʼal tsnopike.

Pe jaʼ to laj yaʼi li ermanoetike, te tspasik jun karetera li j-abteletik li ta snorteal jteklum Dualae, ti te nopol xkom jun Salon sventa Asambleae. Mi la spasik li achʼ kareterae, tstabe sbalil li Betele xchiʼuk mas kʼun yoʼ xichʼ tael li kʼusitik chtune. Taje, jaʼ li kʼusitik chtune. Jaʼ yuʼun, li Jtsop Jbeiltasvaneje laj yal ti xuʼ xichʼ vaʼanel

Li ermanoetike la stojik jun empresa ti jaʼ yabtel tsvaʼanik na sventa spasik jaytosuk li abtelale. Koliyal taje mas jutuk laj takʼin xchiʼuk mas anil laj yichʼ pasel. Ti kʼu yepal laj takʼine mu sta jech yepal kʼuchaʼal snopojike, sovrain to chib miyon dolar li takʼine. Kʼalal jutuk xa ox skʼan xlik li tsatsal chamel coronaviruse, jelavik xa ox batel ta achʼ Betel li jbetelitaetike.

Li jbetelitaetik ta Camerune mas xa lek xchiʼuk mas xa jun yoʼonton ch-abtejik. Jaʼ jun matanal chaʼiik ti akʼbatik achʼ Betel yuʼun Jeovae. Jun nupultsʼakal xi laj yale: «Avie ta jkʼan mas tsots chi-abtejkutik, yuʼun tsots skʼoplal chkilkutik li matanal taje».

Ofisina sventa Sjelubtasobil Kʼop ta tojolabal (México). Li ta Betel ta Centroamérica ti nopol xkom ta Mexicoe oy jayibuk jabil te abtejik ta sjelubtasel kʼop li jtojolabaletike, pe li buchʼutik chkʼopojik ta tojolabale te nakalik ta smunisipioal Altamirano xchiʼuk Las Margaritas ti te van jmil kilometro xil li Betele. Ta skoj taje, li jelubtasej kʼopetike mu xa masuk xaʼiik kʼu x-elan chkʼopojik li ta skʼopike xchiʼuk li Betele vokol chaʼi tsta ermanoetik sventa xkoltavanik li ta sjelubtasel kʼope xchiʼuk sventa xkoltavanik spasel gravare.

Jech oxal, li Komite sventa Stsʼibael vunetik yuʼun li Jtsop Jbeiltasvaneje kʼot ta nopel yuʼun ti jaʼ lek ti tey xbat abtejikuk ti bu chkʼopojik ta tojolabale. Jech oxal, li Betele la sman xchiʼuk laj yachʼubtas jpʼej mukʼta na. Taje mas yalem lokʼ, jaʼ mas toyol lokʼ jechuk ti lajuk svaʼanik achʼ o ti lajuk xchʼamunik ofisinaetike.

Xi chal sloʼil jun jelubtasej kʼope: «Lajuneb jabil li-abtej ta sjelubtasel kʼop li ta Betele, pe muʼyuk bu la jta junuk krixchano ti jech chkʼopoj jech kʼuchaʼal voʼone. Pe li avi une, jaʼ xa te oy j-ofisinakutik ti bu naka tojolabal chkʼopojike. Skotol kʼakʼal ta jkʼoponkutik krixchanoetik ti koʼol jkʼopkutike. Mas xa jnaʼ kʼu yelan chkʼopojik li krixchanoetike xchiʼuk skoltaojun li ta kabtel ta sjelubtasel kʼope».

Kʼusitik nopbil chichʼ pasel li ta septiembre ta 2020 kʼalal ta agosto ta 2021

Li ta septiembre ta 2020 kʼalal ta agosto ta 2021, mi stakʼ laj kiltike, nopbil chichʼ pasel 75 ofisinaetik ti bu chichʼ jelubtasel kʼope xchiʼuk naetik sventa Chanob vunetik sventa Vivlia. Jech xtok, oy vaxakib abtelaletik ti jaʼ sbainoj junantik Betel ti chichʼ-o pasel echʼele. Te tsakal skʼoplal li abtelal ta Rámapo (Nueva York) xchiʼuk ti chichʼ jelbel yavil li Beteletik ta Argentina xchiʼuk Italiae. Jech xtok, skʼan jmil achʼ Salonetik sventa Tsobobbail. Maʼuk noʼox, yuʼun oy mas ta vakmil naetik ti bu ch-echʼ tsobajel ti chʼabal xa leke, ti skʼan saʼel yane xchiʼuk oy chanmil Salonetik sventa Tsobobbail ti skʼan achʼubtasele.

¿Bu chlokʼ stojol skotol taje? Li ermano Lázaro González ti te chtun li ta Komite sventa Betel ta Centroamérica jaʼ chalbutik. Xi laj yalbe skʼoplal li Ofisina sventa Sjelubtasobil Kʼop ta tojolabale: «Li ermanoetik ti te nakalik ti bu kʼalal sventainoj li Betele, chʼabal mas yuni takʼinik. Koliyal ti chakʼik matanal takʼin li ermanoetik ta spʼejel Balumile, jaʼ jech chvaʼi ofisinaetik sventa sjelubtasobil kʼop ta sventa li ermanoetik ti chkʼopojik ta batsʼi kʼopetike. Ta skoj li mantanal takʼin chakʼike, xuʼ xichʼik takel batel li jelubtasej kʼopetik li ta slumalik ti bu koʼol skʼopike. Koliyal chkalbekutik skotol li ermanoetik ti toj lek yoʼontonike». Kʼuchaʼal laj kakʼtik ventae, skotol li kʼusitik chichʼ pasele jaʼ koliyal ti chakʼik matanal takʼin li ermanoetik ta spʼejel balumile. Li matanal takʼine xuʼ te xichʼ akʼel ta Internet ta donate.jw.org.