Moletik, chanbeik stalelal li Jedeone

1. Jech kʼuchaʼal chal 1 Pedro 5:2, ¿kʼusi matanal staojik li moletik ta tsobobbaile?

LI Jeovae yakʼojbe ta sba moletik ta tsobobbail sventa xkʼelbat li xchijtake. Jaʼ jun mukʼta matanal chilik ti chtunik ta stojolal li yermanotakike xchiʼuk chakʼ yipalik ta spasel lek li yabtelike (Jer. 23:4; kʼelo 1 Pedro 5:2). ¡Toj lek tajek ti oy ermanoetik ti jech chtunik li ta tsobobbaile!

2. ¿Kʼusi vokoliletik tsnuptanik junantik moletik?

² Ep kʼusitik tsnuptanik li moletik ta tsobobbail kʼalal tspas li yabtelike. Sventa xchabiik li tsobobbaile, skʼan tsots x-abtejik. Jkʼeltik kʼusi kʼot ta stojolal Toni, jun mol ta tsobobbail ta Estados Unidos. Laj yakʼ venta ti skʼan bikʼit xakʼ sba kʼalal chchʼam spasel abtelaletike, xi chale: «Kʼalal lik li tsatsal chamel COVID-19, ep tajek kʼusi skʼan chapanel sventa li tsobajeletike, li cholmantale xchiʼuk ta jpas skotol li kʼusitik chkichʼ albele akʼo mi laj kakʼ tajek persa spasel li abtelale oy noʼox kʼusitik skʼan pasel. Ta mas tsʼakale, laj kikta xchanel li Jvivliae, xchapanel jba xchiʼuk muʼyuk xa ta jpas orasion». Jun mol ta tsobobbail ta Kosovo ti Ilir sbie jelel li kʼusi la snuptane. Li stuke te nakal ta jun jteklum ti bu oy paskʼope, ta skoj taje vokol chaʼi xchʼunel li beiltaseletik chakʼ li steklumal Jeovae, xi chale: «Kʼalal laj yalbun Betel ti akʼo xbat jkolta li ermanoetik ti te nakalik ti bu xibal sbae, lixiʼ tajek. Toj tsots laj kaʼi xchiʼuk mu sta-o laj kaʼi li kʼusi laj yalik tale». Jun misionero ta Asia ti Tim sbie laj yal ti vokol tajek laj yaʼi spasel skotol li kʼusitik sbainoje, xi laj yale: «Bakʼintike toj lubem tajek chkaʼi jba sventa jkolta li ermanoetike». ¿Kʼusi van xuʼ spasik li moletik mi oy jech la snuptanike?

3. ¿Kʼusi xuʼ jchantik ta stojolal li Jedeone?

³ Li moletik ta tsobobbaile oy kʼusitik xuʼ xchanbeik li Jedeone (Ebr. 6:12; 11:32). Yuʼun la xchabi xchiʼuk la skʼel li steklumal Diose (Jues. 2:16; 1 Kron. 17:6). Li moletik ta tsobobbail avie tsots tajek yabtelik ta xchabiel li steklumal Dios li ta slajebaltik kʼakʼale jech kʼuchaʼal la spas li Jedeone (Ech. 20:28; 2 Tim. 3:1). Ti kʼu yelan la xchʼun mantal Jedeon xchiʼuk ti bikʼit laj yakʼ sbae ep kʼusi ch-akʼbat xchanik. Ti kʼu sjalil tun ta stojolal Jeovae, kuch yuʼun akʼo mi oy kʼusitik la snuptan. Jkotoltik xuʼ jtojbetik ta vokol li yabtel tspasik li moletike xchiʼuk ti ta sjunuluk koʼonton jkoltatike (Ebr. 13:17).

KʼALAL TSOTS CHKAʼITIK TI BIKʼIT XKAKʼ JBATIKE

4. ¿Kʼuxi laj yakʼ ta ilel ti bikʼit laj yakʼ sba li Jedeone?

⁴ Li Jedeone bikʼit laj yakʼ sba.b Kʼalal albat yuʼun jun anjel ti tʼujbil yuʼun Jeova sventa skolta lokʼel j-israeletik li ta skʼob jmadianetike, xi laj yale: «Li kutsʼ kalale jaʼ li mas bikʼit skʼoplal ta Manasese, jech xtok, li ta sna jtote voʼon ti batsʼi mu kʼusi xitojob spasele» (Jues. 6:15). La snop ti mu spas yuʼun li kʼusi akʼbat spase. Pe li Jeovae snaʼoj xa onoʼox ti spas yuʼune. Koliyal ti koltaate, pas yuʼun li Jedeone.

5. ¿Kʼu yuʼun vokol chaʼiik bakʼintik ti bikʼituk xakʼ sbaik li moletike?

⁵ Li moletik ta tsobobbaile chakʼik persa ti bikʼituk xakʼ sbaike (Mik. 6:8; Ech. 20:18, 19). Muʼyuk tstoy sbaik ta skoj li kʼusitik xtojobik spasele o li kʼusitik pasem xa yuʼunike. Jech xtok, muʼyuk chchibajik-o mi oy kʼusi muʼyuk lek xbat ta pasel yuʼunike. Pe bakʼintike vokol ta xaʼiik ti bikʼituk xakʼ sbaik li moletike. Kalbetik junchibuk skʼelobil, xuʼ van oy jun mol ta tsobobbail ti chchʼam skotol li kʼusitik ch-akʼbat spase. Pe ta tsʼakal une, chakʼ venta ti mu spas yuʼun skotole. Bakʼintike xuʼ van xichʼ kʼupil kʼoptael ta skoj ti oy kʼusi lek bat ta pasel yuʼune o xuʼ van xichʼ loʼiltael. Mi jech kʼot ta pasele, ¿kʼuxi xuʼ xkoltaatik li kʼusi kʼot ta stojolal li Jedeone?

6. ¿Kʼuxi xuʼ bikʼit xakʼ sbaik li moletik jech kʼuchaʼal la spas li Jedeone? (Kʼelo xtok li lokʼole).

⁶ Kʼanik koltael. Li Jedeone bikʼit laj yakʼ sba kʼalal la skʼanbe koltael li yantike (Jues. 6:27, 35; 7:24). Li moletik ti bikʼit yakʼoj sbaike jaʼ jech tspasik kʼuchaʼal li Jedeone. Xi chal Toni ti laj kalbetik skʼoplal ta parafo 2: «Ta skoj ti kʼu yelan laj kichʼ tsʼitesele, ta jchʼam skotol li kʼusitik chkichʼ akʼbel jpase. Jaʼ yuʼun, laj kalbekutik skʼoplal ta yichʼel ta mukʼ ta kutsʼ kalalkutik ti skʼan bikʼit xkakʼ jbakutike xchiʼuk la jkʼanbe kajnil ti xalbun kʼusi tsnop ta jtojolale. Jech xtok, la jkʼel jun video ta jw.org ti xi sbie: Jchanubtastik xchiʼuk jpat koʼontontik ta stojolal yantik kʼuchaʼal la spas Jesuse». Li Tonie lik skʼanbe koltael li yantike, vaʼun xi chalbutik li kʼusi kʼot ta pasele: «Oy buchʼutik tskʼel li kʼusitik skʼan pasel ta tsobobbaile. Li avie mas xa xokolun sventa masuk lek xkil jba xchiʼuk li Jeovae».

7. ¿Kʼuxi xuʼ xchanbeik Jedeon mi laj yichʼik loʼiltael li moletike? (Santiago 3:13).

⁷ Mu me xakapik mi laj avichʼik loʼiltaele. Mi chichʼ loʼiltael jun mol ta tsobobbaile, jaʼ me te chvinaj mi bikʼit yakʼoj sba. Oy me kʼusi xuʼ xchanbeik xtok li Jedeone, yuʼun li stuke snaʼoj ti maʼuk tukʼil krixchanoe. Jaʼ yuʼun, muʼyuk xkap kʼalal laj yichʼ loʼiltael yuʼun li viniketik ta Efraine (Jues. 8:1-3). Laj yakʼ ta ilel ti bikʼit laj yakʼ sbae xchiʼuk la xchikinta li kʼusi laj yalike. Jech xtok, ta slekil yoʼonton la xchiʼinan ta loʼil. Li moletik ti muʼyuk chkapike jaʼ me chchanbeik stalelal li Jedeone. Kʼalal oy buchʼu chloʼiltaatike, tstsʼet chikintaik xchiʼuk ta slekil yoʼonton tstakʼik (kʼelo Santiago 3:13). Vaʼun, jun noʼox yoʼontonik li ta tsobobbaile.  

8. ¿Kʼusi skʼan spasik li moletik mi laj yichʼik kʼupil kʼoptaele? Albo junuk skʼelobil.

⁸ Jaʼuk xavakʼik ta ichʼel ta mukʼ li Jeovae. Kʼalal la stsal jmadianetik li Jedeone, laj yichʼ kʼupil kʼoptael. Pe li stuke jaʼ laj yakʼ ta ichʼel ta mukʼ li Jeovae (Jues. 8:22, 23). ¿Kʼuxi xuʼ xchanbeik Jedeon li moletike? Jaʼ ti xakʼik ta ichʼel ta mukʼ Jeova kʼalal oy kʼusi lek chbat ta pasel yuʼunike (1 Kor. 4:6, 7). Mi oy jun mol ta tsobobbail ta xichʼ kʼupil kʼoptael ta skoj ti toj lek chchanubtasvane, xuʼ xal ti te la slokʼes talel ta Skʼop Diose xchiʼuk ti koʼol chkichʼtik chanubtasel li ta slumal Jeovae. Lek onoʼox ti snopbeik skʼoplal moletik ta tsobobbail mi jaʼ chakʼik ta ichʼel ta mukʼ Jeova kʼalal chchanubtasvanike o mi jaʼ chichʼik ichʼel ta mukʼ. Kalbetik skʼoplal jun ermano ti Timoti sbie. Kʼalal kʼot ta mol ta tsobobbaile, tskʼupin tajek chetʼes mantal, xi chale: «Ta skoj ti kʼupil sba kʼu yelan ta jlikes li mantale ta skʼupil kʼoptaikun li ermanoetike, pe voʼon noʼox chkichʼ kʼupil kʼoptael maʼuk li Jeovae o li Vivliae». Ta mas tsʼakale, laj yakʼ venta Timoti ti skʼan sjel ti kʼu yelan tsjelubtas mantale (Prov. 27:21). ¿Kʼusi kʼot ta pasel? Xi chalbutike: «Li avie yalojbeikun ermanoetik ti kʼu xa yelan chketʼes li mantale koltabilik-o sventa stsal yuʼunik jtosuk vokolil, xkuch yuʼunik junuk preva o mas xa nopajemik ta stojolal Jeova. Ximuyubaj tajek kʼalal chkaʼi ti jech chalike».

KʼALAL VOKOL CHKAʼITIK XCHʼUNEL MANTAL XCHIʼUK TI TSOTSUK KOʼONTONTIKE

9. ¿Kʼuxi laj yichʼ akʼel ta preva mi snaʼ xchʼun mantal xchiʼuk mi tsots yoʼonton li Jedeone? (Kʼelo li lokʼol ta pajina 1).

⁹ Kʼalal laj xa ox stʼuj Jeova sventa xkʼot ta jchapanvanej li Jedeone, te laj yichʼ akʼel ta preva mi snaʼ xchʼun mantal xchiʼuk mi tsots yoʼonton. Albat ti akʼo slilinbe li «skajleb smoton Baal» ti jaʼ yuʼun stote (Jues. 6:25, 26). Ta mas tsʼakale, li Jedeone la saʼ epal yajsoltarotak, pe chib to velta albat yuʼun Jeova ti akʼo sjutukajese (Jues. 7:2-7). Laje, albat mantal yuʼun Jeova ti akʼo xbat stsak ta kʼop yajkontratak ta oʼlol akʼobale (Jues. 7:9-11).

10. ¿Kʼuxi xuʼ xichʼ akʼel ta preva mi lek xchʼun mantal li mol ta tsobobbaile?

¹⁰ Li moletik ta tsobobbaile skʼan chapalikuk sventa xchʼunik mantal (Sant. 3:17). Kʼalal lek xchʼun mantal li mol ta tsobobbaile, ti chchʼun li beiltasel chakʼ Vivlia xchiʼuk li steklumal Jeovae, jaʼ jech chchan li yantik eke. Pe bakʼintike vokol tajek chaʼiik xchʼunel. Jech xtok, xuʼ van chichʼik epal beiltasel, vaʼun vokol xa chaʼiik xchʼunel li kʼusi chichʼik albele. Bakʼintike tsnopik mi persa skʼan xchʼunik o mi mu toj persauk li kʼusi chichʼik albele. Jech xtok, xuʼ van xichʼik albel ti oyuk kʼusi spasik ti xuʼ xichʼik-o chukele. Mi jech la snuptanike, ¿kʼuxi xuʼ xchanbeik li Jedeone? 

11. ¿Kʼusi xuʼ xkoltaatik sventa xchʼunik mantal li moletike?

¹¹ Chikintaik li beiltaseletike xchiʼuk pasik. Li Diose laj yalbe Jedeon kʼuxi xuʼ slilinbe skajleb smoton sdios li stote, bu ta svaʼan li skajleb smoton Jeovae xchiʼuk kʼusi chonbolomal xuʼ xakʼ li ta matanale. Jaʼ jech la spas li Jedeone. Li avi eke li moletik ta tsobobbaile ta xichʼik koltael yuʼun li steklumal Jeovae, ta kartaetik, ta aʼyejetik xchiʼuk ta beiltaseletik. Taje jaʼ sventa mu kʼusi jnuptantik xchiʼuk ti lekuk oyutik ta mantale. Ta skoj ti jech tspasik jech kʼuchaʼal ch-albatik yuʼun slumal Jeova li moletike, jkʼanojtik tajek. Koliyal ti chchʼunik mantale, tstabeik sbalil li tsobobbaile (Sal. 119:112).

12. Kʼalal oy kʼusi chjel ta steklumal Jeovae, ¿kʼuxi xuʼ xchʼunik Ebreos 13:17 li moletike?

¹² Ta sjunuluk avoʼonton xachʼunik kʼalal oy kʼusitik chjele. Li Jeovae laj yalbe Jedeon ti akʼo sjutukajes li yajsoltarotake (Jues. 7:8). Xuʼ van xi la snope: «¿Mi persa skʼan jutukajes li kajsoltarotake? ¿Mi ta van xkuch kuʼunkutik li paskʼope?». Akʼo mi jech, la xchʼun li Jedeone. ¿Kʼusi xuʼ xchanik li moletike? Jaʼ ti skʼan xchʼunik skotol li kʼusi chal steklumal Jeovae (Kʼelo Ebreos 13:17). Kalbetik junuk skʼelobil, li ta 2014 li Jtsop Jbeiltasvaneje la sjel ti bu chichʼ lokʼesbel stojol ti xichʼ vaʼanel li Salonetik sventa Tsobobbaile xchiʼuk li Salonetik sventa Asambleae (2 Kor. 8:12-14). Li ta voʼnee, ta toʼox xakʼbe ta chʼom takʼin tsobobbail sventa svaʼan li salonike, vaʼun tsutesik ta tsʼakal. Pe li avi une jaʼ tstunesik li matanal takʼin chakʼik li tsobobbailetik ta spʼejel balumil sventa svaʼanik salonetik akʼo mi jutuk stakʼin li tsobobbaile. Kʼalal laj yaʼi jun mol ta tsobobbail ti Jose sbie, xi la snope: «Taje jaʼ noʼox xuʼ jech stakʼ spasik li ta yan lume, pe liʼe muʼyuk. Xakʼel avil mi jpʼejuk salon chvaʼi». Akʼo mi jech, laj onoʼox skolta sba. ¿Kʼu yuʼun? Xi chalbutike: «Vul ta jol li kʼusi chal Proverbios 3:5, 6 ti skʼan jpat koʼonton ta stojolal Jeovae. Ti jech kʼotem ta nopel yuʼun li steklumal Jeovae, ¡toj lek kʼusi kʼotem ta pasel! Maʼuk noʼox ta jvaʼantik epal salonetik, yuʼun komon ta jkolta jbatik».

13. 1) ¿Kʼusi snaʼoj lek li Jedeone? 2) ¿Kʼusi skʼan spas li moletik sventa jechuk xchanbeik li Jedeone? (Kʼelo xtok li lokʼole).

¹³ Tsotsuk avoʼontonik xapasik li kʼusi tskʼan Jeovae. Li Jedeone la xchʼunbe smantal Jeova akʼo mi xiʼ xchiʼuk mi xibal sba li kʼusi akʼbat spase (Jues. 9:17). Kʼalal albat yuʼun Jeova ti chkoltaate, snaʼoj lek ti chchabi steklumal li Diose. Li moletik ti te nakalik ti bu mu x-akʼbat spas li kʼusi tskʼan Jeova jech kʼuchaʼal ta skʼakʼalil Jedeone, tsots yoʼonton chchapanik tsobajeletik, cholmantal akʼo mi xichʼik-o chukel o xlokʼesat ta yabtelik o xichʼik majel.c Kʼalal mi tal li mukʼta tsatsal vokolile, li moletike skʼan me tsotsuk yoʼontonik sventa xchʼunik li kʼusitik ch-albatike, mu ventauk mi xibal sba li kʼusi tsnuptanike. Xuʼ van jaʼ chalik li aʼyej ti xkoʼolaj ta mukʼta bot ti chyal talel ta vinajele o jaʼ li kʼusi skʼan jpastik sventa kuxul xijkomutik mi tal tsakvanuk ta kʼop li Gog ta Magogue (Esek. 38:18; Apok. 16:21).

KʼALAL VOKOL CHKAʼITIK JTOSUK VOKOLILE

14. ¿Kʼusi la spas li Jedeone?

¹⁴ Ta skoj ti tun ta jchapanvanej ta Israel li Jedeone, tsots abtej. Kʼalal jatav li jmadianetik kʼalal laj yichʼik tsakel ta kʼop ta akʼobaltike, li Jedeone te lik snuts ta stenlejaltik Jesreel kʼalal to ta ukʼum Jordan, xuʼ van chʼixtikaltik li tiʼ ukʼume (Jues. 7:22). ¿Kʼusi la spas? ¿Mi te van vaʼal kom? ¡Muʼyuk! Akʼo mi lubemik xa tajek xchiʼuk li oxib sien sviniktake, la xtuchʼik jelavel li ukʼume xchiʼuk bat snutsik. Ta mas tsʼakal une, la staik ta be li jmadianetike xchiʼuk la stsalik (Jues. 8:4-12).

15. ¿Kʼusi tsnuptanik bakʼintik li moletik ta tsobobbaile?

¹⁵ Kʼalal chchabiik tsobobbail xchiʼuk yutsʼ yalalik li moletike, xuʼ van chlubik tajek. ¿Kʼusi xuʼ xchanbeik Jedeon kʼalal lubem tajek chaʼi sbaik li moletike?

16, 17. 1) ¿Kʼusi koltaat-o Jedeon sventa xkuch yuʼune? 2) ¿Kʼusi skʼan teuk ta sjol li moletike? (Isaias 40:28-31; kʼelo xtok li lokʼole).

¹⁶ Pato avoʼontonik ti tskoltaoxuk li Jeovae. Li Jedeone spatoj onoʼox yoʼonton ti chkoltaat yuʼun li Jeovae (Jues. 6:14, 34). Jun veltae li Jedeon xchiʼuk sviniktake la snutsik batel chaʼvoʼ ajvaliletik ta Madian, yaʼeluke jaʼ kajajtik batel ta kameyo li ajvaliletike (Jues. 8:12, 21). Pe koliyal ti koltaatik yuʼun Jeovae, la staik ta be xchiʼuk la stsalik. Li moletik ta tsobobbail avi eke xuʼ spat yoʼontonik ta stojolal Jeova ti jaʼ li Dios ti «mu snaʼ xlub xchiʼuk mi jaʼuk chkʼunib[e]», yuʼun ta onoʼox x-akʼbat yipalik kʼalal jaʼo chtun yuʼunike (kʼelo Isaias 40:28-31).

¹⁷ Jkʼeltik kʼusi kʼot ta stojolal Matyu ti chtun ta Komite ti Tsbeiltasvan batel ta Ospitaletike. ¿Kʼusi koltaat sventa xkuch yuʼun? Xi chale: «Kiloj ta jkuxlejal jtuk li kʼusi chal Filipenses 4:13. Kʼalal mu xa xuʼ kuʼun chkaʼie, ta jkʼanbe Jeova kipal xchiʼuk jpʼijil sventa xuʼ jkolta li ermanoetike. Vaʼun, chkaʼi ti kʼu yelan chakʼbun kipal li Jeovae». Jech kʼuchaʼal kʼot ta stojolal Jedeone, li moletike ta sjunul yoʼonton chchabibeik xchijtak Jeova akʼo mi oy kʼusitik tsnuptanik. Pe skʼan onoʼox bikʼit xakʼ sbaik xchiʼuk ti xakʼik venta ti oy noʼox spajeb li kʼusi spas yuʼunike. Li moletik avi eke spatoj yoʼontonik ti ch-aʼibat li s-orasionike xchiʼuk ti ch-akʼbat yipalik sventa spas yuʼunik li kʼusitik chkʼanbatike (Sal. 116:1; Filip. 2:13).

18. ¿Kʼusi xuʼ xchanbeik Jedeon li moletike?

¹⁸ Jech kʼuchaʼal laj xa jchantik tale, ep kʼusitik xuʼ xchanik ta stojolal Jedeon li moletike. Skʼan bikʼit xakʼ sbaik kʼalal oy kʼusitik ch-akʼbat sbainike, kʼalal chkʼupil kʼoptaatik o kʼalal chloʼiltaatike. Jech xtok, skʼan xchʼunik mantal xchiʼuk tsotsuk yoʼontonik, mas to ti jutuk xa skʼan xlaj li kʼusitik chopole. Skʼan teuk ta joltik ti ta onoʼox x-akʼbat yipalik yuʼun Jeova sventa xkuch yuʼunik li moletike. Jech xtok, ep sbalil chkiltik xchiʼuk ta jtojbetik ta vokol li abtelal tspasike (Filip. 2:29).