«Lik jnop lek kʼusi yakal ta jpas ta jkuxlejal»

LI JKUXLEJAL TOʼOXE:

Te lichʼi ta Warialda, jun bikʼit lum ta Nueva Gales del Sur. Li ta Warialdae mas nopem xaʼi tstsʼunik chij, vakax, jech xtok, chabtelanik sbekʼ tsʼunobaletik. Li ta bikʼit lum taje lek chʼubabil xchiʼuk muʼyuk mas choplejal.

Ta skoj ti voʼon bankilalun ta jlajunvoʼalkutike, kʼalal oxlajuneb xaʼox jabilale lik abtejkun sventa jkolta kutsʼ kalal. Ta skoj ti jutuk li chanunaje ta ranchoetik noʼox li-abtej. Kʼalal voʼlajuneb xaʼox jabilale lik abtejkun ta spasel ta manxo kaʼetik.

Ti jech chi-abteje oy kʼusitik lek xchiʼuk chopol chkʼot ta pasel. Ta melel, ta onoʼox jkʼupin ti jech chi-abteje xchiʼuk ta jkʼupin xtok li kʼusitik xvinaj ta spat xokone. Kalal ta jtsan jkʼokʼ li ta ikʼ osile ta jkʼel muyel li Ue, li vinajel ti noj ta kʼanaletike xchiʼuk ti lek sikiket ikʼ kʼalal ch-ikʼub xaʼox osile, vaʼun xvul ta jol ti la jnop ti oy van Buchʼu spasoj skotol li kʼusitik labalik sba taje. Pe oy onoʼox kʼusitik chopol la jchan xtok, yuʼun li ta ranchoetike ep chopol kʼop chalik xchiʼuk mu vokoluk ta jta li sikʼolale. Taje anil noʼox nop kaʼi spasel.

Kʼalal vaxaklajuneb xaʼox jabilale libat ta Sydney. Ta jkʼan ox chi-och ta soltaroal, pe ta skoj ti muʼyuk ep chanunajemune muʼyuk la stikʼikun. Vaʼun, la jta kabtel ta Sydney xchiʼuk te likom ta naklej jun jabil. Jaʼo te liloʼilaj ta sba velta xchiʼuk li stestigotak Jeovae. Laj chʼam ti chibat ta stsobajelike xchiʼuk ta anil noʼox laj kakʼ venta ti jaʼ melel li kʼusitik chchanike.

Mu jaluk echʼe la jnop ti chisut batel yan velta ta abtel li ta osiltike. Vaʼun te likʼot ta Goondiwindi ta Queensland. Te laj ta kabtel, linupun, pe li kʼusi chopole te lik kuchʼ pox.

Oy chaʼvoʼ kalab jnichʼnabkutik. Kʼalal vokʼem xaʼox xchaʼvoʼale jaʼo lik jnop lek kʼusi yakal ta jpas ta jkuxlejale. Vul ta jol li kʼusi la jchan ta stsobajel stestigotak Jeova te ta Sydneye, vaʼun oy kʼusi la jpas.

La jta jun voʼneal revista Li Jkʼel osil ta toyole, te chal bu xkom li Betel ta Australia yuʼun stestigotak Jeovae. Vaʼun la jtsʼiba batel jun karta sventa jkʼan koltael. Ti kʼuyelan la stakʼbeikune jaʼ ti ta slekil yoʼonton bat svulaʼanun jun stestigo Jeovae. Vaʼun mu jaluk echʼe, yakal xaʼox chchanubtasun ta Vivlia.

TI KʼUYELAN LA SJEL JKUXLEJAL LI VIVLIAE:

Kʼalal lik jchan li Vivliae laj kakʼ venta ti ep kʼusitik skʼan jel ta jkuxlejale. Jun versikulo ti labal sba laj kaʼie jaʼ li kʼusi chal 2 Corintios 7:1. Li teksto taje jaʼ la stijbun koʼonton, yuʼun chal ti «tscʼan acʼo me jqʼuel jbatic ta sventa li cʼusi tsoques jbecʼtalti[ke]».

La jnop lek ti skʼan xkikta li sikʼolajel xchiʼuk yakubele. Ta skoj ti jal xa jech ta jpase mu kʼunuk ta iktael laj kaʼi. Pe jaʼ oy ta koʼonton spasel li kʼusi lek chil Diose. Li kʼusi mas la skoltaune jaʼ li kʼusi chal Romanos 12:2 ti xie: «Mu me xachanbeic stalel li cristianoetic liʼ ta banamile. Jaʼ tscʼan chjel batel atalelic li voʼoxuque, jech ch-achʼub batel li cʼusi chanopique». Kʼalal la jel li kʼusitik nopem xkaʼie laj kakʼ venta ti skʼan jel ek li jnopbene xchiʼuk ti jpʼaj li kʼusi chopol chil Diose. Koliyal ti la skoltaun li Diose kom kuʼun li sikʼolajele xchiʼuk li yuchʼel ep poxe.

Li kʼusi mas toj vokol laj kaʼi yiktaele jaʼ ti chkal kʼusitik chopole. La jchan li tojobtasel tsʼibabil ta Efesios 4:29 ti xi chale: «Mu xa me xlocʼ ta aveic scotol cʼusitic muʼyuc lec». Akʼo mi jech, mu onoʼox bu xjel kuʼun ta anil ti chopol chikʼopoje. Te la jta koltael xtok kʼalal la jnopbe skʼoplal li teksto ta Isaías 40:26. Yuʼun xi chalbe skʼoplal li epal kʼanaletik ta vinajele: «Toyo muyel asatic ta vinajel, qʼuelo avilic: ¿Bochʼo la spas scotol li cʼusitic te chvinaje? Li bochʼo tspuc batel ta jujun li cʼusitic spasoje, jaʼ chicʼan ta sbi jujun noxtoc. Me junuc muʼyuc chʼojol chcʼot yuʼun, yuʼun toj echʼem stsatsal, toj echʼem svuʼel, yuʼun jaʼ sventainoj scotol». Vaʼun la jnopbe skʼoplal ti mi oy sjuʼel sventa spas skotol kʼusitik oy ta vinajelbalumil li Diose, ti toj lek toʼox xkaʼi skʼelele, xuʼ yuʼun skoltaun xtok ta sjelel kʼusitik ta jkuxlejal sventa jaʼuk jpas li kʼusitik lek chile. Ta skoj ti laj kakʼ persa xchiʼuk ti la jpas tajek orasione, kʼunkʼun kom kuʼun ti chopol chikʼopoje.

KʼUSITIK SBALIL JTAOJAN:

Ta skoj ti li-abtej ta ranchoe muʼyuk mas liloʼilaj, yuʼun jutuk tajek krixchanoetik li tee. Pe ta skoj ti chakʼik chanubtasel ta stsobajelik li stestigotak Jeovae jchanoj xa kʼuyelan xuʼ mas lek xiloʼilaj. Jech xtok, skoltaojun ta yalbel yantik li lekil aʼyej ta sventa li Ajvalilal yuʼun Diose (Mateo 6:9, 10; 24:14).

Li jayib xa jabil echʼem tale ta jkʼupin tajek ti chitun kʼuchaʼal mol ta tsobobbaile. Jaʼ jun mukʼta matanal chkaʼi ti ta jkolta kʼu yepal xuʼ kuʼun li kermanotake. Pe li mukʼta bendision jtaoje jaʼ ti jmoj tsobol chitunkutik ta stojolal Jeova xchiʼuk kajnil ti tukʼ yakʼoj sba xchiʼuk ti lek yoʼontone xchiʼuk li jnichʼnabtak xtoke.

Ta jtojbe tajek ta vokol Jeova ti la xchanubtasune akʼo mi muʼyuk jal li-echʼ ta chanun (Isaías 54:13). Melel tajek li kʼusi chal Proverbios 10:22 ti xi chale: «Li bendición yuʼun Mucʼul Diose jaʼ jcʼulejaltic chcʼot». Oy ta koʼonton xchiʼuk kutsʼ kalal sventa jchankutik-o batel xchiʼuk xitunkutik sbatel osil ta stojolal li Jeovae.