Люкалэ узырлыкез, кудӥз зэмзэ но дуно луэ

1, 2. Малы выль дунне вуытозь, куанер адямиос луозы?

ТУАЛА экономической система жалясьтэм но шонерлыктэм. Егит адямиослы туж секыт уж шедьтыны. Соин тросэз узыр шаеръёсы кошкыны тыршо, со кышкыт ке но. Котькытын, азинлыко шаеръёсын но, трос адямиос куанер уло. Узыр адямиос пумен узыргес но узыргес луо, нош куанеръёсыз — эшшо но куанергес. Кызьы возьматӥз одӥг эскерон, быдэс дунне вылысь 1 процент самой узыр адямиослэн ваньбурзы луэ сомында ик, кӧня луэ, дунне вылысь кылем 99 процент адямиослэсь узырлыксэс ӵош басьтыса. Зэмзэ но, со дыре, куке трос миллиард адямиос туж куанер уло, куд-ог адямиослэн туж трос коньдонзы, кудӥз тырмыт луоз соослы но, соослэн нылпиоссылы но, нылпиоссылэн нылпиоссылы но. Со сярысь Иисус Христос но вераз: «Кураськисьёс ялан тӥ котырын» (Марк 14:7). Малы со озьы луэ?

² Иисус вала вал, та экономической система Инмарлэн Эксэйлыкез лыктытозь уз воштӥськы шуыса. Усьтӥськонын 18:3 вузчиос шуыса нимамын барыш люкась вуз карон система, кудӥз политикаен но религиен ӵош Шайтанлэн дуннеезлэн люкетэз луэ. Инмарлэн калыкез политикае но зэмос луисьтэм религие уг пыриськы. Озьы ке но, тросэз Инмарлэн ужась-тыршисьёсыз Шайтанлэн дуннеезлэн вуз карон системаеныз озьы яке тазьы герӟаськоно луо.

3. Кыӵе юанъёсты ми эскеромы?

³ Христианъёслы туж кулэ эскерыны, кызьы соос вуз карон система шоры учко. Со понна соослы юано асьсэлэсь: «Кызьы мон ваньбурме уже кутыны быгатысал, Инмарлы оскымон кылемме возьматон понна? Мар мыным кароно, вуз карон системае ӧжытгес пыриськон понна? Кыӵе учыръёс возьмато, жалясьтэм но шонерлыктэм дуннеын улыса, христианъёс быдэсак Иеговалы оскисько шуыса?»

ЮРТЭН ПӦЯСЬКИСЬ КИВАЛТӤСЬ СЯРЫСЬ МАДЁН

4, 5. а) Кыӵе югдуре шедиз Иисуслэн мадёнысьтыз юртэн кивалтӥсь? б) Мар карыны ӧтиз Иисус аслэсьтыз дышетскисьёссэ?

⁴ Лыдӟы Лукалэсь 16:1—9. Юртэн пӧяськись кивалтӥсь сярысь мадён, кудзэ вераз Иисус, милемыз тросэзлы дышетыны быгатэ. Куке юртэн кивалтӥсез, юртэз тус-тас каре шуыса, янгыше уськытӥзы, со «валатскыса ужа[з]», яке визьмо лэсьтӥз, но аслыз эшъёс кутӥз, кудъёсыз солы ужтэк кылемез бере юрттысалзыa. Веранэз ӧвӧл, Иисус аслаз дышетскисьёсызлэсь мылкыдзэс ӧз ӝуты шонертэм ужъёс лэсьтыны, та дуннеын улэп кылён понна, уго озьы улӥсьёсты со «таизлэн дуннелэн пиосыз» шуыса нимаз. Нош та мадёнэз вераса, Иисус туж кулэ луись малпанэз валэктӥз.

⁵ Иисус тодэ вал, юртэн кивалтӥсьлы сямен ик, кудӥз секыт югдуре шедиз, тросэзлы христианъёслы, улыны коньдон поттон понна, озьы яке тазьы та шонерлыктэм дуннеен герӟаськоно луоз шуыса. Соин ик со ӧтиз соосты: «Оскиськыны луонтэм узырлыкен асьтэлы эшъёс кутэлэ: начармоно луиды ке, соос [Иегова но Иисус] тӥледыз бырисьтэм юртъёсы мед басьтозы». Кызьы ми та визь-кенешлэсь кылзӥськыны быгатӥськомы?

6. Малы вераны луоз, трос коньдон поттыса яке барыш люкаса улон Инмарлэн малпаназ уг пыры вал шуыса?

⁶ Иисус ӧз валэкты ке но, малы со узырлыкез «оскиськыны луонтэм» шуыса нимаз, Библия возьматэ, Инмарлэн малпаназ ӧй вал, адямиос трос коньдон поттыса яке барыш люкаса мед улозы шуыса. Едем садын Иегова Адамлы но Евалы жалятэк сётӥз ваньзэ, мар соослы кулэ вал (Ул.-выл. 2:15, 16). Нош куке нырысетӥ даурын вӧйын зырӟем христианъёслы святой дух сётэмын вал, «нокин но аслаз ваньбур пӧлысьтыз номыре но таиз мынам аслам шуыса ӧз нима,— ваньмыз соослэн огазьын, огъя вал» (Ап. уж. 4:32). Исаия пророк азьло ик вераз, вуоз шуыса дыр, куке вань адямиос музъемен сётэм трос кузьымъёслы шумпотыса улозы (Ис. 25:6—9; 65:21, 22). Нош али Иисуслэн дышетскисьёсызлы визьмо лэсьтоно. Улыны коньдон поттон понна, соослы та дуннелэсь «оскиськыны луонтэм узырлыксэ» уже кутоно, но со дыре ик Инмарлы оскымон кылёно.

ОСКИСЬКЫНЫ ЛУОНТЭМ УЗЫРЛЫКЕЗ ВИЗЬМО УЖЕ КУТЭ

7. Кыӵе визь-кенеш сётэмын Лукалэсь 16:10—13?

⁷ Лыдӟы Лукалэсь 16:10—13. Иисуслэн мадёнысьтыз юртэн кивалтӥсь, аслыз пайда утчаса, эшъёс кутӥз. Нош Иисуслэн потэ вал, солэн дышетскисьёсыз шонер мылкыдын асьсэлы инмысь эшъёс мед утчалозы шуыса. Мадён верамез бере Иисус возьматӥз, со, кызьы ми уже кутӥськомы оскиськыны луонтэм узырлыкез, возьматэ шуыса сое, оскымонэсь-а ми Инмарлы, ӧвӧл-а. Иисуслэн верамез потэ вал, ми «оскиськыны луонтэм узырлыкын» оскиськымон луыны быгатӥськомы шуыса, яке сое шонер амалэн уже кутыны. Кызьы ми сое лэсьтыны быгатӥськомы?

8, 9. Кызьы куд-ог христианъёс асьсэлэсь ваньбурзэс уже куто?

⁸ Одӥгез валтӥсь амал, кызьы ми возьматыны быгатӥськомы, ваньбурмес уже кутыса ми Инмарлы оскымон кылиськомы шуыса,— со ас мылкыд кареммыя коньдон сётыны быдэс дунне вылын ортчытӥськись тодытон ужлы, кудӥз сярысь Иисус вераз вал (Матф. 24:14). Индиысь одӥг ныл коньдон люканы малпаз. Шудонъёс басьтон интые но, со коньдонзэ нимаз тырыса кельтэ вал. Нош куке солэн трос коньдонэз люкаськиз, со вань люкам коньдонзэ тодытон ужез азьланьтонлы сётӥз. Одӥг вын-агай, кудӥз озьы ик Индиын улэ, кокосъёс будэтэ. Троссэ со сётэ палэнын берыктон ужез нуись офисэ, кудӥз публикациосты малаялам кылэ берыктэ. Со вын-агай тазьы малпаське: офисэ кокосъёс басьтыло бере, коньдонэн сётэм интые, кокос сётыса, умойгес луоз. Озьы со визьмо лэсьтэ. Грециын улӥсь вын-агайёс но Вефиль семьялы ялан сётъяло оливковой вӧй, сыр но мукет сиён-юон.

⁹ Шри-Ланкаысь одӥг вын-агай, кудӥз али мукет шаерын улэ, пумиськонъёс но конгрессъёс ортчытъян понна, аслэсьтыз корказэ но музъемзэ сётӥз. Озьы ик со лэзиз, солэн корказ вань дырзэс сётыса ужась-тыршисьёс мед улозы шуыса. Со солы нокыӵе но барыш уг вайы ке но, озьы со туж юрттэ ивортӥсьёслы, кудъёсызлэн коньдонзы трос ӧвӧл. Одӥгаз шаерын, кытын вын-агайёсмылы но сузэр-апайёсмылы Инмарлы ужаны-тыршыны эрик уг сёто, вын-агайёс лэзё асьсэлэн коркаязы, Эксэйлык юртын кадь, пумиськонъёс ортчытъяны. Солы луыса, пионеръёслы но мукет ивортӥсьёслы, кудъёсызлэн коньдонзы ӧжыт, пумиськонъёс ортчытон понна инты утчаны но со понна коньдон тырыны кулэ ӧвӧл.

10. Кыӵе бакель каронъёс ми басьтӥськомы, куке мукетъёсызлы жалятэк сётӥськомы?

¹⁰ Та примеръёс возьмато, кызьы Инмарлэн ужась-тыршисьёсыз «ӧжытын» оскиськымонэсь луо: соос шонер уже куто ваньбурзэс, кудзэ нокызьы но уд ӵошаты духовной узырлыкен (Лука 16:10). Мае шӧдо Иеговалэн эшъёсыз, ваньбурзэс мукетъёсызлы пайда ваён понна кутыса? Соос валало, шырыт сямо луыса, зэмос узырлык люкало шуыса (Лука 16:11). Одӥг сузэр, кудӥз Эксэйлык ужлы ялан коньдонэн юрттэ, вера, кыӵе бакель каронъёс со басьтэ: «Трос аръёс ӵоже ини мон коньдонме жалятэк сётӥсько. Но мар тунсыкоез: тросгес сётэмъям, мон эшшо но шырыт сямо луисько. Табере мыным капчигес мукетъёссэ простить карыны, чиданы, визь-кенешъёслэсь кылзӥськыны но ортчыт трос сюлмаськытэк улыны». Тросэз асьсэ вылын шӧдӥзы, мукетъёсызлы жалятэк сётыса, соослэн Инмарен кусыпъёссы юнмало шуыса (Пс. 111:5; Мад. 22:9).

11. а) Кызьы эшшо ми визьмо лэсьтыны быгатӥськомы на? б) Кызьы уже куто ас мылкыд кареммыя сётэм коньдонэз Инмарлэн калыкез пӧлын? (Учке статья кутсконысь суредэз.)

¹¹ Со сяна, ми визьмо лэсьтӥськомы на, куке ваньбурмес мукет вын-агайёслы но сузэр-апайёслы Инмарлы ужаны-тыршыны юрттон понна кутӥськомы. Соос, кинъёслэн коньдонзы вань, но асьсэос уг быгато вань дырзэс сётыса ужаны-тыршыны яке мукет шаере тодытон понна мыныны, шумпото, коньдонзэс сётыса, тодытон ужез азинтонлы юрттыны быгато шуыса (Мад. 19:17). Ас мылкыд кареммыя коньдон сётэменымы, ӟеч иворез кылыны быгато куанер шаеръёсын но, кытын трос адямиос зэмлыкен тунсыкъясько; со сяна, отын улӥсь ивортӥсьёс публикациос басьтыны быгато. Азьло дыръёсы Конго, Мадагаскар но Руанда выллем шаеръёсын улӥсь вын-агайёслы ӵем дыръя быръёно луэ вал: семьязэс сюдоно яке Библия басьтоно. Нош Библия басьтон понна, куддыръя арня яке быдэс толэзь ужано вал. Табере, ас мылкыд кареммыя жалятэк коньдон сётэменымы но со коньдонэз, кытчы кӧня кулэ, озьы радъямен сэрен, Иеговалэн организациез сюлмаськыны быгатэ, Библиез пӧртэм кылъёсы мед берыктозы шуыса. Солы луыса, котькудӥз, кин Библиез дышетэ, аслыз Библия басьтыны быгатэ. (Лыдӟы 2 Коринфъёслы 8:13—15.) Озьы, Иеговалы эш луыны быгато сётӥсьёсыз но, басьтӥсьёсыз но.

«ОГШОРЫ УЛОНЫСЬ УЖЪЁСЫН» АСЬТЭДЫ ЭН ГЕРӞАЛЭ

12. Кызьы Авраам возьматӥз, Иеговалы оске шуыса?

¹² Инмарен эшъяськеммы потэ ке, милемлы быгатэммыя вуз карон системалэсь палэнын возиськоно но кароно ваньзэ, мае быгатӥськомы, зэмос узырлыкез люкан понна. Вашкала дыръёсы Авраам, кудӥзлэн юн осконэз вал, Иеговалэсь кылзӥськиз но, узыр Ур карысь кошкыса, ынлэсь возъям балаганъёсын улӥз, малы ке шуоно солэн Инмарен кусыпъёссэ юнматэмез потэ вал (Евр. 11:8—10). Авраам котьку тодаз возиз, зэмос узырлыкез Инмар гинэ сётыны быгатэ шуыса. Соин ик со узырмыны ӧз тыршы, уго со возьматысал, со Иеговалы оскемысь дугдӥз шуыса (Ул.-выл. 14:22, 23). Иисус узыр пинал пилэсь мылкыдзэ ӝутӥз сыӵе ик осконзэ будэтыны: «Дун-шектэм луэмед потэ ке, мын, юртъердэ вуза но кураськисьёслы сётъя; со понна тынад узырлыкед Инмын луоз; лыкты но Мон сьӧры мын» (Матф. 19:21). Та пинал пилэн Авраамлэн кадь юн осконэз ӧй вал, озьы ке но, вал сыӵе адямиос, кудъёсыз Иеговалы быдэсак оско вал.

13. а) Мар гожтӥз Павел Тимофейлы? б) Кызьы ми Павеллэн верам кылъёсызъя улыны быгатӥськомы?

¹³ Тимофейлэн но осконэз юн вал. Павел Тимофеез «Иисус Христослэн ӟечлыко ожмаськисез» шуыса нимаз но солы гожтӥз: «Армиен кивалтӥсьлы кельшыны тыршыса, нокудӥз но ожгарчи огшоры улонысь ужъёсын ассэ уг герӟа» (2 Тим. 2:3, 4). Туннэ Христослэн дышетскисьёсыз, соос пӧлын миллионлэсь тросгес вань дырзэс сётыса ужась-тыршисьёс но, быгатэмзыя Павеллэн верам кылъёсызъя улыны тыршо. Соос уг сётско рекламалы но котырысьтызы зӥбыны тыршись дуннелы. Соослы юрттэ Библиысь возет: «Пунэм тыроно мурт пунэмен сётӥсьлэн ляльчиез луэ» (Мад. 22:7). Шайтанлэн туж потэ, ми вуз карон системалэн ляльчиосыз мед луомы но солы вань дырмес но кужыммес мед сётомы шуыса. Куд-ог кутэм ужпумъёсынымы сэрен, ми трос аръёслы пунэм тыронлэн ляльчиосыз луыны быгатомы. Кылсярысь, куд-огъёсыз бадӟым кредитъёс басьто улон инты, дуно машина, вылӥ образование басьтон понна яке узыр сюан ортчытон понна. Ми визьмо лэсьтомы, огшоры но пунэмаськытэк улӥмы ке но ӧжытгес коньдон быдтыны тыршимы ке. Озьы ми возьматомы, вуз карон системалэн ӧвӧл, нош Инмарлэн ляльчиосыз луыны дась шуыса (1 Тим. 6:10).

14. Мар карыны милям юн мылкыдмы луыны кулэ? Вералэ учыръёсты.

¹⁴ Огшоры улон понна, валано, мае зэмзэ ик нырысетӥ интые пуктоно. Одӥг кузпалъёс асьсэ вылэ ужало вал но трос коньдон потто вал. Соослэн туж потӥз выльысь вань дырзэс сётыса ужамзы-тыршемзы, соин ик соос вузазы асьсэлэсь ужзэс, катерзэс но мукет ваньбурзэс. Собере соос мылкыд каризы мыныны Уорвике (США, Нью-Йорк штат) дунневыл валтӥсь кивалтонниез пуктыны. Иегова соосты туж бакель кариз: кузпалъёс нылынызы но эмеспиенызы ӵош Вефильын тыршизы, нош кӧня ке арня ӵоже картэзлэн анай-атаеныз но, кудъёсыз озьы ик Уорвикын вал. Тани мукетыз учыр. Колорадоысь (США) пионер сузэрмы ужаны интыяськиз банке, кытын быдэс нунал ужано ӧй вал. Кузёосызлы туж яраз сузэрмылэн ужамез. Соин соос солэсь уждунзэ куинь поллы будэтыны ӵектӥзы, со быдэс нунал ужаны соглаш кариськиз ке. Сузэрмы кельшымон ӵектонлы соглаш ӧз луы, малы ке шуоно соку со ужан-тыршонэз улоназ нырысетӥ интые пуктыны ӧй быгатысал ни. Та кыкез гинэ учыръёс, кудъёсыз возьмато, малэсь куштӥсько тросэз Иеговалэн ужась-тыршисьёсыз. Инмарлэсь Эксэйлыксэ нырысетӥ интые пуктыны ӟырдыт мылкыдмы возьматэ, Инмарен эшъяськонэз но духовной узырлыкез ми ваньбурлэсь тросгес дунъяськомы шуыса.

КУКЕ «ОСКИСЬКЫНЫ ЛУОНТЭМ УЗЫРЛЫК» БЫРОЗ

15. Кыӵе узырлык милемыз зэмзэ но шудо каре?

¹⁵ Адями узыр улэ ке, со уг возьматы, Инмар бакель каремен, со узыр улэ шуыса. Иегова бакель каре соосты, кинъёс «ӟеч ужъёсын» узырмыны тыршо. (Лыдӟы 1 Тимофейлы 6:17—19.) Тани одӥг учыр. Албаниын ивортӥсьёс уг тырмо шуыса тодэмез бере, Лючияb, кудӥз соку Италиын улэ вал, 1993-тӥ арын Албание кошкиз. Солэн люкам коньдонэз ӧй вал, соин ик со быдэсак Иеговалы оскиськиз. Со албан кылэз дышетӥз но 60-лэсь тросгес адямиослы улонзэс Иеговалы сӥзьыны юрттӥз. Тросэз христианъёс ужало-тыршо сыӵе интыосын, кытын зэмлыкен туж уг тунсыкъясько. Озьы ке но, ваньмыз, мар ми кариськомы, мукет адямиослы пырак улонэ сюрес шедьтон но со вылын кыльыны юрттон понна, туж дуно луэ. Озьы ми пырак дауръёслы узырлык люкаськомы (Матф. 6:20).

16. а) Мар луоз туала вуз карон системаен? б) Кызьы учконо ваньбур шоры, ми тодӥськомы ке, мар луоз азьланяз?

¹⁶ Лукалэсь 16:9 «начармоно луиды ке» кылъёсын Иисус вераз, сыӵе дыр одно ик луоз шуыса. Та берпуметӥ нуналъёсы куд-ог банкъёс но шаеръёс коньдонэн герӟаськем туж бадӟым шуг-секытъёсы сюремын. Нош ӝоген быдэс дунне вылын югдур эшшо но секытгес луоз на. Шайтанлэн дуннеез, кудаз пыре политика, религия но вуз карон система, быдэсак куашкалоз. Иезекииль но Софония пророкъёс азьло ик веразы вал ини, зарни но азвесь, кудъёсыз трос дауръёс ӵоже та дуннеын валтӥсь инты басьтӥзы, чик кулэтэм луозы шуыса (Иез. 7:19; Соф. 1:18). Мае тӥ шӧдысалды, пересьмем берады валасалды ке, духовной узырлык люкам интые, трос «оскиськыны луонтэм узырлык» люкады шуыса? Тӥляд но сыӵе ик шӧдонъёсты луысалзы, дыр, со адямилэн кадь, кудӥз вань улонзэ сӥзиз тросгес коньдон люкан понна, нош собере тодӥз, со зэмос коньдон вылымтэ шуыса (Мад. 18:12). Зэм, «оскиськыны луонтэм узырлык» куке но быроз, соин ик туж кулэ сое уже кутыны, Иеговаен но Иисусэн эшъяськон понна. Ваньмыз, мар ми кариськомы Иегова но солэн Эксэйлыкез понна, милемыз зэмзэ ик шудо каре.

17, 18. Кыӵе улон возьма азьланяз Инмарлэсь эшъёссэ?

¹⁷ Инмарлэн Эксэйлыкез лыктӥз ке, соку улон инты понна коньдон яке кредит тыроно уз луы ни, вань адямиослэн тырмыт сиён-юонзы луоз но нокин но уз висьы ни. Инмарлэн эшъёсызлэн луоз ваньмыз умоез со пӧлысь, мар сётэ музъем. Зарни, азвесь но дуно изъёс чеберъян понна гинэ кутӥськозы, нош ваньбур люкан понна уз ни. Вань адямиос туж умой пулэсь, излэсь но кортлэсь чебер коркаос пуктыны быгатозы. Нош кинлы ке юрттэт кулэ луиз ке, солы мылысь-кыдысь юрттозы, коньдон поттон понна уз. Со, мае музъем сётэ, вань адямиос куспын огкадь люкемын луоз.

¹⁸ Та куд-огез гинэ дунъяны луонтэм бакель каронъёс пӧлысь, кудъёссэ басьтозы соос, кинъёс Иеговаен но Иисусэн эшъясько. Макем шумпотозы Инмарлэн музъем вылын улӥсь ужась-тыршисьёсыз, куке Иисуслэсь таӵе кылъёссэ кылозы: «Лыктэлэ, Мынам Атаелэн бакель карем муртъёсыз, басьтэлэ дунне кылдэм дырысен тӥледлы дасям Эксэйлыкез»! (Матф. 25:34).