Efesios 3:20 | «Ti jech oy smucʼul stsatsal ti Diose, xʼechʼ to xuʼ ta xacʼbotic ti cʼusi ta jcʼantique, ti cʼusi ta jnoptique»

«Li avi une, li buchʼu yakal ch˗abtej sjuʼel ta jtojolaltike x˗echʼ to ta xakʼbutik li kʼusi ta jkʼantike o li kʼusi jnopojtike. Jaʼuk akʼo yichʼ albel smukʼulal» (Efesios 3:20, 21, Xchʼul Kʼop Dios sventa Achʼ Balumil).

«Ti jech oy smucʼul stsatsal ti Diose, xʼechʼ to xuʼ ta xacʼbotic ti cʼusi ta jcʼantique, ti cʼusi ta jnoptique. Avi tana une, ichʼbiluc ta mucʼ ti Dios ti ta xʼabtej ti smucʼul stsatsal ta jtojoltique. Ichʼbiluc ta mucʼ sbatel osil» (Efesios 3:20, 21 Xchʼul Cʼop ti Jtotic Diose, ta skʼop Chamula).

Li kʼusi skʼan xal Efesios 3:20

Li jtakbol Pabloe chal ta jamal ti spatoj yoʼonton ta stojolal Dios ti tstakʼ j˗orasiontike xchiʼuk laj yal ti xuʼ xakʼbe yajtuneltak li kʼusitik chtun yuʼun akʼo mi mu jechuk snopojike. Bateltike x-echʼ to ti kʼu yepal ta xakʼbe li yajtuneltake, akʼo mi mu jechuk ti kʼu yelan la skʼanike.

«Li avi une, li buchʼu yakal ch˗abtej sjuʼel ta jtojolaltike». Li ta versikulo 21 xi la stsʼiba li Pabloe: «Jaʼuk akʼo yichʼ albel smukʼulal Dios ta stojolal li tsobobbaile xchiʼuk ta stojolal li Kristo Jesuse». Kʼalal jech la stsʼiba li Pabloe jamal laj yal ti jaʼ Jeovaa li buchʼu chakʼe. Jaʼ yuʼun chaʼa, li Diose xuʼ xakʼbutik juʼeltik o kipaltik ti chtun kuʼuntik sventa jpasbetik li kʼusi tskʼan yoʼontone (Filipenses 4:13).

Li ta versikulo 20, li jtakbol Pabloe chal ta jamal ti xuʼ yuʼun xchabi yajtuneltak li Jeovae. Kʼalal xi jelubtasbile: «Li buchʼu yakal ch˗abtej sjuʼel» xchiʼuk ti xuʼ yuʼun li Jeovae, xi chal jlik livroe: «Li versikulo liʼe maʼuk noʼox ta xalbe skʼoplal ti tskʼan chkoltavan li Diose, jaʼ skʼan xal ti oy sjuʼel sventa jech ta spase». Li Jeovae mu xkoʼolaj ta jun kamigotik, yuʼun li jun kamigotike xuʼ van oy ta yoʼonton tskʼan tskoltautik, pe bateltike mu xuʼ yuʼun. Pe li Jeovae jech˗o ta xchabi li yajtuneltake xchiʼuk tstakʼbe li s˗orasiontake. Li stuke muʼyuk spajeb li sjuʼele xchiʼuk jaʼ noʼox stuk li mukʼul jpasmantale (Isaias 40:26).

«Li buchʼu [...] x˗echʼ to ta xakʼbutik li kʼusi ta jkʼantike o li kʼusi jnopojtike». Li Jeovae maʼuk noʼox ta xakʼbe li kʼusi tskʼan li yajtuneltake, yuʼun muʼyuk spajeb li kʼusi xuʼ xakʼbee. Li jun yajtunel Diose snaʼoj ti oy slekil yoʼonton li Jeovae, pe kʼalal oy kʼusi ta skʼanbee xuʼ x˗echʼ to yepal li kʼusi ch˗akʼbate ti maʼuk noʼox jech yepal kʼuchaʼal tskʼane.

Kʼalal laj yal jtakbol Pablo ti ‹x-echʼ to ta xakʼbutik ti maʼuk noʼox kʼuchaʼal ta jkʼantik o ta jnoptike›, oy to kʼusi chakʼ jchantik ta sventa li versikulo taje. Li jtakbole tskʼan chakʼbe snaʼ yajtsʼaklomtak Kristo, ti ep tajek chkoltavan li Diose ti maʼuk noʼox jech kʼuchaʼal snopojike. Li yajtsʼaklomtak Kristoe xuʼ van mu xa kʼusi stakʼ spas chaʼiik ta skoj ti tsots tajek li svokolike xchiʼuk tsnopik ti mu xa xuʼ xchapaje. Bateltike xuʼ van mi jaʼuk snaʼik kʼusi tskʼanbeik li Jeovae. Pe li Jeovae mu kʼusi chmakat˗o sventa xaʼibe smelolal li svokolike xchiʼuk ti xuʼ skolta li yajtuneltake. Ta melel kʼalal sta˗o chile xuʼ xchapan li kʼusitik tsots ta jnuptantike. Jech xtok, ti kʼu yelan ta xchapane xuʼ van mi jaʼuk bu jech la jnopbetik˗o skʼoplal (Job 42:2; Jeremias 32:17). Kʼalal mu to chchapan li jvokoltike, chakʼ juʼeltik sventa xkuch kuʼuntik batel xchiʼuk ti xijmuyubajuk noʼoxe (Santiago 1:2, 3).

Stsʼak loʼil ta Efesios 3:20

Li jtakbol Pabloe la stsʼibabe batel karta li yajtsʼaklomtak Kristo ti te nakalik ta Éfeso ti te xkom ta Asia Menor, ta yosilal Turquía li avie. Li ta skartae, la stsʼiba li kʼusitik la skʼanbe Jeova ta s˗orasion sventa li j˗efesoetike (Efesios 3:14-21). Li kʼusi la skʼan ta orasion li Pabloe jaʼ ti xchanbeik snopben li Jesuse xchiʼuk ti xchanbeik slekil talelale, yuʼun jaʼ jech mas to ta xojtikinik li kʼanelal yuʼun Kristoe. Li yajtsʼaklomtak Kristo avi eke jaʼ jech skʼan spasik. Li kʼusi chal ta Efesios 3:20 xchiʼuk 21 jaʼ xa stsutseb s˗orasion li Pabloe xchiʼuk te la skʼupil kʼopta li Diose.

Sventa xavaʼibe smelolal kʼusi chal li karta sventa Efesiose, kʼelo li video liʼe: