«Ta jkʼan to jpʼisuk»

LI Albertoe buluchib sjabilal kʼalal lik xchan yuchʼel poxe.a Tstsob sbaik xchiʼuk yamigotak ta teʼtik xchiʼuk chlik tajinikuk, jech tspasik kʼuchaʼal li mukʼta jkoltavanejetik chlokʼ ta pelikulaetike. Li buchʼutik chlokʼ ta pelikulae mu melelikuk, pe li pox chuchʼik Alberto xchiʼuk yamigotake melel.

Pe li Antonioe 40 xaʼox sjabilal kʼalal lik meʼinuk yuʼun li poxe. Kʼalaluk like jpʼis o chaʼpʼis noʼox chuchʼ ta akʼobaltik, ta tsʼakale lik yuchʼ voʼpʼis o vakpʼis, pe ta mas tsʼakale muʼyuk xa chchap jaypʼis chuchʼ ta kʼakʼal.

Li Albertoe la xchʼam koltael sventa xkom yuʼun li poxe, pe li Antonioe la spʼaj li koltael akʼbat yuʼun yutsʼ yalal xchiʼuk yamigotak ti chat yoʼontonik ta stojolale. ¿Kʼusi kʼot ta pasel? Li Albertoe kuxul to sventa chchap li kʼusi kʼot ta pasel ta stojolale, pe li Antonioe jaʼtik to icham ta skoj ti yuchʼoj pox la stij batel skaroe.

Oy buchʼutik ta snopik ti muʼyuk ta sta svokol yuʼun yantik mi stuk chuchʼike, pe mu jechuk li kʼusi tsnopike: kʼalal ep chuchʼik poxe tsta svokol ek li yan krixchanoetike, bakʼintike toj tsots kʼusitik chkʼot ta pasel.b Ep ta veltae, jaʼ ta skoj pox chlik li utvaneje xchiʼuk li majvaneje, li saʼel kʼope, li milvaneje, li lajel ta karoetike xchiʼuk li ta abtelaletike, jech xtok te skʼoplal li yantik chameletike. Ta melel, li yuchʼel ep poxe toj ep chlaj stakʼin krixchanoetik yuʼun jujun jabil, pe muʼyuk tsakbil ta venta li svokol ta sta li buchʼu chuchʼe xchiʼuk li yutsʼ yalale.

Akʼo mi jech, «li buchʼutik nopolik ta xuchʼike maʼuk skʼan xal ti meʼinem yuʼunik uchʼ poxe —xi chalik li Institutos Nacionales de la Salud, ta Estados Unidose—, xchiʼuk li buchʼutik meʼinem yuʼune maʼuk skʼan xal ti skotol xa kʼakʼal ta xuchʼe». Oy ep buchʼutik muʼyuk chmeʼin yuʼunik li uchʼ poxe, pe akʼo mi jech, muʼyuk chakʼik venta ti toj ep xa chuchʼike. Yantik xtoke, nomtik to chuchʼik, pe mi laj yuchʼike, maʼuk noʼox voʼpʼis chakʼbeik.

Pe, ¿kʼuxi ta jnaʼtik mi ep chbat kuʼuntik yuchʼel? ¿Xchiʼuk kʼuxi ta jnaʼtik bakʼin jaʼ lek ti mu xa xbat jsaʼtik jpʼisuke? (Proverbios 23:29, 30, 35.) Taje te chichʼ takʼel li ta yan mantaletik chtale.

[Tsʼibetik ta yok vun]