¿Kʼuxi lik tal li kuxlejale?

Ta jaypʼeluk noʼox kʼope, xi chalbe smelolal li baʼyel livro ta Vivlia ti jaʼ li Genesise: «Ta sliqueb cʼalal lic ayinuc scotole, Dios la spas li vinajel xchiʼuc banamile» (Génesis 1:1). Kʼalal spasoj xaʼox teʼetik xchiʼuk chonbolometik li Diose, la spas li baʼyel krixchanoetik ti jaʼ li Adán xchiʼuk Evae. Pe jelelik xchiʼuk li chonbolometike, yuʼun li krixchanoetike jech stalelalik kʼuchaʼal li Diose, te tsakal skʼoplal ti xuʼ snop stukik li kʼusi tskʼan tspasike. Jaʼ yuʼun, oy ta sbaik li kʼusi tspasike. Mi jaʼ chchʼunbeik li smantaltak Diose, xuʼ ox xkʼotik ta baʼyel stot smeʼ krixchanoetik ti bu tskʼupinik jun oʼontonal xchiʼuk tukʼil kuxlejal ta sbatel osil ta Balumil ti jech onoʼox tskʼan tspas li Diose.

Akʼo mi jech, oy jun anjel ti la stunes krixchanoetik sventa jaʼ xichʼ pasel li kʼusi tskʼan stuke. Vaʼun jaʼ te lik tal li Satanase, ti «Jkontrainvanej» skʼan xale. Sventa sloʼla Eva li Satanase, la stunes jkot kiletel chon xchiʼuk laj yalbe ti jaʼ la mas lek chbat xkuxlejal mi muʼyuk chchʼunbe smantal Diose. La spasik kʼusi laj yal Satanás li Adán xchiʼuk Evae, ta skoj taje mu xa lekuk laj yil sbaik xchiʼuk li Jpasvanej yuʼunike. Kʼalal chopol kʼusi la spasik li baʼyel jtot jmeʼtike, chʼay yuʼunik ti xuʼ ox xkuxiik sbatel osile xchiʼuk la sjelubtasbutik li mulile, ti muʼyuk jtukʼiltike xchiʼuk li lajele.

Li Diose laj onoʼox yal ti tskʼan tstukʼibtas li kʼusi chopol kʼot ta pasel taje xchiʼuk ti xuʼ xkuxiik sbatel osil yan velta li snitilul Adane. Li Diose laj yal ti oy jun «snitilul», jaʼ xkaltik, oy buchʼu tʼujbil sventa chakʼbe slajeb li Satanase xchiʼuk skotol vokoliletik ti jaʼ la slikesik li Satanás, Adán xchiʼuk Evae (Génesis 3:15, Ch). ¿Buchʼu van jaʼ li «snitilul» taje? Ti kʼu xa sjalil echʼ tal li kuxlejale jaʼ tskoltautik ta snaʼel buchʼu.

Ti kʼu xa sjalil echʼ talele, li Satanase spasoj bu kʼalal xuʼ yuʼun sventa mu xkʼot ta pasel li kʼusi tskʼan tspas Diose. Li mulil xchiʼuk choplejale anil noʼox lik epajuk. Laj yal Dios ti tslajes ta nojelal ta voʼ li buchʼutik chopolike. Laj yalbe mantal Noé sventa smeltsan jun arka, taje jaʼ jun mukʼta kaxa ti xkajet ta ba voʼe, laj yichʼ albel xtok ti akʼo x-och xchiʼuk li yutsʼ yalale xchiʼuk li chonbolometik sventa kuxul xkomike.

Kʼalal lokʼik ta arka li Noé xchiʼuk yutsʼ yalal ti echʼ xaʼox jun jabil ti lik li Nojelal ta voʼe, lek xaʼox chʼubabil li Balumile. Pe li nitilulale jaʼ to chvul ta lokʼel.

​(Te lokʼem ta Génesis kapitulo 1 kʼalal ta 11; Judas 6, 14, 15; Apocalipsis 12:9.)