Кыӵе янгышъёс лэсьтоно ӧвӧл, Библия дышетонэз ортчытыку

Трос верано ӧвӧл. Эн малпа, тон ваньзэ валэктыны кулэ шуыса. Иисус адямиослы юанъёс сётъя вал, малпаськыны но шонер йылпумъянъёс лэсьтыны юрттон понна (Мф 17:24—27). Юанъёс дышетонэз тунсыкогес каро но валаны юртто, малы оске дышетскись но макем умой вала со материалэз. Юан сётэм бере, чида но ответ сётэмзэ возьма. Дышетскись шонертэм валэктон сётэ ке, эн дырты сое тупатыны. Тупатэм интые, ватсам юанъёс сётыса, юртты солы шонер йылпумъянэ вуыны. Выль малпанъёсты дыртытэк вера, дышетскись соосты умойгес валаны мед быгатоз шуыса.

Валаны секыт кароно ӧвӧл. Эн тыршы вераны ваньзэ, мае тодӥськод эскериськись темая (Ин 16:12). Висъя саклыктэ абзацысь валтӥсь малпанлы. Ватсам малпанъёс, туж тунсыкоосыз но, валтӥсь малпанэз валантэм карыны быгатозы. Дышетскись валтӥсь малпанзэ валаз ке, выж мукет абзаце.

Материалэз гинэ ортчыны тыршоно ӧвӧл. Милям ужпуммы ӧвӧл материалэз гинэ ортчыны, милемлы адямилэсь сюлэмзэ вырӟытоно (Лк 24:32). Инмарлэн Кылызлэн кужмыз мед адӟиськоз шуыса, саклык висъя Библиысь валтӥсь кылбуръёс вылэ (2Кр 10:4; Евр 4:12). Уже кут огшоры примеръёсты но ӵошатонъёсты. Материалэз дышетскисья тупаты, солэсь югдуръёссэ но осконзэ лыдэ басьтыса. Таӵе юанъёс сётъя: кельше-а тыныд со, мар выльзэ тон тодӥськод? Малы со дышетэ милемыз Иегова сярысь? Та визь-кенешез уже кутӥд ке, кыӵе пайда со тыныд сётоз?