KʼUXI CHLAJ SKʼOPLAL LI VOKOLILE

Li Ajvalilal yuʼun Diose chakʼ talel jun oʼontonal

Li Ajvalilal yuʼun Dios ti tspas mantal ta spʼejel balumil xchiʼuk ti voʼne xa onoʼox tajek jmalaojtike jutuk xa tajek skʼan xakʼ talel jun oʼontonal xchiʼuk ti jmojuk oyutike. Li ta Salmo 72:7 chal ti «ta x-epaj li jun oʼontonale». Pe ¿bakʼin ch-ajvalilaj tal ta balumil li Ajvalilal yuʼun Diose? ¿Kʼuxi tspas yuʼun? ¿Kʼuxi van chatabe sbalil li ajvalilal taje?

¿BAKʼIN CHTAL LI AJVALILAL YUʼUN DIOSE?

Li Vivliae yaloj xa onoʼox li kʼusitik chkʼot ta pasel ti jaʼ «senyail» ti poʼot xa skʼan xtal li Ajvalilal yuʼun Diose. Taje te tsakal skʼoplal li paskʼopetik ta spʼejel balumile, li viʼnale, li chameletike, li epal nikeletike xchiʼuk ti yantik ch-epaj li choplejale (Mateo 24:3, 7, 12; Lukas 21:11; Apokalipsis 6:2-8).

Xi chal yan albil kʼope: «Chtal tsots vokolil li ta slajebal xa kʼakʼale, toj echʼ noʼox xibal sba. Yuʼun tskʼan sba stuk li krixchanoetike, batem ta yoʼontonik takʼin, [...] mu xchʼunbe smantal stot smeʼik, mu kʼusi snaʼ stojik ta vokol, muʼyuk stukʼil yoʼontonik, muʼyuk xa kʼanbail kʼuchaʼal stalel onoʼox jeche, mi jsetʼuk oy ta yoʼontonik tspas ta jmoj skʼopik, chchopol loʼiltavanik, mu snaʼ spajes sbaik, simaronik, muʼyuk skʼanojik li kʼusi leke, [...] xtoyet xa tajek chaʼi sbaik, jaʼ skʼanojik li kʼusi kʼupil sba chaʼi stukike jaʼ muʼyuk skʼanojik li Diose» (2 Timoteo 3:1-4). Oy onoʼox krixchanoetik ti jech stalelalike, pe li avie mas to ep ti buchʼu jech stalelalike.

Li albil kʼope lik kʼotuk ta pasel ta sjabilal 1914. Jlom j-al-loʼiletik, jpolitikoetik xchiʼuk jtsʼibajometike chalik ti jaʼo te lik sokuk tal balumil li vaʼ jabile. Jech kʼuchaʼal liʼe, xi la stsʼiba li j-al-loʼil Peter Munch ta Dinamarcae: «Li tsatsal paskʼop ta 1914 jaʼ te lik-o tal svokol li krixchanoetike. Lek toʼox tajek xbat skotol, [...] pe ta tsʼakale sok li kuxlejale, oy kʼusitik ti xibalik sbae, oy pʼajbail xchiʼuk buyuk noʼox ti muʼyuk jun oʼontonale».

Pe oy lekil aʼyejetik xtok. Mi echʼ xa ox li vokolile, chtal jun oʼontonal. Li senyailtak laj kalbetik skʼoplale chakʼ ta ilel ti poʼot xa spas mantal liʼ ta balumil li Ajvalilal yuʼun Diose. Li Jesuse laj yalbe skʼoplal jun senyail ti lek kʼusi chkʼot ta pasele, xi laj yale: «Li lekil aʼyejetik ta sventa li Ajvalilal liʼe ta xichʼ cholel ta spʼejel balumil sventa xaʼi skotol li jteklumetike, vaʼun ta xtal li slajebe» (Mateo 24:14).

Li stestigounkutik Jeovae jaʼ chkalbekutik batel skʼoplal li lekil aʼyejetik taje. Jaʼ yuʼun, li jrevistakutik ti mas ojtikinbile jaʼ sbi Li Jkʼel-osil ta toyole. Yakal chalbe skʼoplal li Ajvalilal yuʼun Jeovae. Jaʼ chalbe skʼoplal li kʼusi tspas li Ajvalilal yuʼun Dios liʼ ta balumile xchiʼuk li kʼusi tspas ta stojolal li krixchanoetike.

¿KʼUXI CHLIK SVENTAIN BALUMIL LI AJVALILAL YUʼUN DIOSE?

Sventa xkaʼibetik smelolale, jkʼeltik batel chantos li kʼusitik tsots skʼoplal chkʼot ta pasele:

Li Ajvalilal yuʼun Diose mu jmojuk ch-abtej xchiʼuk li jpolitikoetike.
Li jnitvanejetik ta politika ta spʼejel balumile chakʼik persa sventa jaʼuk-o x-ajvalilajik xchiʼuk tstsakik ta kʼop li Ajvalilal yuʼun Diose (Salmo 2:2-9).
Li Ajvalilal yuʼun Diose persa tslajesbe skʼoplal li ajvaliletik ti tskʼan jaʼuk-o x-ajvalilajike (Daniel 2:44; Apokalipsis 19:17-21). Li Vivliae chal ti jaʼ sbi Armajedon li slajeb paskʼop ta spʼejel balumile (Apokalipsis 16:14, 16).
Li buchʼutik chakʼ sbaik ta ventainel yuʼun li Ajvalilal yuʼun Diose kuxul chkomik li ta Armajedone xchiʼuk jun yoʼonton chkuxiik liʼ ta balumile. Jaʼ skʼoplal li «epal krixchanoetik» chal ta Vivliae, jaʼ xkaltik, yikʼaluk van ta smiyonal noʼox krixchanoetik (Apokalipsis 7:9, 10, 13, 14).

¿KʼUSITIK TSPAS LI AJVALILAL YUʼUN DIOSE?

Kʼalal ay ta balumil li Jesuse, laj yakʼ ta ilel jutuk li kʼusitik tspas kʼalal mi och xa ox ta ajvalil li ta Ajvalilal yuʼun Diose. La xpoxta jchameletik, koxoetik, pakʼchikinetik, maʼsatetik o yan jeltos chameletik (Mateo 4:23). La smakʼlin epal mil krixchanoetik (Markos 6:35-44). Laj yakʼ ta ilel ti xuʼ yuʼun spajesbe yip li ikʼe, li nabe xchiʼuk yan kʼusitik (Markos 4:37-41).

Li kʼusi mas tsots skʼoplal la spas Jesuse jaʼ ti la xchanubtas li krixchanoetik sventa junuk noʼox yoʼonton xkuxiik xchiʼuk ti jmojuk oyike. Li buchʼutik chakʼ ta xkuxlejalik li chanubtaseletik laj yakʼ ta chanel Jesuse chlekub stalelalik, vaʼun jun yoʼonton chkuxiik sbatel osil kʼalal mi jaʼ xa ox chventainvan li Ajvalilal yuʼun Diose. Mi junuk jchanubtasvanej spas yuʼun taje. Te chata junantik chanubtaseletik yuʼun Jesus li ta Mantaletik ta Vitse, te chal ta Mateo kapitulo 5 kʼalal ta 7. Ta jtijkutik avoʼonton sventa xachan. Kʼun ta aʼibel smelolal li kʼusi chale, pe jtunel tajek. Jnaʼojkutik ti chkʼot ta avoʼontone.

¿KʼUXI XUʼ XATABE SBALIL LI AJVALILAL YUʼUN DIOSE?

Li kʼusi baʼyel skʼan kuʼuntik yoʼ sventainutik li Ajvalilal yuʼun Diose jaʼ li yojtikinobile. Xi laj yalbe Dios ta orasion li Jesuse: «Jaʼ skʼoplal kuxlejal sbatel osil liʼe: ti ta xojtikinikote, li jun noʼox melel Diosote xchiʼuk ti chojtikinik ek li buchʼu la atak tale, li Jesukristoe» (Juan 17:3).

Ep sbalil ta jtabetik kʼalal chkojtikintik li Diose. Kalbetik skʼoplal chaʼtosuk. Baʼyel, jaʼ tskoltautik sventa xkakʼ mas xchʼunel koʼontontik ta stojolal li Diose. Ta skoj ti oy lek sprevail kuʼuntik li kʼusi jchʼunojtike, mas to chakʼ jchʼuntik ti yuʼun oy ta melel li Ajvalilal yuʼun Diose xchiʼuk ti poʼot xa xtale (Evreos 11:1). Xchibal, jaʼ tskoltautik sventa masuk to jkʼantik li Diose xchiʼuk li jchiʼiltaktike. Kʼalal jkʼanojtik li Diose, jaʼ tstij koʼontontik xchʼunbel smantal. Jech xtok, kʼalal jkʼanoj li jchiʼiltaktike, jaʼ tstij koʼontontik ta xchʼunel li tojobtasel laj yal Jesus ti ojtikinbil kʼuchaʼal li Mukʼul Lekil Mantale: «Li kʼusitik chakʼan akʼo spasboxuk li krixchanoetike jechuk me xapasbeik ek» (Lukas 6:31).

Li Jpasvanej kuʼuntike jaʼ jech kʼuchaʼal jun lekil totil ti tskʼan lek chbat jkuxlejaltik xchiʼuk tskʼan ti jkʼupintik «li batsʼi mero kuxlejale» (1 Timoteo 6:19). Li jkuxlejaltik avie maʼuk jaʼ li mero kuxlejale, yuʼun ta smiyonal noʼox krixchanoetik mu kʼunuk chaʼi li xkuxlejalike. Pe ¿kʼu yelan li batsʼi mero kuxlejale? Jkʼeltik batel jaytosuk li kʼusitik kʼupilik sba tspas li Ajvalilal yuʼun Dios ta stojolal li krixchanoetike.

LI MERO KUXLEJALE

«Kʼalal jaʼo ch-ajvalilaje, xnichinajik noʼox li buchʼutik tukʼike, ta x-epaj li jun oʼontonale [...]. Oy buchʼutik tsventain [...] kʼalal to ta spajeb balumil» (Salmo 72:7, 8, 13, 14).
Li Diose «tslajesbe skʼoplal li paskʼopetik ta spʼejel balumile. Tskʼas li arkoe xchiʼuk tslilin li lansae» (Salmo 46:9).
«Ch-ayan ep kʼusitik stakʼ lajesel li ta balumile, li ta joljolvitse solel busul ti kʼusi stakʼ lajesele» (Salmo 72:16).
«Ta xlik svaʼan snaik sventa te chnakiik, ta stsʼun s-uvaik sventa tslobeik sat. Muʼyuk bu tsvaʼanik naetik ti yan-o xa buchʼu te chnakie mi jaʼuk tstsʼunolajik ti yan-o xa buchʼu tslajesbe sate. Yuʼun [...] ta skʼupinik lek yabtel skʼobik li buchʼutik jtʼujoje» (Isaias 65:21, 22).
«Te oy ta stojolal krixchanoetik li skarpana Diose [...]. Tskusbat skotol yaʼlel satik yuʼun li Diose, muʼyuk xa lajelal, muʼyuk xa at-oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux chkaʼitik» (Apokalipsis 21:3, 4).

Jtsop krixchanoetik yakal tskʼupinik li kuxlejal ta paraisoe — Li Ajvalilal yuʼun Diose jaʼ chakʼ ti junuk koʼonton xijkuxie xchiʼuk ti oyuk jveʼel jkotoltike.