Кыӵе пӧртэмлыксы Инмарлы ужаса улӥсьёслэн но солы ужатэк-тыршытэк улӥсьёслэн?

1, 2. Кыӵе шуг-секытэн пумисько Инмарлэн ужась-тыршисьёсыз? (Учке статья кутсконысь туспуктэмъёсты.)

ПАЛАСЬКИСЬ висёнъёсын висисьёсты эмъякузы, эмъясьёслы чакласьконо, малы ке шуоно, мукетъёссэ эмъяса, соослы асьсэлы но со висён паланы быгатоз. Ми но со выллем югдурын улӥськомы. Асьмеос пӧлысь тросэз уло но ужало адямиос пӧлын, кудъёсызлэн сямъёссы Инмарлэсь сюлэмзэ вӧсь каро. Со милемлы кышкытлык кылдытэ.

² Та берпум нуналъёсы адямиос лыдэ уг басьто сое, мар вера Инмар ӟечез но уродэз пумысен. Тимофейлы кыкетӥ гожтэтаз апостол Павел вераз сямъёсты, кудъёсыз луозы Инмарлэсь палэнскем адямиослэн. Пум вуэмъя со сямъёссы соослэн яркытгес но яркытгес адӟиськозы. (Лыдӟе 2 Тимофейлы 3:1—5, 13.) Со милемыз паймытэ, луоз, но со уг вера, та дуннеын улӥсь адямиослэн ужъёссы но мылкыдзы милемлы уз палалэ шуыса (Мад. 13:21). Та статьяын ми эскеромы, макем пӧртэм луо берпум нуналъёсы улӥсь адямиослэн но Инмарлы ужась-тыршисьёслэн сямъёссы. Озьы ик ми вераськомы со сярысь, кызьы та дуннеысь адямиос кадь луоно ӧвӧл, соослы Инмарен кусыпъёссэс юнматыны юрттыса.

3. Кыӵе адямиос сярысь верамын 2 Тимофейлы 3:2—5?

³ Павел гожтӥз, «берпум аръёсы секыт дыръёс вуозы» шуыса. Собере со гожтӥз 19 умойтэм сямъёсты, кудъёсыз луозы со вакытэ улӥсь адямиослэн. Со сямъёс сярысь ик верамын Римъёслы 1:29—31, но Тимофейлы гожтэтын гожтэмын кылъёс, кудъёсыз уг пумисько ни Христиан Грек Гожтэмъёсын. Но Павелэн верам сямъёс вань адямиослэн уз луэ. Зэмос христианъёслэн чылкак мукет сямъёссы. (Лыдӟе Малахиялэсь 3:18.)

КЫЗЬЫ МИ АСЬМЕОС ШОРЫ УЧКИСЬКОМЫ

4. Мар тӥ верасалды, кыӵе со вылтӥяськись адями?

⁴ Адямиос асьсэды асьсэос но коньдонэз гинэ яратӥсесь луозы шуыса верамез бере Павел вераз на, соос озьы ик ушъяськисесь, мукетъёссэ ултӥясесь но вылтӥяськисесь луозы шуыса. Ӵемысь таӵе сямъёссы луо адямиослэн, кудъёсыз асьсэды мукетъёсызлэсь умоенгес лыдъяло, малы ке шуоно соослэн кыӵе ке быгатонлыкъёссы вань, соослэн вылтуссы чебер яке соос сӥё-дано. Таӵе сямо адямиос туж возьмало, мукет адямиос соос шоры синмаськыса учкозы но соосты данъялозы шуыса. Тани мар гожтӥз одӥг тодосчи ортчыт трос вылтӥяськись адями сярысь: «Солэн сюлмаз пичи мудорез вань, кытын со ачиз аслыз йыбыртъя». Верало, вылтӥяськон сям туж юрӟым луэ шуыса. Вылтӥяськись сямо адямиослы гинэ но со уг кельшы, соос со сямез мукет адямиослэсь адӟо ке.

5. Вералэ Инмарлэн оскымон ужась-тыршисьёсыз сярысь, кудъёсыз вылтӥяськисесь луизы.

⁵ Вылтӥяськон сям туж юрӟым потэ Иеговалы. Со вылтӥяськись синъёсты синазькыль каре (Мад. 6:16, 17). Вылтӥяськон сям Инмарлы матэ кариськыны люкетэ (Пс. 9:25). Сыӵе сямыз Шайтанлэн (1 Тим. 3:6). Жаляса верано луэ, Иеговалэн куд-ог оскымон ужась-тыршисьёсыз но вылтӥяськись сямо луизы. Иудалэн Озия эксэез трос аръёс ӵоже Инмарлы оскымон улӥз. Но Библиын верамын: «Кужмо луэм бераз со вылтӥяськыны кутскиз но, со сое быронэ нуиз, Инмарез Кузё-Инмар азьын со йыруж лэсьтӥсь луиз,— Кузё-Инмарлэн храмаз ӵындытон курбон сётон ӝӧк вылын ладанэн ӵындытыны пыриз» (2 Пар. 26:16; 32:25, 26).

6. Маин сэрен Давид вылтӥяськись луыны быгатэ вал? Малы со вылтӥяськись ӧз луы?

⁶ Куд-огъёсыз малпало, соослэн вылтӥяськыны правозы вань шуыса, малы ке шуоно соос чебересь, сӥё-дано, кырӟаны яке кыӵе ке инструментэн шудыны быгато, кужмоесь яке соосты гажало. Давидлэн ваньмыз со вал. Озьы ке но со вань улытозяз зӥбыт-востэм адями кылиз. Голиафез виемез бере Саул солы одӥгзэ нылзэ кышно басьтыны ӵектӥз. Но Давид вераз: «Кин мон, мынам улонэ, атаелэн выжыез — мар со — Израильысь эксэйлы эмеспи луон понна?» (1 Экс. 18:18). Мар юрттӥз Давидлы зӥбыт-востэм кыльыны? Со тодэ вал, сямъёссэ, быгатонлыкъёссэ но эксэй пуконзэ солы Инмар сётӥз шуыса, кудӥз ӧз вылтӥяськы, нош Давидлы саклык висъяз (Пс. 112:5—8). Со вала вал, ваньмыз умоез, маиз солэн вань, Инмар бордысь шуыса. (Ӵошатэ 1 Коринфъёслы 4:7.)

7. Мар юрттоз милемлы зӥбыт-востэм луыны?

⁷ Туннэ Иеговалэн ужась-тыршисьёсыз Давидлэсь адӟем каро но зӥбыт-востэм луыны тыршо. Милесьтым сюлэммес бугыртэ, ачиз Иегова, Ваньзэ быгатӥсь Инмар, ассэ зӥбыт-востэм возе шуыса (Пс. 17:36, ВД). Милям кылзӥськеммы потэ визь-кенешлэсь, кудӥз гожтэмын Колоссыослы 3:12: «Дӥсяське-шобырске гажась-жалясь, лякыт сямо, зӥбыт-востэм, кема чидась луонлэн дӥськутэныз». Ми озьы ик тодӥськомы, «яратон ассэ вылӥе уг пукты, уг вылтӥяськы» шуыса (1 Кор. 13:4). Ми асьмеды зӥбыт-востэм возимы ке, со юрттоз мукет адямиосты Иегова доры вайыны. Кышноос, кылъёсынызы ӧвӧл, нош асьсэды воземенызы, картъёссэс Инмар пала берыктыны быгато. Озьы ик котырысь адямиос но, милесьтым зӥбыт-востэм луэммес адӟыса, зэмлыкен тунсыкъяськыны быгатозы (1 Пётр 3:1).

КЫЗЬЫ МИ МУКЕТЪЁСЫЗ ШОРЫ УЧКИСЬКОМЫ

8. а) Кызьы куд-огъёсыз нылпиослэн анай-атайёссылэсь кылзӥськымтэзы шоры учко? б) Мар карыны нылпиосты ӧте Библия?

⁸ Павел гожтӥз, кызьы берпум нуналъёсы адямиос ог-огзы шоры учкозы. Кылсярысь, солэн кылъёсызъя, нылпиос анай-атайёссылы тэрытскисьтэмесь луозы. Куд-огъёсыз нылпиослэсь асьсэды озьы воземзэс умойтэмен уг лыдъяло. Книгаосын, фильмъёсын но телепрограммаосын гинэ но со умоен возьматэмын. Но кылзӥськисьтэм сям семьяослы кышкытлык кылдытэ, нош со вань адямиослы кышкытлык вае. Сое вашкала дырысен валало ини. Кылсярысь, вашкала Грециын адямилы, кудӥз анай-атаез вылэ кизэ ӝутэ, троссэ лэсьтыны уг лэзё вал. Нош Римын улӥсь аслэсьтыз атайзэ ке шукке, сое адями виисез кадь кыл кутыто вал. Библия сярысь ке верано, кызьы Еврей Гожтэмъёс, озьы ик Христиан Грек Гожтэмъёс но нылпиосты анай-атайёссэс гажаны ӧтё (Пот. 20:12; Еф. 6:1—3).

9. Мар юрттоз нылпиослы анай-атайёссылэсь кылзӥськыны?

⁹ Нылпиос асьсэды кылзӥськисьтэм мылкыд пыӵанлэсь утьыны быгато, малпаськыса со сярысь, мар каро соослы анай-атайёссы. Соослы тау каремзэс возьматыны капчигес луоз, соос тодазы возизы ке, анай-атайлэсь кылзӥськон — со Инмарлэн, инмысь Атаймылэн, косонэз шуыса. Нылпиос анай-атайёссы сярысь умой кылъёс верало ке, озьы соос огъёзъёссылы умой пример возьмато. Зэм, анай-атайёслэсь кылзӥськыны капчи ӧвӧл, соос гажаны-жаляны уг быгато ке, яке соослэн сюлэмъёссы нылпиоссы бордын ӧвӧл. Мукет ласянь, нылпиос шӧдо ке, анай-атайёссы соосты вань сюлмысьтызы ярато шуыса, соослы капчигес кылзӥськыны соку но, куке шонертэм лэсьтэмзы потэ. «Мынам ӵем лэсьтэме потэ вал сое, мае атае уг лэзьы,— шуэ Остин.— Но атае но анае визьмо лэсьто вал, соос валэкто вал, малы кылзӥськоно, но котьку дась вал монэн вераськыны. Со юрттэ вал соослэсь кылзӥськыны. Мон адӟисько вал, соос монэ ярато шуыса, но мынам асме воземеным соосты шумпоттэме потэ вал».

10, 11. а) Кыӵе сямъёс возьмато, адямиос ог-огзэс уг ярато шуыса? б) Макем ярато мукет адямиосты зэмос христианъёс?

¹⁰ Павел гожтӥз на мукет сямъёс сярысь но, кудъёсыз возьмато, адямиос ог-огзэс уг ярато шуыса. Нылпиослэн анай-атайёссылы тэрытскисьтэмесь луэмзы сярысь вераса, Павел тау карисьтэм сям сярысь но вера. Со валамон луэ, малы ке шуоно тау карисьтэм адямиос уг дунъяло, мар каро соослы мукетъёсыз. Павел азьланьтэ, адямиос сьӧлыклэсь кышкасьтэмесь луозы шуыса. Соос йыркурзэс вунэтӥсьтэмесь луозы, яке ог-огенызы тупаны уз дыртэ. Озьы ик, адямиос урод кылын вераськисесь но огзэс огзы вузасесь луозы. Мукет кылъёсын вераса, соос асьсэ кылъёсынызы адямиосты но ассэ Инмарез сантэмалозы. Со сяна, берпум нуналъёсы адямиос кыл нуллӥсесь луозы, яке мукет адямиос сярысь сьӧдмаса вералозыa.

¹¹ Со пӧртэм луэ зэмос яратонлэсь, кудзэ возьмато Иеговалэн ужась-тыршисьёсыз мукет адямиослы. Со котьку озьы вал. Иисус вераз, «Матысьтэ... яраты» курон-косон — со Моисей законысь кыкетӥез курон-косон шуыса (татын со вераз ага́пе яратон сярысь), солэсь бадӟымез одӥг гинэ курон-косон — «Инмардэ Кузё-Инмарез... яраты» (Матф. 22:37—39). Иисуслэн верамезъя, зэмос христианъёс ог-огзэс яратэменызы висъясько. (Лыдӟе Иоаннлэсь 13:34, 35.) Соослы тушмонъёссэс но яратоно (Матф. 5:43, 44).

12. Кызьы Иисус адямиослы яратэмзэ возьматӥз?

¹² Иисус адямиосты вань сюлмысьтыз яратӥз. Со пӧртэм каръёстӥ, Инмарлэн Эксэйлыкез сярысь ӟеч иворез вераса, ветлӥз. Со синтэмъёсты, чутъёсты, гижлочерен висисьёсты, пельтэмъёсты эмъяз но кулэмъёсты улӟытъяз (Лука 7:22). Иисус аслэсьтыз улонзэ но адямиос понна сётӥз, тросэз сое адӟемпотостэм каризы ке но. Аслэсьтыз яратэмзэ возьматыса, Иисус туж умой возьматӥз, макем яратэ солэн Атаез. Быдэс дуннеысь Иеговалэн Адӟись-Ивортӥсьёсыз Иисуслэсь адӟем каро но мукетъёссэ ярато.

13. Кызьы милям яратэммы мукетъёсызлы юрттыны быгатоз Иегова доры матэ кариськыны?

¹³ Милесьтым яратэммес адӟыса, мукет адямиослэн но потоз, дыр, инмысь Атайзы сярысь тросгес тодэмзы. Учкомы одӥг примерез. Таиландысь одӥг пиосмурт улосысь конгрессэ ветлӥз. Отын со адӟиз, макем христианъёс яратӥсесь. Со туж пыӵаз солэн сюлмаз. Соин ик дораз бертыса, со куриз, соин арняяз кык пол Библиез мед дышетозы шуыса. Со вань ӵыжы-выжыосызлы ӟеч иворез вераны кутскиз но ӝыны ар ортчыса ини нырысьсэ аслэсьтыз ужзэ Эксэйлык юртын возьматӥз — Библиысь кылбуръёсты лыдӟиз. Пӧрме-а тӥляд мукет адямиослы яратэмдэс возьматыны? Юалэ асьтэлэсь: «Мылы потыса-а мон юрттӥсько ӵыжы-выжыосылы, кенешысь вын-агайёслы но сузэр-апайёслы но соослы, кинъёслы ӟеч иворез верасько? Тыршисько-а мон мукетъёсыз шоры учкыны озьы ик, кызьы Иегова учке?»

КИОНЪЁС НО ЫЖПИОС

14, 15. Кыӵе пӧйшуръёслэн кадь сямъёссэс возьмато тросэз адямиос? Кызьы куд-огъёсыз воштӥськыны быгатӥзы?

¹⁴ Библиын верамын, берпум нуналъёсы адямиослэн мукетъёсыз но урод сямъёссы луозы шуыса, кудъёссэ христианъёслы адӟем кароно ӧвӧл. Кылсярысь, тросэз ӟечез-уродэз валасьтэмесь луозы, яке, кызьы гожтэмын Библилэн мукет берыктэмъёсаз, «ӟечез яратӥсьтэмесь». Соос чидасьтэмесь но уродэсь-лекесь луозы. Куд-огъёсыз возьытэз уз тодэ, яке мукет кылъёсын вераса, соос чик уз малпаське, кызьы соослэн ужъёссы мукетъёсыз вылын шӧдӥськозы.

¹⁵ Тросэз, кинъёслэн сямъёссы пӧйшуръёслэн выллем вал, умой пала воштӥськыны быгатӥзы. Со паймымон воштӥськонъёс сярысь Библиын азьло ик верамын вал ини. (Лыдӟе Исаиялэсь 11:6, 7.) Исаиялэн азьпалзэ ивортоназ верамын дыр сярысь, ку пӧйшуръёс, кылсярысь, кион но лев, огазьын улозы гурт пудо-животъёсын, кылсярысь, ыжпиен но кунянэн. Малы соос озьы улыны быгатозы? Библия валэктэ: «Уго... музъем выл Кузё-Инмарез тодонэн пачылмыса улоз» (Ис. 11:9). Нош пудо-животъёс Иегова сярысь тодон-валан басьтыны уг быгато. Озьыен, та азьпалзэ ивортон адямиос вылын но быдэсмыны кулэ.

16. Кызьы Библия адямиослы воштӥськыны юрттэ?

¹⁶ Тросэз адямиос азьло сьӧсь кионъёс кадь вал, нош али воштӥськизы но мукетъёсыныз тупаса уло. Куд-огъёсыз сярысь лыдӟыны луоз «Библия меняет жизнь» статьяосысь. Соос сярысь, кинъёс Иеговаез тодӥзы но солы ужаны-тыршыны кутскизы, уд вера, соос вылтуссыя Инмарлы оскись кадесь, нош ужъёсынызы Инмарлы осконлэсь куштӥсько шуыса. Мукет кылъёсын верано ке, соос уг тупало адямиослы, кудъёсыз Инмарлэн оскымон ужась-тыршисьёсыз луэмъясько гинэ, нош асьсэос зэмзэ сыӵеесь уг луо. Соос, кинъёс азьло туж пӧсекъясесь вал, выль адями луо, кудъёсыз Инмарлы укшатыса кылдытэмын. Соос зэмзэ ик шонерлыко но оскымон луо (Еф. 4:23, 24). Инмар сярысь тодыса, соос валало, соослы Инмарлэсь куронъёссэ быдэсъяно шуыса. Соос дась улон шоры учконъёссэс воштыны но асьсэос воштӥськыны. Воштӥськыны капчи ӧвӧл. Но адямилэн Инмарез зэмзэ ик шумпоттэмез потэ ке, сыӵе муртлы Инмар аслаз святой духеныз воштӥськыны юрттэ.

«ТАӴЕ МУРТЪЁСЛЭСЬ ПАЛЭНСКЫ»

17. Мар юрттоз милемлы адӟем карытэк улыны адямиослэсь, кудъёсызлэн сямъёссы Инмарлы уг кельшо?

¹⁷ Инмарлы ужаса улӥсьёслэн но солы ужатэк-тыршытэк улӥсьёслэн пӧртэмлыксы яркытгес но яркытгес адӟиське. Милемлы туж чакласьконо, мукет адямиослэн асьсэды урод воземзы милям мылкыдмы вылын медаз шӧдӥськы шуыса. Иегова милемыз палэнскыны косэ адямиослэсь, кудъёсыз сярысь верамын 2 Тимофейлы 3:2—5. Зэм, быдэсак палэнскыны уг луы соослэсь, кинъёслэн сямъёссы Инмарлы уг кельшо. Ми соосын пумиськиськомы школаын, уж дорын, ас дорамы но. Но ми быгатӥськомы адӟем карытэк улыны соослэсь малпаськон амалзэс но урод сямъёссэс. Мар юрттоз милемлы Иеговаен кусыпъёсмес юнматыны? Библиез дышетон но сыӵе муртъёсын эшъяськон, кудъёсыз ми сямен ик Инмарез ярато.

18. Кызьы асьмеды воземмы но кылъёсмы мукетъёсызлы Иегова сярысь тодыны юрттозы?

¹⁸ Озьы ик милям потэ, мукетъёсыз но Инмарен мед тодматскозы шуыса. Соин ик милемлы адямиосын зэмлык сярысь вераськыны луонлык утчано но куроно, Иегова милемлы тупась дыре шонер кылъёс шедьтыны мед юрттоз шуыса. Мукет адямиос мед тодозы, ми Иеговалэн Адӟись-Ивортӥсьёсыз шуыса. Соку асьмеды умой воземмы асьмеды уз, нош Инмарез данъялоз. Ми «сьӧлыклэсь кышкатэк улонлэсь, та дуннелэн куронъёсызлы тэрытскыса улонлэсь куштӥськыны но таяз улон даурын дун-шектэм, шонерлыко, вӧсяськыса улыны» дышетэмын (Тит. 2:11—14). Ужъёсынымы Инмарез шумпоттыны тыршиськомы ке, асьмеды воземмес адӟыса, мукетъёсыз вераны быгато: «Ми тон сьӧры мыномы, уго кылӥмы, Инмар тӥ пӧлын улэ шуыса» (Зах. 8:23).