Skarta li Jtsop Jbeiltasvaneje

Kuni kermanotak:

Jkʼanojtik tajek li Dios xchiʼuk li krixchanoetike. Taje jaʼ tstij koʼontontik xchʼunel li mantal liʼe: «Batanik, bat pasik ta jchankʼop li krixchanoetik ta skotol jteklumetike, akʼbeik yichʼ voʼ» (Mat. 28:​19, 20; Mar. 12:​28-31). Mi ta melel jkʼanojtik li krixchanoetike, xuʼ me jkoltatik sventa xkʼot ta yoʼontonik mantal «li buchʼutik oy lek ta yoʼontonik stael li kuxlejal sbatel osile» (Ech. 13:48).

Li ta voʼnee, ta jkomes toʼox ta joltik li kʼusi chkaltik ta cholmantale xchiʼuk ta jnoptik toʼox ti persa skʼan xkakʼbetik komel vunetik li krixchanoetike. Pe li avie, jaʼ xa chkakʼ ta koʼontontik ti jnaʼtikuk lek kʼu yelan xuʼ jchiʼintik ta loʼil li krixchanoetike. Kʼalal jaʼ ta jloʼiltabetik li kʼusi oy ta yoʼontonike, jaʼ jech chkakʼtik ta ilel ti jkʼanojtike. Ta skoj ti jelel xkuxlejal li jujun krixchanoe, skʼan ti jtsaktik ta venta li kʼusi oy ta yoʼontonike o li kʼusi tsvul-o yoʼontonike, vaʼun jaʼuk xkalbetik skʼoplal kʼalal ta jchiʼintik ta loʼile. Sventa spas kuʼuntike, jaʼ me tskoltautik li foyeto liʼe.

Li foyeto liʼe yichʼoj 12 xchanobiltak. Li jujun xchanobile chalbe skʼoplal jtos talelal o li kʼusi xuʼ jpastik sventa xkakʼtik ta ilel kʼanelal kʼalal ta jkoltatik li krixchanoetik sventa xkʼotik ta yajchankʼop Kristoe. Li jujutos taje jaʼ jech laj yakʼ ta ilel li Jesuse o junuk yajtsʼaklom Kristo ta baʼyel siglo. Jaʼ yuʼun, li ta jujun xchanobile tey chal kʼuxi laj yakʼik ta ilel. Muʼyuk xa ta jkomes ta joltik li kʼusi chkaltik ta cholmantale, yuʼun li kʼusi ta jkʼan chkakʼbetik yil li krixchanoetike jaʼ ti jkʼanojantike. Li talelaletik o li kʼusitik chal ti xuʼ jpastik li ta foyeto liʼe jtunel tajek kuʼuntik. Pe junantik li kʼusitik taje mas jtunel kuʼuntik kʼalal ta jlikes jloʼiltik ta cholmantale, kʼalal ta jpastik revisitae o kʼalal chkakʼtik estudioe.

Kʼalal chachan li jujun xchanobile, nopbo lek skʼoplal kʼuxi xuʼ xavakʼ ta ilel ti bu chachol mantale. Mi jkʼanojtik tajek Jeova xchiʼuk li krixchanoetike, mas to me lek kʼusi chkʼot ta pasel kuʼuntik kʼalal ta jpastik ta yajchankʼop Kristo li krixchanoetike. Jaʼ yuʼun, akʼo persa ti jujunuk kʼakʼal masuk to xakʼan li Jeova xchiʼuk li krixchanoetike.

Ximuyubajkutik ti jmoj chijtunutik ta stojolal Jdiostike (Sof. 3:9). ¡Akʼo skoltaoxuk-o li Jeovae, yuʼun chavakʼik ta ilel ti akʼanojik li krixchanoetik kʼalal chakoltaik sventa x-ochik ta mantale!