Малы милемыз дышетэ Иаковлэн азьпалзэ ивортонэз (2-тӥ люкет)

1. Мае ми эскеромы та статьяын?

ИАКОВЛЭН пиосыз арлыдо атайзы котырын люкаськизы но сое сак кылзо. Кызьы вераськиз ини кылем статьяын, Рувим, Симеон, Левий но Иуда туж паймизы, вылды, солы, мар соос сярысь атайзы вераз. Соин ик, соослэн тодэмзы потэ, дыр, мар атайзы вералоз мукет тямыс пиосызлы. Ойдолэ эскеромы, малы милемыз дышето Иаковлэн кылъёсыз, кудъёссэ со вераз Завулонлы, Иссахарлы, Данлы, Гадлы, Асирлы, Неффалимлы, Иосифлы но Вениаминлыa.

ЗАВУЛОН

2. Мар вераз Иаков Завулонлы но кызьы быдэсмизы со кылъёс? (Ул.-выл. 49:13). (Озьы ик учке рамкаез.)

² Лыдӟе Улон-вылонэз 49:13. Иаков вера, Завулон зарезь ярдурын улоз шуыса. Кызьы быдэсмизы та кылъёс? 200 арлэсь кемагес ортчыса, Завулонлэн нылпиосызлы Галилей но Быдӟым зарезьёс вискын музъем сётэмын вал. Моисей азьпалзэ тодытыса вераз: «Сюрес вылъёсад шулдыръяськы, Завулон» (К. Зак. 33:18). Та кылъёс возьмато вал, дыр, кык зарезьёс вискын улыса, Завулонлэн пиосыз вуз карыны быгатозы шуыса. Мае гинэ та кылъёс медам возьматэ, Завулон нылпиослэн шумпотыны мугъёссы вал.

3. Мар милемлы юрттоз котьку но шумпотыны?

³ Малы ми дышетскиськомы. Кытын гинэ ми медам улэ, кыӵе гинэ югдурмы милям медам луы, милям котьку шумпотон мугъёсмы вань. Шумпотыса улон понна, шумпотоно солы, мармы милям вань (Пс. 15:6; 23:5). Куддыръя ми малпаськиськомы со сярысь, мармы милям ӧвӧл. Соин сэрен мылкыдмы куашканы быгатэ. Но улонады трос умоез но вань, дыр. Соин ик ас югдурады ӟечсэ адӟыны тырше (Гал. 6:4).

ИССАХАР

4. Мар вераз Иаков Иссахарлы но кызьы быдэсмизы со кылъёс? (Ул.-выл. 49:14, 15). (Озьы ик учке рамкаез.)

⁴ Лыдӟе Улон-вылонэз 49:14, 15. Иаков Иссахарез ушъя тыршыса ужамез понна но сое ӵошатэ кужмо ишакен, кудӥз секыт ныпъетъёсты нуллыны быгатэ. Со сяна, Иаков вера, Иссахарлы туж умой музъем сётэмын луоз шуыса. Кызьы быдэсмизы та кылъёс? Иссахарлэн нылпиосызлы Иордан вӧзысь умой музъем сётэмын вал (Иис. Н. 19:22). Соос туж тыршыса музъем вылын ужазы, вылды. Со сяна, соос, асьсэды жалятэк, мукетъёсызлы юрттӥськизы (3 Экс. 4:7, 17). Кылсярысь, куке Варак судья но азьпалзэ тодытыса верась Девора Сисараен ожмаськыны израиль калыклэсь юрттэт куризы, Иссахарлэн выжыез дась луыса юрттӥськиз. Иссахар выжы мукет ожмаськонъёсы но пыриськылӥз (Суд. 5:15).

5. Малы милемлы тыршыса ужаны кулэ?

⁵ Малы ми дышетскиськомы. Иегова дунъя милесьтым но солы тыршыса ужаммес (Екк. 2:24). Кылсярысь, малпаськомы агайёс сярысь, кудъёсыз кенеш сярысь сюлмасько (1 Тим. 3:1). Валамон, соос зэмос ожмаськонъёсы уг пырисько. Озьы ке но соос, асьсэды жалятэк, Инмарлэсь калыксэ утё ваньмызлэсь, мар Иеговаен кусыпъёссэс лябӟытыны быгатэ (1 Кор. 5:1, 5; Иуда 17—23). Озьы ик соос туж тыршо мылкыдэз ӝутӥсь речьёс дасяны, кудъёсыз агайёсты но сузэръёсты юнмато (1 Тим. 5:17).

ДАН

6. Кыӵе уж сётэмын вал Данлэн выжыезлы? (Улон-вылон 49:17, 18). (Озьы ик учке рамкаез.)

⁶ Лыдӟе Улон-вылонэз 49:17, 18. Иаков Данэз ӵошатӥз кыен, кудӥз уг кышка урдскыны аслэсьтыз бадӟымгес пудо-живот вылэ, кылсярысь, ожмаськон вал вылэ. Данлэн выжыез кышкасьтэм вал. Со котьку дась вал ожмаськыны Израильлэн тушмонъёсыныз. Сӥзем музъеме мыныку, Данлэн выжыез «вань станъёс пӧлысь ваньмызлэсь берло ӝутэмын вал», мукет выжыосты утён понна (Лыд. 10:25). Данлэсь выжызэ тросэз уг адӟо вал ке но, соос туж кулэ ужез быдэсто вал.

7. Мар сярысь тодамы возёно, Иеговалэн организацияз ужъёсты быдэсъяку?

⁷ Малы ми дышетскиськомы. Быдэсъяды-а тӥ куке но кыӵе ке ужез, но, тӥ малпамъя, сое нокин ӧз адӟы? Кылсярысь, тӥ Эксэйлык юртэз утялтон яке эскерон-тупатъян ужъёсы пыриськиды, конгрессын юрттӥськиды яке кыӵе ке мукет ужез быдэсъяды. Тӥ туж кулэ ужез быдэстӥды! Ноку эн вунэтэ: Иегова адӟе но дунъя ваньзэ, мае тӥ со понна лэсьтӥськоды. Солы ужаку-тыршыку, ми мукетъёсызлэсь ушъямзэс ум возьмаське. Ми Иеговалы ужаськомы-тыршиськомы, малы ке шуоно сое вань сюлмысьтымы яратӥськомы. Сыӵе ужам-тыршеммес адӟыса, Иегова шумпотэ (Матф. 6:1—4).

ГАД

8. Малы Гадлэн выжыез вылэ малпамтэ шорысь тушмонъёс урдскыны быгато вал? (Улон-вылон 49:19). (Озьы ик учке рамкаез.)

⁸ Лыдӟе Улон-вылонэз 49:19. Иаков вераз, Гад вылэ таласьёс урдскылозы шуыса. 200 арлэсь кемагес ортчыса, Гад выжылы сётэмын вал музъем, кудӥз интыяськемын вал Иорданлэсь шундыӝужан палан. Со музъем котырын трос тушмонъёс вал. Соин ик Гадлэн выжыез вылэ малпамтэ шорысь тушмонъёс урдскыны быгато вал. Озьы ке но Гад нылпиослэн со музъемын улэмзы потэ вал, малы ке шуоно отын пудо возьман понна умой интыос вал (Лыд. 32:1, 5). Адӟиське, соос кышкасьтэмесь вал шуыса. Озьы ик Гадлэн выжыез оске вал, Иегова соослы музъемзэс таласьёслэсь утьыны юрттоз шуыса. Со сяна, Гадлэн выжыез трос аръёс ӵоже юрттӥз мукет выжыослы Сӥзем музъемлэсь кылем люкетсэ киултыны, кудӥз интыяськемын вал Иорданлэсь шундыпуксён палан (Лыд. 32:16—19). Соос юн оскизы, ожмаськыса ветлыкузы, Иегова кышнооссэс но нылпиоссэс утёз шуыса. Кышкасьтэм луэмез понна Иегова Гадлэсь выжызэ бакель кариз (Иис. Н. 22:1—4).

9. Кыӵе ужъёсмы возьматозы, ми Иеговалы оскиськомы шуыса?

⁹ Малы ми дышетскиськомы. Секыт дыръя Иеговалы ужан-тыршон понна, милемлы со вылэ оскиськыны кулэ (Пс. 36:3). Туннэ тросэз пуктӥськон ужъёсы пырисько, кошко отчы, кытын тодытӥсьёс уг тырмо, яке кызьы ке мукет сямен организацилы юрттӥсько. Соос уг кышкало сыӵе вамыш лэсьтыны, малы ке шуоно оско, Иегова соос сярысь сюлмаськоз шуыса (Пс. 22:1).

АСИР

10. Кызьы быдэсмиз Иаковлэн Асир сярысь азьпалзэ ивортонэз? Мае ӧз лэсьты Асир выжы? (Улон-вылон 49:20). (Озьы ик учке рамкаез.)

¹⁰ Лыдӟе Улон-вылонэз 49:20. Иаков вераз, Асирлэн нылпиосыз узыресь луозы шуыса. Озьы ик луиз. Асирлы сётэм музъем туж умой вал (К. Зак. 33:24). Со интыяськемын вал Быдӟым зарезьлэн ярдурез кузя. Озьы ик солэн музъемез пӧлы пыре вал Сӥдон вузкарон порт. Но Асир ас музъемысьтыз хананей калыкез ӧз улля (Суд. 1:31, 32). Узыр луыса но хананей калык пӧлын улыса, вылды, Асирлэн нылпиосыз Иеговалы ӧжытгес ужаны-тыршыны кутскизы. Кылсярысь, куке Варак судья израиль калыклэсь юрттэт куриз хананей калыкен ожмаськыны, Асир ӧз юрттӥськы. Соин ик та выжы ӧз адӟы, кызьы Иегова «Мегиддонысь ву дурын» паймымон уж лэсьтӥз но калыкезлы вормон кузьмаз (Суд. 5:19—21). Асирлы возьыт вал, дыр, куке Варак но Девора вормон кырӟаназы со сярысь тазьы кырӟазы: «Асир пуке зарезь дурын... каньылак улэ» (Суд. 5:17)

11. Малы коньдон улонамы валтӥсез луыны кулэ ӧвӧл?

¹¹ Малы ми дышетскиськомы. Милям Иеговалы самой умойзэ сётэммы потэ. Соин ик ойдолэ, та дуннеысь адямиос сямен, ум малпалэ, коньдон но ваньбур — улонын валтӥсез шуыса (Мад. 18:12). Ми валаськомы, коньдон кулэ шуыса, но соин сэрен Иеговаен кусыпъёсмы лябӟыны кулэ ӧвӧл (Екк. 7:12; Евр. 13:5). Милям уг поты дырмес но кужыммес быдтэммы, кулэтэм арбериосты басьтон понна. Со интые ми дырмес но кужыммес кутӥськомы, Иеговалы ужан-тыршон понна. Ми тодӥськомы, Иеговалы оскымон луимы ке, азьланяз кышкатэк но шудо уломы шуыса (Пс. 4:9).

НЕФФАЛИМ

12. Мае возьмато вал, дыр, Иаковлэн Неффалим сярысь кылъёсыз? (Улон-вылон 49:21). (Озьы ик учке рамкаез.)

¹² Лыдӟе Улон-вылонэз 49:21, ВД, сноскаысьb. Иаков вераз, Неффалим «туж чебер кылъёс вера» шуыса. Та кылъёс возьмато вал, дыр, кызьы вераськоз Иисус. Музъем вылын ужакуз-тыршыкуз, со трос дырзэ ортчытъяз Капернаумын, «аслаз городаз», кудӥз интыяськемын вал Неффалимлэн музъемаз (Матф. 4:13; 9:1). Мессия сярысь азьпалзэ тодытыса веракуз, Исаия гожтӥз, Завулон но Неффалим «быдӟым югытэз» адӟозы шуыса (Ис. 9:1, 2). Зэм но, Иисус, самой умой Дышетӥсь, «зэмос Югыт» вал, кудӥз «дуннее лыктэ но котькудзэ адямиез югдытэ» (Иоанн 1:9; 7:46).

13. Мар кароно, верам кылъёсынымы Иеговаез шумпоттон понна?

¹³ Малы ми дышетскиськомы. Иегова чакла, мае ми вераськомы но кызьы. Мар юрттоз «туж чебер кылъёс» вераны, кудъёсыз Иеговаез шумпоттозы? Нырысетӥез, эн пӧяське (Пс. 14:1, 2). Кыкетӥез, тырше верам кылъёсыныды мукетъёсты юнматыны — ӵемгес соосты ушъялэ, шергес тэргалэ но ӧжытгес ӝожтӥське (Еф. 4:29). Со сяна, ужпум пуктыны луэ адямиосын огшоры вераськонъёс кутскыны, тупась учыр кылдыку, соослы Иегова сярысь веран понна.

ИОСИФ

14. Кызьы быдэсмиз Иаковлэн Иосиф сярысь азьпалзэ ивортонэз? (Улон-вылон 49:22, 26). (Озьы ик учке рамкаез.)

¹⁴ Лыдӟе Улон-вылонэз 49:22, ВД, сноскаысьc, но Улон-вылонэз 49:26. Иосиф Иаковлэн яратоно кышноезлэн, Рахильлэн, нырысетӥ пиез вал. Иаков сое «емыш сётӥсь писпулэн ваеныз» нимаз. Ачиз Иаков «писпу» вал, нош Иосиф — солэн «ваез». Иаков туж данъяське вал, вылды, Иосифен, «агай-вынъёс пӧлысь быръемен». Иаков шуиз, Сӥзем музъемын Иосифлы, Рувим интые, кык люкет сётэмын луоз шуыса (Ул.-выл. 48:5, 6; 1 Пар. 5:1, 2). Кызьы быдэсмиз та азьпалзэ ивортон? Иосифлэн пиосызлэсь, Ефремлэсь но Манассиялэсь, кык выжы кылдӥз. Котькудӥзлы Сӥзем музъемын люкет сётэмын вал (Ул.-выл. 49:25; Иис. Н. 14:4).

15. Кызьы ассэ возиз Иосиф, шонерлыктэм ужъёсын пумиськыкуз?

¹⁵ Озьы ик Иаков вера пукыӵен ыбылӥськисьёс сярысь, кудъёсыз «[Иосифлэн] шораз ыбылӥзы, соин тушмонъяськыса улӥзы» (Ул.-выл. 49:23). Со вал Иосифлэн вожъяськись агайёсыз. Соос соин асьсэды шонерлыктэм возизы, соин ик Иосиф трос курадӟонъёсын пумиськоно луиз. Но Иосиф агайёсызлы вожзэ поттыса ӧз улы но вань шуг-секытъёсыз понна Иеговаез янгыше ӧз уськыты. Иаковлэн верамезъя, «[Иосифлэн] пукыӵез но, киызлэн суйбыгытъёсыз но юн куен кылизы» (Ул.-выл. 49:24). Иосиф котьку но Иегова вылэ оскиськиз. Со агайёссэ простить кариз, озьы ик соосын ассэ ӟеч возиз (Ул.-выл. 47:11, 12). Иосифлэн агайёсыз соин тушмонъяськизы ке но, со соослы гажан-жалянзэ но яратонзэ возьматӥз. Иосиф шуг-секытъёслы лэзиз сое сузяны-чылкытатыны, яке сое умойгес карыны (Пс. 104:17—19). Соин ик Иегова Иосифез кутӥз, туж бадӟым ужъёсты быдэстон понна.

16. Кызьы шуг-секытъёс дыръя милям Иосифлэсь адӟем кареммы луэ?

¹⁶ Малы ми дышетскиськомы. Эн лэзе шуг-секытъёслы Иеговаен, озьы ик агайёсын но сузэръёсын кусыпъёстэс лябӟытыны. Эн вунэтэ: шуг-секытъёс дыръя Иегова милемыз малы ке но дышетыны быгатэ (Евр. 12:7). Секыт дыръя милям христиан сямъёсмес умоятэммы луэ. Кылсярысь, ми быгатӥськомы эшшо но гажась-жалясесь но простить карисесь луыны (Евр. 12:11). Милям оскеммы луэ, Иосифез сямен, Иегова милемыз но юн луэммы понна бакель кароз шуыса.

ВЕНИАМИН

17. Кызьы быдэсмиз Вениамин сярысь азьпалзэ ивортон? (Улон-вылон 49:27). (Озьы ик учке рамкаез.)

¹⁷ Лыдӟе Улон-вылонэз 49:27. Иаков Вениаминэз ӵошатӥз кионэн. Озьы со возьматӥз, Вениамин выжыысь адямиос умой ожгарчиос луозы шуыса (Суд. 20:15, 16; 1 Пар. 12:2). Израиль Эксэйлыкын нырысетӥ эксэй луиз Саул, кудӥз Вениамин выжыысь потэмын вал. Со кышкатэк филистим калыкен ожмаськиз. Вераны луоз, со «ӵукна» луиз, малы ке шуоно Израиль Эксэйлык али гинэ кылдэмын вал (1 Экс. 9:15—17, 21). Нош трос аръёс ортчыса, «ӝыт», Есфирь эксэй кышно но Мардохей, кудъёсыз Вениамин выжыысь потэмын вал, израиль калыкез быронлэсь утизы (Есф. 2:5—7; 8:3; 10:3).

18. Кызьы ми, Вениамин выжы сямен, оскымонэсь луыны быгатӥськомы?

¹⁸ Малы ми дышетскиськомы. Вениамин выжыысь адямиос туж данъясько вал, дыр, соослэн выжыысьтызы адями Израильлэн эксэез луиз шуыса. Но берлогес Иегова эксэе пуктӥз Иуда выжыысь Давидэз. Вениамин выжы соку ик Давид пала ӧз кариськы ке но, берлогес соос со пала султӥзы (2 Экс. 3:17—19). Трос аръёс ортчыса, куке дас выжыос бугыръяськыны кутскизы, Вениамин выжы Иуда выжылы но Иеговаен пуктэм эксэйлы оскымон кылиз (3 Экс. 11:31, 32; 12:19, 21). Ойдолэ ми но оскымонэсь луомы соослы, кинъёсты Иегова туннэ пуктӥз аслаз калыкез понна сюлмаськыны (1 Фес. 5:12).

19. Кыӵе милемлы пайда вайиз Иаковлэсь азьпалзэ ивортонзэ эскерон?

¹⁹ Кызьы ми адӟимы, Иаковлэн кулонэз азьын сётэм азьпалзэ ивортон милемыз тросэзлы дышетыны быгатэ. Куке ми эскеримы, кызьы со быдэсмиз, милям осконмы юнмаз, Иегова кылсётонъёссэ быдэстоз шуыса. Куке ми адӟимы, кызьы котькуд выжы бакель каремын вал, ми эшшо но умой валамы, кызьы Иеговаез шумпоттоно.