¿Kʼusi chakʼ jchantik li kartaetik la stsʼiba Pedroe?

1. ¿Kʼusi akʼbat sbain yuʼun Jeova li jtakbol Pedro kʼalal jutuk xa ox skʼan xchame?

LI JTAKBOL Pedroe jal tajek tukʼ tun ta stojolal Jeova. La xchiʼin ta cholmantal li Jesuse, lik xcholbe mantal li buchʼutik maʼuk judaetike xchiʼuk tun ta jtsop jbeiltasvanej. Kʼalal jutuk xa ox skʼan xchame, oy to kʼusi akʼbat sbain yuʼun li Jeovae. Li ta sjabilaltik 62 xchiʼuk 64 kʼalal talem xa ox Jesuse, albat yuʼun Dios ti akʼo stsʼiba chaʼlik kartaetike. Jaʼ li baʼyel xchiʼuk xchibal skarta Pedroe. Li jtakbole oy ta yoʼonton ti jech-o skolta yajtsʼaklomtak Kristo li skartatak la stsʼibae (2 Ped. 1:​12-15).

2. ¿Kʼu yuʼun tun tajek li kʼusi la stsʼiba li Pedroe?

² Kʼalal la stsʼiba xchaʼlikal karta li Pedroe, jaʼo yakal chil ep ta tos prevaetik li ermanoetike (1 Ped. 1:6). Li ta tsobobbaile oy buchʼutik lik yalik jecheʼ chanubtaseletik xchiʼuk lik sokesbeik stalelal li ermanoetike (2 Ped. 2:​1, 2, 14). Li yajtsʼaklomtak Kristo ti te nakalik ta Jerusalene poʼot xa xilik slajeb skotol li kʼusitike, jaʼ xkaltik, ti chichʼ lajesbel slumalik xchiʼuk li stemploik yuʼun li soltaroetik ta Romae (1 Ped. 4:7). Li kartaetik la stsʼiba Pedroe koltaatik-o yuʼun li yajtsʼaklomtak Kristo sventa xkuch yuʼunik li prevaetik yakal tsnuptanike xchiʼuk li kʼusitik tsnuptanik ta tsʼakale.b

3. ¿Kʼu yuʼun skʼan jchantik li skartatak Pedroe?

³ Li kartaetik la stsʼiba Pedroe jaʼ sventa li yajtsʼaklomtak Kristo ta baʼyel sigloe. Akʼo mi jech, li Jeovae laj yakʼ ti teuk tsʼibabil xkom ta Vivlia sventa jtabetik sbalil jkotoltike (Rom. 15:4). Li avi eke, kuxulutik ta jun chopol balumil xchiʼuk oy kʼusitik ta jnuptantik ti xuʼ vokol-o chkaʼitik ti xijtun ta stojolal Jeovae. Jech xtok, poʼot xa chtal jun mukʼta tsatsal vokolil ti mu xkoʼolaj li kʼusi kʼot ta stojolal Jerusalen xchiʼuk li temploe. Jaʼ yuʼun, li kartaetik la stsʼiba Pedroe tskoltautik sventa chapalukutik mi tal li skʼakʼalil Jeovae, ti mu jxiʼtatik li krixchanoetik xchiʼuk ti jkʼan li kermanotaktike. Jech xtok, chkoltaat li moletik ta tsobobbail sventa xchabibeik lek li xchijtak Jeovae.

CHAPALUKUTIK NOʼOX ME

4. ¿Kʼusi xuʼ skʼunibtas li xchʼunel koʼontontike? (2 Pedro 3:​3, 4).

⁴ Jutuk mu skotoluk li krixchanoetike muʼyuk xchʼunojik kʼusi chal Vivlia ta sventa li kʼusi chtal ta tsʼakale. Ta skoj ti voʼne xa tajek kalojtik talel ti poʼot xichʼ lajesel li chopol balumil liʼe, oy krixchanoetik tslabanutik o chalbutik ti muʼyuk onoʼox chtal slajeb li choplejale (kʼelo 2 Pedro 3:​3, 4). Kʼalal jech chalbutik ta cholmantal, junuk jchiʼiltik ta abtel o junuk kutsʼ kalaltike, xuʼ me xkʼunib-o li xchʼunel koʼontontike. ¿Kʼusi xuʼ skoltautik? Jkʼeltik kʼusi laj yalbe skʼoplal li jtakbol Pedroe.

5. Yoʼ to mu xtal li skʼakʼalil Jeovae, ¿kʼuxi tskoltautik li smalael kuʼuntike? (2 Pedro 3:​8, 9).

⁵ Oy buchʼutik tsnopik ti jalij xa tajek Jeova sventa xtal yakʼbe slajeb li choplejal ta balumile. Pe li Pedroe tsvules ta joltik ti mu xkoʼolaj kʼu yelan chchap kʼakʼaletik li Jeova kʼuchaʼal voʼotike (kʼelo 2 Pedro 3:​8, 9). Yuʼun li Jeovae jun kʼakʼal chil li jmil jabile. Jech xtok, oy smalael yuʼun xchiʼuk mu skʼan ti oyuk buchʼu xichʼ lajesele. Pe ta onoʼox xtal slajes li kʼusitik chopol oy ta sba balumile. ¿Mi mu jaʼuk jun matanal ti xuʼ jcholbetik mantal li krixchanoetik yoʼ to mu xtal li skʼakʼalil Jeovae?

6. ¿Kʼuxi chkakʼtik ta ilel ti te ta joltik ti poʼot xa skʼan xtal li skʼakʼalil Jeovae? (2 Pedro 3:​11, 12).

⁶ Li Pedroe chalbutik ti teuk ta joltik ti poʼot xa xtal li skʼakʼalil Jeovae (kʼelo 2 Pedro 3:​11, 12). ¿Kʼuxi xuʼ xkakʼtik ta ilel ti te ta joltike? Jaʼ ti jnopbetik skʼoplal kʼu yelan li kuxlejal ta achʼ balumile. Nopo noʼox avaʼi ti chalajes muil veʼliletike, ti te oyot kʼalal chchaʼkuxi li buchʼutik chamemik avuʼune xchiʼuk ti chachapbe smelolal kʼu yelan kʼot ta pasel li albil kʼopetik li buchʼutik voʼne xa xchamelike. Kʼalal ta jnopbetik skʼoplal taje, tskoltautik sventa chapalukutik xchiʼuk ti teuk ta joltik ti kuxulutik xa ta slajebal kʼakʼale. Ta skoj ti jnaʼojtik li kʼusitik poʼot xa xkʼot ta pasele, muʼyuk ta jchʼuntik li jecheʼ chanubtaseletike (2 Ped. 3:17).

MU JXIʼTATIK LI KRIXCHANOETIKE

7. ¿Kʼusi xuʼ xkʼot ta pasel mi la jxiʼtatik li krixchanoetike?

⁷ Jnaʼojtik ti poʼot xa skʼan xtal li skʼakʼalil Jeovae, jaʼ yuʼun oy ta koʼontontik chkalbetik yantik li lekil aʼyejetike. Pe bakʼintike ta skoj ti chijxiʼe vokol chkaʼitik. Taje jaʼ li kʼusi kʼot ta stojolal Pedro kʼalal laj yichʼ chapanel li Jesuse. Muʼyuk laj yal ti jaʼ yajchankʼop li Kristoe xchiʼuk oxib to velta laj yal ti mu xojtikine (Mat. 26:​69-75). Pe li Pedroe tsal yuʼun li xiʼele, ta mas tsʼakale xi laj yale: «Mu me xaxiʼtaik li kʼusi chiʼtaike mi jaʼuk xavul avoʼontonik» (1 Ped. 3:14). Li kʼusi laj yale chakʼ ta ilel ti stsal kuʼuntik li xiʼtael krixchanoetike.

8. ¿Kʼusi tskoltautik sventa mu jxiʼtatik li krixchanoetike? (1 Pedro 3:15).

⁸ Xi chalbutik Pedro sventa stsal kuʼuntik li xiʼtael krixchanoetike: «Chʼuluk xavaʼi ta avoʼontonik li Kristo ti jaʼ Kajvaltike» (kʼelo 1 Pedro 3:15). Taje jaʼ skʼan xal ti jnopbetik skʼoplal li yabtel akʼbil xchiʼuk li sjuʼel akʼbil kʼuchaʼal Ajvalil li Jesukristoe. Jaʼ yuʼun, mi chaxiʼ kʼalal chachol mantale, nopbo skʼoplal li Ajvalil kuʼuntike. Teuk ta ajol ti yakal xa ch-ajvalilaj ta vinajele xchiʼuk ti te xchiʼuk ta smiyonal xa noʼox anjeletike. Teuk ta ajolik xtok, ti akʼbil sventain «skotol li kʼusitik ta vinajel xchiʼuk ta sba balumile» xchiʼuk ti te xchiʼukot-o «skotol kʼakʼal jaʼ to mi poʼot xa ox xlaj skotol li kʼusitik oy ta balumile» (Mat. 28:​18-20). Li Pedroe chalbutik ti skʼan chapalutik «skotol ora» sventa jpakbetik skʼoplal li kʼusi jchʼunojtike. ¿Mi oy ta avoʼonton chachol mantal ta avabtel, ta aeskuela o ta buyuk noʼox? Mi jeche, kʼelo kʼusi xuʼ xapas xchiʼuk chapano li kʼusi chakʼan chavale. Kʼanbo Jeova ti akʼo xakʼbot stsatsal avoʼontone xchiʼuk ti ta onoʼox skoltaot sventa stsal avuʼun li xiʼele (Ech. 4:29).

JKʼAN JBATIK TA JUJUNTAL

9. ¿Bak’in ti muʼyuk laj yakʼ ta ilel kʼanelal li Pedroe? (Kʼelo xtok li lokʼole).

⁹ Li Pedroe la xchan kʼuxi ta akʼel ta ilel li kʼanelale. Jaʼo te oy kʼalal xi laj yal Jesuse: «Chkakʼboxuk jun achʼ mantal: kʼano me abaik ta jujuntal; jech kʼuchaʼal jkʼanojoxuke jechuk xakʼan abaik ta jujuntal ek li voʼoxuke» (Juan 13:34). Pe ta tsʼakale, li Pedroe xiʼ ta stojolal li xchiʼiltake, yuʼun mu xa skʼan xchiʼin ta veʼel li yajtsʼaklomtak Kristo ti maʼuk judaetike. Jaʼ yuʼun, li jtakbol Pabloe laj yalbe Pedro ti muʼyuk lek li kʼusi yakal tspase (Gal. 2:​11-14). Li Pedroe la stsak ta venta li kʼusi albat yuʼun Pabloe, vaʼun la sjel stalelal. Li ta skartatake laj yal ti maʼuk noʼox skʼan jkʼan li kermanotaktike, yuʼun skʼan xkakʼtik ta ilel xtok.

10. ¿Kʼuxi chkakʼtik ta ilel ti jkʼanojtik kʼuchaʼal jchiʼiltik ta vokʼel li ermanoetike? (1 Pedro 1:22).

¹⁰ Li Pedroe laj yal ti skʼan jkʼantik li ermanoetik jech kʼuchaʼal jkʼanoj li jchiʼiltik ta vokʼele (kʼelo 1 Pedro 1:22). Chkakʼtik ta ilel ti chijkʼanvan ta skoj ti ta xkakʼ ta jkuxlejaltik li mantale, yuʼun chkichʼtik chanubtasel «ti mu snaʼ xtʼujvan li Diose» (Ech. 10:​34, 35). Mi tʼujbil noʼox ta jkʼantik li ermanoetike, muʼyuk me yakal ta jchʼuntik li kʼusi laj yal Jesus ta sventa li kʼanelale. Melel onoʼox ti oy van buchʼu mas lek tajek xkil jbatik xchiʼuke jech kʼuchaʼal li Jesuse oy buchʼutik ti mas lek laj yil sba xchiʼuk li yajchankʼoptake (Juan 13:23; 20:2). Pe li Pedroe tsvules ta joltik ti skʼan jkʼantik skotol li kermanotik jech kʼuchaʼal jkʼanojtik li jchiʼiltaktik ta vokʼele (1 Ped. 2:17).

11. ¿Kʼusi skʼan xal ti chijkʼanvan ta sjunul koʼontontike?

¹¹ Li Pedroe xi tojobtasvane: «Ta sjunuluk me avoʼonton xakʼan abaik tajek ta jujuntal». Kʼalal «ta sjunuluk me avoʼonton» xie, chakʼ ta aʼiel ti chlik jkʼantik li buchʼu vokol chkaʼitik skʼanele. ¿Kʼu van yelan chkaʼi jbatik mi oy kʼusi chopol la spasbutik junuk kermanotike? Xuʼ van xijkap ta stojolal xchiʼuk ta jkʼan ta jpakbetik sutel li kʼusi la spasbutike. Pe li kʼusi albat yuʼun Jesus li Pedroe chakʼ kiltik ti muʼyuk lek chil li Jeovae (Juan 18:​10, 11). Xi la stsʼiba li Pedroe: «Mu me xapakbe abaik ta jujuntal li kʼusi chopole xchiʼuk mu me xachopol kʼopta abaik. Ti kʼusi mas leke akʼik noʼox bendision» (1 Ped. 3:9). Mi kʼanvanemot tajeke, chavakʼ ta ilel slekil avoʼonton ta stojolal li buchʼutik oy kʼusi muʼyuk lek la spasbote.

12. 1) ¿Kʼusi mas ta jpastik mi jkʼanojtik ta sjunul koʼontontik li kermanotaktike? 2) ¿Kʼusi tstij avoʼonton spasel li video Mu me xkakʼtik ti oyuk kʼusi xchʼakutike?

¹² Li ta ba’yel skarta Pedroe laj yal ti jkʼan jbatike. Li kʼanelal taje tspix «epal mulil» (1 Ped. 4:8). Kʼalal jech laj yal taje, jaʼ van vul ta sjol li kʼusi albat yuʼun Jesus ta sventa li yakʼel pertone. Kʼalal laj yal Pedro ti vukub to velta chakʼ pertone, laj van snop ti yakal xa chakʼ ta ilel slekil yoʼontone. Pe li Jesuse laj yal ti skʼan xakʼ perton «77 to ta velta», jaʼ xkaltik, ti muʼyuk spajebe. Taje oy kʼusi lek chakʼ jchantik (Mat. 18:​21, 22). ¿Mi vokol chavaʼi xchʼunel li kʼusi laj yal Jesuse? Mi jeche, mu me xachibaj. Ta skoj ti jpasmulilutike, bakʼintike vokol van chkaʼitik yakʼel perton. Pe ¿kʼusi xuʼ jpastik? Jaʼ ti xkakʼ kipaltik sventa xkakʼtik ta perton li kermanotike xchiʼuk ti jchapan li jkʼoptike.c

MOLETIK TA TSOBOBBAIL, CHABIBEIK LI XCHIJTAK JEOVAE

13. Li moletik ta tsobobbaile, ¿kʼu yuʼun xuʼ van vokol chaʼiik xchʼakbel yorail sventa spatbeik yoʼonton li ermanoetike?

¹³ Li Pedroe muʼyuk van chʼay ta sjol ti xi albat yuʼun Jesus kʼalal chaʼkuxiem xa oxe: «Chabio li kuni chijtake» (Juan 21:16). Mi molot ta tsobobbaile, skʼan me jech xapas ek. Pe xuʼ van mu kʼunuk chavaʼi ta xchʼakbel yorail sventa xapase. Yuʼun li moletik ta tsobobbaile skʼan xakʼbeik li kʼusitik chtun yuʼunik jujun kʼakʼal li yutsʼ yalalike xchiʼuk ti lekuk oyik ta mantale. Jech xtok, skʼan xakʼik ta ilel ti baxbolik ta cholmantale, skʼan lek xchapan sbaik sventa xchanubtasvanik li ta tsobajeletike xchiʼuk sventa sjelubtasik mantaletik li ta asambleaetike. Junantike chkoltavanik ta Komite ti Tsbeiltasvan batel ta Ospitaletike o li ta Departamento sventa Svaʼanel salonetik xchiʼuk yan kʼusitike. Li moletik ta tsobobbaile toj ep kʼusitik sbainojik.

14. ¿Kʼusi chtijbat-o yoʼontonik li moletik sventa spatbeik yoʼonton li ermanoetike, xchiʼuk kʼusi xuʼ xkoltaatik-o? (1 Pedro 5:​1-4).

¹⁴ Li Pedroe laj yalbe moletik ta tsobobbail ta skʼakʼalil ti skʼan xchabibeik li xchijtak Dios ti oy ta sbaike (kʼelo 1 Pedro 5:​1-4). Jnaʼojtik ti skʼanoj yermanotakik li moletike xchiʼuk tskʼan tspatbeik yoʼonton. Pe bakʼintike xuʼ van mu spas chaʼiik li kʼusi sbainojik ta skoj ti mu noʼox xokobike o ti lubemik noʼoxe. ¿Kʼusi xuʼ xapas mi jech yakal chkʼot ta atojolale? Albo Jeova ti kʼu yelan chavaʼi abae. Xi laj yal li Pedroe: «Mi oy buchʼu ch-abtej ta stojolal yantike, akʼo spat yoʼonton ti jaʼ ch-akʼbat yipal yuʼun li Diose» (1 Ped. 4:11). Junantik ermanoetike oy kʼusitik tsots yakal tsnuptanik ti mu to stakʼ kʼusi pasel avie. Pe teuk ta ajol li bankilal jchabichij ti jaʼ li Jesukristoe, mas to ep kʼusitik xuʼ spas ta stojolal li ermanoetik avie xchiʼuk li ta achʼ balumile. Li kʼusi tskʼan Jeova ta stojolal li moletik ta tsobobbaile jaʼ ti akʼo skʼan li yermanotakike, ti akʼo spatbeik yoʼontonike xchiʼuk ti lekuk ta chanel li stalelalike.

15. ¿Kʼusi tspas jun mol ta tsobobbail sventa spatbe yoʼonton li ermanoetike? (Kʼelo xtok li lokʼole).

¹⁵ Li William ti jal xa tunem tal ta mol ta tsobobbaile tsots tajek skʼoplal chil ti spatbe yoʼonton li ermanoetike. Kʼalal lik li chamel COVID-19, li William xchiʼuk li yan moletik ta stsobobbaile laj yilik ti skʼan skʼoponik batel jujun xemana li jcholmantaletik ta sgrupoike. ¿Kʼu yuʼun ti jech la spasike? Xi chale: «Epal ermanoetik stuk te oyik ta snaik xchiʼuk muʼyuk buchʼu xuʼ xchiʼinik ta loʼil. Xuʼ van muʼyuk xa kʼusi lek chtal ta snopbenik». Kʼalal oy jun ermano ti oy kʼusi tsnuptane, li Williame tstsʼet chikinta sventa snaʼ li kʼusi chtun yuʼune xchiʼuk li kʼusi tsvul-o yoʼontone. Vaʼun, tsaʼ junuk mantal sventa skolta li ermanoe. Li kʼusi mas tstunese jaʼ li videoetik te oy ta jpajinatike. Xi to chal li Williame: «Mas to tsots skʼoplal avi ti jpatbetik yoʼonton li ermanoetike. Mi ta jkoltatik krixchanoetik ta yojtikinel li Jeovae, jaʼ jech skʼan jpatbetik yoʼontonik ek li ermanoetik sventa mu xiktaik li mantale».

JAʼ TSTSʼAKUBTAS JCHANUBTASEKTIK LI JEOVAE

16. ¿Kʼuxitik xuʼ xkakʼ ta jkuxlejaltik li kʼusi la jchantik ta skartatak Pedroe?

¹⁶ Li ta xchanobil liʼe, la jkʼeltik junantik noʼox li kʼusi chakʼ jchantik li skartatak Pedroe. Yikʼaluk van laj avakʼ venta ti oy to kʼusitik skʼan xapase. Nopbo skʼoplal liʼe: ¿Mi oy ta avoʼonton chanopbe mas skʼoplal ti kʼu yelan li kuxlejal ta achʼ balumile? ¿Mi oy ta avoʼonton chachol mantal ta avabtel, ta aeskuela o ta buyuk noʼox? ¿Mi la anopbe skʼoplal kʼuxitik yan xuʼ xavakʼ ta ilel ti akʼanoj tajek li ermanoetike? Mi molot ta tsobobbaile, ¿mi ta slekil avoʼonton xchiʼuk chavakʼ avipal ta spatbel yoʼonton li ermanoetike? Mu xachibaj mi la avakʼ venta ti oy to kʼusi skʼan xapase. Teuk ta ajol «ti toj lek yoʼonton li Kajvaltike» xchiʼuk tskoltaot sventa spas avuʼun (1 Ped. 2:3). Jech xtok, xi chal li Pedroe: «Jaʼ tstsʼakubtas li chanubtasel chavichʼike. Jaʼ tskoltaoxuk sventa tukʼuk-o oyoxuk, jaʼ tskoltaoxuk sventa tsotsukoxuk-o» (1 Ped. 5:10).

17. ¿K’usi jmoton ta jtatik mi chkakʼ kipaltik chijtun ta stojolal Jeova xchiʼuk ti xchanubtasutike?

¹⁷ Jun veltae, li Pedroe mu sta-o laj yaʼi ti te xchiʼuk li Xnichʼon Diose (Luk. 5:8). Pe ta skoj ti koltaat yuʼun Jeova xchiʼuk Jesuse, jech-o la stsʼakli batel li Kristoe. Jaʼ yuʼun, akʼe ochuk «li ta Ajvalilal sbatel osil yuʼun Kajvaltike, li Jkoltavanej Jesukristoe» (2 Ped. 1:11). ¡Kʼupil tajek sba li matanal la stae! Mi jech-o chavakʼ batel avipal eke xchiʼuk chavakʼ xchanubtasot li Jeovae, ta me xata li kuxlejal sbatel osile xchiʼuk chakol ta skoj ti oy xchʼunel avoʼontone (1 Ped. 1:9).