Малы милемыз дышетэ Иаковлэн азьпалзэ ивортонэз (1-тӥ люкет)

1, 2. Мар кариз Иаков кулонэз азьын но малы? (Озьы ик учке суредэз.)

АРЛЫДО дыръяз ини Иаков быдэс семьяеныз Ханаанысь Египетэ улыны кошкиз. Со туж шумпотӥз, отын Иосиф пиеныз адӟиськиз но вань нылпиосыз огазе люкаськизы шуыса. Со дырысен 17 ар котыр ортчиз (Ул.-выл. 47:28). Кулонэзлэсь матэктэмзэ шӧдыса, Иаков куриз вань пиоссэ со доры лыктыны. Солэн соослы туж кулэ мае ке верамез потэ вал (Ул.-выл. 49:28).

² Вашкала дыръя семьялэн йырыз кулонэз азьын быдэс семьязэ люка вал но соослы берпуметӥ курон-косонъёс сётэ вал (Ис. 38:1). Кылсярысь, сыӵе пумиськонын со вераны быгатэ вал, кин луоз семьялэн йырыз солэн кулэмез бере.

3. Мае ми тодӥськомы Улон-вылонысь 49:1, 2?

³ Лыдӟе Улон-вылонэз 49:1, 2. Но таиз пумиськон мукет пумиськонъёслэсь пӧртэм вал. Малы? Иаков вал пророк. Святой духлэн валтэмез улсын со пиосызлы вераз, мар луоз соосын но соослэн семьяосынызы азьланяз.

4. Мае ми эскеромы та статьяын? (Озьы ик учке «Иаковлэн семьяез» рамкаез.)

⁴ Та статьяын ми эскеромы, мар вераз Иаков Рувимлы, Симеонлы, Левийлы но Иудалы. Вуоно статьяысь ми тодомы, мар со вераз мукет тямыс пиосызлы. Ми адӟомы, Иаковлэн кылъёсыз пиосызлы гинэ верамын ӧй вал, соос соослэн нылпиоссылы но верамын вал шуыса. Берлогес Иаковлэн пиосызлэсь бадӟым израиль калык кылдӥз. Со калык вылын Иаковлэн азьпалзэ ивортонэз быдэсмиз. Солэн азьпалзэ ивортонэз милемыз но тросэзлы дышетыны быгатэ. Ми эшшо но умой валаломы, кызьы инмысь Атаймес, Иеговаез, шумпотэммы луэ.

РУВИМ

5. Мае Рувим возьма вал, дыр, аслаз атаезлэсь?

⁵ Нырысь Иаков вазиськиз Рувимлы но сое «нырысь вордӥськем пиеныз» нимаз (Ул.-выл. 49:3). Рувим малпаны быгатэ вал, со нырысь вордӥськем пи бере, мукет вынъёсыныз ӵошатыса, атаез солы тросгес ваньбурзэ кельтоз шуыса. Озьы ик со малпаны быгатэ вал, дыр, атаезлэн кулэмез бере со семьялэн йырыз луоз, нош берло, выжыысь выжые, солэн нылпиосыз пӧлысь кин ке но семьялэн йырыз луоз шуыса.

6. Малы Рувим нырысь вордӥськем пи луон правозэ ыштӥз? (Улон-вылон 49:3, 4).

⁶ Но Рувим нырысь вордӥськем пи луон правозэ ыштӥз (1 Пар. 5:1). Малы? Рахильлэн кулэмез бере кӧня ке дыр ортчыса, Рувим азон-калгон сьӧлыке пыриз Валлаен, кудӥз Рахильлэн медо нылыз но Иаковлэн медо кышноез вал (Ул.-выл. 35:19, 22). Малы Рувим ассэ озьы возиз? Оло нош, Валла Рувимлы кельше вал но со кырсь мылпотонъёсызлы сётскиз. Яке Рувим малпа вал, со учыр бере Иаков Валлаез адӟемпотостэм кароз, нош Лия кышнозэ золгес яратоз шуыса. Кызьы гинэ медам луы, солэн ужез Иеговалы но, Иаковлы но юрӟым вал. (Лыдӟе Улон-вылонэз 49:3, 4.)

7. Мар луиз Рувимен но солэн нылпиосыныз? (Озьы ик учке «Иаковлэн азьпалзэ ивортонэз» рамкаез.)

⁷ Иаков Рувимлы шуиз: «Тон ваньзылэсь вылӥын уд ни луы». Озьы ик луиз. Библиын нокытын уг вераськы, Рувимлэн нылпиосыз эксэйёс, священникъёс яке пророкъёс луизы шуыса. Но Иаков пизэ ӧз палэнты но сое номыртэк ӧз кельты. Рувимлэн нылпиосыз Израильлэн выжыез пӧлы пыризы (Иис. Н. 12:6). Валлаен луэм учыр юрӟым вал ке но, берло Рувим сыӵе ужъёсты ноку ӧз лэсьтылы ни. Мукет учыръёсысь адӟиське, солэн умой сямъёсыз но вал шуыса (Ул.-выл. 37:20—22; 42:37).

8. Малы милемыз дышетэ Рувимлэн учырез?

⁸ Малы ми дышетскиськомы. Ваньмылы асьмеды киямы кутоно но азон-калгон сьӧлыклэсь палэнсконо. Сьӧлыке пырыны мылкыдмы ӝутске ке, дугдоно но малпаськоно, макем вӧсь ми каромы Иеговаез, семьямес но мукет адямиосты. Озьы ик вунэтоно ӧвӧл: «Адями мае кизе, сое ик со ара» (Гал. 6:7). Со сяна, Рувимлэн учырез возьматэ, макем Иегова гажась-жалясь. Инмар милемыз янгышъёсмылэн бервылъёссылэсь уг утьы. Озьы ке но, ми ӧпкелимы ке но асьмеды шонер возьыны тыршимы ке, со милемыз простить кароз но бакель кароз.

СИМЕОН НО ЛЕВИЙ

9. Малы Иаковлэн Симеонлы но Левийлы вожез потэмын вал? (Улон-вылон 49:5—7).

⁹ Лыдӟе Улон-вылонэз 49:5—7. Собере Иаков вазиське Симеонлы но Левийлы. Иаковлэн кылъёсысьтыз адӟиське, солэн соослы туж вожез потӥз шуыса. Ханаанын улыкузы, со музъемысь Сӥхем нимо пиосмурт Иаковлэсь Дина нылзэ эриктэмаз. Соин сэрен Иаковлэн вань пиосыз туж ӝоже усизы. Но кыкез, Симеон но Левий, вожпотонзылы сётскизы. Соос Сӥхем карын улӥсьёсты пӧязы но веразы, вандӥськон сямез ортчизы ке, соосын тупаса улозы шуыса. Со карысь пиосмуртъёс соглаш кариськизы. Но, куке соос вандӥськон сямез ортчем бере висё на вал, Симеон но Левий соос вылэ урдскизы. Соос «меч басьтӥзы но кышкатэк город вылэ урдскизы, отысь вань пиосмуртъёсты виылӥзы» (Ул.-выл. 34:25—29).

10. Кызьы быдэсмизы Иаковлэн Симеон но Левий сярысь верам кылъёсыз? (Озьы ик учке «Иаковлэн азьпалзэ ивортонэз» рамкаез.)

¹⁰ Иаковлэн Симеонлы но Левийлы вожез потэ вал, малы ке шуоно соос трос адямиосты виизы. Иаков вераз, соос люкиськозы но быдэс Израильтӥ пазьгиськозы шуыса. Та быдэсмиз, 200 арлэсь тросгес ортчыса, куке израиль калык Сӥзем музъеме пыриз. Симеонлэн выжыезлы сётэмын вал куд-ог каръёс, кудъёсыз Иуда выжылэн музъемаз интыяськемын вал (Иис. Н. 19:1). Нош Левийлы сётэмын вал 48 каръёс, кудъёсыз быдэс Израильын интыяськемын вал (Иис. Н. 21:41).

11. Мар умойзэ лэсьтӥзы Симеонлэн но Левийлэн нылпиоссы?

¹¹ Симеонлэн но Левийлэн нылпиоссы со выллем янгышъёс ӧз лэсьтылэ. Левийлэн выжыез пӧлысь тросэз Иеговалы оскымон ужаз-тыршиз. Куке Моисей Сӥнай гурезь йылэ тубиз, закон басьтон понна, израиль калык пӧлысь тросэз зарни ошпилы йыбыртъяны кутскиз. Берытскемез бере Моисей шуиз: «Кузё-Инмарлэнэз адямиос, лыктэ мон доры!» Вань левитъёс соку ик Моисей котыре люкаськизы но солы юрттӥзы ошпилы йыбыртъясьёсты быдтыны (Пот. 32:26—29). Иегова левитъёсты пуктӥз священникъёс луыса ужаны-тыршыны (Пот. 40:12—15; Лыд. 3:11, 12). Нош, Сӥзем музъемез басьтыку, Симеонлэн выжыез юрттӥз Иудалэн выжыезлы хананей калыкен ожмаськыны. Со Иеговалэн эрикезъя вал (Суд. 1:3, 17).

12. Малы милемыз дышетэ Симеонлэн но Левийлэн учырзы?

¹² Малы ми дышетскиськомы. Вожпотонмылы ноку но сётсконо ӧвӧл. Милемын яке матысь адямиосынымы мукетъёсыз асьсэды шонерлыктэм возё ке, милям кӧтмы ӝож луэ (Пс. 4:5). Но вожпотонмылы сётскимы ке, ми милемыз вӧсь карись адямиез кылъёсынымы яке ужъёсынымы вӧсь каромы. Иеговалы со уз кельшы (Иак. 1:20). Соку кызьы асьмеды возёно, шонерлыктэм ужъёсын пумиськыку? Кин гинэ милемыз вӧсь медам кары, агайёс но сузэръёс яке мукет адямиос, астэ котьку возёно озьы, кызьы дышетэ Библия. Соку кылъёсмы но ужъёсмы нокинэ вӧсь уз каре (Рим. 12:17, 19; 1 Пётр 3:9). Нош тани малы дышетскыны быгато нылпиос. Анай-атаед асьсэды шонертэм возё ке но, тон быгатӥськод астэ мукет сямен возьыны. Эн вунэты: анай-атаед Иеговалы ярамон ӧвӧл ке но, тон быгатӥськод солы ярамон луыны. Тон тыршид ке Инмарез шумпоттыны но астэ шонер возьыны, со тонэ бакель кароз.

ИУДА

13. Малы Иуда сюлмаське вал, дыр, куке атаез солы вазиськиз?

¹³ Собере Иаков вазиськиз Иудалы. Атаезлэсь агайёсызлы верам кылъёссэ кылыса, Иуда сюлмаське вал, дыр. Малы ке шуоно со но кӧня ке бадӟым янгышъёс лэсьтӥз. Кылсярысь, Сӥхем карез таркаку, со но отын вал, дыр (Ул.-выл. 34:27). Озьы ик со вын-агайёсызлы чектӥз Иосифез ляльчи луонэ вузаны но соосын ӵош атайзэ пӧяз (Ул.-выл. 37:27, 31—33). Берлогес Иуда Фамарь кенэныз азон-калгон сьӧлыке пыриз, малы ке шуоно малпаз, со «калгись ныл» шуыса (Ул.-выл. 38:15—18).

14. Мар умойзэ лэсьтӥз Иуда? (Улон-вылон 49:8, 9).

¹⁴ Но Иаков Иудаез ушъяз но кылзэ сётӥз ассэ но нылпиоссэ бакель карыны. (Лыдӟе Улон-вылонэз 49:8, 9.) Малы ке шуоно Иуда арлыдо атаез сярысь сюлмаськиз но Вениамин вынызлы гажан-жалянзэ возьматӥз (Ул.-выл. 44:18, 30—34).

15. Кызьы быдэсмиз Иуда сярысь азьпалзэ ивортон?

¹⁵ Иаков вераз, Иуда вын-агайёсыз пӧлын валтӥсез луоз шуыса. Но та азьпалзэ ивортон, 200 ар котыр ортчыса гинэ, быдэсмыны кутскиз. Куке израиль калык Египетысь потӥз но Сӥзем музъеме луоё кыр дуннеетӥ мынэ вал, Иудалэн выжыез ваньмыз азьын мынэ вал (Лыд. 10:14). Кӧня ке дасо аръёс ортчыса, Сӥзем музъемез басьтыку, хананей калыкен ожмаськыны нырысь ик Иуда мынӥз (Суд. 1:1, 2). Нош Давид вал нырысетӥез трос эксэйёс пӧлысь, кудъёсыз Иуда выжыысь потӥзы но трос сю аръёс ӵоже кивалтӥзы. Но таин та азьпалзэ ивортон пумозяз ӧз быдэсмы.

16. Кызьы быдэсмиз азьпалзэ ивортон, кудӥз гожтэмын Улон-вылонын 49:10? (Озьы ик учке «Иаковлэн азьпалзэ ивортонэз» рамкаез.)

¹⁶ Иаков вераз, Иуда выжыысь Кивалтӥсь потоз шуыса, кудӥз пырак дауръёс ӵоже адямиосын кивалтоз. (Лыдӟе Улон-вылонэз 49:10.) Со Кивалтӥсь — Иисус Христос. Со сярысь кылчин шуиз: «Солы Инмар Кузё-Инмар Давидлэсь, Солэн атаезлэсь, эксэй пуконзэ сётоз» (Лука 1:32, 33). Озьы ик Иисус «Иуда выжыысь лев» шуыса нимаське (Усьт. 5:5).

17. Кызьы Иегова учке ужась-тыршисьёсыз шоры но кызьы ми солэсь адӟем карыны быгатӥськомы?

¹⁷ Малы ми дышетскиськомы. Иегова Иудаез бакель кариз, со бадӟым янгышъёс лэсьтӥз ке но. Иудалэн вын-агайёсыз паймизы вал, дыр, малы солы собыдӟа дан сётэмын. Нош Иегова Иудалэсь умойзэ адӟиз но со понна сое бакель кариз. Кызьы милям Иеговалэсь адӟем кареммы луэ? Кылсярысь, куке кинлы ке нимысьтыз уж сёто, нырысь ми малпаны быгатӥськомы: «Солэн сомында тырмымтэосыз. Кызьы солы сыӵе уж сётӥзы?» Но милемлы тодамы возёно, Иегова адямилэсь умой сямъёссэ дунъя шуыса. Иегова ужась-тыршисьёсызлэсь умойзэ утча. Милемлы но озьы ик кароно.

18. Малы милемлы чидасесь луоно?

¹⁸ Со сяна, ми быгатӥськомы Иудалэсь дышетскыны чидасесь луыны. Иегова кылсётонъёссэ котьку но быдэстэ. Нош кызьы но ку со сое лэсьтэ, милям малпаммылэсь пӧртэм луыны быгатэ. Иуда выжыысь адямиос Инмар калыклэн валтӥсьёсыз соку ик ӧз луэ. Но соос котьку юрттӥськизы соослы, кинъёсты Иегова пуктӥз та ужез быдэстыны: Левий выжыысь Моисейлы, Ефрем выжыысь Иисус Навинлы но Вениамин выжыысь Сауллы. Ойдолэ ми но юрттӥськомы соослы, кинъёсты Иегова пуктӥз аслэсьтыз калыксэ нуыны (Евр. 6:12).

19. Мае ми тодӥмы Иегова сярысь, Иаковлэсь азьпалзэ ивортонзэ эскерыса?

¹⁹ Озьыен, мае ми тодӥмы азьпалзэ ивортонысь, кудзэ вераз Иаков ньыль пиосыз сярысь? Валамон, Инмар адями кадь уг учкы шуыса (1 Экс. 16:7). Иегова туж чидась но простить карыны яратэ. Со сьӧлык шоры синзэ уг ворса. Озьы ке но ужась-тыршисьёсызлэсь сьӧлыктэм луэмзэс уг возьма. Иегова быгатэ бакель карыны соосты но, кинъёс азьвыл бадӟым янгышъёс лэсьтӥзы, но собере вань сюлмысьтызы ӧпкелизы но асьсэды шонер возьыны кутскизы. Вуоно статьяысь ми тодомы, мар вераз Иаков мукет тямыс пиосызлы.