Кызьы тон Иеговаен кусыпъёстэ тупатыны быгатӥськод

КОТЬКУД аре троссэ кенешысь поттэмъёсты выльысь христиан кенеше пырто. Котьку, куке Иеговалэн дуно ыжез со доры берытске, инмын туж бадӟым шумпотон луэ! (Лука 15:7, 10). Тон но кенеше берытскид ке, юн оскы: Иисус, кылчинъёс но ачиз Иегова тынэсьтыд берытскемдэ туж возьмазы. Озьы ке но Иеговаен кусыпъёстэ юнматыны капчи уз луы, дыр. Кыӵе шуг-секытъёс кылдыны быгато но кызьы соосты вормоно?

КЫӴЕ ШУГ-СЕКЫТЪЁС КЫЛДО?

Тросэз соос пӧлысь, кинэ кенеше выльысь пыртӥзы, секыт мылкыдын улыны быгато. Тае валаны луэ. Кылсярысь, Давид эксэй но Иегова сое простить карем бере вераз: «Сьӧлыко ужъёс монэ вормо» (Пс. 64:4; 39:13). Тыныд солэн шӧдонъёсыз тодмо, дыр. Кенеше берытскемзы бере куд-ог вын-агайёс но сузэр апайёс трос аръёс ӵоже асьсэды янгышен лыдъяло, озьы ик соослы возьыт луэ. Изабельa, кудӥз 20 арлэсь но кемагес кенешысь поттэмын вал, вера: «Мыным секыт вал оскыны, Иегова монэ простить карыны быгатоз шуыса». Нош тон секыт мылкыдлы сётскид ке, соку осконэд выльысь лябӟоз (Мад. 24:10). Туж тыршоно, озьы медаз луы шуыса.

Мукет шуг-секыт но кылдыны быгатэ: кин ке но кышка, Иеговаен матысь кусыпъёсты выльысь тупатон понна, туж трос тыршоно луоз шуыса. Кенеше берытскемез бере Антуан вераз: «Мон троссэ вунэтӥ но ыштӥ быгатонлыкъёсме, кудъёсыз мынам вал, кенешысь поттытозязы». Куд-огъёсызлэн но кылдо сыӵе ик шӧдонъёссы, кудъёсыз люкето соослы ӟырдыт мылкыдын кенешлэн ужъёсаз пыриськыны.

Пукты син азяд адямиез, кудӥзлэн корка вылтӥз кужмо сильтӧл ортчиз но бадӟым изъян вайиз. Куке та адями малпа, кӧня дыр но кужым кошкоз, корказэ выльысь тупатон понна, солэн киосыз ик лэзиськыны быгато. Тынад но сыӵе ик шӧдонъёсыд кылдыло, дыр. Секыт сьӧлык лэсьтэмед сэрен, тынад Иеговаен кусыпъёсыд сӧриськизы. Соин ик тон малпаны быгатӥськод, соосты выльысь тупатон понна, туж тыршоно луоз шуыса. Нош тыныд та ужез одӥгнад быдэсъяно уз луы.

Вераны луоз, Иегова тыныд вазиське: «Чале, дорам лыктэлэ, учкоме-эскероме» (Ис. 1:18). Иеговаен кусыпъёстэ тупатон понна, тон трос лэсьтӥд ини. Инмар тае туж дунъя. Малпа гинэ: Иегова тынад примеред вылын Шайтанлэн янгыше уськытонъёсызлы ответ сётыны быгатэ! (Мад. 27:11).

Иегова доры берытскыса, тон солы матэ кариськид. Со но тыныд матэ кариськыны кылзэ сётэ (Иак. 4:8). Зэм но, кенешысь вын-агайёс но сузэр- апайёс шумпото, тон берытскид шуыса. Со туж умой. Нош мар тон понна тужгес но валтӥсез луыны кулэ? Эшшо но золгес яратоно Иеговаез, аслэсьтыд Атайдэ но Эштэ. Ойдолэ эскеромы, мар со понна кароно.

БЫДЭСТЫНЫ ЛУЫМОН УЖПУМЪЁС ПУКТЫ

Малпаськы, кыӵе ужпумъёс тыныд али ас азяд пуктоно луоз. Тон тодӥськод на, дыр, Иегова сярысь валтӥсь зэмлыкъёсты но солэсь вуоно улон сярысь кылсётонзэ. Нош тыныд выльысь христиан улондэ тупатоно, кылсярысь, ялан тодытоно, кенешлэн пумиськонъёсаз ветлоно, озьы ик вын-агайёсын но сузэр-апайёсын дырдэ ортчытъяно. Тани кыӵе ужпумъёс тон ас азяд пуктыны быгатӥськод.

Ӵем вераськы Иеговаен. Тынад Атаед вала: астэ янгыше уськытэмед сэрен, солы вазиськыны тыныд капчи ӧвӧл (Рим. 8:26). Озьы ке но Иегова куре тонэ ялан вӧсяськыны (Рим. 12:12). Вера солы, макем зол тынад потэ соин выльысь эшъяськемед. Андрей тодаз вае: «Мон асме янгыше уськытылӥ но мыным возьыт вал. Нош котьку но, куке мон вӧсяськи, мыным капчигес луылӥз, нош сюлмам каньыллык вал». Тон уд ке тодӥськы, мар сярысь вӧсяськыны, выльысь лыдӟы 50-тӥ но 64-тӥ Псаломъёсты. Отын гожтэмын Давид эксэйлэн вӧсяськонъёсыз, кудӥз ӧпкелиз.

Ялан эскеры Библиез. Та тынэсьтыд оскондэ юнматоз но юрттоз тыныд эшшо но золгес Иеговаез яратыны (Пс. 18:8—12). Филипп вера: «Одӥг дыре мынам осконэ лябӟиз но, мон Иеговаез ӝоже уськытӥ, малы ке шуоно мынам ӧй вал сямы Библиез ялан лыдӟыны но эскерыны. Асме таӵе ик янгышлэсь утён понна, мон кутски Библиез ялан эскерыны». Тон но озьы ик лэсьтыны быгатӥськод. Нош тыныд ас поннад Библиез эскерон понна тупась темаос бырйыны секыт ке, тон юрттэт курыны быгатӥськод эшедлэсь, кудӥзлэн Иеговаен юн кусыпъёсыз.

Выльысь эшъяськы вын-агайёсын но сузэр-апайёсын. Соос, кинъёс кенеше берытскизы, куддыръя сюлмасько, соосты пыкылозы шуыса. Лариса вера: «Мыным туж возьыт вал. Мон малпай, вын-агайёсты но сузэр-апайёсты вӧсь кари шуыса. Та малпанэн мон кема дыр ӵоже улӥ». Но юн оскы: тӧроослэн но мукет христиан муртъёслэн, кудъёсызлэн Иеговаен юн кусыпъёссы, тыныд туж юрттэмзы потэ Иеговаен кусыпъёстэ выльысь тупатыны. (Учкы «Мар карыны быгато тӧроос?» рамкаез.) Соос шумпото, тон берытскид шуыса, но тыныд ваньзэ умойзэ сӥзё! (Мад. 17:17).

Мар юрттоз тыныд кенешлы выльысь матэ луыны? Эн кельты одӥг пумиськонэз но, озьы ик ялан тодыты вын-агайёсын но сузэр-апайёсын ӵош. Малы со туж кулэ? Тани мар вераз Феликс: «Быдэс кенеш мынэсьтым берытскемме возьмаз. Монэ туж шуныт пумитазы. Котькудӥз мыным юрттыны тыршиз валаны, мон нош ик семьялэн ог-люкетэз луисько, Иегова монэ простить кариз но берлань учконо ӧвӧл ни шуыса». (Учкы «Мар карыны быгатӥськод тон?» рамкаез.)

ЭН СЁТСКЫ!

Шайтан тэк уз пукы, куке адӟоз, тон Иеговаен кусыпъёстэ юнматӥськод шуыса (Лука 4:13). Со азьланяз но тон вылэ выль «сильтӧлъёс» лэзьялоз, тонэ лябӟытон понна. Нош тон вань сюлмысьтыд тыршы Иеговаен кусыпъёстэ юнматыны.

Аслаз ыжъёсыз сярысь Иегова вераз: «Ышемзэ утчаса шедьто, йыромемзэ берен ваё, яраё луэмзэ биняло, висисьсэ эмъяло» (Иез. 34:16). Инмар тросэзлы асэныз кусыпъёссэ тупатыны юрттӥз ини. Соин ик юн оскы: Иеговалэн тыныд юрттэмез потэ кусыпъёстэс юнматыны но «сильтӧлъёслы» сётскытэк улыны.

Мар карыны быгато тӧроос?

Тӧроос, тӥляд вань трос луонлыкъёсты юрттыны вын-агайёслы но сузэр-апайёслы, кудъёссэ кенеше выльысь пыртӥзы, соос Иеговаен кусыпъёссэс мед тупатозы шуыса. Тани мар карыны быгатӥськоды тӥ.

Соосты яратӥськоды шуыса оскытэ. Апостол Павел валаз, Коринфысь ӧпкелем агай «укыр бадӟым куректонэн ёртэмын» луыны быгатэ шуыса (2 Кор. 2:7). Солы возьыт вал но солэн мылкыдыз куашкамын вал, луоз. Соин ик Павел кенешез косӥз со агаез простить карыны но буйгатыны. Кенеше берытскем вын-агайёслы но сузэр-апайёслы шӧдыны кулэ, Иегова но огъя оскисьёссы соосты туж ярато шуыса. Соин ик, соослэн мылкыдзы медаз куашка шуыса, соосты ушъялэ но соослы юрттэ.

Соосын ӵош вӧсяське. «Шонер улӥсьлэн сюлмысь вӧсяськемез трос лэсьтыны быгатэ» (Иак. 5:16). Лариса, кудӥз сярысь статьяын вераськиз, шуэ: «Аслам сюлмаськонъёсы но кышканъёсы сярысь мон тӧроослы верай, нош соос монэн ӵош вӧсяськизы. Мон валай, соос мон вылэ уг йыркуръясько шуыса. Соослэн мыным юрттэмзы потэ вал Иеговаен кусыпъёсме тупатыны». Тео агай вера: «Тӧроослэн вӧсяськемзы оскытӥз монэ: Иегова монэ зэмзэ ик яратэ но мынэсьтым умойзэ адӟе, нош уродзэ гинэ уг».

Соослы эшъёс луэ. Соослы, кинъёс кенеше берытскизы, эшъёс кулэ. Джастин, кудӥз тӧро луыса ужа-тырше, таӵе визь-кенеш сётэ: «Ӵемгес соосын ӵош тодытэ но соос доры одно ик куное ветлэ. Соослы туж кулэ эшъёс!» Нош тани мар вера Хенри нимо тӧро: «Тӧроос эшъяськизы ке соосын, кинъёсты кенеше выльысь пыртӥзы, мукет вын-агайёс но сузэр-апайёс соос сямен ик лэсьтыны тыршозы».

Юрттэ соослы ас понназы эскеронъёс ортчытъяны. Эшъёс, кудъёсызлэн Инмарен юн кусыпъёссы, кенеше берытскемъёслы юрттыны быгато, соослэн нош ик Библиез лыдӟыны но эскерыны сямзы мед луоз шуыса. Дарко нимо тӧро вера: «Мыным кельше соослы духовной марӟанъёсты вераны, кудъёссэ ачим шедьтӥ. Озьы мон соослэсь мылкыдзэс ӝутӥсько эскеронъёс ортчытъяны. Нош эшшо мон соослы ӵектӥсько кыӵе ке темаосты ӵош эскерыны». Мукетыз тӧро, Клейтон, вера: «Мон соослэсь мылкыдзэс ӝутӥсько шедьтыны Библиысь учыръёсты адямиос сярысь, кудъёсыз та выллем ик югдуре шедизы, но пусйыны, малы соос дышетскыны быгато».

Соослы возьмасьёс луэ. Соос, кинъёсты выльысь кенеше пыртӥзы, адӟизы, тӥ судьяос кадь вал шуыса. Нош табере соослы адӟыны кулэ, тӥ возьмасьёс луиськоды шуыса (Иер. 23:4). Соосты кылзэ, трос ушъялэ но соосын ӵемгес вераське. Тани мар вера Маркус нимо тӧро со сярысь, кызьы со кенеше пыртэмъёсты юнматэ: «Ми эскериськомы соосын Библиысь малпанъёсты, ушъяськомы соосты но оскытӥськомы, Иегова но, ми но соосын данъяськиськомы шуыса, малы ке шуоно соос туж тыршизы, кенеше берытскон понна. Нош пумиськонмылэн пумаз ми вераськиськомы, ку мукет дыръя пумиськомы».

a Та статьяын нимъёс воштэмын.