Малы милемлы Иеговаез ушъяно?

1—3. а) Ку гожтэмын вал, вылды, 146-тӥ но 147-тӥ псаломъёс? б) Мае ми тодыны быгатӥськомы 146-тӥ но 147-тӥ псаломъёсысь?

ӴЕМ ДЫРЪЯ ми ушъяськомы адямиосты ужзэс умой быдэстэмзы понна яке умой сямъёссы понна, кудъёсыз милемлы ярало. Ми шедьтӥськомы бере, мар понна адямиосты ушъяны луэ, соку макем трос милям мугъёсмы луыны кулэ Иеговаез ушъяны! Кылсярысь, ми Иеговаез ушъяны быгатӥськомы солэн мертаны луонтэм кужымез понна, кудӥз кылдытэмъёсысь адӟиське, яке солэн ӟырдыт яратонэз понна, кудзэ со возьматӥз, аслэсьтыз Пизэ сьӧлыкъёсмы понна сётыса.

² 146-тӥ но 147-тӥ псаломъёсты гожъясьлэн юн мылкыдыз вал Иеговаез ушъяны. Озьы ик со мукетъёссэ но ӧтиз соин ӵош Инмарез ушъяны. (Лыдӟы Псалтирез 146:1, 7; 147:1.)

³ Ми ум тодӥське, кин та псаломъёсты гожтӥз, но соосты гожъясь, Иегова израиль калыкез вавилон пленысь берыктыку, улӥз, вылды (Пс. 146:2). Табере Инмарлэн калыкез выльысь Инмарлы ужаны-тыршыны быгатэ вал аслаз вордскем шаераз. Со псаломъёсты гожъясьлэсь мылкыдзэ ӝутӥз, луоз, Иеговаез ушъяны. Со сяна, Иеговаез ушъян понна, солэн мукет мугъёсыз но вал, кудъёсыз сярысь со аслаз псаломъёсаз гожтӥз. Нош кыӵе мугъёсты вань тӥляд, Иеговаез ушъян понна?

ИЕГОВА СЮЛМЫНЫЗЫ ЧИГИСЬКЫСА УЛӤСЬЁСТЫ БУРМЫТЪЯ

4. Мае шӧдӥз, луоз, израиль калык, куке сое Кир мозмытӥз, но малы?

⁴ Малпалэ ай, мае шӧдӥз израиль калык Вавилонын, пленын дыръяз. Вавилонын улӥсьёс соосты серекъяса косылӥзы: «Сӥон кырӟанъёс пӧлысь кудзэ ке но кырӟалэ». Соку Иерусалим куашкатэмын вал ини, соин ик израиль калыклэн мугез ӧй вал шумпотыса улыны (Пс. 136:1—3, 6). Соослэн чик уг поты вал кырӟамзы. Соос туж кайгыро вал, но соосты буйгатоно вал. Но тани, кызьы Инмар азьло ик вераз, соосты Персиялэн Кир эксэез мозмытӥз. Вавилонэз киултэмез бере со ялӥз: «Кузё-Инмар... монэ Иудеяе, Иерусалиме Аслыз корка пуктыны косӥз. Тӥ пӧлысь кин Солэн калыкез луэ, солэн Инмарез Кузё-Инмар соин огазьын мед луоз, со отчы мед мыноз» (2 Пар. 36:23). Макем шумпотӥз израиль калык, куке Кир аслэсьтыз косонзэ поттӥз!

5. Мар гожтӥз псаломъёсты гожъясь со сярысь, кызьы Иегова милемлы юрттэ?

⁵ Иегова аслэсьтыз калыксэ оглом буйгатэм сяна, котькуд ужась-тыршисьсэ нимысьтыз буйгатӥз на. Туннэ но Иегова озьы ик буйгатэ. Тани мар гожтӥз псаломъёсты гожъясь Инмар сярысь: «Сюлмынызы чигиськисьёсты Со бурмытъя, соослэсь яраоссэс бине» (Пс. 146:3). Иегова юрттэ соослы, кинъёс висё яке кайгыро. Со котьку дась милемыз буйгатыны но сюлэм яраосмес бурмытыны (Пс. 33:19; Ис. 57:15). Иегова милемлы визьлык но кужым сётэ, ми котькыӵе шуг-секытъёсмес вормыны мед быгатомы шуыса (Иак. 1:5).

6. Малы дышетэ милемыз Псалтирь 146:4? (Учке статья кутсконысь суредэз.)

⁶ Собере псаломъёсты гожъясь инбам шоры учке но вера, Иегова «кизилиослэсь лыдзэс ӵота, соосты ваньзэс нимынызы вера» шуыса (Пс. 146:4). Со кизилиосты адӟе вал ке но, малпаны но уг быгаты вал, макем соос трос. Туннэ адямиос тросгес кизилиосты адӟыны быгато. Куд-ог тодосчиос малпало, милям галактикаямы гинэ трос миллиард кизилиос шуыса. Нош быдэс Дуннеын трос триллион галактикаос, вылды! Адями кизилиосты лыдъяны уг быгаты. Нош Кылдытӥсь котькуд кизилиез нимызъя тодэ. Со возьматэ, Кылдытӥсь понна котькуд кизили аспӧртэмлыко луэ шуыса (1 Кор. 15:41). Нош мар луоз вераны адямиос сярысь? Иегова тодэ, кытын али котькудӥз кизили. Озьы ик со ваньзэ тодэ тӥ сярысь но — кытын тӥ али, мае тӥ шӧдӥськоды но мар тӥледлы кулэ.

7, 8. а) Мае тодэ Иегова ми сярысь? б) Вералэ пример, кудӥз возьматэ, Иегова тырбыдэстэм адямиосты жаля но соослы юрттэ шуыса.

⁷ Иегова тӥледын тунсыкъяське. Со сяна, Иегова зэмзэ ик тӥледыз жаля, но солэн кужымез вань юрттыны тӥледлы шуг-секытъёстэс вормыны. (Лыдӟы Псалтирез 146:5.) Тӥ малпаны быгатоды, югдурды ортчыт шуг шуыса, нош шуг-секытты вормыны луонтэм. Инмар тодэ, мае ми чиданы быгатомы, нош мае — ум, «асьмеос сюй-тузон луиськомы шуыса, Со тодаз возе» (Пс. 102:14). Тырбыдэстэм луэменымы сэрен, одӥг янгышмес ик ми выльысь но выльысь лэсьтыны быгатӥськомы. Куддыръя ми туж жаляськомы, сое яке тае верамы шуыса, яке милемлы возьыт, шонертэм малпанъёсынымы яке вожъяськонэнымы сэрен. Иеговалэн аслаз сыӵе малпанъёсыз но шӧдонъёсыз ӧз кылдылэ ке но, со туж умой вала милемыз (Ис. 40:28).

⁸ Тӥляд но улонады сыӵе учыръёс вал, дыр, куке тӥ шуг-секытъёсын пумиськиды, нош Иегова аслаз кужмо киыныз тӥледыз кутыса возиз (Ис. 41:10, 13). Тани мар луиз Кёко нимо пионер сузэренымы. Куке сое мукет интые ужаны-тыршыны ыстӥзы, выль кенеше лыктыса, солэн мылкыдыз куашказ. Кызьы Иегова возьматӥз, солэсь шуг-секытсэ вала шуыса? Выль кенешын Кёко трос вын-агайёсын но сузэр-апайёсын тодматскиз, кудъёсыз туж умой валало вал солэсь шӧдонъёссэ. Со вера: «Мыным ачиз Иегова вера кадь потэ вал: „Мон тонэ пионер луыса ужамед-тыршемед понна гинэ уг яратӥськы. Нош мон тонэ яратӥсько, малы ке шуоно тон мынам нылы, но аслэсьтыд улондэ мыным сӥзид. Мынам потэ, тон шумпотыса мед улод шуыса, уго тон мынам Адӟись-Ивортӥсе!“» Нош кызьы тӥляд учырады Иегова возьматӥз, тӥледыз ваньмызлэсь умой вала шуыса?

ИЕГОВА КУЛЭЯСЬКОНЪЁСМЫ СЯРЫСЬ СЮЛМАСЬКЕ

9, 10. Мар сярысь Иегова нырысь ик сюлмаське? Вералэ луэм учырез.

⁹ Милемлы ваньмылы кулэ сиён, юон, дӥськут но улон инты. Куддыръя ми сюлмаськиськомы, луоз: тырмоз-а милям сиёнмы. Но Иегова Музъемез кылдытӥз озьы, со ваньмызлы тырмыт сиён сётыны мед быгатоз шуыса. Псаломъёсты гожъясь гожтӥз, со «кесяськись кырныжпиослы но сиён сётэ» шуыса. (Лыдӟы Псалтирез 146:8, 9.) Иегова кырныжъёс сярысь но сюлмаське бере, тӥ оскыны быгатӥськоды: со тӥляд но кулэяськонъёсты сярысь сюлмаськоз (Пс. 36:25).

¹⁰ Нош нырысь Иегова сюлмаське, милям юн осконмы мед луоз шуыса, но сётэ каньыллыксэ, кудӥз «котькыӵе визьлэсь но вылӥын» (Флп. 4:6, 7). Тани мар луиз Япониысь Муцуо вын-агаен но солэн кышноеныз. 2011-тӥ арын, куке соослэн шаеразы цунами вал, соос ас вылазы Иеговалэсь юрттэмзэ шӧдӥзы. Шимучыр дыръя соос, корказылэн липет вылазы тубыса, утиськизы. Со нуналэ кузпалъёс вань улэм-вылэмзэс кадь ыштӥзы. Быдэс уйзэ соос ортчытӥзы куашкась корказылэн кыкетӥ этажаз, кезьыт но пеймыт интыын. Ӵукна соос утчаны кутскизы мае ке но, мар соосты буйгатыны быгатысал. Соос шедьтӥзы 2006-тӥ ар понна поттэм «Иеговалэн Адӟись-Ивортӥсьёсызлэсь арлы быдэ потӥсь книгазэс». Муцуолэн син шораз соку ик етӥз «Самой кышкыт цунами, кудӥз куке но вал» подзаголовок. Отын верамын вал 2004-тӥ арын Суматраын луэм музъем зуркан сярысь, кудӥзлы луыса кылдӥз самой кужмо цунами. Муцуо кышноеныз бӧрдыса лыдӟизы сое, мар веразы вын-агайёс но сузэр-апайёс, кудъёсыз со шимучыр дыръя улэп кылизы. Кузпалъёс Иеговалэсь яратыса сюлмаськемзэ шӧдӥзы, кудӥз сётӥз соослы ӵапак сое, мар соослы кулэ вал со дыре. Озьы ик Иегова яратыса сюлмаськиз соослэн кулэяськонъёссы сярысь но. Огъя оскисьёссы соослы сиён но дӥськут сётӥзы. Нош тужгес но мылкыдзэс ӝутӥз кенешазы Филиаллэн комитетысьтыз вын-агайёслэн ветлэмзы. Муцуо вера: «Мыным потӥз, Иегова ми пӧлысь котькудӥныз артэ шуыса но котькудмы сярысь сюлмаське. Макем со милемыз буйгатӥз!» Кызьы адӟиське, Иегова нырысь ик юрттэ милемлы осконмес юнматыны, нош озьы ик сюлмаське кулэяськонъёсмы сярысь но.

ИНМАР ДАСЬ ТӤЛЕДЛЫ ЮРТТЫНЫ

11. Мар кароно соослы, кинъёслэн потэ, Иегова соослы мед юрттоз шуыса?

¹¹ Иегова котьку дась зӥбыт-востэм муртъёс пала пырыны но юрттыны соослы (Пс. 146:6а). Нош мар кароно, со милемлы мед юрттоз шуыса? Милемлы азьланяз но соин кусыпъёсмес юнматоно. Со понна зӥбыт-востэм сям будэтоно (Соф. 2:3). Зӥбыт-востэм адямиос чидаса возьмало, Инмар пунэмзэ берыктоз но ваньзэ тупатоз шуыса. Иегова туж шумпотэ, зӥбыт-востэм адямиос шоры учкыса.

12, 13. а) Малэсь милемлы палэнын возиськоно, Инмарлэсь юрттэтсэ басьтэммы потэ ке? б) Кыӵе адямиос Иеговаез шумпотто?

¹² Нош сьӧлыклэсь кышкасьтэмъёсты Иегова «сюй бордозь нюртэ» (Пс. 146:6б). Макем кужмо кылъёс! Иеговалэсь оскиськымон яратонзэ шӧдон понна но солэсь вожзэ поттонтэм понна, милемлы адӟонтэм кароно сое, мае со адӟонтэм каре (Пс. 96:10). Кылсярысь, адӟонтэм кароно азон-калгонэз. Со понна палэнын возиськоно ваньмызлэсь, мар милемыз сьӧлыке вуттыны быгатоз, озьы ик порнографилэсь но (Пс. 118:37; Матф. 5:28). Куддыръя палэнын возиськыны секыт ке но, вань кужыммес поныса нюръяськоно, малы ке шуоно соку Иегова милемыз бакель кароз.

¹³ Со нюръяськонын милемлы ас выламы оскиськоно ӧвӧл, нош оскиськоно Иеговалы. Нош ми оскиськимы ке солы, малы оскисько та дуннеысь адямиос, Иегова солы шумпотоз-а? Яке лэсьтӥмы ке сое, мар возьматоз, ми ас выламы яке мукет адямиос вылэ оскиськиськомы шуыса? Псалтирьын 146:10 Инмар сярысь верамын: «Со валлэн кужымез шоры уг учкы, адями пыдъёслэн шаплызы понна но мылкыдыз уг лӧпты». Милемлы сюлворыса куроно Иеговалэсь юрттэтсэ. Адямиосын ӵошатоно ке, Иегова ноку но уз жадьы милесьтым куронъёсмес кылзыса, ми солэсь юрттэтсэ выльысь но выльысь куриськомы ке но. Иеговаез шумпотто «Солэсь кышканэн улӥсьёс... Солэн гажан-жалянэзлы оскиськыса улӥсьёс» (Пс. 146:11). Ми оскыны быгатӥськомы, Иегова милемыз жаля но яратэ шуыса. Со милемыз уз кельты но шонертэм малпанъёсмес вормыны юрттоз.

14. Малы оске вал псаломъёсты гожъясь?

¹⁴ Милям трос мугъёсмы вань оскыны, Иегова аслэсьтыз калыксэ шугадӟонын уз кельты шуыса. Тани мар гожтӥз псаломъёсты гожъясь Иерусалимез выльысь ӝутон сярысь: «Со уго капкаосыдлэсь ворсэтсэс юнматэ, дорысьтыд нылпиостэ бакель каре; улоно музъем вылад тупаса улон вае» (Пс. 147:2, 3). Макем буйгатэ вал псаломъёсты гожъясез малпан, Инмар, аслэсьтыз ужась-тыршисьёссэ утён понна, карлэсь капкаоссэ юнматоз шуыса!

15—17. а) Кызьы ми куддыръя шӧдӥськомы асьмеды, шуг-секытъёс кылдыку, но кызьы Иегова юрттэ милемлы аслаз Кылыз пыр? б) Вералэ пример, кудӥз возьматэ, макем «ӝог бызе» Иеговалэн кылыз.

¹⁵ Куддыръя шуг-секытъёс милемлы гань-гань улыны маза уг сёто. Но соосты вормон понна, Иегова милемлы визьлык сётыны быгатэ. 147-тӥ псаломез гожъясь гожтӥз, Иегова «Аслэсьтыз кылзэ музъем вылэ ыстэ; ӝог бызе Солэн кылыз» шуыса, озьы ик со «лымы сётэ... пужмер кисьтэ... комокен куя йӧзорзэ» шуыса. Собере псаломез гожъясь таӵе юан сётӥз: «Солэн кезьытэзлы кин чидалоз?» Со ватсаз на, Иегова «Аслэсьтыз кылзэ вералоз но — ваньмыз шуналоз» шуыса (Пс. 147:4—7). Милям визьмо, Ваньмызлэсь Кужмо Инмармы, кудӥзлэн йӧзор но лымы киулаз возисько, милемлы юрттыны быгатэ котькыӵе шуг-секытъёсмес вормыны.

¹⁶ Туннэ Иегова милемлы визь-кенешъёс аслаз Кылыз пыр, Библия пыр, сётэ. Иеговалэн кылыз «ӝог бызе». Со возьматэ, Иегова туж ӝог но дырыз дыръя милемлы визь-кенеш сётэ но сюрес возьматэ шуыса. Малпалэ ай, макем бадӟым пайда вае милемлы Библиез лыдӟон, «оскиськымон, визьмо ляльчиен» сётэм публикациосты эскерон, организацимылэн интернет-ресурсъёсысьтыз материалъёсты учкон, тӧроослэн юрттэмзы но вын-агайёсынымы но сузэр-апайёсынымы кусып возён (Матф. 24:45). Быгатӥськоды-а тӥ тодады вайыны учырез, куке Иегова дырыз дыръя возьматӥз, мар тӥледлы кароно?

¹⁷ Симон сузэрмы ас вылаз шӧдӥз, макем кужмо Инмарлэн Кылыз. Со ассэ туж ултӥя вал но малпа вал, со шоры учкыса, Инмар шум уг поты шуыса. Куке солы тужгес но секыт вал, со ялан Иеговалы вӧсяськиз но солэсь юрттэтсэ куриз. Озьы ик со туж тыршыса Библиез эскериз. Тани мар вера со Иегова сярысь: «Ӧй вал сыӵе учыр, куке мон ӧй шӧдысал Иеговалэсь юрттэмзэ но визь-кенеш сётэмзэ». Ваньмыз со юрттӥз солы умой мылкыдын улыны.

18. Малы тӥ оскиськоды, Иегова тӥледыз дунъя шуыса? Кыӵе тӥляд мугъёсты вань Иеговаез ушъяны?

¹⁸ Псаломъёсты гожъясь тодэ вал, Инмарлэн аслаз калыкеныз нимысьтыз кусыпъёсыз шуыса. Со одӥг гинэ калык вал, кудӥзлы Инмар «Аслэсьтыз кылзэ», «косонъёссэ, законъёссэ» сётӥз. (Лыдӟы Псалтирез 147:8, 9.) Туннэ Иеговалэн Адӟись-Ивортӥсьёсызлы гинэ сыӵе дан сётэмын — Инмарлэсь нимзэ нуллыны. Ми Иеговаез тодӥськомы но солэн Кылысьтыз визь-кенешъёсты улонамы кутӥськомы, соин ик ми солэн матысь эшъёсыз луыны быгатӥськомы. Милям, 146-тӥ но 147-тӥ псаломъёсты гожъясьлэн сямен ик, туж трос мугъёсмы вань Иеговаез ушъяны.