Kʼalal mu xa xuʼ avuʼun chavaʼie

Xi chal Adriana ta Brasil: «Ta toʼox jvul koʼonton skotol kʼakʼal. Ta skoj taje, ta xa ox jmil jba».

¿MI OY jech avaʼioj aba? Mi jeche, xavaʼibe van smelolal ti kʼu yelan chaʼi sba li Adrianae. Li stuke toj ep toʼox kʼusi tsvul-o yoʼonton xchiʼuk muʼyuk xa spatobil yoʼonton chaʼi. Ta tsʼakale, albat ti tsots ip ta at-oʼontone.

Jkʼeltik kʼusi kʼot ta stojolal Kaoru ta Japón ti la xchabi stot smeʼ ta skoj ti ipajike xchiʼuk ti oy xa sjabilalike. Xi chal kaʼitike: «Li vaʼ jabiletike, solel mu xa jnaʼ kʼusi ta jpas ta skoj ti jaʼo ep tajek kabtele. Ta tsʼakale, mu xa jkʼan lek xiveʼ xchiʼuk muʼyuk xa lek chivay. Ta jkʼan xa ox chicham kaʼi sventa mu xa xkil jvokole».

Xi chal jun vinik ta Nigeria ti Ojebode sbie: «Skotol kʼakʼal ta jvul koʼonton xchiʼuk kʼusiuk noʼox chi-okʼ-o yuʼun. La jnop ti ta jmil jbae». Li Ojebode, Kaoru xchiʼuk Adrianae muʼyuk onoʼox la smil sbaik, pe kʼux ta alel ti jutuk mu vaxakib sien mil krixchanoetik tsmil sbaik jujun jabile.

¿BU XUʼ JTATIK KOLTAEL?

Jaʼ mas ep tsmil sbaik li viniketike, yuʼun chkʼexavik ta skʼanel koltael. Akʼo mi jech, li Jesuse laj yal ti chtun yuʼunik doktor li buchʼutik ipike (Lukas 5:31). Jaʼ yuʼun, mu xakʼexav ta skʼanel koltael mi jech chavaʼi abae. Li buchʼutik ipik ta at-oʼontone jaʼ te staojik koltael li ta poxiletike. Li Ojebode, Kaoru xchiʼuk Adrianae la saʼik koltael ta doktoretik, vaʼun mas xa jun yoʼontonik li avie.

Junantik doktoretike chalik ti skʼan xichʼik poxiletik xchiʼuk skʼanik chiʼinel ta loʼil li buchʼutik ipik ta at-oʼontone. Jech xtok, skʼan xkoltavanik li yutsʼ yalalik xchiʼuk yamigotakike, skʼan xaʼibeik smelolal ti kʼu yelan chaʼi sbaike xchiʼuk ti oyuk smalael yuʼunike. Li buchʼu xuʼ lek xkamigointike jaʼ li Jeovae xchiʼuk tstunes Vivlia sventa skoltautike.

¿MI CHLAJ VAN SKʼOPLAL LI AT-OʼONTONE?

Li buchʼutik ipik ta at-oʼontone skʼan jal xichʼ xpoxilik xchiʼuk oy kʼusitik skʼan sjel ta xkuxlejalik sventa xkuch batel yuʼunike. Jaʼ yuʼun, mi ipot ta at-oʼontone pato avoʼonton ti oy kʼusi lek chata ta jelavele. Jaʼ jech tsnop li Ojebodee, yuʼun xi chale: «Ta jkʼan xa chkʼot ta pasel li kʼusi chal ta Isaias 33:24, ti chkʼot yorail muʼyuk xa buchʼu xi chale: ‹Toj ipun›». Tspat van tajek avoʼonton ek ti yaloj ta jamal Dios ti chakʼ «jun achʼ balumil» ti bu muʼyuk xa kʼusi kʼux chkaʼitik xchiʼuk ti jun xa koʼontontike (Apokalipsis 21:1, 4). Chlaj skʼoplal ti chavul avoʼontone xchiʼuk muʼyuk xa bu chtal ta ajol (Isaias 65:17).

Tekstoetik ta Vivlia ti xuʼ skoltaote

Li Diose xaʼibe lek smelolal ti kʼu yelan chavaʼi abae

«Jtsakoj lek abatsʼikʼob voʼon ti Jeovaune, voʼon li Adiosune, xi chkalbote: ‹Mu xaxiʼ. Voʼon ta jkoltaot›» (Isaias 41:13).

Jaʼ noʼox stuk Jeova xaʼibe lek smelolal ti kʼu yelan chkaʼi jbatike xchiʼuk oy ta yoʼonton tskoltautik.

Nopbo skʼoplal li kʼusi chal Vivliae

Li j-alkʼop Eliase «la skʼan ti akʼo chamuke. Xi laj yale: ‹¡Taʼlo xa! Milun xa ta ora, Kajval Jeova›» (1 Reyes 19:4).

Xi chal li Ojebodee: «Jaʼ la skoltaun kʼalal la jnopbe skʼoplal li kʼusi chal Vivliae. Laj kakʼ venta ti jaʼ jech laj yaʼi sba Elias kʼuchaʼal chkaʼi jbae».

Oyuk kʼusi xachan li ta loʼiletik ta Vivliae

Xi albat yuʼun Jesus li Pedroe: «Jkʼanoj xa vokol ta atojolal sventa mu xchʼay li xchʼunel avoʼontone» (Lukas 22:32).

Kʼalal oxib xa ox velta laj yal Pedro ti mu xojtikin li Jesuse, batsʼi ep laj yokʼita sba ta skoj ti chopol tajek laj yaʼi sbae. Xi chal li Kaorue: «La spatbun tajek koʼonton ti laj yaʼibeik smelolal kʼu yelan laj yaʼi sba Pedro li Jeova xchiʼuk Jesuse».

Chlaj skʼoplal ti chavul avoʼontone xchiʼuk muʼyuk xa bu chtal ta ajol (Isaias 65:17)