Chkʼot ta pasel li kʼusitik albile
Yakal chichʼ cholel ta spʼejel balumil li lekil aʼyejetik ta sventa li Ajvalilal yuʼun Diose, jech kʼuchaʼal yaloj xa onoʼox li Jesuse (Mateo 24:14). Li ta slivroal Daniele chal ti te likem tal ta stojolal Dios li Ajvalilal taje. Li ta kapitulo 2, chal li kʼusi chkʼot ta pasel ta stojolal li mukʼtik tsatsal lumetik ti te lik tal ta voʼneal Babilonia kʼalal to avi kʼakʼale. Li ta versikulo 44, te chal li kʼusi chkʼot ta pasel ta tsʼakale.
«Li Dios te oy ta vinajele tsvaʼan jun ajvalilal ti muʼyuk bu chichʼ chʼaybel-o skʼoplale. Li ajvalilal taje muʼyuk ch-och ta skʼob junuk jteklum. Jaʼ bikʼitik tslilin xchiʼuk tslajesbe skʼoplal skotol li ajvalilaletik taje, vaʼun stuk xa noʼox te chkom sbatel osil».
Li albil kʼop liʼe xchiʼuk li yantik albil kʼopetik ta Vivliae chal ti chakʼbe slajeb skotol ajvaliletik liʼ ta balumil li Ajvalilal yuʼun Diose xchiʼuk ti chakʼ jun oʼontonale. ¿Kʼu van yelan jkuxlejaltik xanaʼ mi tal li Ajvalilal taje? Jkʼeltik batel junantik li kʼusitik kʼupilik sba albil skʼoplal ti jutuk xa skʼan xkʼot ta pasele.
CHLAJ SKʼOPLAL PASKʼOP
Salmo 46:9. Li Diose «tslajesbe skʼoplal li paskʼopetik ta spʼejel balumile. Tskʼas li arkoe xchiʼuk tslilin li lansae; ta xchikʼbe ta kʼokʼ li skareta soltaroetike».
Nopo noʼox avaʼi kʼu van yelan jkuxlejaltik ti jaʼuk tskoltaik-o krixchanoetik ti kʼu yepal takʼin chlaj xchiʼuk li kʼusitik tspasik sventa paskʼope. Pe jaʼuk li Ajvalilal yuʼun Diose ta onoʼox slajesbe skʼoplal li paskʼopetike.
CHLAJ SKʼOPLAL CHAMEL
Isaias 33:24. «Mi junuk jnaklej ta balumil xi chale: ‹Toj ipun›».
Nopo noʼox avaʼi ti muʼyuk xa buchʼu ch-ipaj ta yoʼonton, ta kanser, ta askal chamel xchiʼuk muʼyuk xa yan chamel tstsakutik. Ti jechuk kuxulutik avie muʼyuk chtun kuʼuntik ospitaletik mi jaʼuk poxiletik ti jechuke. Taje jaʼ onoʼox li kʼusi chkʼot ta stojolal li krixchanoetike: ti muʼyuk xa ch-ipajike.
CHLAJ SKʼOPLAL VIʼNAL
Salmo 72:16. «Ch-ayan ep kʼusitik stakʼ lajesel li ta balumile, li ta joljolvitse solel busul ti kʼusi stakʼ lajesele».
Chchʼi ep ta tos veʼliletik ta balumil sventa skotol li krixchanoetike. Jaʼ yuʼun, chlaj skʼoplal li viʼnale.
CHLAJ SKʼOPLAL KʼUSI KʼUX-IP, LAJELAL XCHIʼUK VOKOLIL
Apokalipsis 21:4. «Tskusbat skotol yaʼlel satik yuʼun li Diose, muʼyuk xa lajelal, muʼyuk xa at-oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux chkaʼitik. Jelav xa skʼoplal skotol li kʼusitik oy toʼoxe».
Naka tukʼil krixchanoetik xa te chkuxiik li ta balumil mi pas ta Paraisoe. Taje jaʼ li kʼusi yaloj chakʼbutik li Jpasvanej kuʼuntik ti jaʼ li Jeovae.
«PERSA CHKʼOT TA PASEL»
¿Mi stakʼ chʼunel chavaʼi li kʼusi chal Vivliae? Akʼo mi ep krixchanoetik lek chaʼiik li kʼusi chal Vivliae, mu chʼunbaj chaʼiik ti xuʼ xkuxiik sbatel osile, yuʼun muʼyuk buchʼu kuxiem-o sbatel osil.
Voʼne xa tajek mosoinbilik yuʼun mulil xchiʼuk lajelal li krixchanoetike, jaʼ yuʼun chalik ti stalel jech ti chkil jvokoltike. Pe taje maʼuk li kʼusi snopoj tspas Dios ta stojolal li krixchanoetike.
Yoʼ jpat lek koʼontontik ti chkʼot ta pasel li kʼusi yaloj Diose, xi jamal yaloje: «Muʼyuk tsut tal ta jtojolal mi muʼyuk kʼotem ta pasele. Chkʼot ta pasel ta melel li kʼusi tskʼan koʼontone xchiʼuk persa chkʼot ta pasel skotol li kʼusi chkale» (Isaias 55:11).
Li Vivliae chal ti «mu snaʼ sjut [kʼop]» li Diose (Tito 1:2). Ta skoj ti jaʼ yalojbutik li kʼusitik toj alakʼik sba tspas ta jelavele, toj lek ti jnopbetik skʼoplal li sjakʼobiltak liʼe: «¿Mi ta melel xuʼ xijkuxi ta sbatel osil ta jun paraiso? ¿Kʼusi skʼan jpastik yoʼ jkʼupintik li kʼusitik yaloj tspas Diose?». Te ta jtabetik stakʼobiltak li ta yan mantaletike.