Oyuk abalil xavaʼi aba

**¿KʼU YUʼUN TSOTS SKʼOPLAL TI OYUK JBALIL XKAʼI JBATIKE?**

Li buchʼutik oy sbalil chaʼi li xkuxlejalike xkuch noʼox yuʼun li svokolike, muʼyuk chchibajik ta anil.

Li buchʼutik xchanojbeik skʼoplale yakʼojik venta ti buchʼutik muʼyuk sbalil chaʼi sbaike mas anil ch-ipajik ta at-oʼonton (depresión, ansiedad), muʼyuk xa lek chveʼik o junantike toj echʼ xa noʼox chveʼik. Jech xtok, mas anil xuʼ xlik stsakik yuchʼel pox, slajesel poxiletik ti mu jechuk albilik yuʼun doktore o slajesel droga.
Li buchʼutik oy sbalil chaʼi sbaike muʼyuk tskoʼoltas sbaik xchiʼuk li yantike. Jaʼ yuʼun, lek xil sbaik xchiʼuk li yantike xchiʼuk tsta lek yamigotakik. Pe li buchʼutik muʼyuk sbalil chaʼi sbaike tsloʼiltaik li yantike, ta skoj taje muʼyuk xa lek chil sbaik.
Li buchʼutik oy sbalil chaʼi sbaike muʼyuk chchibajik-o kʼalal oy kʼusi tsnuptanike xchiʼuk muʼyuk kʼusi chmakatik sventa staik li kʼusi oy ta yoʼontonike. Pe li buchʼutik muʼyuk sbalil chaʼi sbaike chchibajik-o kʼalal mu spas yuʼunik li kʼusi snopojike akʼo mi ta jsetʼjuteb noʼox.

LI KʼUSI XUʼ XAPASE

Tʼujo lek avamigotak. Jaʼuk xachiʼin li buchʼutik lek x-ichʼvanik ta mukʼe, ti tskʼanik ti lekuk oyote xchiʼuk ti oy kʼusitik lek xakʼ avile.

«Li melel amigoile skotol ora chakʼ ta ilel ti chkʼanvane xchiʼuk jaʼ jchiʼiltik ta vokʼel chkʼot kʼalal oy jvokoltike» (Proverbios 17:17).

Koltao li yantike. Mi lek avoʼonton xchiʼuk mi oy kʼusitik lek chapas ta stojolal li yantike, xamuyubaj me ta melel xchiʼuk oy abalil chavaʼi aba akʼo mi oy buchʼutik mu x-akʼ yuʼunik sutel li kʼusi laj avakʼe. Jech xtok, xamuyubaj noʼox akʼo mi oy buchʼutik mu snaʼ stojik ta vokol.

«Jaʼ mas xmuyubaj li buchʼu chakʼe, jaʼ mu sta li buchʼu chichʼe» (Echos 20:35).

Koltao li avalab anichʼnab sventa oyuk sbalil xaʼi sbaike. Jtos ti kʼuxi xuʼ xapase jaʼ ti xavakʼ akʼo xchapan stuk li svokolik ti bu kʼalal xuʼ yuʼunike. Vaʼun, kʼalal mi mas xa tsots la snuptan svokolike, snaʼojik xa kʼuxi xuʼ xchapanik. Jech xtok, mas oy sbalil chaʼi sbaik xchiʼuk jtunel yuʼun kʼalal mi staoj xa ox svaʼlejike.

«Chanubtaso bu beal skʼan stam batel li kereme; vaʼun muʼyuk chkʼejpʼuj lokʼel ta be akʼo mi mol xa ox» (Proverbios 22:6).

Jun stestigo Jeova chakʼbe chanubtasel ta Vivlia jun ants te ta uchʼom kafe.

¿KʼUSI TA JPASKUTIK LI STESTIGOUNKUTIK JEOVAE?

Li jtsobajelkutik xchiʼuk li chanubtasel ta Vivlia chkakʼkutik li stestigounkutik Jeovae tskolta krixchanoetik sventa xlekub xkuxlejalik xchiʼuk ti oyuk sbalil xaʼi sbaike.

LI JTSOBAJELKUTIK CH-ECHʼ JUJUN XEMANAE

Li ta jtsobajelkutik jujun xemanae chkaʼikutik mantaletik ti lokʼem ta Vivliae. Tee chkaʼikutik tojobtaseletik ti xuʼ skoltaunkutik sventa oyuk jbalil xkaʼi jbakutike. Muʼyuk tojbil li ochebale xchiʼuk buchʼuuk noʼox xuʼ xbat. Mi la bate, te chavaʼibe smelolal. . .

. . . ti kʼu yuʼun ep abalil chilot li Diose.
. . . ti kʼuxi xuʼ oyuk sbalil xavaʼi li akuxlejale.
. . . ti kʼuxi xuʼ xata lek avamigotake.

Jech xtok, li ta tsobajeletike xuʼ xata lek avamigotak ti oyot ta yoʼonton ta melele (1 Korintios 12:25, 26).

Sventa xanabe mas skʼoplal kʼu yelan li jtsobajelkutike, ochan ta jw.org xchiʼuk kʼelo li video ¿Kʼu yelan li jtsobajelkutike?

LI CHANUBTASEL TA VIVLIA CHKAKʼKUTIKE

Ta matanal chkakʼkutik chanubtasel ta Vivlia xchiʼuk jaʼ ta jtuneskutik li livro Kʼupino akuxlejale. Li livroe yichʼoj talel sjakʼobiltak ti tskoltautik ta snopbel skʼoplal xchiʼuk ta yaʼibel lek smelolal li tekstoetik ti tsots skʼoplale. Jech xtok, yichʼoj tal kʼupil sba videoetik xchiʼuk lokʼoletik. Li chanubtasel ta Vivlia chkakʼkutike jaʼ sventa xlekub xkuxlejalik li krixchanoetike xchiʼuk ti oyuk sbalil xaʼi sbaike.

Mi chakʼan chanaʼ kʼu yelan li chanubtasel ta Vivlia chakʼik li stestigotak Jeovae, ochan ta jw.org xchiʼuk kʼelo li video ¿Kʼu yuʼun skʼan jchantik li Vivliae?