Палэнтэ малпанъёсты, кудъёсыз Инмарез тодонлы пумит мыно!

1. Мар карыны мылкыдзэс ӝутӥз апостол Павел зырӟем вын-агайёслэсь но сузэр-апайёслэсь?

«ТУАЛА вапумысь улонлэн куронъёсызлы тупатскыны турттыса эн улэ»,— гожтӥз апостол Павел нырысетӥ даурысь христианъёслы (Рим. 12:2). Малы со озьы лэсьтыны мылкыдзэс ӝутӥз зырӟем вын-агайёслэсь но сузэр-апайёслэсь, кудъёсыз улонзэс Инмарлы сӥзизы? (Рим. 1:7).

2, 3. Кызьы Шайтан тырше милемыз Иеговалэсь палэнтыны но кызьы куштӥськыны луэ визьмамы мур пыӵам малпанъёслэсь?

² Павел сюлмаське вал, малы ке шуоно куд-ог христианъёслы пыӵазы урод малпанъёс, кудъёсыз Шайтанлэн дуннеяз туж вӧлмемын (Еф. 4:17—19). Со выллем учыре ми но сюрыны быгатӥськомы. Та дуннелэн кивалтӥсез луыса Шайтан быгатэ уже кутыны пӧртэм амалъёсты, милемыз ас палаз кыскон понна. Кылсярысь, милям потэ ке вылӥ инты басьтэммы яке тодмо луэммы, Шайтан сое уже кутоз, милемыз Иеговалэсь палэнтон понна. Озьы ик, милемыз ас палаз берыктон понна, со уже кутыны быгатэ сое, малы ми дышетскимы дорамы, школаын яке котырысьтымы адямиослэсь.

³ Луэ-а мар ке но карыны, визьмамы мур пыӵам малпанъёс ми вылын медаз шӧдӥське ини шуыса? (2 Кор. 10:4). Висъялэ саклыктэс солы, мар гожтӥз Павел: «[Ми] кескич малпанъёсты таркаськомы, Инмарез тодонлы пумит султэм котькыӵе вылтӥяськонэз, котькыӵе малпанэз Христослы тэрытскись карон понна киуламы кутӥськомы» (2 Кор. 10:4, 5). Бен, Иеговалэн юрттэменыз, ми котькыӵе шонертэм малпанъёслэсь куштӥськыны быгатомы. Кызьы эмъюм уте милемыз висёнлэн бервылъёсызлэсь, озьы ик Инмарлэн Кылыз уте милемыз Шайтан дуннелэн ми вылэ пыӵамезлэсь.

АСЬТЭЛЭСЬ ВИЗЬДЭС ВЫЛЬДЭ-ВОШТЭ

4. Кыӵе воштӥськонъёс лэсьтӥзы ми пӧлысь тросэз зэмлыкез тодэмзы бере?

⁴ Тодады вае, кыӵе воштӥськонъёс тӥ лэсьтӥды, куке Инмарлэн Кылысьтыз зэмлыкез тодӥды но Иеговалы ужаны-тыршыны ужпум кутӥды. Ми пӧлысь тросэзлы улонзэс воштоно луиз (1 Кор. 6:9—11). Ми Иеговалы туж тау кариськомы, со милемлы сьӧлыко сюресэз кельтыны юрттӥз шуыса.

5. Мар милемлы кароно, Римъёслы 12:2 лыдэ басьтыса?

⁵ Озьы ке но малпано ӧвӧл, милемлы воштӥськонъёс лэсьтоно ӧвӧл ини шуыса. Христианъёс луыса, ми секыт сьӧлыкъёсты ум лэсьтӥське ке но, азьло сямен ик милемлы палэнсконо ваньмызлэсь, мар милемыз секыт сьӧлыке вуттыны быгатысал. Мар милемлы юрттоз? Павел христианъёсты ӧтиз: «Туала вапумысь улонлэн куронъёсызлы тупатскыны турттыса эн улэ. Нош тӥ асьтэлэсь лулдэс-сюлэмдэс [«визьдэс», ВД] выльдэ-воштэ» (Рим. 12:2). Озьыен, нырысетӥез, мар милемлы карыны кулэ, туала вапумысь улонлэн куронъёсызлы тупатсконо ӧвӧл, яке дуннелы ми вылэ пыӵаны лэзёно ӧвӧл. Нош кыкетӥез, визьмес выльдоно-воштоно, яке малпанъёсмес воштоно.

6. Кыӵе кулэ луись дышетон вань Иисуслэн кылъёсаз, кудъёсыз гожтэмын Матфейлэн 12:43—45?

⁶ Выльдӥськон-воштӥськон сярысь веракуз, Павел вылтусэз воштон сярысь гинэ ӧз вера, нош мур воштӥськонъёс сярысь вераз. (Учке «Выльдӥське-воштӥське, нош асьтэды чебер возьматыны гинэ эн тырше» рамкаез.) Милемлы выльдыны-воштыны кулэ визьмес — малпанъёсмес, шӧдонъёсмес но сямъёсмес. Соин ик котькудмылы аслэсьтыз юано: «Кыӵе воштӥськонъёс мон пушкын ортчо: мон адямиос азьын гинэ чебер адскыны тыршисько-а яке мон зэмзэ ик сюлэмме но визьме воштыны тыршисько-а?» Та юанлы валэктон туж кулэ луэ. Матфейлэн 12:43—45 Иисус валэктӥз, мар милемлы карыны кулэ. (Лыдӟе.) Солэн кылъёсаз кулэ луись дышетон вань: шонертэм малпанъёсты палэнтыны тырмыт ӧвӧл. Со сяна, визьмес тырмытоно малпанъёсын, кудъёсыз Инмарлы ярамон луо.

ВИЗЬДЭС ВЫЛЬДЭ-ВОШТЭ

7. Кызьы ми визьмес но сюлэммес воштыны быгатӥськомы?

⁷ Нош быгатӥськомы-а ми визьмес но сюлэммес воштыны? Инмарлэн Кылаз вераське, милемлы визьмес выльдоно-воштоно, выль адями луоно шуыса, «уго сое Инмар, Аслыз укшатыса, шонерлык, зэмлык, дун-сьӧлыктэм улон понна кылдытӥз» (Еф. 4:23, 24). Зэм, сыӵе воштӥськонъёс лэсьтыны луэ, со капчи ӧвӧл ке но. Шонертэм мылпотонъёслэсь но ужъёслэсь палэнскем сяна, милемлы эшшо мар ке но кароно. Милемлы визьмес выльдоно-воштоно, яке малпаськон амалмес воштоно. Со понна милемлы воштоно мылпотонъёсмес, сямъёсмес, озьы ик сое, кызьы ми асьмеды возиськомы. Но сое ялан лэсьтыны кулэ.

8, 9. Кызьы одӥг агайлэн учырез возьматэ, макем кулэ малпаськон амалэз воштыны?

⁸ Тани мар луиз одӥг агаен, кудӥз азьло ассэ туж лек возиз. Вина юэмысь но жугиськемысь дугдыса, со Иеговаез данъяз аслаз пичи гуртаз. Нош одӥг ӝытэ, пылатӥськемез берегес ик, малпамтэ шорысь аспӧртэмлыко учыр кылдӥз. Солэн корка дораз лыктӥз кыӵе ке но кудӟем пиосмурт но со борды жугиськыны ӧдъяз. Нырысь агай ассэ кияз кутӥз. Нош куке кудӟем пиосмурт Иеговаез сантэманы кутскиз, агайлэн чиданэз быриз. Со дорысьтыз потӥз но пиосмуртэз жугиз. Малы со ассэ кияз кутыны ӧз быгаты? Библиез дышетон солы лек мылкыдыныз нюръяськыны юрттӥз ке но, солэн малпаськон амалэз воштӥськемын ӧй вал.

⁹ Озьы ке но агай киоссэ ӧз лэзьы (Мад. 24:16). Тӧроослэн юрттэменызы, со зэмзэ но воштӥськыны быгатӥз, но дыр ортчыса, ачиз тӧро луиз. Кӧня ке ар ортчыса, со выльысь сыӵе учырен пумиськиз. Одӥг ӝытэ Эксэйлык юрт котырын кудӟем пиосмурт мукет тӧроез жугыны ӧдъяз. Мар кариз агай? Со лякытэн но гажаса вераськиз кудӟем пиосмуртэн, солы буйгатскыны юрттӥз но дорозяз келяз. Малы та учырын агай ассэ мукет сямен возиз? Со быгатӥз быдэсак воштыны малпаськон амалзэ. Со зэмзэ ик тупаса улӥсь но зӥбыт-востэм адями луиз. Та учырын агай Иеговаез данъяз.

10. Мар кароно воштӥськон понна?

¹⁰ Сыӵе воштӥськонъёс вакчи дыр куспын уг ортчо. Милемлы трос аръёс ӵоже туж тыршоно луоз, дыр (2 Пётр 1:5). Уг луы воштӥськыны, Иеговалы трос аръёс ӵоже ужаса-тыршыса гинэ. Милемлы вань кужмысьтымы тыршоно малпаськон амалмес воштыны. Эскеромы, мар милемлы юрттоз та удысын.

КЫЗЬЫ МАЛПАСЬКОН АМАЛЭЗ ВОШТОНО

11. Кызьы вӧсяськон юрттэ милемлы малпаськон амалмес воштыны?

¹¹ Нырысетӥез, кулэ вӧсяськыны. Умой адӟем карон возьматӥз милемлы псаломъёсты гожъясь, кудӥз вераз: «Инмаре, сюлэмме чылкыт кар, мынам пушкам выльдэм юн дух пон» (Пс. 50:12). Валаны кулэ, милемлы малпаськон амалмес воштоно шуыса но ми Инмарлэн юрттэмезтэк сое лэсьтыны ум быгатэ шуыса. Малы оскыны луэ, Иегова милемлы воштӥськыны юрттоз шуыса? Тодамы ваёмы, мар со вераз израиль калыкысь вылтӥяськись адямиос сярысь, кудъёсыз Иезекииль пророк дыръя улӥзы: «Соослы ваньзылы одӥг кадь сюлэм сёто, соос пушкы выль дух поно... соослы лулмугоро [яке Инмарлэсь кылзӥськись] сюлэм сёто» (Иез. 11:19). Иеговалэн израиль калыкысь адямиослы воштӥськыны юрттэмез потэ вал. Солэн милемлы но юрттэмез потэ.

12, 13. а) Мар сярысь милемлы малпаськоно, Псалтирез 118:59 лыдэ басьтыса? б) Мар сярысь аслэсьтыд юаны луоз?

¹² Кыкетӥез, туж кулэ малпаськыны. Котькуд нунал Библиез сак лыдӟыса, дыр висъяно малпаськон понна со сярысь, кыӵе малпанъёслэсь но мылпотонъёслэсь куштӥськыны кулэ. (Лыдӟе Псалтирез 118:59; Иак. 1:25; Евр. 4:12.) Милемлы валаны кулэ, ӧвӧл-а милям сямъёсмы но мылпотонъёсмы, кудъёсыз вылын та дуннелэн мылкыдыз шӧдӥське. Валаны кулэ, милям ляб интыосмы вань шуыса но милемлы соосын вань кужмысьтымы нюръяськоно шуыса.

¹³ Кылсярысь, аслэсьтыд юаны луоз: «Быдэсак быремын-а сюлмысьтым вожъяськон но вылтӥяськон сямъёс? (1 Пётр 2:1). Данъяськисько-а мон ас калыкеным, дышетскеменым яке ваньбуреным? (Мад. 16:5). Уг малпаськы-а мон, адямиос, кудъёсызлэн мынам выллем арбериоссы ӧвӧл, мынэсьтым улӥегес инты басьто шуыса? Уг учкиськы-а мон умойтэмен мукет калыкысь адямиос шоры? (Иак. 2:2—4). Уг кельшы-а мыным мар ке но, мар вань Шайтанлэн дуннеяз? (1 Иоанн 2:15—17). Кельшо-а мыным шутэтскон амалъёс, кудъёсыз кужмысь каронэн но азон-калгонэн герӟаськемын? (Пс. 96:10; 100:3; Ам. 5:15)». Та юанъёслы валэктонъёс валаны юртто, мае милемлы эшшо воштоно на. Мур пыӵам сямъёсмылэсь куштӥськыса, ми инмысь Атаймес шумпоттомы (Пс. 18:15).

14. Малы туж кулэ эшъёсты шонер бырйыны?

¹⁴ Куинетӥез, кулэ эшъёсты шонер бырйыны. Валаськомы-а ми, ум-а, ми вылын зол шӧдӥсько асьмелэн эшъёсмы (Мад. 13:21). Уж дорын яке школаын ми луиськомы, вылды, адямиос пӧлын, кудъёсыз уз юрттэ милемлы Инмарлы ярамон сямен малпаськыны. Нош христиан пумиськонъёсын ми туж умой эшъёсты шедьтыны быгатӥськомы. Отын милесьтым мылкыдмес ӝуто «яратыса, ӟеч ужъёс лэсьтыса улыны» (Евр. 10:24, 25).

«ОСКОНДЭС ЮНМАТЭ»

15, 16. Кызьы Шайтан малпаськон амалмес ас палаз берыктыны тырше?

¹⁵ Эн вунэтэ: Шайтан малпаськон амалмес ас палаз берыктыны тырше. Со пӧртэм дышетонъёсты уже кутэ, Инмарлэн Кылысьтыз зэмлык малпаськон амалмылы пайда медаз вайы шуыса.

¹⁶ Вераны луоз: Шайтан милемлы сётэ сыӵе ик юан, кудзэ со куке но сётӥз Евалы Едем садын: «Инмар зэмзэ ик-а вераз..?» (Ул.-выл. 3:1). Дуннеын, кудӥз Шайтанлэн ки улаз возиське, ми ӵем дыръя кылӥськомы сое, мар осконмес лябӟытыны быгатэ, кылсярысь: «Зэмзэ ик-а Инмар пумит луэ, пиосмурт пиосмуртэн, нош кышномурт кышномуртэн мед кузпалъяськозы шуыса? Зэмзэ ик-а солэн уг поты, тӥ Иисуслэсь вордӥськон нуналзэ яке мукет вордӥськон нуналъёсты мед пусйылоды шуыса? Зэмзэ ик-а Инмардылэн уг поты, тӥ асьтэлэн пушкады вирез мед лэзёды шуыса? Зэмзэ ик-а адямиосты яратӥсь Инмарлэн уг поты, тӥ кенешысь поттэм ӵыжы-выжыосыныды но эшъёсыныды кусып мед возёды шуыса?»

17. Мар милемлы кароно, куке кин ке но милемлы юанъёс сётъя, осконмес лябӟытыны тыршыса? Мар карыны мылкыдмес ӝутэ Колоссыослы 2:6, 7?

¹⁷ Милям осконмы юн луыны кулэ. Осконэнымы герӟаськем кулэ луись юанъёслы ми валэктонъёс ӧм шедьтэ ке, соку Библиысь зэмлыклы осконмы лябӟыны быгатоз. Нош соин сэрен малпаськон амалмы воштӥськыны но осконмы куашканы быгатоз. Соку мар милемлы кароно? Инмарлэн Кылыз ӧте милемыз визьмес выльдыны-воштыны, тодыны мед быгатомы шуыса, «мае... [милесьтым] Инмар возьма, кыӵе уж Солы ӟеч, ярамон, дун-шектэм луэ» (Рим. 12:2). Библиез но со вылэ пыкиськыса гожтэм публикациосты ялан эскерыкумы, ми тодыны быгатӥськомы, басьтэм тодон-валанъёсмы зэм луо шуыса. Со сяна, милям осконмы юнма, Иеговалэн эсэпъёсыз шонерлыкоесь шуыса. Соку, кызьы писпулэн выжыосыз юн луо, милям но осконмы юн луоз. (Лыдӟе Колоссыослы 2:6, 7.)

18. Мар юрттыны быгатоз, Шайтанлэн дуннеез ми вылэ медаз пыӵа шуыса?

¹⁸ Тӥлесьтыд оскондэс, тӥ сяна, нокин но юнматыны уз быгаты. Соин ик азьланяз но малпаськон амалдэс тупатыны тырше. Ялан вӧсяське но Иеговалэсь святой духсэ куре. Дышетске малпаськыны но тырше валаны, кыӵеесь тӥляд сямъёсты но мылпотонъёсты. Эшъёсты шонер быръе но кусып возе соосын, кинъёс юрттозы тӥледлы малпаськон амалдэс умой пала воштыны. Озьы лэсьтыса, Шайтанлэн дуннеез тӥ вылэ пыӵаны уз быгаты, но тӥ котькыӵе шонертэм малпанэз, «Инмарез тодонлы пумит султэм котькыӵе вылтӥяськонэз» палэнтыны быгатоды (2 Кор. 10:5).