Mu xavakʼ smakot li xiʼele
1. ¿Kʼu yuʼun oy jlom ti chiʼik ta yakʼel chanubtasel ta Vivliae?
1 ¿Mi tsots chavaʼi ti chavakʼ chanubtasel ta Vivlia ta skoj ti chaxiʼ ti mu lekuk xachanubtasvane? Oy jlom tukʼil yajtuneltak Dios ta voʼnee mu spas yuʼun laj yaʼiik li kʼusi akʼbat spasike, taje jech laj yaʼi sbaik li Moisés xchiʼuk Jeremiase (Éx. 3:10, 11; 4:10; Jer. 1:4-6). Kʼuchaʼal chkiltike stalel onoʼox ti oy bakʼintik jech chkaʼi jbatike. ¿Kʼusi xuʼ jpastik?
2. ¿Kʼu yuʼun skʼan mu jaʼuk noʼox bal xkaʼitik ti jcholtik mantal ta naetike xchiʼuk ti yan-o xa buchʼu chakʼ chanubtasel ta Vivliae?
2 Baʼyele skʼan jvules ta joltik ti Jeovae muʼyuk chakʼ jpastik li kʼusi mu spas kuʼuntike (Sal. 103:14). Jaʼ yuʼun kʼalal chalbutik ti skʼan jchanubtastik xchiʼuk ti jpastik ta yajtsʼaklom Cristo li krixchanoetike jaʼ skʼan xal ti xuʼ kuʼuntike (Mat. 28:19, 20). Li matanal taje maʼuk noʼox yakʼojbe li buchʼutik mas lek chanemike xchiʼuk ti lek xtojobike (1 Cor. 1:26, 27). Jaʼ yuʼun, mu jaʼuk noʼox bal xkaʼitik ti jcholtik mantal ta naetike xchiʼuk ti yan-o xa buchʼu chakʼ chanubtasel ta Vivliae.
3. ¿Kʼuxi tstojobtasutik Jeova sventa xkakʼtik chanubtasel ta Vivlia?
3 Tstojobtasutik li Jeovae. Sventa xuʼ jpastik ta yajtsʼaklom Cristo li krixchanoetike jaʼ tstojobtasutik li Jeovae (2 Cor. 3:5). Ta sventa li s-organisasione yakʼoj jchantik li kʼusitik melel ti mi jaʼuk xojtikinik li buchʼutik pʼijik ta balumile (1 Cor. 2:7, 8). Li ta Vivliae chakʼ ta ilel ti jelel kʼutik yelan chanubtasvan li Jesuse, ti jaʼ li Mukʼta Jchanubtasvaneje. Li ta tsobobbail xtoke nopajtik noʼox chkichʼtik chanubtasel. Jech xtok, oy vunetik xchiʼuk yan kʼusitik ti lek jtunelike, jech kʼuchaʼal li livro Chchanubtasvane ti chchapbe lek skʼoplal xchiʼuk ti kʼun noʼox ta aʼyel li kʼusitik melel chal ta Vivliae. Kʼuchaʼal chavakʼ ventae kʼun noʼox ta akʼel li chanubtasel ta Vivliae.
4. ¿Kʼu yuʼun xuʼ jpat koʼontontik ti tskoltautik li Jeovae?
4 Ta skoj ti la skolta Moisés xchiʼuk Jeremías li Jeovae pas yuʼunik li kʼusi akʼbat spasike (Éx. 4:11, 12; Jer. 1:7, 8). Jaʼ yuʼun jkʼanbetik koltael li Jeova eke. Xuʼ jpat koʼontontik ti tskoltautike, yuʼun kʼalal chkakʼtik chanubtasel ta Vivliae jaʼ ta jpastik li kʼusi lek chile, ti chkakʼtik ta chanel li kʼusi melel ta sventae (1 Juan 3:22). Jaʼ yuʼun kakʼ ta koʼontontik slikesel junuk chanubtasel ta Vivlia, yuʼun mi jech ta jpastike ta jkʼupintik tajek xchiʼuk ep sbalil ta jtabetik.