Lekubuk batel mas ti kʼu yelan xijtojob ta cholmantale: yoʼ xtakʼ kuʼuntik li kʼusi xuʼ xpaj-o jloʼiltike

Kuʼ yuʼun tsots skʼoplal. Nopo noʼox avaʼi ti anaʼoj ti poʼot xa xtal nikel, nojelal ta voʼ o yan kʼusitike xchiʼuk ti ep krixchanoetik chchamik mi muʼyuk laj yichʼik albele. Vaʼun chbat avalbe alakʼ na li kʼusi chkʼot ta pasele, pe chtuchʼ ta be aloʼil xchiʼuk chalbot ti muʼyuk xokole. ¿Mi ta jech noʼox van chasut batel? ¡Ta melel moʼoj! Jaʼ jech ek, kʼalal chbat jcholbetik mantal li krixchanoetike mu skʼanik, yuʼun mu snaʼik mi jaʼ te tsta-o skolebalik. Yikʼaluk van jaʼo oy kʼusi tsvul-o yoʼontonik kʼalal chijkʼote (Mat. 24:37-39). O jaʼ van ta skoj ti oy kʼusi chopol yaʼiojik ta jtojolaltik ti mu meleluke (Mat. 11:18, 19). Yikʼaluk van ta snopik ti jaʼutik jun relijion jech kʼuchaʼal li yantik ti muʼyuk lek kʼusitik spasojike (2 Ped. 2:1, 2). Mi muʼyuk oy ta yoʼontonik mantal chkiltik li krixchanoe mu ta aniluk noʼox xkiktatik komel.

Kʼuxi ta pasel:

Kʼalal skʼan toʼox xabat ta cholmantal ta naetike, chʼakbo jlikeluk yorail sventa xanop li kʼusitik xuʼ spajes-o aloʼil li jun krixchanoe xchiʼuk nopo kʼuxi xuʼ xatakʼbe.
Mi la spajes aloʼil junuk krixchanoe, ta slekiluk avoʼonton xatakʼbe. Xuʼ van xa lekil kʼopta ta jtosuk kʼusi. Jech kʼuchaʼal liʼe, mi laj yal ti oy xa srelijione, xuʼ van xi xatakʼbee: «Toj lek chkaʼi ti jech oy ta avoʼonton li kʼusitik sventa mantale». Oy bakʼintike, kʼalal ta jtsaktik ta mukʼ kʼu yelan chaʼi sbaik o li kʼusi tspasik li krixchanoetike xuʼ skoltautik sventa mu xtuchʼ ta be li jloʼiltike. Mi oy buchʼu laj yalbutik ti muʼyuk xokole, xuʼ xi jtakʼbetike: «Jech avaʼuk mu noʼox xijxokob. Pe yoʼ to mu chibate ta jkʼan chkiktabot komel liʼe». Pe mi laj yal ti muʼyuk oy ta yoʼontone, xuʼ xi xajakʼbee: «¿Mi jaʼ muʼyuk ta avoʼonton li Skʼop Diose o mi jaʼ li relijionetike?».
Tuneso lek apʼijil. Vuleso ta ajol ti muʼyuk buchʼu tsuj sventa x-aʼibat smantal li Jeovae (Deut. 30:19). Yuʼun ta jujuntal chkʼot ta jventatik li kʼusi ta jpastik ta stojolal Jeovae (Gál. 6:5). Mi tsotsik xa tstakʼbutik li jun krixchanoe, li kʼusi xuʼ jpastike jaʼ ti xijlokʼ batele. Kʼalal ta jtsaktik ta venta ti kʼu yelan chaʼi sba li krixchanoe xuʼ xchʼam ta mas tsʼakal yan jcholmantaletik (1 Ped. 3:15, 16).

Paso jech sjunul u li kʼusitik laj yichʼ alele:

Kʼalaluk mi lalokʼ xaʼox batel ta sna li jun krixchano ti la spajes aloʼile, koʼol xanopik xchiʼuk li achiʼil ta cholmantal mi oy ox kʼusi mas lek xuʼ la atakʼbeik ti jechuke.