Tunkutik-o ta stojolal Jeova jech kʼuchaʼal la spas li Pedroe

1. ¿Kʼu yelan laj yaʼi sba Pedro kʼalal la stsak epal choyetik ta skʼelobil juʼelale?

LI Pedroe sjunul akʼobal tsots abtej, pe mi jkotuk choy la stsak. Vaʼun, xi albat yuʼun li Jesuse: «Tikʼo ochel ta natil nab li avarkoe, vaʼun te xajipik yalel li anutiʼik sventa tsakob choye» (Luk. 5:4). Akʼo mi mu ox skʼan li Pedroe, pe laj onoʼox spas. La stsakik epal choy ti chjat xa li snutiʼal sventa stsakobil choye. Kʼalal laj yakʼik venta ti jaʼ skʼelobil juʼelale, chʼayal to kʼot yoʼonton li Pedro xchiʼuk xchiʼiltake. Li Pedroe xi laj yale: «Chʼako aba ta jtojolal, Kajval, yuʼun jpasmulil vinikun» (Luk. 5:​6-9). Mu sta-o laj yaʼi ti te xchiʼuk li Jesuse.

2. ¿Kʼuxi tskoltautik kʼalal ta jkʼeltik kʼusi la spas li Pedroe?

² Oy onoʼox srason Pedro kʼalal laj yal ti jaʼ jpasmulile. Li Vivliae chal ti oy onoʼox kʼusitik laj yal o la spas ti chopol laj yaʼi-o sba ta tsʼakale. ¿Mi oy jech avaʼioj aba kʼuchaʼal li Pedroe? ¿Mi vokol chavaʼi sjelel jtosuk atalelal o yiktael li kʼusi mu lekuke? Mi jeche, mu me xachibaj. Xuʼ me skoltaot li kʼusi la spas Pedroe. Yuʼun li Diose laj yakʼ ti xichʼuk tsʼibael li kʼusi muʼyuk lek bat ta pasel yuʼun sventa oyuk kʼusi xakʼ jchantike (2 Tim. 3:​16, 17). Kʼalal ta jkʼelbetik sloʼilal li Pedro ti jaʼ jun vinik ti oy kʼusi vokol laj yaʼi xchiʼuk ti jech laj yaʼi sba kʼuchaʼal voʼotike, chkakʼtik venta ti muʼyuk tskʼan Jeova ti tukʼil krixchanoutikuke. Li kʼusi noʼox tskʼane jaʼ ti jechuk-o xkakʼ kipaltik akʼo mi oy kʼusi vokol chkaʼitike.

3. ¿Kʼu yuʼun skʼan jechuk-o xkakʼ kipaltik?

³ ¿Kʼu yuʼun tsots kʼoplal ti mu xijlubtsaje? Yuʼun kʼalal oy kʼusi ta jchanilantike, ta me xijtojob spasel. Kalbetik junuk skʼelobil, li buchʼu tskʼan chchan stijel Guitarrae mu ta aniluk chchan. Xuʼ van oy muʼyuk lek chbat ta tijel yuʼun, pe mi jech-o chchanilane, chlekub batel yuʼun. Akʼo mi xtojob xa ox lek, oy onoʼox bu muʼyuk lek chbat ta tijel yuʼun. Pe taje maʼuk skʼan xal ti chikta stijele, yuʼun jech-o chchanilan. Taje jaʼ jech chkʼot ta jtojolaltik ek. Akʼo mi ta jnoptik mi tsalem xa kuʼuntik li kʼusi vokol chkaʼitike, xuʼ van xijtsʼuj to yan velta. Pe jech-o chkakʼ kipaltik sventa mu xijlubtsaj. Jkotoltik onoʼox oy kʼusi chkaltik o ta jpastik ti chopol chkaʼi jbatik yuʼun ta tsʼakale. Pe mi muʼyuk lijlubtsaje, jech-o tskoltautik li Jeovae (1 Ped. 5:10). Jkʼelbetik batel skʼoplal kʼuxi muʼyuk xlubtsaj li Pedroe. Ti kʼu yelan laj yakʼbe ta ilel xkʼuxul yoʼonton Pedro li Jesuse, tstij koʼontontik sventa jechuk-o xijtun ta stojolal Jeova.

LI KʼUSITIK VOKOL LAJ YAʼI XCHIʼUK LI BENDISIONETIK LA STAE

4. ¿Kʼuxi laj yalbe sba skʼoplal li Pedroe, xchiʼuk kʼusi albat yuʼun li Jesuse? (Lukas 5:​5-10).

⁴ Li Vivliae muʼyuk chal kʼu yuʼun «jpasmulil vinikun» xi li Pedroe (kʼelo Lukas 5:​5-10). Pe oy onoʼox van kʼusitik muʼyuk lek bat ta pasel yuʼun. Li Jesuse laj yakʼ venta ti ta xiʼe jaʼ van ta skoj ti mu spas yuʼun li kʼusi leke. Pe snaʼoj xtok ti xuʼ tukʼ xakʼ sbae, jaʼ yuʼun xi laj yalbe ta slekil yoʼontone: «Mu xa xaxiʼ». Kʼot tajek ta yoʼonton Pedro kʼalal laj yil ti spatoj yoʼonton Jesus ta stojolale. Ta mas tsʼakale, li Pedro xchiʼuk li Andres ti jaʼ xchiʼil ta vokʼele laj yiktaik li tsak choy sventa stsʼakliik li Mesiase. Ta skoj li kʼusi la spasike, la staik-o epal bendision (Mar. 1:​16-18).

5. ¿Kʼusi bendision la sta Pedro ta skoj ti tsal yuʼun li xiʼele xchiʼuk ti la spas kʼusi albat yuʼun Jesuse?

⁵ Li Pedroe ep kʼusi laj yil ta xkuxlejal. Laj yil ti la xpoxta jchameletik li Jesuse, la slokʼes pukujetik xchiʼuk ti la xchaʼkuxes animaetike (Mat. 8:​14-17; Mar. 5:​37, 41, 42).b Jech xtok, akʼbat yil yuʼun Jeova kʼu yelan mi och xa ox ta Ajvalil li Jesuse. Taje mu xchʼay-o ta sjol (Mar. 9:​1-8; 2 Ped. 1:​16-18). ¡Ep tajek kʼusitik laj yil li Pedroe! Ti muʼyukuk la stsʼakli li Jesuse, muʼyuk la yil jechuke.

6. ¿Mi tsal noʼox van yuʼun Pedro li kʼusi vokol chaʼie?

⁶ Akʼo mi ep kʼusitik laj yil xchiʼuk laj yaʼi li Pedroe. Pe jech-o laj yakʼ yipal ta stsalel li kʼusi vokol laj yaʼie. Kalbetik junantik skʼelobil, kʼalal laj yal Jesus ti persa chil svokol xchiʼuk ti chcham sventa xkʼot ta pasel li albil kʼopetik ta Vivliae, li Pedro laj yal ti mu persauk jech chkʼot ta stojolale (Mar. 8:​31-33). Li Pedro xchiʼuk li yan jtakboletike ep ta velta la svulilan sbaik ta sventa ti buchʼu mas mukʼ skʼoplal yuʼunike (Mar. 9:​33, 34). Kʼalal jutuk xa ox skʼan xcham li Jesuse, ta skapemal sjol li Pedroe la xtuchʼbe xchikin jun vinik (Juan 18:10). Jech xtok, ta skoj ti xiʼe oxib to velta laj yal ti mu xojtikin li Jesuse (Mar. 14:​66-72). Vaʼun, la smil sba ta okʼel (Mat. 26:75).

7. Kʼalal chaʼkuxiem xa ox li Jesuse, ¿kʼusi matanal laj yakʼbe li Pedroe?

⁷ Li Jesuse muʼyuk la snop ti mu xa kʼusi stakʼ pasel ta stojolal Pedro kʼalal chibajem tajeke. Kʼalal chaʼkuxiem xa ox li Jesuse, laj yakʼbe yil ti skʼanoje. Laj yalbe mi xuʼ xchabibat li xchijtake (Juan 21:​15-17). Li Pedroe ta slekil yoʼonton la xchʼam. Jaʼ yuʼun, jaʼo te oy ta Jerusalen li ta skʼakʼal Pentekostese xchiʼuk jaʼ baʼyel laj yichʼ tʼujel ta chʼul espiritu.

8. ¿Kʼusi muʼyuk lek bat ta pasel yuʼun Pedro li ta Antiokiae?

⁸ Kʼalal yichʼoj xa ox tʼujel ta chʼul espiritu li Pedroe, jech-o laj yakʼ persa ta stsalel li kʼusitik vokol chaʼi spasele. Li ta sjabilal 36, li Pedroe laj yil kʼalal laj yichʼ tʼujel ta chʼul espiritu jun jyanlum vinik ti Kornelio sbie. Taje jaʼ svinajeb ti «mu snaʼ xtʼujvan li Diose» xchiʼuk ti xuʼ x-ochik ta steklumal li krixchanoetik ti yan-o slumalike (Ech. 10:​34, 44, 45). Jaʼ yuʼun, li Pedroe lik xchiʼin ta veʼel li jyanlum krixchanoetike. Taje muʼyuk toʼox jech tspas (Gal. 2:12). Li vaʼ orae, oy toʼox junantik judaetik la snopik ti muʼyuk lek ti xchiʼinik ta veʼel li jyanlumetike. Kʼalal kʼotik ta Antiokia li buchʼutik jech tsnopike, li Pedroe la xchʼak sba lokʼel ta stojolal li jyanlumetike. Taje jaʼ van ta skoj mi chopol chaʼi sba yuʼun li judaetike. Kʼalal laj yil Pablo ti jech la spase, tsots la stsak ta utel ta yeloval yantik (Gal. 2:​13, 14). Akʼo mi muʼyuk lek kʼusi la spas li Pedroe, muʼyuk xlubtsaj. ¿Kʼusi koltaat-o?

¿KʼUSI KOLTAAT-O LI PEDROE?

9. Jech kʼuchaʼal chal Juan 6:​68, 69, ¿kʼuxi laj yakʼ ta ilel ti tukʼ laj yakʼ sba li Pedroe?

⁹ Li Pedroe muʼyuk laj yakʼ ti oyuk kʼusi xlubtsanate. Tukʼ-o yoʼonton laj yakʼ sba. Jech laj yakʼ ta ilel kʼalal oy kʼusi laj yal Jesus ti muʼyuk laj yaʼibeik smelolal li yan yajchankʼoptake (kʼelo Juan 6:​68, 69). Muʼyuk kʼusi la sjakʼik mi jaʼuk la smalaik ti x-albatik to mas smelolal yuʼun li Jesuse, jaʼ noʼox laj yiktaik komel. Pe li Pedroe mu jechuk la spas. Xi laj yalbe Jesus ta yeloval li yantike: «Yuʼun voʼot chavalbe skʼoplal li kuxlejal sbatel osile».

10. ¿Kʼuxi laj yakʼ ta ilel Jesus ti spatoj yoʼonton ta stojolal li Pedroe? (Kʼelo xtok li lokʼole).

¹⁰ Li Jesuse muʼyuk laj yikta li Pedroe. Kʼalal jutuk xa ox skʼan xchame, snaʼoj xa onoʼox ti ch-iktaat komel yuʼun Pedro xchiʼuk li yan jtakboletike. Akʼo mi jech, li Jesuse laj yal ti tsutes yoʼonton li Pedroe xchiʼuk ti tukʼ-o chakʼ sbae (Luk. 22:​31, 32). Li Jesuse snaʼoj ti «oy ta yoʼonton tspas kʼusi lek li krixchanoe, pe kʼun li sbekʼtale» (Mar. 14:38). Kʼalal laj yal Pedro ti mu xojtikine, li Jesuse muʼyuk laj yal ti muʼyuk xa kʼusi stakʼ pasel ta stojolal li Pedroe. Kʼalal chaʼkuxiem xa ox li Jesuse, laj yakʼ sba ta ilel ta stojolal li Pedroe (Mar. 16:7; Luk. 24:34; 1 Kor. 15:5). Taje jaʼ van koltaat sventa jechuk-o xakʼbe yipal.

11. Li Jesuse, ¿kʼuxi jamal laj yakʼbe ta ilel Pedro ti chchabiat yuʼun li Jeovae?

¹¹ Li Jesuse laj yakʼbe ta ilel Pedro ti ta onoʼox xchabiat yuʼun Jeovae. Kʼalal chaʼkuxiem xa ox li Jesuse, la spas yan velta skʼelobil juʼelal. Yuʼun la stsakik epal choy li Pedro xchiʼuk li jtakboletike (Juan 21:​4-6). Li kʼusi la spas Jesuse jamal akʼbat iluk Pedro ti ta onoʼox x-akʼbat yuʼun Jeova li kʼusi chtun yuʼune. Taje jaʼ van te vul-o ta sjol ti yaloj xa onoʼox Jesus ti ch-akʼbatik yuʼun Jeova li kʼusitik chtun yuʼunik li buchʼutik tsaʼilanik «baʼyel li Ajvalilal yuʼun Diose» (Mat. 6:33). Vaʼun, li Pedroe jaʼ xa laj yakʼ ta yoʼonton li cholmantale, maʼuk li tsak choye. Li ta Pentekostes ta sjabilal 33, oy kʼusi laj yal ti ta smilal noʼox krixchanoetik la xchʼamik-o mantale (Ech. 2:​14, 37-41). Ta mas tsʼakale, la skolta epal jsamariaetik xchiʼuk jyanlumetik sventa xkʼotik ta yajtsʼaklom Kristo (Ech. 8:​14-17; 10:​44-48). Jamal xvinaj ti lek tunesat yuʼun Jeova li Pedroe, yuʼun ep buchʼutik ochik ta mantal.

¿KʼUSI CHAKʼ JCHANTIK?

12. ¿Kʼuxi tskoltautik sloʼil Pedro mi yakal ta jtsaltik li kʼusi vokol chkaʼitike?

¹² Li Jeovae xuʼ skoltautik ek sventa mu xijlubtsaj. Bakʼintike mu van kʼunuk chkaʼitik ti jechuk-o xkakʼtik persae. Mas to kʼalal oy xa kʼuk sjalil kakʼoj tal kipaltik ta yiktael li kʼusi vokol chkaʼitike. Xuʼ van ta jnoptik ti mas to chopol li kʼusi jpasojtike ti jaʼ mu sta li kʼusitik la spas li Pedroe. Pe li Jeovae tskoltautik sventa jechuk-o xkakʼbetik yipal (Sal. 94:​17-19). Kalbetik skʼoplal jun ermano ti kʼalal skʼan toʼox xojtikin li mantale, lek toʼox chil li xchiʼil ta vinikale. Akʼo mi laj yikta li kʼusi chopol toʼox tspase, bakʼintike te to chtal ta sjol li kʼusitik chopole. ¿Kʼusi koltaat-o sventa stsal yuʼune? Xi chale: «Li Jeovae chakʼ kipaltik». Xi to chale: «Koliyal li xchʼul espiritu Jeovae […], xuʼ jpas li kʼusi lek chile». Xi to chalbutik xtoke: «Li Jeovae jech-o chakʼbun kipal […], tskoltaun akʼo mi maʼuk tukʼil krixchanoun».

13. ¿Kʼusi xuʼ jchanbetik li Pedroe? (Echos 4:​13, 29, 31; kʼelo xtok li lokʼole).

¹³ Jech kʼuchaʼal laj kiltike li Pedroe ep ta velta la xiʼta li krixchanoetike. Pe la skʼanbe koltael Jeova, vaʼun tsatsub yoʼonton (kʼelo Echos 4:​13, 29, 31). Li voʼotik eke xuʼ me stsal kuʼuntik li kʼusi chijxiʼo yuʼune. Kalbetik skʼoplal kʼusi kʼot ta stojolal Horst jun kerem ti jaʼ stestigo Jeova ti te naki ta Alemania kʼalal jaʼo tspas mantal li jnazietike. Ep ta velta laj yal ¡Heil, Hitler! ta skoj ti laj yichʼ sujel ta s-eskuelae. Pe muʼyuk x-utat yuʼun li stot smeʼe jaʼ noʼox jmoj la spasik orasion sventa x-akʼbat yipal yoʼonton yuʼun li Jeovae. Ta skoj ti koltaat yuʼun stot smeʼ xchiʼuk ti koltaat yuʼun Jeovae, li Horste tukʼ laj yakʼ sba. Ta tsʼakale, xi laj yale: «Muʼyuk onoʼox laj yiktaun jtuk li Jeovae».c

14. ¿Kʼuxi xuʼ skoltaik li buchʼutik chibajemik li moletike?

¹⁴ Li Jeova xchiʼuk Jesuse muʼyuk tsnopik ti mu xa kʼusi stakʼ pasel ta jtojolaltike. Kʼalal laj yal xa ox yal Pedro ti mu xojtikin li Kristoe, skʼan snop mi jech-o tstsʼakli li Kristoe o mi chikta. Li Jesuse skʼanojbe xa onoʼox Jeova ti mu xkʼunib xchʼunel yoʼonton li Pedroe. Ta tsʼakale, laj yalbe ti spasoj xa onoʼox orasion ta stojolale xchiʼuk snaʼoj ti tstsatsubtasbe yoʼonton li yermanotake (Luk. 22:​31, 32). Patbat van tajek yoʼonton Pedro li kʼusi laj yal Jesuse. Li voʼotik eke skʼan oy kʼusi xkʼot ta nopel kuʼuntik. Li Jeovae xuʼ me stunes moletik ta tsobobbail sventa spat koʼontontik yoʼ tukʼ xkakʼ jbatike (Efes. 4:​8, 11). Li Paul ti jal xa chtun ta mol ta tsobobbaile chakʼ yipal ti spatbe yoʼonton li ermanoetike. Kʼalal chakʼ venta ti tslubtsaj junuk ermanoe, tsvulesbe ta sjol ti kʼuxi laj yojtikinik li mantale. Jech xtok, tsvulesbe ta sjol ti chkoltaat yuʼun Jeova ta skoj ti kʼanbile. Li Paule yiloj kʼuxi skoltaoj Jeova li buchʼutik lubtsajemik sventa jechuk-o xtunik ta stojolale.

15. Jech kʼuchaʼal chal Mateo 6:​33, ¿kʼusi chakʼ ta ilel li sloʼil Pedro xchiʼuk li Horste?

¹⁵ Jech kʼuchaʼal laj xa jchantike li Jeovae laj yakʼbe kʼusi chtun yuʼun Pedro xchiʼuk li yan jtakboletike. Taje jaʼ me jech tspas ta jtojolaltik mi baʼyel ta jpastik li kʼusi tskʼan yoʼontone (Mat. 6:33). K’alal echʼ xa ox li Xchibal Mukʼta Paskʼop ta spʼejel Balumile, li Horst ti laj xa kalbetik skʼoplale la snop ch-och ta prekursor. Pe abol tajek sba o povre noʼox xchiʼuk mu snaʼ kʼuxi tsta li kʼusi chtun yuʼun mi och ta prekursore. ¿Kʼusi la spas? Laj yakʼ ta preva li Jeovae, vaʼun la xchol mantal sjunul xemana kʼalal jaʼo vulaʼanvan li jkʼelvanej ta sirkuitoe. Kʼalal tsuts li xemanae, labal to laj yaʼi ti akʼbat komel jun uni sovre yuʼun li jkʼelvanej ta sirkuitoe. Li ta sovree te tikʼil takʼin ti muʼyuk chal buchʼu laj yakʼe. Taje koltaat-o sventa xtun ta prekursor jayibuk u. Li Horste te laj yakʼ venta ti chkoltaat onoʼox yuʼun li Jeovae. Vaʼun, jaʼ xa laj yakʼ ta yoʼonton spasel li kʼusi tskʼan Jeovae (Mal. 3:10).

16. ¿Kʼu yuʼun lek ti jkʼelbetik skʼoplal li kʼusi la spas xchiʼuk li kʼusi la stsʼiba li Pedroe?

¹⁶ Muyubaj van tajek Pedro ti muʼyuk la spas Jesus kʼalal xi laj yalbee: «Chʼako aba ta jtojolal». Li Jesuse jech-o la skolta Pedro sventa jaʼuk jun lekil jtakbol xchiʼuk ti lekuk ta chanbel stalelale. Ti kʼu yelan laj yichʼ chanubtasele, ep kʼusi chakʼ jchantik. Kʼalal la stak batel li chaʼlik karta ta tsobobbailetik ta baʼyel sigloe, te chalbe skʼoplal junantik li kʼusi chakʼ jchantike. Li ta yan xchanobile, te ta jkʼeltik li kʼusitik mas tsotsik skʼoplal chal li ta kartaetik taje xchiʼuk ti kʼuxi xuʼ xkakʼ ta jkuxlejaltike.