«Бӧрдӥсьёсын ӵош бӧрдэ»
«Ог-огдылэсь мылкыддэс ӝутэ, ог-огдэс юнматэ» (1 ФЕС. 5:11).
1, 2. Малы милемлы туж кулэ вераськыны со сярысь, кызьы буйгатоно матысь адямизэс ыштэм муртъёсты? (Учке статья кутсконысь туспуктэмез.)
«ПИМЫ кулэм бере ми ар пала туж юн кайгыримы»,— шуэ Сузи нимо сузэрмы. Нош одӥг вын-агаймы, куке солэн шӧдтэк шорысь кышноез кулӥз, вераз, солы «чиданы луонтэм вӧсь» вал шуыса. Туж жаль, но таӵе учыръёс туж ӵем пумисько. Тросэз христианъёс ӧз но малпалэ, дыр, Армагеддонозь семьяысьтызы кинэ ке ыштоно луозы шуыса. Тӥ, яке тӥляд тодмоосты, сыӵе югдурен пумиськиды ке, тӥляд юанды кылдыны быгатоз: «Кызьы юрттоно соослы, кинъёс кайгыро?»
2 Тӥ кылӥды, луоз, таӵе веранэз: «Дыр эмъя». Нош зэмзэ ик-а дыр ас понназ сюлэм яраосты бурмытыны быгатэ? Тани мар вераз одӥг палкышно: «Мон малпамъя, шонергес луоз вераны, адямиез эмъяны быгатэ шуыса со, кызьы адями аслэсьтыз дырзэ ортчытэ». Мугорысь яраез чидаса эмъяд ке, пумен со бурмоз. Озьы ик луэ сюлмысь яраен но — дыр ортчемъя, куддыръя, капчигес луэ. Мар юрттоз соослы, кинъёс, матысь адямизэс ыштэменызы сэрен, юн кайгыро?
ИЕГОВА — «КОТЬКЫӴЕ БУЙГАТСКОНЛЭН ИНМАРЕЗ»
3, 4. Малы ми оскыны быгатӥськомы, Иегова вала шуыса соосты, кинъёс кайгыро?
3 Веранэз ӧвӧл, ваньмызлэсь умой милемыз буйгатыны быгатэ инмысь гажась-жалясь Атаймы, Иегова. (Лыдӟы 2 Коринфъёслы 1:3, 4.) Иегова кадь, нокин но гажаны-жаляны уг быгаты. Со оскытэ аслэсьтыз калыксэ: «Мон, Мон Ачим — тӥляд Буйгатӥсьты» (Ис. 51:12; Пс. 118:50, 52, 76).
4 Иегова, гажан-жалянлэн Атаез, ачиз куректонэн пумиськиз, куке солэн яратоно адямиосыз кулӥзы — Авраам, Исаак, Иаков, Моисей но Давид (Лыд. 12:6—8; Матф. 22:31, 32; Ап. уж. 13:22). Кызьы адӟиське Инмарлэн Кылысьтыз, Иегова туж мӧзме соослэсь но ӵыдытэк вите со дырез, куке улӟытоз соосты (Иов 14:14, 15). Соосты туж умой улон возьма райын, кытын соос ноку но уз висе ни. Озьы ик тодады вае, Инмарлэн яратоно Пиез, кудӥз солы шумпотон вае вал, курадӟыса кулӥз шуыса (Мад. 8:22, 30). Со Иеговалэсь сюлэмзэ туж вӧсь кариз, луоз (Иоанн 5:20; 10:17).
5, 6. Кызьы Иегова буйгатэ милемыз?
5 Ми оскыны быгатӥськомы, Иегова милемлы одно ик юрттоз шуыса. Соин ик милемлы, вань куректонъёсмес вераса, солы сюлэммес кисьтыны кулэ. Макем шумпотоно тодыны, Иегова милесьтым шӧдонъёсмес вала но милемыз буйгатэ шуыса. Со милемлы туж кулэ! Кызьы со милемыз буйгатэ?
6 Кылсярысь, Инмар милемыз буйгатэ святой духеныз, аслаз кужыменыз (Ап. уж. 9:31). Иисус Христос оскытӥз милемыз, инмысь Атаймы «Солэсь курисьёслы Святой Духез сётоз» шуыса (Лука 11:13). Сузи, кудӥз сярысь вылӥынгес верамын вал ини, вера: «Ми туж ӵем пыдес выламы Иеговаез сюлворыса куримы милемыз буйгатыны! Но ми котьку шӧдӥмы, кызьы Инмарлэн каньыллыкез милесьтым сюлэмъёсмес но, малпанъёсмес но утьыса возиз». (Лыдӟы Филиппыослы 4:6, 7.)
ИИСУС НО ВАЛА МИЛЕСЬТЫМ ШӦДОНЪЁСМЕС
7, 8. Малы оскыны луоз, Иисус милемыз буйгатоз шуыса?
7 Куке Иисус музъем вылын улӥз, со котьма ласянь Иеговалэсь адӟем кариз. Со адямиослы кылъёсын но ужъёсын гажам-жалямзэ возьматӥз (Иоанн 5:19). Инмар Иисусэз ыстӥз, со «сюлмынызы чигиськыса улӥсьёсты» но «ӝоже усемъёсты» мед буйгатоз шуыса (Ис. 61:1, 2; Лука 4:17—21). Тӥни малы Иисус гажась-жалясь луэменыз тодмо луиз. Со кайгырись адямиен ӵош кайгырыны быгатэ вал, но солэн туж потэ вал адямиослэсь курадӟонъёссэс быдтэмез (Евр. 2:17).
8 Егит дыръяз ик ини Иисуслы матысь адямиосызлэн яке эшъёсызлэн кулэменызы пумиськоно луиз. Солэн музъем вылысь Иосиф атаез Иисус туж егит дыръя кулӥз, луозa. Малпалэ ай, макем вӧсь вал Иисуслы, но макем секыт вал солы адӟыны, кызьы солэн анаез, вынъёсыз но сузэръёсыз куректо!
9. Кызьы Иисус аслэсьтыз валась но жалясь луэмзэ возьматӥз, куке Лазарь кулӥз?
9 Музъем вылын дыръяз Иисус адямиосты зэмзэ но вала но жаля вал. Ойдолэ тодамы ваёмы, мар луиз, куке солэн Лазарь эшез кулӥз. Иисус тодэ вал ке но, сое улӟытоз шуыса, солы озьы ик вӧсь вал, кызьы вӧсь вал Мариялы но Марфалы. Соослэсь кайгыремзэс адӟыса, Иисус ӧз чида — бӧрдыны кутскиз (Иоанн 11:33—36).
10. Малы ми оскыны быгатӥськомы, Иисус милесьтым шӧдонъёсмес вала шуыса?
10 Музъем вылын улыкуз, Иисус адямиосты вала но буйгатэ вал. Кызьы сое тодон милемыз буйгатыны быгатэ? Библия милемыз оскытэ, «Иисус Христос толон но, туннэ но, пумтэм вапумъёс ӵоже одӥг кадь», со ӧз воштӥськы шуыса (Евр. 13:8). Иисус, кудӥз «Улон Сётӥсь» шуыса нимамын, ачиз матысь адямиоссэ ыштонэн пумиськиз бере, «Со визь сынаськонэ сюремъёслы но юрттыны быгатэ» (Ап. уж. 3:15; Евр. 2:10, 18). Соин ик ми оскыны быгатӥськомы, со туж жаля шуыса соосты, кинъёс кайгыро. Иисус вала соослэсь шӧдонъёссэс но кулэ дыръяз буйгатэ соосты. (Лыдӟы Еврейёслы 4:15, 16.)
СВЯЩЕННОЙ ГОЖТЭМ ПЫР БУЙГАТОН
11. Библиысь кыӵе кылбуръёс тӥледыз тужгес но буйгато?
11 Кылбуръёс, кудъёсаз верамын Лазарьлэн кулэмез но Иисуслэн соин сэрен юн кайгыремез сярысь, со ӧжытэз гинэ со кылбуръёс пӧлысь, кудъёсыз милемыз буйгатыны быгато. Со милемыз уг паймыты, малы ке шуоно «ваньмыз, мар азьвыл гожтэмын вал, гожтэмын асьмемыз визьман-дышетон понна. Чидан пыр, Священной Гожтэм пыр мылкыддэс ӝутыса, асьмеос оскиськыса мед уломы шуыса» (Рим. 15:4). Тӥ кайгыриськоды ке, тӥледыз буйгатыны быгато Библиысь таӵе кылбуръёс:
«Сюлмынызы чигиськыса улӥсьёслы Кузё-Инмар матын улэ, духенызы зӥбыт муртъёсты Со уте» (Пс. 33:19, 20).
«Кӧтӝожъёс сюлэмам аляку, Тынад буйгатэмед лулме каньыл каре» (Пс. 93:19).
«Ачиз Кузё-Инмармы Иисус Христос но асьмемыз яратӥсь Инмар Атаймы, Аслаз гажан-жалянэныз пумтэм вапумъёслы буйгатскон но оскиськон сётӥсь, сюлэмъёстэс мед каньылатоз... тӥледыз мед юнматоз» (2 Фес. 2:16, 17)b.
ЗЭМОС БУЙГАТСКОН — КЕНЕШЫН
12. Кызьы мукетъёссэ буйгатыны луоз?
12 Кайгырисьёс христиан кенешысь буйгатскон шедьтыны быгато на. (Лыдӟы 1 Фессалоникаослы 5:11.) Кызьы луоз кайгырисьёслы юрттыны но буйгатыны соосты? (Мад. 17:22). Тодады возе, «шып улонлэн аслаз дырыз, вераськонлэн аслаз дырыз» шуыса (Екк. 3:7). Далин нимо палкышно вера: «Матысь адямизэ ыштэм муртлы шара вераны кулэ сое, мар сюлмаз люкаськиз. Соин ик сыӵе муртэ туж сак кылзоно, солэн кыл куспаз пырытэк». Юния, кудӥзлэн агаез йырзэ быдтӥз, ватса на: «Тӥ соослэсь шӧдонъёссэс быдэсак валаны уд быгатӥське ке но, тӥ соосты валаны тыршиськоды. Нош со бадӟым юрттэт».
13. Мае тодамы возёно, кинэ ке буйгатэммы потэ ке?
13 Озьы ик тодады возе, адямиос пӧртэм сямен кайгыро но пӧртэм сямен сое возьмато шуыса. Куддыръя адями ачиз гинэ тодэ, макем солы вӧсь, но солы секыт луэ вераны, мар солэн сюлмаз. Библиын верамын: «Сюлэм аслэсьтыз куректон-кайгузэ адӟе, солэн шумпотон пӧлаз но уз пыриськы мукет мурт» (Мад. 14:10). Адями вера ке но, мар солэн сюлмаз, котьку ик валаны уг луы, мае солэн верамез потэ вал.
14. Мар вераны луоз, кайгырисьёсты буйгатон понна?
14 Куддыръя ми ум тодӥське, мар вераны кайгырись муртлы. Нош Библиын верамын, «визьмо муртлэн кылыз эмъя» шуыса (Мад. 12:18). Тросэз буйгатӥсь малпанъёсты шедьтӥзы «Куке матысь адямиед кулӥз» брошюраысь (ӟуч)c. Но ӵемысь пайда вае, куке ми таӵе визь-кенешез уже кутӥськомы: «Бӧрдӥсьёсын ӵош бӧрдэ» (Рим. 12:15). «Луыло сыӵе дыръёс, куке мон уг быгатӥськы вераны, макем мыным вӧсь, соку мон бӧрдӥсько,— шуэ Габи, кудӥзлэн картэз кулӥз.— Соин, эшъёсы монэн ӵош бӧрдо ке, мыным капчигес луэ. Соку мон шӧдӥсько, мон огнам ӧвӧл шуыса».
15. Кызьы ми кайгырисьёсты буйгатыны быгатомы, милемлы соосын вераськыны секыт ке? (Озьы ик учке «Кызьы кылъёсын буйгатоно» рамкаез.)
15 Тӥледлы секыт ке вераськыны соин, кин кайгыре, соку тӥ солы открытка, СМС яке гожтэт гожтыны быгатоды. Озьы тӥледлы капчигес луоз сое буйгатыны. Луоз гожтыны солы Библиысь буйгатӥсь кылъёсты, улонысь кошкем адямилэн одӥгез умой сямыз сярысь яке соин герӟаськем тунсыко учырез, кудзэ тӥ тодады возиськоды. Юния вера: «Вераны ик уг быгатӥськы, макем мон шумпотӥсько, куке мыным буйгатӥсь кылъёс ысто яке огъя оскисьёсын ӵош дырме ортчытыны ӧтё. Соку мон шӧдӥсько, монэ ярато но дунъяло шуыса».
16. Мар эшшо мукетъёссэ буйгатыны быгатэ на?
16 Ноку но эн вунэтэ, вӧсяськонлэн кужымез туж бадӟым шуыса. Ми быгатӥськомы матысь адямизэс ыштэм муртъёс понна вӧсяськыны, кызьы соосын ӵош, озьы ик асьме понна но. Сыӵе секыт вакытэ вӧсяськон понна кыл шедьтыны капчи уг луы. Нош тӥляд сюлмысь вӧсяськемды, бӧрдыса но дырекъясь куараен ке но, кайгырись адямиез буйгатыны быгатэ. Далин вера: «Сузэръёс монэ буйгатыны лыкто ке, куддыръя мон соосты вӧсяськыны курисько. Ӵемысь, куке соос вӧсяськыны кутско, соослы секыт луэ вераны, но пумен соослэн куаразы дырекъямысь дугдэ, но соос сюлэмез бугыртӥсь кылъёс вераса вӧсясько. Соослэн юн осконзы, яратонзы но мыным саклык висъямзы мынэсьтым осконме туж юнмато».
АЗЬЛАНЯЗ НО БУЙГАТЭ
17—19. Малы азьланяз но юрттыны кулэ солы, кин матысь адямизэ ыштӥз?
17 Шугадӟон бере кин ке но ӝоггес буйгатске, нош кинлы ке но со понна тросгес дыр кулэ. Нырысь, кинлэн ке но матысь адямиез кулэ ке, со вӧзын ӵыжы-выжыосыз но эшъёсыз луо. Нош собере соослы ас ужъёссы доры берытсконо луэ. Соин ик, матысь дыре гинэ ӧвӧл, нош азьланяз но дась луэ юрттыны матысь адямизэ ыштэм муртлы. Библиын верамын: «Эш эшсэ котькыӵе дыре но яратэ, шуге-леке сюрыку, агай-вын кадь со юрттыны лыктэ» (Мад. 17:17). Милемлы кайгырись адямилы юрттыны но сое буйгатыны кулэ вань дыр ӵоже, куке со сюлэм яразэ эмъяны тырше. (Лыдӟы 1 Фессалоникаослы 3:7.)
18 Эн вунэтэ, куддыръя кайгырись адямилэсь сюлэмзэ вӧсь карыны быгато тодэ ваёнъёс. Сыӵе тодэ ваёнъёс йыре лыкто пӧртэм шулдыръяськонъёс дыръя, мае ке лэсьтыку, туспуктэмъёсты учкыку, кыӵе ке крезьгурез, куараез кылыку, кыӵе ке зынэз шӧдыку яке арлэн кыӵе ке вакытэз лыктыку. Кузпалзэ ыштэм муртлы тужгес но секыт луэ, куке солы нырысетӥзэ лэсьтыны кулэ сое, мае соос котьку ӵош лэсьто вал, кылсярысь, Тодэ ваён ӝытанэ мыныны. Тани мар вера одӥг вын-агаймы: «Мон малпай вал, нырысетӥез сюан нуналмы кышноетэк мон понна туж секытэн ортчоз шуыса. Озьы ик луиз. Но мынам матысь эшъёсы ӵектӥзы люкаськыса со нуналэз ӵош ортчытыны, мон огнам медам кыльы шуыса».
19 Котьку тодамы возёно, матысь адямизэ ыштэм муртлы нимысьтыз нуналъёсы гинэ юрттэт кулэ ӧвӧл шуыса. Юния вера: «Туж юнматэ, эшъёсы монэ ноку уг вунэто шуыса. Соос монэ кыӵе ке нимысьтыз нуналъёсы гинэ тодазы уг ваё, нош котьку юртто мыным. Мон туж дунъясько сое. Со мыным кужым сётэ». Веранэз ӧвӧл, адямиез сюлэмзэ вӧсь карись тодэ ваёнъёсызлэсь быдэсак мозмытыны уг луы. Озьы ке но, ужъёсын но кылъёсын юрттыса, ми сое буйгатыны быгатӥськомы (1 Иоанн 3:18). Габи вера: «Мон туж тау карисько Иеговалы, со милемлы валась тӧроос сётӥз шуыса, кудъёсыз туж юрттӥзы мыным секыт вакытъёсы. Соосын вераськыса, мон шӧдӥсько вал, Иегова монэ аслаз яратӥсь киосаз возе шуыса».
20. Малы Иеговалэн кыл сётонъёсыз милемыз зэмзэ ик буйгато?
20 Ӝоген Иегова, котькыӵе буйгатсконлэн Инмарез, пырак дауръёслы кайгыронэз быдтоз но вань кайгырисьёсты буйгатоз. Макем со шумпоттэ милемыз! Со луоз соку, куке «ваньмыз шайгуосын кыллисьёс Инмар Пилэсь куаразэ кылозы; соку... улӟозы» (Иоанн 5:28, 29). Библия оскытэ: «Кулон пумтэм вапумъёслы ньылэмын луоз, Инмар Кузё-Инмар ваньмызлэсь ымныр вылысьтыз синвузэ ӵушоз» (Ис. 25:8). Соку ми бӧрдӥсьёсын ӵош ум бӧрдэ ни, малы ке шуоно музъем вылын вань адямиос шумпотӥсьёсын ӵош шумпотыса улозы (Рим. 12:15).
a Библиын Иосиф сярысь берпуметӥзэ верамын, куке Иисуслы 12 арес вал. Отын, кытын Библиын верамын Иисуслэн нырысетӥ паймымон ужез сярысь, куке Иисус вуэз виналы пӧрмытӥз, Иосиф сярысь номыр верамын ӧвӧл. Юбо вылын кортӵогам дыръяз Иисус апостол Иоаннэз куриз Мария сярысь сюлмаськыны. Иосиф соку улэп луысал ке, Иисус Иоаннэз со сярысь ӧй курысал, дыр (Иоанн 19:26, 27).
b Тросэз буйгатскон шедьтӥзы кылъёсысь, кудъёсыз гожтэмын Псалтирьын 19:2, 3; 30:8; 37:9, 10, 16; 54:23; 120:1, 2; Исаиялэн 57:15; 66:13; Филиппыослы 4:13; 1 Пётрлэн 5:7.
c Учке озьы ик «Утешайте скорбящих, как это делал Иисус» статьяез «Пять секретов, как быть довольным жизнью» (bp104-U) брошюраысь.