«Улон но ужан-тыршон» ужан тетрадьлы малпанъёс
4—10-ТӤ КУАРТОЛЭЗЬ
ИНМАРЛЭН КЫЛЫСЬТЫЗ УЗЫРЛЫК | УЛОН-ВЫЛОН 36, 37
Духовной марӟанъёсты утчаськомы
(Улон-вылон 36:1) Тани Исавлэсь, со ик Едом, выжыоссэ гожъян.
it «Эдом», 1 абз.
Едом
(«горд»).
Со кыкетӥ ним яке кушемним, кудӥз сётэмын Иаковлэн кыкто вынызлы, Исавлы (Ул 36:1). Исавлы сыӵе ним сётэмын вал, малы ке шуоно со нырысь нуны луон правозэ горд сиён понна вузаз (Ул 25:30—34). Озьы тупаз: вордӥськыкуз Исав туж горд вал (Ул 25:25), озьы ик музъем но, кытын бератаз улӥз Исав но солэн выжыез, интыен-интыен горд вал.
(Улон-вылон 37:29—32) Рувим нош ик гу доры лыктӥз, нош гуын Иосиф ӧвӧл ни. Соку со вылысьтыз дӥськутсэ ӵажак кесиз. 30 Агай-вынъёсыз доры лыктыса, со шуиз: «Пияш отын ӧвӧл, нош мон таре мар каром на?» 31 Соку агай-вынъёс кечпиез вандӥзы но солэн вирыныз Иосифлэсь дӥськутсэ наштазы. 32 Пӧртэм буёло выл дӥсянзэ атайзы доры вайизы но шуизы: «Ми тае шедьтӥмы, учкы, та дӥськут тынад пиедлэн-а, ӧвӧл-а?»
it «Попечение, забота», 3, 4 абз.
Вордон; кин ке яке мар ке понна кыл кутон
Куке пудо возьмась вера вал, со пудоез возьмалоз но сое утёз шуыса, со дырысен со пудо понна кыл кутыны кутске вал. Пудо возьмась кузёлы кылзэ сётэ вал, пудо сюдэмын луоз но сое уз лушкалэ шуыса. Нош пудо возьмась сётэм кылзэ уг быдэсты яке пудоен мар ке луэ вал ке, соку со дась вал изъянэз берыктыны. Но кылдэ вал ке югдур, куке пудо возьмась пудоез утён понна номыр карыны уг быгаты вал, кылсярысь, пудоез сьӧсь пӧйшуръёс кесяло вал ке, соку, вылӥын верам законъя, со янгыш ӧй вал. Нош пудо возьмасез кыл кутыны медаз косэ шуыса, со кузёезлы возьматыны кулэ вал, со янгыш ӧвӧл шуыса, кылсярысь, кесям пудоез возьматыса. Куке пудо возьмась возьматэ вал, со янгыш ӧвӧл шуыса, кузёез сое кыл кутыны уг косы ни вал.
Озьы ик каро вал котькуд учырын, куке мае ке яке кинэ ке мукет адямилэн киулаз сёто вал, со сое мед утёз шуыса. Озьы каро вал семья куспын но. Кылсярысь, семьяын бадӟымез пи кыл кутэ вал пичиосыз нылпиос понна. Соин ик валамон, малы, Улон-вылон 37:18—30 верамъя, Рувим, кудӥз семьяын бадӟымез вал, Иосиф понна сюлмаськиз, куке Иосифлэн мукет агайёсыз сое виыны ӵектӥзы. Рувим вераз: «Сое ум вие». Со шуиз: «Вир эн кисьтэ... кидэс со вылэ эн вуттэ». Собере валэктэмын: «Тае со [Рувим] таӵе малпанэн вераз: сое соослэн киулысьтызы мозмытоно но атаез доры берыктоно». Берлогес, куке Рувим Иосифез ӧз шедьты, со туж ӝоже усиз, сюлмаськыны кутскиз но вераз: «Пияш отын ӧвӧл, нош мон таре мар каром на?» Со вала вал, Иосиф понна солы кыл кутоно луоз шуыса. Кыл кутонтэм вылысь, агай-вынъёс пӧяны малпазы: атайзы мед малпалоз, Иосифез сьӧсь пӧйшур кесяз шуыса, соос кечпиез вандӥзы но солэн вирыныз Иосифлэсь дӥськутсэ наштазы. Куке Иаков, соослэн атайзы но судьязы (патриархъёслэн законзыя) вирен наштам дӥськутэз адӟиз, со вераз, Иосиф кесямын шуыса, но Рувимез кыл ӧз кутыты (Ул 37:31—33).
11—17-ТӤ КУАРТОЛЭЗЬ
ИНМАРЛЭН КЫЛЫСЬТЫЗ УЗЫРЛЫК | УЛОН-ВЫЛОН 38, 39
Духовной марӟанъёсты утчаськомы
(Улон-вылон 38:9, 10) Онан тодэ вал, вордскем нылпиос солэн шуыса уз лыдъяське, соин ик со агаезлэн кышноез доры пыракуз, кидыссэ музъем вылэ кисьтэ вал,— агаезлэсь выжызэ йылэтытонтэм понна. 10 Мар со лэсьтӥз, Кузё-Инмар азьын со лек уж вал; Со Онанэз вииз.
it «Онан»
Она́н
(кылдэмын кыллэсь, кудӥз возьматэ «нуны вайыны яке пинал лэсьтыны кужым; кужым» шуэмез).
Со Иудалэн пиез, кыкетӥез соос пӧлысь, кудъёсыз вордӥськизы Шуа нимо хананей пиосмуртлэн нылызлэсь (Ул 38:2—4; 1Пр 2:3). Иегова Онанлэсь Ир агайзэ сьӧлыко ужъёсыз понна вииз. Ирлэн нылпиосыз ӧй вал, соин ик Иуда Онанэз агаезлэсь Фамарь кышнозэ аслыз кышно басьтыны косӥз. Онанлэн но Фамарьлэн пизы вордӥськысал ке, со Онанлэсь выжызэ ӧй азьланьтысал, малы ке шуоно со Ирлэн нырысетӥ вордӥськем пиез шуыса лыдъяськысал но Ирлэн юртысьтыз пай басьтысал. Нош Онанлэн но Фамарьлэн пизы ӧй вордӥськысал ке, Ирлэн юртысьтыз пай Онанлы сюрысал. Куке Онан Фамарен кӧла вал, со «кидыссэ музъем вылэ кисьтэ вал». Со мастурбация ӧй вал, малы ке шуоно Онан «кидыссэ музъем вылэ кисьтэ вал», «агаезлэн кышноез доры пыракуз». Онан юри озьы лэсьтэ вал, Фамарь секытэн медаз луы шуыса. Озьыен, Иегова нылпитэм Онанэз маструбациен выремез понна ӧз виы. Со сое вииз, малы ке шуоно Онан атаезлэсь ӧз кылзӥськы, кӧттырмостэм выриз но Инмарлэсь кузпалъяськон пумысен косонзэ ӧз быдэсты (Ул 38:6—10; 46:12; Лд 26:19).
(Улон-вылон 38:15—18) Иуда, Фамарез адӟыса, калгись ныл, дыр, та шуыса малпаз, уго Фамарь ымнырзэ кышетэныз ворсаз. 16 Иуда сюрес вылысь со доры кожиз но шуиз: «Мон тон доры пыро». Уго со ӧз тодма, та солэн кенэз шуыса. Фамарь шуиз: «Мон доры пырид ке, мар тон мыным сётод?» 17 Иуда шуиз: «Уллёысьтым тыныд кечпиме келяло». Фамарь шуиз: «Ыстытозядлы, верам кылдэ юнматон понна мардэ кельтод?» 18 Иуда шуиз: «Верам кылэз юнматон понна мар тыныд сётоно?» Фамарь шуиз: «Гайтан борды шедьытэм печатьтэ, киысьтыд бодыдэ». Мар куриз, сое со солы сётӥз но со доры изьыны пыриз; Фамарь Иудалэсь нуны ваёно луиз.
w04 15/1 30 б., 4, 5 абз.
Лыдӟисьёслэн юанъёссы
Иуда шонертэм лэсьтӥз, куке сётэм кылзэ ӧз быдэсты но Фамарез Шела пиезлы кышнолы ӧз вайы. Со сяна, со кӧлӥз кышномуртэн, кудӥз сярысь малпаз, со храмын калгыса улэ шуыса. Инмарлэн малпамезъя, пиосмурт аслаз кышноеныз гинэ кӧланы кулэ, соин ик Иудалэн со кышномуртэн кӧлэмез Инмарлэн малпамезлы пумит вал (Улон-вылон 2:24). Зэмзэ ке верано, Иуда калгыса улӥсь кышномуртэн ӧз кӧлы. Иуда, ачиз но сое валатэк, Шела пиезлэсь интызэ басьтӥз но законъя пай басьтӥсьлэн атаез луиз.
Фамарь сярысь ке верано, солэн Иудаен кусыпъёсыз азон-калгон ӧй вал. Солэн кыкто пиосыз азон-калгонлэсь ӧз вордӥське. Куке Вифлеемысь Вооз, Инмарлэсь кузпалъяськон сярысь законзэ быдэстыса, кулэм ӵыжы-выжыезлэсь кышнозэ, Моав музъемысь Руфез, кышно басьтӥз, Вифлеемысь тӧроос Фамарьлэн Фарес пиез сярысь умоен веразы. Соос шуизы Воозлы: «Тынад выжыед Фамарьлэн Иудалы вордскытэм Фареслэн выжыез кадь мед луоз, Кузё-Инмарлэн ӟечлыкеныз та егит кышномуртлэсь тыныд кужмо выжы мед потоз» (Руфь 4:12). Озьы ик, Фареслэн нимыз Иисус Христослэн ӵыжы-выжыосыз пӧлын гожтэмын (Матфей 1:1—3; Лука 3:23—33).
18—24-ТӤ КУАРТОЛЭЗЬ
ИНМАРЛЭН КЫЛЫСЬТЫЗ УЗЫРЛЫК | УЛОН-ВЫЛОН 40, 41
Духовной марӟанъёсты утчаськомы
(Улон-вылон 41:14) Фараон Иосифез ӧтьыны ыстӥз. Дыртыса сое пытсэтысь поттӥзы. Йырзэ ӵышкиз, дӥськутсэ воштӥз но фараон доры лыктӥз.
w15 1/11 9 б., 1—3 абз.
Тодӥськоды-а тӥ?
Малы Иосиф фараон доры лыктэмезлэсь азьло йырзэ ӵышкиз но тушсэ мычиз?
Улон-вылон книга верамъя, фараон Иосиф еврей пиез ӝоггес тюрьмаысь вайыны косӥз, со солы сюлмаськытӥсь уйвӧтъёссэ мед валэктоз шуыса. Со дырлы Иосиф пытсэтын трос аръёс пуке вал ини. Фараон Иосифез ӝоггес лыктыны косӥз ке но, Иосиф йырзэ ӵышкыны но тушсэ мычыны дыр висъяз (Улон-вылон 39:20—23; 41:1, 14). Улон-вылон книгаез гожтӥсьлэн Иосифлэн сыӵе дасяськемезлы саклык висъямез возьматэ, Иосиф египет калыклэсь сямъёссэ умой тодэ вал шуыса.
Тросэзлэн вашкала калыкъёслэн, озьы ик еврейёслэн но, пиосмуртъёссы тушсэс лэзё вал. Макклинтоклэн но Стронглэн библейской энциклопедиязы верамын, вашкала египет калык шундыӝужан палась одӥг гинэ калык вал шуыса, кудаз пиосмуртъёслы тушсэс лэзьыны уг яра вал (McClintock and Strong’s Cyclopedia of Biblical, Theological, and Ecclesiastical Literature).
Тушсэс гинэ мычо вал-а? «Библейское археологическое обозрение» журналын малпан гожтэмын вал, египет калыклэн куд-ог сямъёсызъя, адямилы фараон доры лыктэмезлэсь азьло дасяськоно вал шуыса озьы ик, кызьы со дасяськысал храме пырон азяз (Biblical Archaeology Review). Озьы ке, соку Иосифлы йырзэ гольык ӵышконо но мугорысьтыз вань гонзэ мычоно вал.
(Улон-вылон 41:33) Фараон мед шедьтоз ук табере нодлыко, визьмо адямиез, сое мед пуктоз Египетэн кивалтыны.
w09 15/11 28 б., 14 абз.
Инмарлэн ужась-тыршисьёсыз луыса умой сямъёсмес возьматӥськомы
14 Библиын гожтэм дыръёсы Инмарлы оскись анай-атайёс нылпиоссэс умой сямъёслы дышетыны тыршизы. Учке Улон-вылонын 22:7 гожтэм кылъёсты, кудъёсысьтыз адӟиське, кызьы Авраам но солэн Исаак пиез ог-огенызы верасько вал. Иосифлэн учырысьтыз но адӟиське, анай-атайёсыз сое умой дышетӥзы шуыса. Тюрьмаын дыръяз со умоен вераськиз тюрьмаын мукет пукисьёсын но (Ул.-выл. 40:8, 14). Фараонлы верам кылъёсысьтыз адӟиське, Иосиф тодэ вал шуыса, кызьы шонер вераськоно вылӥе пуктэм адямиен (Ул.-выл. 41:16, 33, 34).
25—31-ТӤ КУАРТОЛЭЗЬ
ИНМАРЛЭН КЫЛЫСЬТЫЗ УЗЫРЛЫК | УЛОН-ВЫЛОН 42, 43
Духовной марӟанъёсты утчаськомы
(Улон-вылон 42:22) Рувим, ответ сётыса, соослы шуиз: «Мон тӥледлы ӧй вера-а: пинал пилы урод лэсьтыса эн сьӧлыкалэ? Нош тӥ ӧд кылзӥське, нош табере солэн вирыз понна кыл кутон дыр вуиз».
(Улон-вылон 42:37) Соку Рувим атаезлы тазьы шуиз: «Мынэсьтым кык пиосме ви, Вениаминэз берен ӧй ке вайы тон доры; сое мон кие сёт, мон сое берен тон доры вутто».
it «Рувим», № 1, 2 абз.
Рувим
Рувимлэн куд-ог умой сямъёсыз шӧдӥськизы соку но, куке со укмыс вынъёссэ оскытӥз, соос Иосифез медаз вие, нош тырттэм гуэ мед куштозы шуыса. Рувим лушкемен берытскыны но Иосифез мозмытыны малпа вал (Ул 37:18—30). Кызь арлэсь кемагес ортчыса, со вынъёс ик Египетын асьсэ куспазы вераськизы, соосты утчаськыса-чакласькыса ветлӥсьёсын нимазы шуыса. Соос малпазы, озьы соосты Иосифлы пумит урод уж лэсьтэмзы понна кыл кутытӥзы шуыса. Соку Рувим тодазы вайытӥз соослы, со соослэн Иосифлы пумит лэсьтэм ужазы ӧз пыриськы шуыса (Ул 42:9—14, 21, 22). Нош куке Иаков пумит луиз Египетэ кыкетӥзэ мыныны дасяськем пиосыныз ӵош Вениаминэз лэзьыны, Рувим вераз атаезлы, со Вениамин понна кыл кутоз шуыса, но ватсаз: «Мынэсьтым кык пиосме ви, Вениаминэз берен ӧй ке вайы тон доры» (Ул 42:37).
(Улон-вылон 43:32) Талы нимаз сиён-юон пуктӥзы, соослы но нимаз пуктылӥзы, соин ӵош сиськись египет пиослы но нимаз сётӥзы, египет пиос еврей пиосын огазьын сиськыны уг быгато уго, малы ке шуоно египет пиос понна та — юрӟым уж.
w04 15/1 29 б., 1 абз.
Улон-вылон книгаысь тунсыко малпанъёс — II люкет
43:32 — Малы Египет калык малпа вал, еврейёсын огазьын сиськыны — со юрӟым уж шуыса? Мугез мукет осконысь адямиосты ултӥян яке аслад калыкеныд данъяськон бордын вал, шӧдске. Египет калыклы ыж возьмасьёс но юрӟым пото вал (Улон-вылон 46:34). Малы? Малы ке шуоно ыж возьмасьёс куанер но дышетскымтэ адямиос пӧлысь вал, вылды. Яке эшшо одӥг муг луыны быгатэ вал, малы Египет калык ыж возьмасьёсты уг яраты вал,— ыж возьмасьёс пудо возьманы инты утчало вал, нош кизён-мерттӥськон понна музъем сотэк но ӧжыт вал.