Muʼyuk xa noʼox yan abtelal jech tsots skʼoplal
1. ¿Kʼusitik mu jalantik mi tsots skʼoplal chkiltik li chol mantale?
1 ¿Kʼu yuʼun nopoltik noʼox chkichʼtik albel ti akʼo jtunes jkʼakʼaltik, kipaltik xchiʼuk kʼusitik oy kuʼuntik sventa li chol mantale? ¡Yuʼun muʼyuk xa noʼox yan abtelal jech tsots skʼoplal! Mi ta jnopbetik skʼoplal kʼusitik ta jkʼan ta jtatik ta skoj li chol mantale mas me tstij koʼontontik sventa ta jkʼan chi jtun li ta abtelal ti stuk noʼox jeche xchiʼuk ti jaʼ noʼox jech chichʼ pasel avie (Hech. 20:24).
2. Ta sventa li chol mantale, ¿kʼuxi xuʼ xichʼ chʼultajesbel smukʼta bi li Jeovae?
2 Chchʼultajesbe sbi li Jeovae. Li ta chol mantale chichʼ akʼel ta ilel ti Ajvalilal yuʼun Jeova ti yakʼojbe Cristoe jaʼ chkom ta xkʼexol li ajvaliletik ta Balumile xchiʼuk jaʼ tslekubtas-o ta jyalel li kʼusitik chopol snuptanoj krixchanoetike (Mat. 6:9, 10). Lek jamal chakʼ ta ilel ti jaʼ noʼox stuk Jeova ti buchʼu xuʼ spojutik ta sventa li chamele xchiʼuk li lajelale (Isa. 25:8; 33:24). Jech noxtok, ta skoj ti kichʼojbetik sbie, li jtalelaltike xchiʼuk mi jun koʼontontik xvinaj kʼalal ta jcholtik mantale jaʼ tspas ti akʼo xichʼik ta mukʼ Jeova li yan krixchanoetik eke (1 Ped. 2:12). ¡Jaʼ jun mukʼta muyubajel ti chkakʼtik ta ojtikinel ta spʼejel Balumil li sbi Mukʼta Jpas mantal Jeovae! (Sal. 83:18, NM.)
3. ¿Kʼusitik sbalil ta sta li buchʼu chakʼ ta yoʼonton sKʼop Diose?
3 Chakʼ mu xcham krixchanoetik. Li Jeovae «mu scʼan ti oy bochʼo chʼayel chbat junuque. Jaʼ tscʼan scotol acʼo sutes yoʼnton yuʼun smulic ta stojol li Diose» (2 Ped. 3:9). Pe mi muʼyuk buchʼu la xchanubtase, ¿kʼuxi xuʼ snaʼik kʼusitik lek xchiʼuk kʼusitik chopol chil li Diose? (Jon. 4:11; Rom. 10:13-15.) Kʼalal chkʼot ta yoʼonton sKʼop Dios li jun krixchanoe xchiʼuk chikta li kʼusitik chopol tspase, mu jaʼuk noʼox ta sta spatobil yoʼonton sbatel osil, moʼoj, chlekub xkuxlejal li avi xtoke (Miq. 4:1-4). Ta melel, kʼalal te xi jtijet-o ta chol mantale chi jkol li voʼotike xchiʼuk li buchʼutik ta xaʼibutike (1 Tim. 4:16). ¡Jaʼ jun mukʼta matanal ti chi jkoltavan li ta abtelal ti tsots skʼoplal taje!
4. ¿Kʼu yuʼun skʼan jcholtik-o batel li Ajvalilal yuʼun Diose xchiʼuk ti skʼan jpastik ta yajtsʼaklom Cristo li krixchanoetike?
4 Mu xa jaluk, li mukʼta tsatsal vokolile ta xakʼbe slajeb li krixchanoetik ti muʼyuk stukʼilike. Jaʼ noʼox kuxul chkomik li buchʼutik te nopol oy ta stojolal Jeovae. Jech oxal, li chol mantale xchiʼuk li spasel ta yajtsʼaklom Cristo li krixchanoetik avie jaʼ jun abtelal ti anil xa skʼan spasele, ti tsots skʼoplale xchiʼuk ti oy sbalile. Jaʼ yuʼun, ¡baʼyel xkakʼ ta jkuxlejaltik! (Mat. 6:33.)