Тодӥськоды-а тӥ Иеговаез озьы ик, кызьы тодэ вал Ной, Даниил но Иов?

1—3. а) Мар юрттоз милемлы Инмарлы оскымон кыльыны та дуннелэн берпуметӥ нуналъёсаз? б) Мае ми эскеромы таяз статьяын?

ТА ЛЕК дуннелэн пумыз туж матын ини, но сьӧлыклэсь кышкасьтэм адямиос «турын кадь ӝужало» (Пс. 91:8). Соин ик паймымон ӧвӧл, ӧжытгес но ӧжытгес адямиос Инмарлэн шонерлыко эсэпъёсызъя уло шуыса. Кызьы милемлы сыӵе югдуръёсын кылзӥськоно таӵе ӧтёнлэсь: «Уродлы-леклы пумит валасьтэм нуны кадесь луэ, нош визьдыя быдэ вуэмъёс кадесь луэ»? (1 Кор. 14:20).

² Та юанлы валэктонэз ми шедьтомы статьялы валтӥсь кылбурысь, кудаз верамын: «Кузё-Инмарез утчасьёс ваньзэ валало». Соос валаны быгато ваньзэ, мар кулэ, Инмарез улонэнызы шумпоттон понна (Мад. 28:5). Со выллем малпан Мадёнъёсын 2:7, 9 но вань, кытын Иегова сярысь верамын, «шонер улӥсьёслы Со утиськон [«визьлык», ВД] дасяса возе» шуыса. Солы луыса соос шонерлыкез валаны, «шонер судэз, дун-шектэм улонэз — вань ӟеч сюресъёсты» тодыны быгато.

³ Ӵапак сыӵе визьлыкез вал Нойлэн, Данииллэн но Иовлэн (Иез. 14:14). Туннэ но Инмарлэн ужась-тыршисьёсыз сыӵе визьлыкез шедьтыны тыршо. Нош мар вераны луоз тӥ сярысь? Тыршиськоды-а тӥ «ваньзэ валаны», Иеговаез шумпоттон вылысь? Со понна Иегова сярысь шонер тодон-валан басьтоно. Ойдолэ сое тодамы возёмы но эскеромы: 1) кызьы Ной, Даниил но Иов Инмар сярысь тодӥзы, 2) кызьы со тодон-валан соослы юрттӥз но 3) кызьы ми но соослэн кадь осконмес будэтыны быгатӥськомы.

СЬӦЛЫКО ДУННЕЫН НОЙ ИНМАР АЗЬТӤ ВЕТЛӤЗ

4. Кызьы Ной Иегова сярысь тодӥз но кызьы со тодон-валан юрттӥз солы?

⁴ Кызьы Ной Иегова сярысь тодӥз. Адамлэн но Евалэн нылпиоссы вордӥськем дырысен Инмарлы оскымон пиосмуртъёс но кышномуртъёс Инмар сярысь куинь амалэн тодылӥзы: эскерыса сое, мае со кылдытӥз, Инмарлэсь кышканэн улӥсь адямиосын вераськыса но адӟыса сое, кызьы Инмар бакель каре солэн шонерлыко эсэпъёсызъя но курон-косонъёсызъя улӥсьёсты (Ис. 48:18). Котырысь дуннеез чакласа, Ной оскиз, Инмар вань шуыса. Со сяна, со адӟиз солэсь туж трос адӟиськисьтэм сямъёссэ, кылсярысь, «пумтэм вапумъёс улӥсь кужымзэ но Инмар луонзэ» (Рим. 1:20). Солы луыса Нойлэн осконэз юнмаз.

5. Кытысь Ной тодӥз, кыӵе улонэз адӟемез потэ вал Иеговалэн музъем вылысь?

⁵ Библиын верамын: «Оскон потэ тодытон бордысь» (Рим. 10:17). Кызьы Ной Иегова сярысь тодӥз? Троссэ со тодӥз ӵыжы-выжыосызлэсь, кылсярысь, Ламех атаезлэсь, кудӥзлэн юн осконэз вал но кудӥз Адам улыку вордӥськиз. (Учке статья кутсконысь суредэз.) Со сяна, Ной Иегова сярысь тодыны быгатӥз, Мафусал песятаеныз но песятаезлэн Иаред песятаеныз вераськыса, кудӥз кулӥз, куке Нойлы 366 арес вал (Лука 3:36, 37)a. Соос но соослэн кышнооссы, вылды, веразы Нойлы, адямиосты Инмар кылдытӥз но солэн потэ вал, соос быдэс музъемез мед тырмытозы шуыса. Озьы ик, соос веразы солы Едемын пумит ӝутскон сярысь, кудӥзлэсь бервылъёссэ со ачиз адӟиз (Ул.-выл. 1:28; 3:16—19, 24). Тодэмез солэсь сюлэмзэ вырӟытӥз, но солэн Инмарлы ужамез-тыршемез потӥз (Ул.-выл. 6:9).

6, 7. Кыӵе оскиськон Нойлэсь осконзэ юнматӥз?

⁶ Оскон оскиськонлы луыса юнма. Малпалэ, мар шӧдӥз, луоз, Ной, куке тодӥз, солэн нимыз, кудӥз «шутэтскон, буйгатон» шуэм луэ, вылды, мукетъёсызлы оскиськон сётэ вал шуыса (Ул.-выл. 5:29). Инмарлэн святой духезлэн кивалтэмез улсын Ламех Ной сярысь вераз: «Кузё-Инмарен каргам музъемез ас киынымы утялтыкумы, со асьмеды буйгатоз». Ной Инмарлы оскиське вал. Солэсь азьвыл улӥсь Авель но Енох сямен, со оске вал, «кидыс-выжы» кыйлэсь «йырзэ сузмытоз» шуыса (Ул.-выл. 3:15).

⁷ Ной пумозяз уг вала вал, дыр, Улон-вылонысь 3:15 азьпалзэ ивортонэз. Озьы ке но солэн оскиськонэз вал, курадӟонъёслы пум вуоз шуыса. Енохлэн но верам иворез со сярысь ик вал. Со вераз, азьланяз Инмар «сьӧлыклэсь кышкасьтэмъёсты» судъялоз шуыса (Иуда 14, 15). Ивор Инмарлэн судэз сярысь, кудӥз йылаз-пумаз вуттэмын луоз Армагеддонын, Нойлэсь осконзэ юнматэ вал но солы оскиськон сётэ вал, вылды.

8. Кызьы Инмар сярысь шонер тодон-валан Ноез утиз?

⁸ Кызьы Инмар сярысь шонер тодон-валан Нойлы юрттӥз. Шонер тодон-валанлы луыса, Нойлэн осконэз но Инмарлэсь визьлыкез вал. Со сое утиз, тужгес но солэсь, мар Инмарен кусыпъёссэ тӥяны быгатысал. Кылсярысь, Ной «Инмар азьтӥ ветлӥз» бере, со ӧз эшъяськы соосын, кинъёслэн Инмарлэсь кышканзы ӧй вал. Ной ӧз лэзьы, музъем вылэ васькем периос сое мед пӧялозы шуыса. Нош мукет адямиос туж паймемын вал соослэн аспӧртэмлыко быгатонлыкъёссылы но кужымзылы. Соос соослы йыбыртъяны ик малпало вал, вылды (Ул.-выл. 6:1—4, 9). Со сяна, Ной тодэ вал, нылпиос вордыны но музъемез тырмытыны Инмар адямиосты косӥз шуыса (Ул.-выл. 1:27, 28). Со вала вал, дыр, адями кадь кариськем периослэн но кышномуртъёслэн ӵош кӧламзы туж умойтэм шуыса. Малпанэзлэн шонер луэмез адӟиськиз, куке соослэн нылпиоссы вордскылыны кутскизы, кудъёсыз мукет нылпиослэсь трослы бадӟымгес но кужмогес вал. Кӧня ке дыр ортчыса, Инмар Нойлы вераз, музъем вылэ ву тудӟон лэзьыны малпа шуыса. Ной Инмарлы оскиз, ковчег лэсьтӥз но озьы семьязэ утиз (Евр. 11:7).

9, 10. Кызьы Нойлэсь оскемзэ адӟем карыны луоз?

⁹ Кызьы Нойлэн кадь осконэз будэтоно. Со понна Инмарлэсь Кылзэ пыр-поч эскероно, тодэммес санэ пононо, воштӥськоно но Библиысь визь-кенешъёсъя улоно (1 Пётр 1:13—15). Соку оскон но Инмарлэсь визьлык юрттозы милемлы Шайтанлэн кескич сьӧлтэтъёсаз сюрытэк но та лек дуннелэн мылкыдызлы сётскытэк улыны (2 Кор. 2:11). Адями та дуннелэн мылкыдызлы сётске ке, со лек ужъёсты, азыса-калгыса улонэз яратыны кутске, озьы ик, аслаз мыл потонъёсызъя улэ (1 Иоанн 2:15, 16). Дуннелэн мылкыдызлы сётскыса, адями, кудӥзлэн Инмарен кусыпъёсыз ляб, шӧдытэк кыльыны быгатэ, та дуннелы пум вуэ ини шуыса. Тунсыко луэ, Нойлэсь улон нуналъёссэ асьме нуналъёсын ӵошатыкуз, Иисус ӧз вера туж лек луон но азыса-калгыса улон сярысь, нош вераз кышкытлык сярысь, кудӥз люкетоз Инмарлы ужаны-тыршыны. (Лыдӟе Матфейлэсь 24:36—39.)

¹⁰ Юалэ асьтэлэсь: «Адӟиське-а мынам улонысьтым, мон Иеговаез зэмзэ ик тодӥсько шуыса? Ӝутэ-а осконэ мынэсьтым мылкыдме Инмарлэсь кылзӥськыса улыны но мукетъёсызлы вераны, мар возьма соослэсь Инмар?» Та юанъёслы валэктонъёсты возьматозы, ветлӥськоды-а тӥ Инмар азьтӥ озьы ик, кызьы ветлӥз Ной.

СУЛЬДЭРЪЁСЛЫ-ИДОЛЪЁСЛЫ ЙЫБЫРТЪЯСЬ АДЯМИОС ПӦЛЫН УЛЫСА, ДАНИИЛ ВИЗЬМО УЖПУМЪЁС КУТЫЛӤЗ

11. а) Мар вера Данииллэн егит дырысеныз ик Инмарез яратэмез солэн анаез но атаез сярысь? б) Данииллэсь кыӵе сямъёссэ тӥ адӟем карысалды?

¹¹ Кызьы Даниил Иегова сярысь тодӥз. Данииллэн анаез но атаез сое умой визьмазы-нодъязы, Иеговаез но солэсь Кылзэ яратыны дышетӥзы, шӧдске. Со яратонэз Данииллэн вань улытозяз ӧз быры. Мӧйымем дыръяз но Даниил Гожтэмъёсты пыр-поч эскериз (Дан. 9:1, 2). Данииллэн книгаяз 9:3—19 гожтэмын Данииллэн зӥбыт-востэм но сюлмысь вӧсяськемез. Отысь адӟиське, со Инмар сярысь троссэ тодэ вал шуыса. Озьы ик, со тодэ вал, кызьы Инмар ассэ израиль калыкеныз возиз. Умой луысал дыр висъяны но та вӧсяськонэз лыдӟыны, со сярысь малпаськыны но малпаны, кыӵе адями вал Даниил.

12—14. а) Кытысь адӟиськиз, Данииллэн Инмарлэсь визьлыкез вал шуыса? б) Кызьы Иегова Даниилэз бакель кариз оскымон но кышкасьтэм луэмез понна?

¹² Кызьы Инмар сярысь шонер тодон-валан Данииллы юрттӥз. Инмарлы оскымон еврейёс Вавилонын, сульдэръёслы-идолъёслы йыбыртъясь адямиос пӧлын улыса, трос шуг-секытъёсын пумиськылӥзы. Иегова косӥз соосты: «Тӥледыз улыны выжытэм городлэн тупаса улонэз сярысь сюлмаське» (Иер. 29:7). Со дыре ик со соосты аслыз гинэ оскымон луыны косӥз (Пот. 34:14). Мар юрттэ вал Данииллы кыксэ ик та куронъёсты быдэсъяны? Солэн Инмарлэсь визьлыкез вал. Со юрттӥз солы валаны, музъем вылысь кивалтӥсьёслэсь кылзӥськоно шуыса, нош нырысь ик кылзӥськоно Инмарлэсь. Кӧня ке дауръёс ортчыса, Иисус но солы ик дышетӥз (Лука 20:25).

¹³ Эскеромы, мар кариз Даниил, куке пуктон-косон потӥз, кудӥз 30 нунал ӵоже, эксэйлы сяна, нокинлы куронэн вазиськыны уг лэзьы вал. (Лыдӟе Данииллэсь 6:7—10.) Даниил малпаны быгатысал: «Куамын нунал — сокем кема но ӧвӧл!» Но со ӧз кылзӥськы эксэйлэн пуктон-косонэзлэсь, кудӥз пумит вал Священной Гожтэмъёсысь косонъёслы. Даниил лушкемен вӧсяськыны быгатысал. Но со тодэ вал, адямиос котькуд нунал вӧсяськемзэ адӟыны дышемын шуыса. Солэн улонэзлы кышкытлык кылдэмын вал ке но, солэн ӧз поты, адямиос мед малпалозы, со дышем сямызлэсь куштӥськиз но вӧсяськемысь дугдӥз шуыса.

¹⁴ Иегова бакель кариз Даниилэз оскымон но кышкасьтэм луэмез понна но кышкыт кулонлэсь утиз. Солы луыса Мидилэн но Персилэн огазеям быдэс кунзы Иегова сярысь тодӥз (Дан. 6:25—27).

15. Кызьы Данииллэн кадь осконэз будэтоно?

¹⁵ Кызьы Данииллэн кадь осконэз будэтоно. Со понна, Инмарлэсь Кылзэ лыдӟем сяна, сое валаны тыршоно (Матф. 13:23). Милемлы тодоно, мар малпа Иегова со яке та юан пумысен. Нош со понна милемлы Библиысь возетъёсты умой валано. Соин ик милемлы малпаськыны кулэ со сярысь, мае лыдӟимы. Озьы ик, милемлы ялан но сюлмысь Иеговалы вӧсяськоно, тужгес но шуг-секытъёсын пумиськыкумы. Инмарлэсь визьлыксэ но кужымзэ оскыса куримы ке, со милемыз одно ик кылоз (Иак. 1:5).

КУРЕКТЫКУЗ НО, ШУМПОТЫКУЗ НО ИОВ ИНМАРЛЭН ЭСЭПЪЁСЫЗЪЯ УЛӤЗ

16, 17. Кызьы Иов Иегова сярысь шонер тодон-валан басьтӥз?

¹⁶ Кызьы Иов Иегова сярысь тодӥз. Иов израиль калык пӧлысь ӧй вал, но со ӵыжы-выжыез вал Авраамлэн, Исааклэн но Иаковлэн. Нош соослы Иегова вераз ачиз сярысь но со сярысь, мар адямиосты азьланяз возьма. Ми ум тодӥське кытысь, но Иов троссэ сое тодэ вал (Иов 23:12). Со вераз: «Тон сярысь мон пельыным кылӥ вал» (Иов 42:5). Со сяна, ачиз Иегова вераз, Иовлэн со сярысь верамез шонер шуыса (Иов 42:7, 8).

¹⁷ Озьы ик, Иов кылдытэмъёсысь Инмарлэсь адӟиськисьтэм сямъёссэ адӟе вал (Иов 12:7—9, 13). Берлогес Елиуй но Иегова, пӧртэм кылдытэмъёс но инкуазь явлениос сярысь веракузы, тодазы вайытӥзы Иовлы, макем пичи луэ адями, Кылдытӥсен ӵошатыса (Иов 37:14; 38:1—4). Иеговалэн кылъёсыз Иовлэн сюлмаз ик пыризы, но со зӥбыт-востэм сюлмын вераз: «Тодӥсько, мар лэсьтыны Тынад мылкыдыд вань, Тон сое ваньзэ лэсьтыны быгатӥськод, сое дугдытыны уг луы. Соин ик мон, сюй-тузон, пень пӧлы султыса... ӧкынӥсько» (Иов 42:2, 6).

18, 19. Кытысь адӟиське, Иов Иеговаез умой тодэ вал шуыса?

¹⁸ Кызьы Инмар сярысь шонер тодон-валан Иовлы юрттӥз. Иов туж умой вала вал Инмарлэсь возетъёссэ. Со Иеговаез зэмзэ ик умой тодӥз, но со солэн ужъёсыз вылын шӧдӥськиз. Кылсярысь, Иов вала вал, со Инмарез яратэмез сярысь вера ке, солы мукет адямиосын ассэ лек возёно ӧвӧл шуыса (Иов 6:14). Иов вылтӥяськись ӧй вал. Со ваньмыз сярысь аслаз семьяез сярысь кадь сюлмаськиз, кызьы узыръёсыз, озьы ик куанеръёсыз сярысь но. Со вераз: «Кин монэ кылдытӥз, Со ик медоме но кылдытӥз» (Иов 31:13—22). Иов тодэ вал, солэн тодмо луэмез но узырлыкез солы вылтӥяськыны право уг сёто шуыса. Макем пӧртэм вал солэн мылкыдыз асьме нуналъёсысь узыр но тодмо адямиослэн мылкыдзылэсь!

¹⁹ Иовлэн уг поты вал, мар ке но, озьы ик ваньбур люкан мылкыд но, солэн улоназ нырысетӥ интыын мед луоз шуыса, нош Иеговаен кусыпъёсыз кыкетӥ интыын. Со вала вал, озьы луысал ке, со Инмарезлэсь куштӥськысал шуыса. (Лыдӟе Иов книгаез 31:24—28.) Иов кузпалъяськонэз святой шуыса лыдъяз. Со кылзэ ик сётӥз, синъёссэ нылъёс пала уз берыкъя шуыса (Иов 31:1). Вераны кулэ, со вакытэ Инмар трос кышно басьтыны лэзе вал. Соин ик, Иовлэн потысал ке, со аслыз эшшо одӥг кышно басьтыны быгатысалb. Но со тодэ вал, вылды, Едемын Инмар одӥг пиосмуртэз но одӥг кышномуртэз кузпалъяз шуыса. Иов соя улыны ужпум кутӥз, шӧдске (Ул.-выл. 2:18, 24). 16 даур пала ортчыса, Иисус Христос но дышетӥз, кузпалъяськон одӥг пиосмурт но одӥг кышномурт вискын гинэ луыны кулэ шуыса (Матф. 5:28; 19:4, 5).

20. Кызьы Иегова сярысь шонер тодон-валан но солэсь эсэпъёссэ валан юрттэ милемлы умой эшъёсты но шутэтскон амалъёсты бырйыны?

²⁰ Кызьы Иовлэн кадь осконэз будэтоно. Со понна Иегова сярысь шонер тодон-валан басьтоно но соя улоно. Кылсярысь, псаломъёсты гожъясь Давид гожтӥз, Иегова «ултӥяны яратӥсез» адӟемпотостэм каре шуыса, озьы ик со «ӧрекчи адямиосын» эшъяськемлэсь алӥз. (Лыдӟе Псалтирез 10:5; 25:4.) Мар верало та кылъёс Иегова сярысь? Кызьы та возетъёсты валан юрттыны кулэ тӥледлы улонады ужпумъёс пуктыны, эшъёс шедьтыны, шутэтскон амалъёсты бырйыны, нош озьы ик интернетэз шонер уже кутыны? Та юанъёслы валэктонъёсты возьматозы, макем умой тӥ Иеговаез тодӥськоды. Та лек но сьӧлыко дуннеын чылкыт кылён понна, милемлы «визьмес-шӧдонмес» дышетоно ӟечез но, уродэз но висъяны, озьы ик, визьмозэ но визьмо луымтэзэ (Евр. 5:14; Еф. 5:15).

21. Мар юрттоз милемлы «ваньзэ валаны» но инмысь Атаймес шумпоттыны?

²¹ Нойлэн, Данииллэн но Иовлэн Иеговаез умой тодэмзы потэ вал. Соин ик Иегова юрттӥз соослы «ваньзэ валаны», соос сое улонэнызы шумпоттыны мед быгатозы шуыса. Со пиосмуртъёс адӟем карон возьматӥзы, кызьы шонер улоно, но соослэн улонзы зэмзэ ик шудо вал (Пс. 1:1—3). Малпаське: тодӥськоды-а тӥ Иеговаез озьы ик умой, кызьы тодэ вал Ной, Даниил но Иов? Туннэ Иегова тросгес тодон-валан сётэ, но ми соослэсь но тросгес тодыны быгатӥськомы! (Мад. 4:18). Соин ик валаны тырше Инмарлэсь Кылзэ. Малпаське со сярысь, мае лыдӟиды. Вӧсяське, святой дух курыса. Озьы тӥ инмысь Атаймылы матэгес кариськоды но, та лек дуннеын улыса, визьмо ужпумъёс кутоды (Мад. 2:4—7).