Чаклаське, нокин но тӥледыз ӧрекчи дышетонъёс пала медаз кыскы шуыса!

1. Кызьы Шайтан визьмес ас палаз берыктыны тырше, Колоссыослы 2:4, 8 гожтэмъя?

ШАЙТАНЛЭН потэ, ми Иеговаез яратэмысь мед дугдомы шуыса. Со понна Шайтан визьмес ас палаз берыктыны тырше, но солэн потэ, ми со кадь ик малпаськыны мед кутскомы шуыса. Со милемыз пӧяны тырше, ми со сьӧры мед мыномы шуыса. Шайтан тодэ, кызьы милемыз ас палаз кыскыны, но сое быгатыса уже кутэ. (Лыдӟе Колоссыослы 2:4, 8.)

2, 3. а) Малы милемлы тодамы возёно алонэз, кудӥз Колоссыослы 2:8 гожтэмын? б) Мае ми эскеромы та статьяын?

² Зэм ик-а Шайтан милемыз пӧяны быгатэ? Бен, быгатэ. Колоссыослы 2:8 кылъёс зырӟем христианъёслы верамын вал (Кол. 1:2, 5). Соос кышкытлыке сюрыны быгатӥзы, нош туннэ ми эшшо но бадӟымгес кышкытлыкен пумиськыны быгатӥськомы (1 Кор. 10:12). Малы? Шайтан музъем вылэ сэрпалтэмын вал, но табере со Инмарлэн ужась-тыршисьёсызлэсь визьзэс туганы тырше (Усьт. 12:9, 12, 17). Со сяна, ми улӥськомы сыӵе дыре, куке «кескич адямиос, пӧяськисьёс эшшо но тросгес урод ужъёс» лэсьто (2 Тим. 3:1, 13).

³ Та статьяын ми эскеромы, кызьы Шайтан «ӧрекчи дышетонъёс» пыр милесьтым визьмес ас палаз берыктыны тырше. Ми тодомы «Диаволлэн кескич ужъёсыз» сярысь (Еф. 6:11). Нош вуонояз статьяын вераськон мыноз, кызьы нюръяськоно урод бервылъёсын, кудъёссэ вайиз Шайтанлэн дуннеез. Но нырысь вераськомы, кызьы Шайтан израиль калыкез пӧяз, куке со Сӥзем музъеме пыриз, но малы ми дышетскыны быгатӥськомы со учырысь.

ВИЗЬ СЫНАСЬКОН, КУДӤЗ СУЛЬДЭРЪЁСЛЫ-ИДОЛЪЁСЛЫ ЙЫБЫРТЪЯНЭ ВУТТӤЗ

4—6. Мар карыны дышоно вал израиль калыклы Сӥзем музъемын, Кыкетӥ Законэз 11:10—15 лыдэ басьтыса?

⁴ Шайтан израиль калыкез быгатыса пӧяз, сульдэръёслы-идолъёслы йыбыртъянэ кыскыса. Кызьы со сое лэсьтыны быгатӥз? Шайтан тодӥз, соослы сиён кулэ луоз шуыса, но со сое уже кутӥз. Сӥзем музъемын израиль калыклы дышетсконо луиз выль амалэн бакча сиёнъёсты будэтыны. Египетын, бусыосазы ву киськан понна, соос Нил шурысь ву басьтӥзы, нош Сӥзем музъемын бадӟым шуръёс ӧй вал, соин ик, емышъёсты будэтон понна, соослы зор ву яке лысву кулэ вал. (Лыдӟе Кыкетӥ Законэз 11:10—15; Ис. 18:4, 5.) Израиль калыклы выль сямен емышъёсты будэтыны капчи ӧй вал, малы ке шуоно соос, кинъёс музъемен ӧжыт ке но ужаны быгатӥзы, кыр дуннеын кулӥзы.

⁵ Иегова калыкезлы валэктӥз, табере соослы выль югдуръёслы дышоно луоз шуыса. Собере со вераз сое, мар, нырысь учкыса, музъем ужен герӟаськемын кадь уг поты: «Утиське-чаклаське: сюлэмды медаз сӧриськы но кырыже медад кошке, мурт инмаръёслы ужаны-тыршыны, йыбыртъяны медад кутске» (К. Зак. 11:16, 17). Малы Иегова зэмос луисьтэм инмаръёслы йыбыртъямлэсь алӥз, куке вераз музъемен выль амалэн ужан сярысь?

⁶ Иегова тодӥз, со интыын музъемен ужаны дышетскон понна, израиль калыклэн артысь калыкъёслы вазиськемез потоз шуыса. Котыразы улӥсь адямиос тросгес тодо вал со сярысь, кызьы со интыын музъемен ужано, но соос израиль калыкез тросэзлы дышетыны быгатысалзы, нош со кышкытлыкъёсын герӟаськемын вал. Ханаан музъемысь адямиос Вааллы йыбыртъязы, но малпанъёссы вылын солы оскемзы шӧдӥськиз. Соос малпазы, Ваал инбамлэн кузёез луэ но зор сётэ шуыса. Иеговалэн уг поты вал, солэн калыкез та шонертэм учконъёсын пӧямын мед луоз шуыса. Нош израиль калык выльысь но выльысь Вааллы йыбыртъянэз бырйылӥз (Лыд. 25:3, 5; Суд. 2:13; 3 Экс. 18:18). Кызьы Шайтан соослэсь визьзэс ас палаз берыктыны быгатӥз?

КУИНЬ АМАЛЪЁС, КУДЪЁСЫНЫЗ ШАЙТАН ИЗРАИЛЬ КАЛЫКЕЗ ПӦЯЗ

7. Кызьы израиль калыклэн Сӥзем музъемын осконэз эскериськиз?

⁷ Кыӵе вал нырысетӥез амал, кудзэ уже кутӥз Шайтан? Со уже кутӥз израиль калыклэсь огшоры мылпотонзэ, музъемез зор мед коттоз шуыса. Оштолэзьлэн пумысеныз куарусён толэзьлэн пумозяз Сӥзем музъемын зоръёс туж ӧжыт вал. Емышсылэн удалтэмез, озьы ик израиль калыклэн быдэс улонэз но, герӟаськемын вал зоръёсын, кудъёсыз ӵем дыръя коньывуон толэзьлэн пумаз кутско вал. Шайтан пӧяса оскытӥз соосты, умой улон понна, соослы артысь калыкъёслэн сям-йылолъёссыя улыны кулэ шуыса. Со калыкъёс оскизы: инмаръёс музъем вылэ зор ысто куд-ог сям-йылолъёсты быдэстэм бере гинэ. Израиль калыкысь адямиос, кудъёсызлэн Иеговалы осконзы лябӟиз, малпаны кутскизы, сям-йылолъёсты ортчытыса гинэ, куазь выльысь зороз шуыса. Соин ик соос Вааллы сӥзем сям-йылолъёсы пыриськыны кутскизы.

8. Кыӵе кыкетӥ амалэз уже кутӥз Шайтан? Валэктэ.

⁸ Израиль калыкез пӧян понна, Шайтан кыкетӥ амалэз уже кутӥз. Со солэсь мылкыдзэ ӝутӥз сьӧлыко мылпотонъёсызъя улыны. Артысь калыкъёслэн асьсэлэн инмаръёссылы йыбырттонзы герӟаськемын вал азон-калгонэн: пиосмуртъёс но кышномуртъёс йыбырттон интыязы азон-калгонэн выризы. Гомосексуализмез но азон-калгонэн герӟаськем мукет ужъёсты урод ужъёсын гинэ ӧз лыдъялэ. Соос малпазы, озьы ик луыны кулэ шуыса! (К. Зак. 23:17, 18; 3 Экс. 14:24). Зэмос луисьтэм инмаръёслы йыбыртъясьёс оскизы: азон-калгонэн герӟаськем сям-йылолъёсы пыриськон юрттэ инмаръёссылы ярамон луыны но трос бакча сиён басьтыны. Со сям-йылолъёс израиль калыкысь тросэзлы кельшизы, но соос зэмос луисьтэм инмаръёслы йыбыртъяны кутскизы. Озьы Шайтан соослэсь визьзэс ас палаз берыктӥз.

9. Кызьы Шайтан израиль калыклы Иегова сярысь зэмлыкез тодыны люкетӥз, Осиялэсь 2:16, 17 лыдэ басьтыса?

⁹ Шайтан куинетӥ амалэз уже кутӥз. Со израиль калыклы Иегова сярысь зэмлыкез тодыны люкетӥз. Иеремия пророк улон нуналъёсы Иегова вераз, зэмос луисьтэм пророкъёс лэсьтӥзы озьы, «Ваалэн сэрен» израиль калык Инмарлэсь нимзэ мед вунэтоз шуыса (Иер. 23:27). Израиль калык Инмарлэсь нимзэ уже кутэмысь дугдӥз, вылды, но сое Ваал нимен воштӥз, кудӥз возьматэ «кузё» шуэмез. Солы луыса израиль калыклы секыт луиз валаны Иеговалэсь но Вааллэсь пӧртэмлыксэс, но соослы капчигес луиз Иеговалы но, Вааллы но йыбыртъяны. (Лыдӟе Осиялэсь 2:16, 17.)

АМАЛЪЁС, КУДЪЁССЭ ШАЙТАН ТУННЭ УЖЕ КУТЭ

10. Кыӵе амалъёсты Шайтан туннэ уже кутэ?

¹⁰ Шайтанлэн пӧян амалъёсыз ӧз воштӥське. Туннэ, адямиослэсь визьёссэс ас палаз берыктон понна, со адямиослэсь огшоры мылпотонъёссэс уже кутэ, сьӧлыко мылпотонъёссыя улыны мылкыдзэс ӝутэ но Иегова сярысь зэмлыкез тодыны люкетэ. Нырысь эскеромы берпуметӥ амалэз.

11. Кызьы Шайтан адямиослы Иегова сярысь зэмлыкез тодыны люкетэ?

¹¹ Шайтан адямиослы Иегова сярысь зэмлыкез тодыны люкетэ. Апостолъёслэн кулэмзы бере куд-огъёсыз, кинъёс асьсэды христианъёс шуыса нимазы, зэмос луисьтэм дышетонъёсты вӧлмытыны кутскизы (Ап. уж. 20:29, 30; 2 Фес. 2:3). Зэмос йыбырттонлэсь палэнскемъёс Инмар сярысь зэмлыкез сурало-пожало вал. Кылсярысь, Библилэсь копиоссэ лэсьтыкузы, соос Инмарлэсь нимзэ «Кузё-Инмар» но «Инмар» титулъёсын вошъязы. Соин сэрен лыдӟисьёслы валаны секыт вал, маин Иегова мукет «инмаръёслэсь» пӧртэм луэ (1 Кор. 8:5). Зэмос йыбырттонлэсь палэнскемъёс Кузё-Инмар шуыса Иеговаез но, Иисусэз но нимазы бере, адямиослы валаны секыт луиз, Иегова но солэн Пиез одӥг ӧвӧл шуыса но соос пӧртэм инты басьто шуыса (Иоанн 17:3). Та сураськонлы луыса кылдӥз дышетон, кудӥз вера, Инмар, Пи но святой дух — со одӥг шуыса, но кудӥз сярысь Инмарлэн Кылаз номыр уг вераськы. Соин сэрен трос адямиос малпало, Инмарез тодыны уг луы шуыса. Макем пӧяз соосты Шайтан! (Ап. уж. 17:27).

12. Мае умоен возьматыны тырше зэмос луисьтэм религия но кытчы со вуттэ, Римъёслы 1:28—31 лыдэ басьтыса?

¹² Шайтан адямиослэсь мылкыдзэс ӝутэ сьӧлыко мылпотонъёссыя улыны. Вашкала дыръёсы, Иеговалэсь калыксэ азон-калгон сьӧлыке пыртыны тыршыса, Шайтан уже кутӥз зэмос луисьтэм религиез. Туннэ со озьы ик лэсьтэ. Зэмос луисьтэм религия азон-калгонэз урод ужен уг лыдъя но сое умоен возьматыны тырше. Соин ик тросэз адямиос Инмарлы ужало-тыршо шуыса верало ке но, зэмзэ вераса, соос Инмарлэн вылӥ эсэпъёсызъя улэмысь дугдӥзы. Апостол Павел римъёслы гожтэтаз вераз, кытчы вуттэ сыӵе улон. (Лыдӟе Римъёслы 1:28—31.) Юрӟым ужъёс пӧлы, кудъёсыз сярысь апостол Павел гожтӥз, азон-калгонэн герӟаськем вань ужъёс пыро, озьы ик гомосексуализм но (Рим. 1:24—27, 32; Усьт. 2:20). Ми Инмарлэн ужась-тыршисьёсыз луиськомы бере, милемлы туж кулэ улыны Библиысь дышетонъёсъя, кудъёсыз валамонэсь луо.

13. Кыӵе эшшо амалэз Шайтан уже кутэ?

¹³ Шайтан адямиослэсь огшоры мылпотонъёссэс уже кутэ. Номыр умойтэмез ӧвӧл, милям дышетскеммы потэ шуыса быгатонлыкъёслы, кудъёсыз юрттозы асьмеос сярысь но семьяосмы сярысь сюлмаськыны (1 Тим. 5:8). Сыӵе быгатонлыкъёсты басьтыны луэ, школаын умой дышетскыса. Но татын кышкытлык вань. Трос шаеръёсын дышетскон удыс пиослы но нылъёслы пайдаё быгатонлыкъёслы дышетскыны юрттэ ке но, озьы ик со Шайтанлэн дуннеезлэсь учконъёссэ но пыӵатэ. Дышетскисьёс сокем уг оско ини, Инмар вань шуыса но Библилы оскыны луэ шуыса. Соосты дышето: улон эволюцилы луыса кылдӥз (Рим. 1:21—23). Ваньмыз таиз пумит луэ солы, мае Инмар визьмоен лыдъя (1 Кор. 1:19—21; 3:18—20).

14. Мар карыны мылкыдэз ӝутэ та дуннелэн визьлыкез?

¹⁴ Та дуннелэн учконъёсыз пумит мыно Иеговалэн шонерлыко эсэпъёсызлы. Со учконъёс мылкыдэз уг ӝуто возьматыны сямъёсты, кудъёсыз Инмарлэн духезлэн емышез пӧлы пыро, со интые, соос «лулмугорлэсь сьӧлыко ужъёссэ» лэсьтыны кыско (Гал. 5:19—23). Та дуннелэн учконъёсызлы луыса адямиос вылтӥяськыса улыны кутско. Соин сэрен соос «асьсэды асьсэос... гинэ яратӥсесь» луо (2 Тим. 3:2—4). Та сямъёс чылкак пумит мыно зӥбыт-востэм мылкыдлы, кудзэ Инмарлэн адӟемез потэ ужась-тыршисьёсызлэсь (2 Экс. 22:28). Куд-ог христианъёс, вылӥ образование басьтыса, Шайтанлэн дуннеез сямен малпаськыны кутскизы. Эскеромы одӥг учырез.

15, 16. Малы дышетэ тӥледыз одӥг сузэрмылэн учырез?

¹⁵ Тани мар вера одӥг сузэр, кудӥз 15 ар ӵоже, вань дырзэ сётыса, ужа-тырше: «Адӟись-Ивортӥсь луыса, мон тодӥ, кыӵе кышкытлыкъёсын герӟаськемын вылӥ образованиез басьтон, озьы ке но мон сое пелям ӧй поны. Мон малпай, сыӵе кышкытлыкъёсын уг пумиськы шуыса». Кытчы со вуттӥз? Со вера: «Мон сокем трос дырме но кужымме дышетсконлы висъясько вал, жадьыса мон вӧсяськыны но уг быгатӥськы вал ини. Туж зол жадеменым, адямиосын Библия сярысь вераськыны но пумиськонъёслы умой дасяськыны мынам кужыме ӧй вал ини. Шумпотыса вераны луэ: мон валай, вылӥ образованиез басьтон Иеговаен кусыпъёсме лябӟытэ шуыса но мыным мае ке но воштыны кулэ шуыса. Соин ик мон университетысь кошки».

¹⁶ Кызьы вылӥ образованиез басьтон та сузэрлэн учконъёсыз вылын шӧдӥськиз? Со вера: «Жаляса верано луэ, мон мукет адямиослэн янгышъёссылы но тырмымтэоссылы саклыкме висъяны кутски, тужгес но вын-агайёсмылэн но сузэр-апайёсмылэн тырмымтэоссылы. Мон соослэсь укыр троссэ возьмай но соосын дырме ӧй ортчытъя. Мыным трос дыр кулэ луиз, адямиос шоры мукет сямен учкон понна. Та учыр возьматӥз мыным, макем кышкыт лыдэ басьтытэк улыны инмысь Атаймылэсь визь-кенешъёссэ, кудъёссэ со организациез пыр сётэ. Иегова мынэсьтым умойгес монэ тодэ вал. Туж жаль, мон сое ӧй кылзы шуыса!»

17. а) Кыӵе милям мылкыдмы луыны кулэ? б) Мае ми эскеромы вуонояз статьяын?

¹⁷ Эн лэзе Шайтанлы ӧрекчи дышетонъёс пыр визьдэс ас палаз кыскыны. Чаклаське, со тӥледыз медаз пӧя шуыса (1 Кор. 3:18; 2 Кор. 2:11). Эн лэзе, Иегова сярысь зэмлыкез Шайтан тӥледлы тодыны мед люкетоз шуыса. Инмарлэн вылӥ эсэпъёсызъя улэ. Иеговалэсь алэмзэ лыдэ басьтэ. Нош мар кароно, тӥ шӧдӥды ке, Шайтанлэн дуннеез тӥ вылын шӧдӥське ини шуыса? Вуоно статья возьматоз, кызьы Инмарлэн Кылыз куштӥськыны юрттэ мур пыӵам урод сямъёслэсь но учконъёслэсь (2 Кор. 10:4, 5).