Ми ужаськомы-тыршиськомы Инмарлы, кудӥз «гажан-жалянэн узыр»

1. Кыӵе адями тӥляд син азяды пуксе, куке кылӥськоды «гажась-жалясь» кылэз?

КЫӴЕ адями тӥляд син азяды пуксе, куке тӥ кылӥськоды «гажась-жалясь» кылэз? Тӥ син азяды пуктӥськоды, дыр, валась, жалясь но шырыт сямо адямиез. Яке тӥ тодады вайиды, дыр, Иисуслэсь ӟеч сямо самария мурт сярысь мадёнзэ. Со гажан-жалянзэ возьматӥз еврей пиосмуртлы, кудӥз таласьёс ки улэ шедиз. Самария мурт кулытозяз жугем адямиез жаляз но со сярысь яратыса сюлмаськиз, соос пӧртэм калыкъёсысь луо вал ке но (Лука 10:29—37). Та мадён возьматэ, макем гажась-жалясь луэ Инмармы. Инмар гажась-жалясь, малы ке шуоно со милемыз яратэ. Котькуд нунал Иегова та сямзэ милемлы пӧртэм сямен возьматэ.

2. Кытысь эшшо адӟиське на гажась-жалясь луон?

² Кытысь эшшо адӟиське гажась-жалясь луон? Со, кин гажась-жалясь луэмзэ возьматэ, ужпум кутыны быгатэ янгыш лэсьтэм адямиез вӧсь карытэк кельтыны. Кызьы гожтэмын Псалтирьын 102:10, ӵапак озьы ик Иегова милемлы гажан-жалянзэ возьматэ: «Законлы пумит улэмъёсмы понна вӧсь ӧз кары». Нош куддыръя Иегова зол кыл кутытэ сое, кин сьӧлыказ.

3. Кыӵе юанъёсты ми эскеромы?

³ Та статьяын ми эскеромы куинь юанъёсты: малы Иегова гажан-жалянзэ возьматэ? Возьматэ-а зол кылкутытон гажась-жалясь луэмез? Мар юрттоз милемлы гажась-жалясь луыны? Ойдолэ учкомы, мар вераське та сярысь Инмарлэн Кылаз.

МАР ИЕГОВАЛЭСЬ МЫЛКЫДЗЭ ӜУТЭ ГАЖАН-ЖАЛЯНЗЭ ВОЗЬМАТЫНЫ

4. Мар Иеговалэсь мылкыдзэ ӝутэ гажан-жалянзэ возьматыны?

⁴ Яратон. Ефесъёслы гожтэтаз 2-тӥ люкетын Павел гожтӥз, Инмар «гажан-жалянэн узыр» шуыса. Та учыре Павел вераз, кызьы Инмар гажан-жалянзэ возьматэ тырбыдэстэм зырӟем христианъёслы, кудъёсызлэн инмын улыны осконзы вань (Еф. 2:4—7). Нош Иегова зырӟем христианъёслы гинэ гажан-жалянзэ уг возьматы. Одӥгаз псаломаз Давид гожтӥз: «Гажась-жалясь Кузё-Инмар... [Со] ваньмызлы ӟеч» (Пс. 144:8, 9). Адямиосты яратэменыз, Иегова возьматэ гажан-жалянзэ котьку но, куке со понна мугъёс вань.

5. Кытысь Иисус тодӥз, Иеговалы гажась-жалясь луыны туж кельше шуыса?

⁵ Иисус ваньмызлэсь умой тодэ, макем зол Иеговалы кельше гажан-жалянзэ возьматыны. Музъем вылэ лыктон азяз со туж трос аръёс инмын Атаеныз ӵош ортчытӥз (Мад. 8:30, 31). Адямиослэн вань улонзы ӵоже со адӟиз, кызьы Иегова, соослэн сьӧлыкамзы шоры учкытэк, выльысь но выльысь соослы гажан-жалянзэ возьматылӥз! (Пс. 77:37—42). Соин ик паймонэз ӧвӧл, Иисус кылзӥсьёсызлэсь Атаезлэн та сямызлы туж трос пол саклыксэ висъяз шуыса.

6. Кызьы Иисус возьматӥз, Атаез гажан-жалянзэ возьматыны дась шуыса?

⁶ Иисус вераз йыромем пи сярысь сюлэмез бугыртӥсь мадёнэз. Отын со возьматӥз, макем Иегова гажась-жалясь луэ. Кылем статьяын ми солы саклыкмес висъямы вал ини. Та мадёнын пияш атай юртсэ кельтэм, «калгыса, азыса улэм» но «вань юртъер люкетсэ тус-тас карем» (Лука 15:13). Нош берлогес со ӧпкелиз, зӥбыт-востэм луиз но дораз берытскиз. Кызьы солэн берытскемез шоры атаез учкиз? Тае тодон понна, пияшлы кема возьмано ӧз луы. Иисус азьланьтэ: «Кыдёкысен ик сое атаез адӟем, солы со жаль потэм, бызьыса мынэм но чырты бордаз ӟыгыртӥськыса чупам сое». Атаез пизэ ӧз пыкылы, нош шумпотыса пумитаз сое. Пиез туж бадӟым янгыш лэсьтӥз ке но, атаез гажаса-жаляса сое простить кариз, малы ке шуоно пиез ӧпкелиз. Иисуслэн мадёназ гажась-жалясь атай — со Иегова. Милям инмысь Атаймы дась простить карыны соосты, кинъёс вань сюлмысьтызы ӧпкелё. Со, макем яркыт возьматӥз тае Иисус, милям сюлмамы ик пыре (Лука 15:17—24).

7. Кызьы Иеговалэн визьлыкез герӟаськемын солэн гажан-жалянэныз?

⁷ Номырин ӵошатонтэм визьлык. Иегова гажась-жалясь, малы ке шуоно со туж визьмо. Иегова котьку но сыӵе ужпумъёс кутэ, кудъёсыз вань кылдытэмъёсызлы пайда ваё. Библиын верамын, «вылӥысь васькись визьлык... гажан-жалянэн но ӟеч емышъёсын тырмемын» шуыса (Иак. 3:17). Яратӥсь Атаймы тодэ, милемлы солэн гажан-жалянэз кулэ шуыса (Пс. 102:13; Ис. 49:15). Ми тырбыдэстэмесь ке но, со сётэ милемлы вуоноезлы паймымон оскон. Иеговалэн визьлыкез солэсь мылкыдзэ ӝутэ гажан-жалянзэ возьматыны котьку но, куке со понна мугъёс вань. Со дыре ик милям визьмо Инмармы умой вала, ку гажан-жалянзэ возьматыны умой ӧй луысал, нош ку со умойтэм ужъёсты шонере поттысал.

8. Кыӵе ужпум куддыръя кенешын куто но малы?

⁸ Мар милемлы кароно, куке кенешысь христиан мурт валаса вылысь сьӧлыко сюрес быръе? Апостол Павел пыр Иегова вера милемлы, ми сыӵе адямиен кусып воземысь мед дугдомы шуыса (1 Кор. 5:11). Соин ик ӧпкелисьтэм сьӧлыкась муртэ кенешысь потто. Со туж кулэ, Инмарлы оскымон вын-агайёсты но сузэр-апайёсты утён понна, озьы ик Инмарлэн син азяз кенеш чылкыт мед кылёз шуыса. Нош кин ке но малпаны быгатэ, кенешысь поттэм адямилы Иегова гажан-жалянзэ уг возьматы шуыса. Озьы-а со? Ойдолэ эскеромы та юанэз.

ВОЗЬМАТЭ-А КЕНЕШЫСЬ ПОТТОН ГАЖАН-ЖАЛЯНЭЗ?

9, 10. Кыӵе пример вылын адӟиське, кенешысь поттон гажан-жалянэз возьматэ шуыса? (Еврейёслы 12:5, 6).

⁹ Туж вӧсь луэ, куке кин ке тодмоосмы яке эшъёсмы пӧлысь Иеговалэн Адӟись-Ивортӥсез луэмысь дугдэ. Милям юанъёсмы кылдыны быгато: зэмзэ ик-а сое кенешысь поттоно вал? Возьматэ-а со гажан-жалянэз? Зэм, возьматэ. Визьмо уз луы кыл кутытэк кельтыны сое, кинэ кулэ кыл кутытыны. Озьы ик кыл кутытытэк кельтон гажан-жалямез но яратэмез ӧй возьматысал (Мад. 13:25). Быгатэ-а юрттыны кенешысь поттон ӧпкелисьтэм сьӧлыкась муртлы тупатскыны? Быгатэ. Тросэз вын-агайёс но сузэр-апайёс, кудъёсыз куке но секыт сьӧлык лэсьтӥзы но кенешысь поттэмын вал, берлогес веразы, тӧроослэн асьсэды юн воземзы юрттӥз соослы валаны, соос шонертэм лэсьтӥзы шуыса, озьы ик тупатскыны но Иегова доры берытскыны юрттӥз шуыса. (Лыдӟе Еврейёслы 12:5, 6.)

¹⁰ Эскеромы таӵе примерез. Ыж возьмась адӟе, уллёысьтыз одӥг ыж висьыны кутскиз шуыса. Висёнзэ лыдэ басьтыса, ыж возьмась ужпум кутэ сое мукет ыжъёслэсь люкыны. Нош ыжъёс дышемын уллёен улыны, соос ог-огзы доры кыстӥсько но сюлмаськыны кутско, куке огназы кылё. Возьматэ-а со, ыж возьмась лек шуыса, куке та эмъян амалэз быръе? Зэм но, уг возьматы. Малы ке шуоно со вала, висись ыжез уллёлэсь ӧд люкы ке, висён мукет ыжъёслы но паласькоз. Висись ыжез мукетъёслэсь люкыса, со быдэс уллёез уте. (Ӵошатэ Левитэз 13:3, 4.)

11. а) Малы кенешысь поттэм адямиез ӵошатыны луэ висись ыжен? б) Мар азьло сямен ик карыны быгато кенешысь поттэм адямиос но кыӵе юрттэт солы сёто?

¹¹ Кенешысь поттэм адямиез ӵошатыны луэ примерысьтымы ыжен. Солэн духовной висёнэз вань (Иак. 5:14). Сыӵе висёнъёс быгато мукет адямиослы но паласькыны. Соин ик куд-ог учыръёсы духовной висёнэн адямиез кенешлэсь люкыны кулэ. Татысь адӟиське Иеговалэн аслэсьтыз ужась-тыршисьёссэ яратэмез. Озьы ик адӟиське Иеговалэн юрттыны мылкыд каремез, сьӧлыкась адями секыт сьӧлыксэ мед валалоз но мед ӧпкелёз шуыса. Духовной сиён шедьтон понна но тазалыксэ юнматон понна, кенешысь поттэм адями азьло сямен ик быгатэ кенешлэн пумиськонъёсаз ветлыны, публикациосмес лыдӟыны но котькуд толэзе потӥсь JW Broadcasting^® программаез учкыны. Тӧроос адӟо ке, кенешысь поттэм адями умой пала воштӥськыны тырше шуыса, соос быгато солы визь-кенешъёс сётыны, кудъёсыз юрттозы солы Инмарен кусыпъёссэ тупатыны но выльысь Иеговалэн Адӟись-Ивортӥсез луыныb.

12. Кытысь адӟиське тӧроослэн ӧпкелисьтэм сьӧлыкась муртэ яратэмзы но гажам-жалямзы?

¹² Тодамы возёно: кенешысь потто сое гинэ, кин аслаз сьӧлыкъёсыз сярысь уг ӧпкельы. Таӵе ужпум кутон азязы тӧроос ваньзэ пыр-поч эскеро. Соос тодо: Иегова котьку но кыл кутытэ озьы, кызьы кулэ, но тае ик со возьма тӧроослэсь но (Иер. 30:11). Соос ярато вань вын-агайёсты но сузэр-апайёсты. Тӧроослэн уг поты, соослэн Иеговаен кусыпъёссы мед сӧриськозы шуыса. Озьы ке но, куке сьӧлыкась муртэ кенешысь потто, куддыръя со возьматэ яратэмез но гажан-жалянэз.

13. Малы Коринфысь одӥг христиан муртэ кенешысь поттыны кулэ вал?

¹³ Эскеромы учырез, кудӥз луиз нырысетӥ даурын Коринф карын. Апостол Павел тодӥз, одӥг христиан мурт аслаз атаезлэн кышноеныз азыса-калгыса улэ шуыса. Макем со юрӟым! Вашкала дыръёсы Иегова израиль калыклы вераз: «Кин ке атаезлэн кышноеныз артэ выдӥз ке, со пиосмурт атаезлэсь гольыксэ усьтӥз — кыксы но соос виемын мед луозы» (Лев. 20:11). Зэм но, та юанэз сэрттон-пертчон понна, Павел ӧз быгаты Моисейлэсь законзэ уже кутыны но та адямиез виыны. Соин ик Коринфысь христианъёсты со куриз та агаез кенешысь поттыны. Солэн азыса-калгыса улэмез мукет вын-агайёс но сузэр-апайёс вылэ пыӵаз, соин ик куд-огъёсыз та азон-калгонэз юрӟым ужен лыдъямысь дугдӥзы (1 Кор. 5:1, 2, 13).

14. Кызьы Павел гажан-жалянзэ возьматӥз кенешысь поттэм адямилы но малы? (2 Коринфъёслы 2:5—8, 11).

¹⁴ Кӧня ке дыр ортчыса, апостол Павел тодӥз, со пиосмурт аслэсьтыз улонзэ быдэсак воштӥз но зэмзэ ик ӧпкелиз шуыса. Павел валаз, соин укыр чурыт луыны кулэ ӧвӧл шуыса, со кенешлэсь нимзэ саптаз ке но. Соин ик Павел тӧроослы вераз: «Тӥледлы умойгес луоз солэсь сьӧлыксэ куштыны но сое буйгатыны». Тани кызьы Павел валэктэ, малы со озьы вераз: «Укыр бадӟым куректонэн ёртэмын медаз луы шуыса». Павел ӧпкелись пиосмуртлы гажан-жалянзэ возьматӥз. Солэн потэ вал: та пиосмурт, ӝоже усеменыз, осконзэ медаз ышты, со простить каремын луоз шуыса. (Лыдӟе 2 Коринфъёслы 2:5—8, 11.)

15. Кызьы тӧроос огдыре ик юн луыны но гажась-жалясь луыны быгато?

¹⁵ Иеговалы сямен ик, тӧроослы кельше гажан-жалянзэс возьматыны. Луэ ке, озьы ик со понна мугъёс вань ке, соос сьӧлыкась муртэ кенешысь уг потто. Нош кыл кутытыны кулэ ке, соос озьы ик лэсьто. Озьы ӧз лэсьтэ ке, соос уз возьматэ гажан-жалянзэс, нош возьматозы, сьӧлыкаса улыны яра шуыса. Нош кулэ-а тӧроослы гинэ гажась-жалясь луыны?

МАР ЮРТТОЗ ГАЖАСЬ-ЖАЛЯСЬ ЛУЫНЫ

16. Мадёнъёсты 21:13 лыдэ басьтыса, кызьы Иегова ассэ возе соосын, кинъёс мукетъёслы гажан-жалянзэс уг возьмато?

¹⁶ Котькуд христиан мурт тырше Иеговалэсь гажан-жалянзэ адӟем карыны. Малы? Одӥгез муг: Иегова уз кылзы вӧсяськонъёссэс соослэсь, кинъёс гажась-жалясь уг луо. (Лыдӟе Мадёнъёсты 21:13.) Куке та сярысь малпаськод, туж кышкыт луэ. Соин ик ми вань сюлмысьтымы тыршиськомы, жалясьтэм но укыр чурытэсь медам луэ шуыса. «Куанер мурт викышъяса бӧрдыку», ми солэсь ум палэнскиське. Нош куке вын-агайёсмылы но сузэр-апайёсмылы секыт, ми тыршиськомы соослы юрттыны. Озьы ик ми туж сак луиськомы Библиысь алонлы: «Гажанэз-жалянэз тодытэк улонзэ ортчытӥсьлы гажасьтэм-жалясьтэм суд луоз» (Иак. 2:13). Ми зӥбыт-востэмен валаськомы ке, макем кулэ милемлы гажан-жалян, соку милемлы капчигес луоз мукетъёслы гажан-жалянмес возьматыны. Тужгес но гажан-жалянмес возьматоно соку, куке ӧпкелись сьӧлыкам мурт кенеше берытске.

17. Кызьы Давид вань сюлмысьтыз гажан-жалянзэ возьматъяз?

¹⁷ Библиысь примеръёс юрттозы милемлы со пумысен, кызьы гажан-жалянмес возьматоно но кызьы асьмеды укыр чурыт возёно ӧвӧл. Тодамы ваёмы Давидэз. Со ӵем дыръя мукетъёсызлы вань сюлмысьтыз гажан-жалянзэ возьматъяз. Кылсярысь, Саул эксэй сое трос пол виыны тыршиз. Нош Давид валаз, Саулэз Иегова зырӟыса пуктӥз шуыса, соин ик, сое гажам-жаляменыз, со ноку но ӧз тыршы солы пунэмзэ берыктыны (1 Экс. 24:10—13, 19, 20).

18, 19. Кыӵе кык учыръёсын Давидлы гажан-жалян ӧз тырмы?

¹⁸ Нош куд-ог учыръёсын Давид гажась-жалясь луыны ӧз быгаты. Кылсярысь, огпол лек Навал Давидлы урод кылъёс вераз но пумит луиз сое но солэсь адямиоссэ сюдыны. Соку Давидлэн туж вожез потӥз но со ужпум кутӥз виыны Навалэз но, солэн коркаысьтыз вань пиосмуртъёсты но. Наваллэн Авигея кышноез зӥбыт-востэм но чидась кышномурт вал. Со сиён-юон вайиз Давидлы но солэн адямиосызлы. Солы луыса Давид вир кисьтон понна янгыш ӧз луы (1 Экс. 25:9—22, 32—35).

¹⁹ Тани мукетыз учыр. Нафан пророк вераз Давидлы узыр пиосмурт сярысь, кудӥз куанер пиосмуртлэсь яратоно ыжзэ талаз. Нош ик вожез потыса, Давид кеськиз: «Улэп Кузё-Инмар! Та ужез лэсьтӥсь муртэ виыны кулэ» (2 Экс. 12:1—6). Давид туж умой тодӥз Моисейлэсь законзэ: со, кин ыжез талаз, ньыль поллы тросгес берыктыны кулэ вал (Пот. 22:1). Нош та понна сое виыны кулэ-а?! Зэмзэ вераса, Нафан та малпам учырез вераз, Давид мед валалоз шуыса, макем кышкыт вал солэн йыружъёсыз! Иегова Давидлы тросгес гажан-жалянзэ возьматӥз, ӵошатоно ке соин, мар карыны малпа вал Давид со ыж таласен (2 Экс. 12:7—13).

20. Малы ми дышетскиськомы Давидлэн учырысьтыз?

²⁰ Висъялэ саклыктэс: куке Давид вожпотонлы сётскиз, со ужпум кутӥз Навалэз но солэсь адямиоссэ виыны. Берлогес Давид вераз, Нафанлэн примерысьтыз узыр адямиез виёно шуыса. Ойдолэ пыр-почгес эскеромы кыкетӥ учырез. Малы сыӵе лякыт адями мукетъёссэ лек судъяны кутскиз? Лыдэ басьтоно, мар луиз та учырлэсь азьло. Со дыре Давидлэн возьытлыкез чылкыт ӧй вал. Куке адями мукетъёсыныз ассэ укыр чурыт возьыны кутске но мукетъёссэ судъя, та возьматэ, солэн Инмарен кусыпъёсыз лябӟизы шуыса. Тӥни малы Иисус аслэсьтыз дышетскисьёссэ алӥз: «Судить эн каре, тӥледыз но судить уз каре, уго кыӵе судэн судить кариськоды, сыӵеен ик тӥ но судить каремын луоды» (Матф. 7:1, 2). Соин ик ойдолэ тыршомы, мукетъёсыныз асьмеды укыр чурыт медам возе шуыса. Милемлы адӟем кароно «гажан-жалянэн узыр» Инмармылэсь.

21, 22. Кызьы ми гажан-жалянмес возьматыны быгатӥськомы?

²¹ Гажан-жалян уг возьматы мукетъёссэ жалямез гинэ. Сое ужъёсысь адӟыны луэ. Соин ик милемлы ваньмылы адӟыны кулэ, кызьы юрттыны быгатомы мукетъёсызлы: ӵыжы-выжыосмылы, кенешысь вын-агайёслы но сузэр-апайёслы, бускельёсмылы. Ми пӧртэм сямен гажан-жалянмес возьматыны быгатӥськомы, кылсярысь, кинэ ке буйгатыны, кинлы ке корка котыраз юрттыны, кинлы ке сиён-юон вайыны. Нош соослы, кинъёсты алигес кенеше пыртӥзы, умой эшъёс кулэ. Быгатысалды-а тӥ соослы умой эшъёс луыны? Со сяна, одӥгез тужгес но умой амал гажан-жалянэз возьматыны — мукетъёслы Библиысь шумпотон иворез вераны (Иов 29:12, 13; Рим. 10:14, 15; Иак. 1:27).

²² Зэм, милям трос луонлыкъёсмы вань мукетъёсызлы гажан-жаляммес возьматыны! Милемлы сак луыны гинэ кулэ. Озьы ми шумпоттомы инмысь Атаймес, Инмарез, кудӥз «гажан-жалянэн узыр»!